34. यीशु होरनियां कहानियां केरी शिक्षा दींता- कहानी

यीशु मसीह परमेश्वरेरै राज्यरै बारै मझ होरी बि बड़ी कहानी शुणांई। उदाहरणेरै तेईनी तेनि बोलु, “परमेश्वरैरा राज्य एकि राईरै बीआ सैयि आ जै कुनिक्यै अपड़ी पट्टी मझ बा दित्तु। तुहां पता कि राईरू बी सारा बीआ मझ सभनियां हल्कु आ।”

“पण जेख्णी राईरू बी मोटि गांहथु ता सै बगीचै मझ सारा बुट्टा मझ सभनियां बड्डु भौ गांहथु, यौउतु बड्डु कि पक्षी आईछी करी तैसेरी डाईया पनि आराम कातै।”

यीशु अक होरी कहानी शुणाय, “परमेश्वरैरा राज्य खमीरा सैयि आ जैस अंणि करि अक जनानी अट्टु मझ मिला दींति जां फिरी सै सारू अट्टु मझ फैली गांहथा।”

स्वर्गैरा राज्य तैस खजाने सैयि आ जै कुनिक्यै पट्टी मझ छपा दित्ता। कौसक्यै होरै मैहणु सैक्या खजाना मैयि गिया जां तेनि तैस हासिल कांनेरी बड़ी ईच्छा की। ऐठणीरै तेईनी तेनि सै फिरी दबि छडा। सैक्या यौउता खुश थ्या कि तेनि गहि करि अपड़ु सभ किछ बैचि दित्तु ताकि सैक्या तैस पट्टी खरीदि सकिया जेठि सैक्या खजाना थ्या।”

“स्वर्गैरा राज्य एकि बड़ै कीमती शुद्ध मोतिरै समान बि आ। जेख्णी कौ मोतिरा व्यापारी तैस हासिल करि लींता ता सै तैस खरीदणेरै तेईनी अपड़ु सभ किछ बैचि दींता।”

तैठि किछ मैहणु थियै जै सोचींथ्यै कि परमेश्वर तैन्हां ऐठणीरे तेईनी स्वीकार करैला कि सैक्यै भलै कंम कातै अतै। ऐक्यै मैहणु तैन्हां मैहणुवां तुच्छ समझींथ्यै जै ऐन्हां कंमा ना करींथ्यै। ऐठणीरै तेईनी यीशु तैन्हांनि ऐकैई कहानी शुणांय: “दो मड़द थ्यै जां दोईयो प्रार्थना कांनेरै तेईनी मंदरा गियै। तैन्हां मझां अक चुंगी लींणार थ्या जां दुवां धार्मिक अगुवा थ्या।”

“तेनि धार्मिक अगुवे ऐकैई प्रार्थना की कि, “हे परमेश्वर, तिंडा धन्यवाद भुईया कि आंउ होरनियां मैहणुवां सेयि डाकू, अन्याय कांनार मैहणु, जां व्याभिचारी जां यो तेईनी कि ऐठि बेठौरै ऐस चुंगी लींणारै सैयि अक पापी ना।”

“उदाहरणेरै तेईनी, आंउ हर हफ्तै दो बारी उपवास रखता, जां जै मूंनि धन जां समान मेईंता तेठणीरा दसुवां हिस्सा ताउनि दींता।”

“पण सैक्या चुंगी लींणै बा तैस धार्मिक अगुवे किना बड़ा दूर खड़ा भौ गिया। तेनि स्वर्गा धेरै हैरू बि ना। ऐठणीरी बजाए, तेनि अपड़ि मुट्ठि ला अपड़ि छाति पिट्टी जां प्रार्थना की, ‘हे परमेश्वर, कृपा करि करी मूं पनि दया कर केईनी आंउ अक पापी आ।’”

फिरी यीशु बोलु, “आंउ तुहां सिंउ सच बौलता, परमेश्वरै तैस चुंगी लींणै बाऐरी प्रार्थना शुणी जां सैक्या धर्मी घोषित केया। पण तेनि तैस धार्मिक अगुवेरी प्रार्थना पसंद ना की। परमेश्वरा हरेक घमंडिरू शिर झुकांणु, पण तैस हर तैस मैहणुनि आदर दींणा जै अपांणा नम्र काता।”