37. यीशु लाजर जा सिचिम कू खचि स टांगद कस्युंगस,

लाजर मिन ग तिग मि निस| उग निस्यी पूस्या निस जइग मिन मरियम ची मार्था निस| उसी जम्मा यीशु गै बुद स्यासि निस तीज्या, खमी सै यीशु जा बतास कि लाजर मत्त कांगत निस| हंग यीशु सै हिदि यन्स ता उस ल्यैस, “हिदि रोग लाजर गै सिचिम गै दंची मुनीय| हिदिस परमेश्वर गै आदर गै दंची अनि|

यीशु आफिग सिस्या मंग जा बुदतैग, हंग जइ बं उ निस अतकू उस निज्या वास रिहनचिस| अति निज्या गै निमफन, उस आफिग चेलों मंग जा ल्यैस, रनि थोकसिग यहूदिया दिम|” चेलों मंग सै जबाब दास, “ हंग हे रीथि इता दूमा ज्या लरी अतकू ची मि मंग गजा सतिम दंची तेग निस!” यीशु सै ल्यैस, “ इंग सिस्या लाजर लयकत अनि, हंग जीजा उजा रची ल्हैम अनि|”

यीशु गै चेलों मंग सै जबाब दास, “हे प्रभु, लाजर लयकत निस, ता उ बुद ल्हैयंग|” हंग यीशु सै उसीजा साफ मन स कल्यैसिद, “लाजर पझयंगस| जी खुशी इय कि जी अतकू मुनियस खस्युंग कि गनी जीजा विश्वास स्युंग तरयंगन्न|”

हंग यीशु लाजर गै सोंग टोनभस ता लाजर सिचिग पी ज्या कल्त निस| मार्था यीशु जा छिम दंची छंगपंग रास हंग ल्यैस, “हे प्रभु, गै हिदा ल्हैम च्यंग जिग पी मुसिचिद ल्है| हंग जी विश्वास स्युंगतो कि खरी ल्हैम च्यंग री गै परमेश्वर जा थोमच्यंग उ गजा दायंग|”

यीशु सै जबाब दास, “पुनरुत्थान (सिचिम कू खचि टँगद लीच्च्) हंग जीवन जी ल्हिय| जइ खमी जीजा विश्वास स्युंगता उ सिचिम च्यंग री हजू टांगयंग| जइ खमी जीजा विश्वास स्युंगता उ खज्या री मुसिचियंग| खै गै हिदि जा स्युंगतन?” मार्था सै जबाब दास, “हे प्रभु, जी विश्वास स्युंगता कि गै परमेश्वर ग सिरी मसीह ल्हैन|

हंग मरियम रास, उस यीशु ग लिकी कू करचिग ल्यैस, “हे प्रभु गै हिदूंग ल्हैम च्यंग ता जिग पी मुसिचिस| “यीशु सै उजा रूस, “ गस लाजर जा उलो तानस?” उसिस उजा बतास, “कब्र कू| राय हंग ओंगयो|” हंग यीशु तीग नि|

अति कब्र तिग फू निस जइग मोरोंग कू तिग ऊँग चांगतिन्नस| हंग यीशु कब्र कू टोनभस ता उस उसीजा ल्यैस, “ऊँग जा आंग्तनि|” हंग मार्था सै ल्यैस, “उजा पझयंगद पी ज्या कल्च| उजा खचि थन लताग नियंग|”

यीशु सै जबाब दास, “खै जिस गनीजा मुल्हैगस कि गनी जीजा विश्वास स्युंगनि ता परमेश्वर गै सामर्थ्य तियंगनी?” हिना दंची उसिस ऊँग कआंगतिन्नस|

हंग यीशु सै थू स्वर्ग ओंगचिग ल्यैस, “हे बूबा, जिग यन्म दंची जी नग धन्यवाद ल्हैग तातू| जीजा पत्तो अनि| कि गै राज्यारी जिग यन्नो, हंग जिस हिदि हिदूंग टांगयबत जम्मा मि मंग ग सार सहायता साथो स्युंगम दंची ल्यैता कि हिदि मंग विश्वास स्युंगनि कि गस जीजा थिरन्नस|” हंग यीशु सै हार स्युंगस| “ हे लाजर, छंगपंग रा!”

हिना दंची लाजर छंगपंग वोन रास! उ इतारी कातरी कू कघिसिद निस| यीशु सै उजा ल्यैस, “हिदि कातरी जा फरम कू उग साथो स्युंगयो हंग उजा आजाद स्युंगयो| “हिदि चमत्कार गै कारण मत्त स यहूदियों मंग सै यीशु जा विश्वास स्युंगन्नस|

हंग यहूदियों गै धार्मिक प्रधान मंग यीशु स डासिन्नस, हिना दंची उसी योजना बनाम दंची तिग जरू तीक्क कल्त निन्नस कि हना यीशु हंग लाजर जा पझयंगम ना निस|