38. यीशु को पकड़वायो जानो

हर साल, यहूदी लोग फसह को त्योहार मनात होतीन। यो एके बारे में एक त्योहार होतीस कि हजारो साल पहले परमेश्वर ने हुनके दादा-पडदादानाऊन को मिस्र के गुलामी से छुड़ाइस होतीस। लगभग तीन साल के बाद यीशु ने खुले जागा में प्रचार करनो अऊर शिक्षा देनो शुरू करीस। यीशु ने अपने चेलानाऊन को बताइस कि हु हुनके संग यरूशलेम में फसह को त्योहार मनानो चाहते, अऊर यो भी कि हु वहाँ पे मार डालो जाए।

यीशु के चेलानाऊन में से एक यहूदा नाम को मानुष होतीस। यहूदा प्रेरितानाऊन के धन की थैली रखन वालो भंडारी होतीस, पर हु हमेशा वा थैली में से पैसे निकाल लियों करत होतीस। यीशु अऊर ओके चेलानाऊन के यरूशलेम में पहुँचन के बाद यहूदा यहूदी अगुवानाऊन के जवर गइस। ओने धन के बदला में यीशु को पकड़वान का प्रस्ताव रखीस। हु जानत होतीस कि यहूदी अगुवा ओको ग्रहण नी करत होतीन कि यीशु च मसीह होतीस। हु जानत होतीस कि ही ओको मार डालनो चाहत होतीन।

महायाजक के कहन पे यहूदी अगुवानाऊन ने यीशु को हुनके हाथ में पकड़वान के गुना यहूदा को तीस चाँदी के सिक्का देइन। यो वा तरीका से भइस जसो कि भविष्यद्वक्तानाऊन ने कहे होतीन कि हु होये। यहूदा मान गइस अऊर हु धन जी लेयके चलो गइस। हु यीशु को पकडवान के गुना हुनकी मदत करन के गुना कोइ मौका ढूढन लगीस।

यरूशलेम में, यीशु ने अपने चेलों के साथ फसह का त्योहार मनाइस। फसह के जेवन के समय, यीशु ने रोटी लेयके तोड़ीस। ओने कहीस, "एको लेव अऊर खाओ। यो मोरो शरीर आय जो मय तुमारे गुना देतम। एको मोरी याद में करने।" या तरिका से, यीशु ने कहीस कि हु हुनके गुना मर जाये, मतलब हुनके गुना हु अपने शरीर को बलिदान कर देहे।

फिर यीशु ने एक दाखरस को प्याला लेइस अऊर कहिस, "एको पी लेव। या नई वाचा को मोरो खून आय जो कि मय उंडेलूँ ताकि परमेश्वर तुमारे पापनाऊन को माफ़ करे। हर बार एको पीते समय मोरी याद में एको करो जो मय अभी कर रहे हम।"

फिर यीशु ने अपने चेलानाऊन से कहिस, "तुमारे में से एक जन मोको पकड़वाए।" तब चेला चकित भइन, अऊर पूछन लगीन कि हु कोन आय जो असो काम करे। यीशु ने कहिस, "मेरा पकड़वाने वाला मानुष हु आय जेके मय या रोटी को टुकड़ा देतम।" तब ओने वा रोटी यहूदा को देइस।

वा रोटी लेन के बाद, यहूदा में शैतान समा गइस। यहूदा निकलके यीशु को पकडवान के गुना यहूदी अगुवानाऊन की मदत करन को चलो गइस। हु रात को समय होतीस।

जेवन के बाद, यीशु अऊर ओके चेलनाऊन जैतून के पहाड़ी पे चले गइन। यीशु ने कहिस, "तुम सप्पाई आज रात मोको छोड़ देवो। यो लिखो हय कि, 'मय चरवाहानाऊन को मारूँ अऊर सप्पाई मेढ़ानाऊन तितर-बितर हो जाये।'"

पतरस ने उत्तर देइस, "भले ही बाकी के सप्पाई तोको छोड़ देहेत, पर मय नी छोड़ूँ!" तब यीशु ने पतरस से कहिस, "शैतान तुम सप्पाई को ले लेना चाहते, पर हे पतरस, मयने तोरे गुना प्रार्थना करेम हम कि तू विश्वास से भटक न जाये। फिर भी, आज की रात, कुकड़ा के बाँग देन से पहले तू तीन बार इंकार करबेन कि तू मोको जानस भी नी करके।"

तब पतरस ने यीशु से कहिस, "भले ही मय मर भी जाऊँ, पर मय कभी भी तेरो इनकार नी करूँ!" बाकी के सप्पाई चेलानाऊन ने भी योच कहिन।

तब यीशु अपने चेलानाऊन के संग गतसमनी नाम के जागा पे गइस। यीशु ने अपने चेलानाऊन से प्रार्थना करन के गुना कहिस ताकि शैतान हुनकी परीक्षा नी करे पाइजे। तब यीशु खुद भी प्रार्थना करन के गुना चलो गइस।

यीशु ने तीन बार प्रार्थना करीस कि, "हे मोरे बाप, अगर हो सके हो तो दया करके यो दुःख को प्याला पीन के गुना मोको मत दे। पर अगर लोगनाऊन के पाप माफ़ करे जान के गुना कोई अऊर दूसरा रास्ता निय्या, तो फिर भी तोरी च इच्छा पूरी होये पाइजे।" यीशु बहुत दुखी होतीस अऊर ओको पछीना खून की बूँद के सारखो होतीस। ओको सामर्थ देन के गुना परमेश्वर ने एक स्वर्गदूत को भेजिस।

हर बार प्रार्थना करन के बाद, यीशु अपने चेलानाऊन के जवर वापस आइस, पर ही सो गइतीन। जब यीशु तीसरी बार लौटीस तो यीशु ने कहिस, "जाग जाओ! मोको पकड़वान वालो यहाँ हय।"

यहूदी अगुवानाऊन, सैनिकनाऊन, अऊर एक बड़ी गर्दी के संग यहूदा आइस। हुनने तलवार अऊर लाठी लेये होतीन। यहूदा ने यीशु के जवर आयके ओके से कहिस, "हे गुरु, नमस्कार," अऊर ओको चूम्मा लेइस। ओने पकद्वान वाले मानुष को यहूदी अगुवानाऊन पे प्रकट करन के गुना असो करे होतीस। फिर यीशु ने कहिस, "हे यहूदा, का तू एक चुम्मा लेके मोको पकड़वा रहेसस?"

जब ही सैनिक यीशु को पकड़त होतीन, तो पतरस ने अपनी तलवार निकालीस अऊर महायाजक को एक सेवक को कान काट देइस। यीशु ने कहिस, "तलवार को हटा ले! मय अपने बाप से मोको बचान के गुना स्वर्गदूतनाऊन की एक सेना को भेजन के गुना बिनती कर सकतम। पर मोको मोरे बाप की बात माननो हय।" फिर यीशु ने हु मानुष के कान को सही कर देइस। तब सप्पाई चेलानाऊन भग गइन।