45. स्तिफनुस अज्यु फिलिप्पुस।

तुकतू मसीही प्रधान कु घुन्दा रु स्तिफनुस मुड़ं कु ताकु हुरासीरी निजु। बिर मी इदुकु जैनु खी निजु। शुद्ध लेमे सु इदु दलना शक्ति अज्यु बुद्वि दासु कि। स्तिफनुस सु दलना सु चमत्कार किघानिजु। जब इदसु यीशु रु भरोसा घामु कु बारी रु उइजो ज्ञान दासु दलना सु मिजन सु विश्‍वाश घासु।

ताकु ज्या स्तिफनुस यीशु कु बारी रु ज्ञान दा निजु अज्यु अल्या यहूदी राजु खमरी ले यीशु रु विश्‍वाश मुघासु अज्यु इदु ताकु खिजु रकसा फासीमु शुरु घासु। उई दलना रिस रु निजु इदु हन्दु इदु यहूदी धार्मिक प्रधान कु लगान्दी राजु अज्यु इदु कु बारी आ लाजु। उइसु लिजु निड़ं सु स्तिफनुस कु मूसा अज्यु परमेश्‍वर कु बारी रु यानु काडंथे फामु यनसु। इदु हन्दु यहूदी धार्मिक प्रधान सु स्तिफनुस जो कुचुमजु अज्यु यहूदी पुनु पुजारी अज्यु यहूदियो कु खिजु प्रधान लगान्दी रेलन राजु। अज्यु उइसु स्तिफनुस कु बारी रु आ लाजु।

यहूदी पुनु पुजारी सु स्तिफनुस जो रुजु खा अनमा मी घेघु बारी रु हुचना ली निजु कि स्तिफनुस सु यहूदी पुनु पुजारी जवाब दामु हन्दु दलना सु काडंथे फामु शुरु घासु। इदसु लिसु कि अब्राहम कु ज्या सु यीशु कु ज्या होना परमेश्‍वर सु इस्त्राएल मीजन हन्दु दलना सु जेनु लन घासु। खलन कि मीजन सु तुकतू सु ना परमेश्‍वर जो मुमानिजु। स्तिफनुस सु लिजु घनी जन परमेश्‍वर कु खिलाफ दाकछुनु अज्यु परमेश्‍वर कु काड़ंथे मुमानेजु। घनसु तुकतू र्खचु शुद्ध लेमे जेनु मुखिजु ,घमुरी ले निडं हुइनू मीजन तुकतू र्खचु शुद्ध लेमे जेनु मुखिजु अज्यु तुकतू सु ना इदु भविष्य पेनु मी जो सेदुसु। खलन जो उइसु घासु उइकु बराबर रु घनी अज्यु ले दलना यानु घादनी। घनसु मसीह जो सेदन्सु।

जब उइ यहूदी धार्मिक प्रधान सु अनमा यनसु ,ते अलाडं रिस पिरा निजु इदसु अफी रजु बंद किघा निजु अज्यु दलना हरतलन सु ढालन। इदु स्तिफनुस ज सिलन सु भाड़ं सु कुरलन बघरु दिजु। अज्यु इदु सेदमु हन्दु इदरु उड़ं कमसु।

जब स्तिफनुस सिजी निजु ,इदु हरतेलन सु रिजुसू ,है यीशु जीकु लेमे कुरा ,,तब इदु अफी कुबटो रु किघेदिजु अज्यु सु हरतेलन है प्रभु अनमा पाप इदरु मुलघेमु। तब इदु किसीजु।

इदु ज्या यरुशलेम सुडंनु जन दलना मिजन यीशु कु नोगोन्दी दीमु मीजन सतेमु शुरु घासु , इदु हन्दु विश्‍वाश मी जन खिजु भाड़ंरु फुडंलन ताजु। खलन अन्दु कु बाद ले घुबरी ले भाड़ं इदु दिसु , उइसु यीशु कु बारी रु प्रचार घासु।

फिलिप्पुस मुड़ं कु यीशु कु ताकु विश्‍वाशी निजु। घुमरी ले खिचु दलना सु विश्‍वाश घासु इदु ले यरुशलेम सु फुडंलन ताजु। इदु सामरिया कु भाडं रु ताजु। इदडं मीजन सु यीशु कु बारी रु प्रचार घासु दलना मी सु इदरु विश्‍वाश घासु अज्यु पापी कु माफ ताड़ंसु। ताकु ज्या फिलिप्पुस कु लगान्दी परमेश्‍वर कु इदु खर्चु ताकु थो लोग र्खचु राजु अज्यु इदसु सेरु दीमु हन्दु अज्यु ताकु रोठ रु दिमु हन्दु लिसु। फिलिप्पुस इदड़ं ताजु। ते इदु रोठ रु दी निजु इदसु ताकु मी अफी रथ रु दिनु ताड़ंसु। अनमा मी कूशी देश कु ताकु दलना पुनु अधिकारी निजु। शुद्ध लेमे सु फिलिप्पुस सु लिसु कि दिलन इदु मी कु साथु साथु दिन्या।

इदु हन्दु फिलिप्पुस रथ कु लगान्दी दिसु। इदसु यनसु कि इदु कूषी परमेश्‍वर कु वचन जो लु निजु। जो यषायाह भविष्य पेनु मी सु किरी निजु इदु लु निजु। इदु लु निजु ,इदु उइजो बली घामु हन्दु मला मा घरतु चुमलन पुकुरसु अनमा। अज्यु घबरी ताकु पाठो शान्त लि निजु,इदसु ताकु शब्द मुलिसु। उइसु उइजो साथु यानु काड़ंथे घासु अज्यु इदकु आदर मुघासु। उइसु उइकु किसेदिसु।

फिलिप्पुस सु इदु कूशी जो रुसु ,जो घे लुदंन खा घे इदु घे पेदन खा, इदु कूशी सु जवाब दासु महा जब होना घुबरी अन्दु जी मुसमंझी लो ते होना जी अन्दु मुसमझी तरनी। विनती नीनी जिकु लगान्दी सुडां। यषायाह अन्दु बारी रु रीनिजु कि या घुबरी अज्यु कु बारी रु।

फिलिप्पुस रथ रु कुसुयजु। तब इदसु इदु कूशी मीजन इदु काड़ंथे यषायाह सु यीशु कु बारी रु किरि निजु। फिलिप्पुस सु परमेश्‍वर कु बोली रु दलना सु खिजु हिस्सा रु काड़ंथे घासु। अनमा घालन इदु सु इदु मी यीशु कु बारी रु जेनु फुड़ं यनसु।

फिलिप्पुस अज्यु इदु कूशी दिलन ती कु लगान्दी राजु। इदु कूशी जो लेसु , "धो ,ती नीनी खा ,जी शुद्ध ढुबकी कुर तरसा खा ?" अज्यु इदसु रथ चनेमु मी रथ रोकमु हन्दु लिसु।

इदु रु ती रु ताजु ,अज्यु फिलिप्पुस इदु कूशी जो शुद्ध ढुबकी दासु। जब इदु ती रु सु बाड़ंरु राजु शुद्ध लेमे अचानकसु फिलिप्पुस जो रीजन खिजु भड़ं रु पुकरसु। इदोडं फिलिप्पुस सु मिजन जो यीशु कु बारी बतेमु लिसु।

इदु कूशी अफी सुड़ंरु कु यात्रा रु तुकतू ताजु। जेनु खि निजु इदु थन यीशु पे निजु।