50. यीशु थोकते रानी।

लगभग 2000 ना साफा हिड़ं सु संसार रु बिर भड़ं रु दल सु दल मीजन मसीह यीशु कु बारी रु जेनु फुड़ं यन निजु। कलीसिया किबेडे निजु। यीशु सु वादा घासु कि इदु संसार कु लास्ट रु थोकते रायाड़ं। खलन इदु इता थोकते मुराजु ते इदु अफी वादा पुरा घालो।

जब कि निड़ं यीशु कु थोकते रानु कु इंताजार घालन , परमेश्‍वर चिड़ंनी जी इदु हन्दु जीवन टाड़ंमु नीनी जो शुद्ध निनि अज्यु जो इदकु इज्जत घादा ली। जब यीशु धरती सुड़ं निजु इदसु रिदु जिकु चेले संसार भर रु बिर संसार कु मीजन जो परमेश्‍वर कु राज्य कु बारी रु जेनु फुड़ं प्रचार घाघदा ,तब इलाडं वक्त अंत रायड़ं।

दलना सु जाती सु इता हुना यीशु कु बारी मुयनसु ली। थो लोक थोकते दिमु झायड़ं तुकतू यीशु सु मसीह जन जो इदु मी कु जेनु फुड़ं सुनेमु हन्दु लिसु। उइसु अन्दु सु खजारी मियनसु ली। इदसु लिसु दिनी अज्यु बिर जाती मीजन जो चेले बनेमु। अज्यु झमु हन्दु री रु कुमजू ली।

यीशु सु अनमा लिसु , घुबरी ले दास अफी मालिक पुनु मुलेनु। अन्दु संसार कु खास मीजन सु जीजो रीस घासु , अज्यु जीकु कारण सु इदु घनी सतेसु अज्यु सेदडंदा। अन्दु संसार रु घनी सतेजु नीनी , खलन कि सारु लीनी ,खलन कि जिसु शीनु हरे दिसु जो संसार रु राज घादा ली। अनमा घनी लास्ट होना जीरु विश्‍वाश घामु मी बनेमु , ते परमेश्‍वर घनी बचेडंदा।

यीशु सु अफी चेले कु अनमा समझमे हन्दु ताकु कथा बतेसु जब संसार कु अंत निनि ते मी कु साथु खा लयड़ं। इदसु लिसु घुबरी ले मी सु अफी री रु जेनु पिजे हिबाड़ंदा। जब इदु किया निजु ते उइकु बेरी राजु अज्यु रीजे कु पीजे कु घुन्दा रु सीरु कु सिड़ं कु घुदा रु किहेदसु , अज्यु थन ताजु।

जब सिड़ं ढोजु ते सेवा घानु इदु मी जो लिसु हे स्वामी घेसु अफी री रु जेनु पिजे किहिबी निजु। ते अन्दु सेरु सिड़ं खलन निनि। इदु मी सु जवाब दासु ताकुचना जिकु बेरी उइ हिमु चिहनी। अन्दु जिकु घुबरी ले बेरी ले घुबरी सु अनमा घासु।

इदु सेवक सु अफी स्वामी जो जवाब दासु सेरु कु सिडं फोमु चियहन। इदु स्वामी सु लिसु महा। अनमा घनी अनमा घाजे ते घनी अल्या रीजे ले फोदाड़ंनी। जबलड़ं जमु कु ज्या होना रुड़ंजम पड़ंयड़ं। तब सेरु सिड़ं सिडं थुमलन तादनी खलन घनी ची तरसनी। खलन कि रिजे जिकु गोठ रेलन योनी।

चेले सु अन्दु कु कथा कु मतलब मुसमजेसु ,इदु हन्दु उइसु यीशु सु उइजो समझमे हन्दु कोशिश घासु। यीशु सु लिसु जेनु निजे हिबनु मी मसीह जो थेमु ली। री कु संसार रु थेमु। जेनु पीजे परमेश्‍वर कु राज्य रु मीजन थेयदी।

सेरु कु सिडं पापी जन ,शीनु कु मीजन थेयदी। इदु मी कु बेरी शीनु जो थेसु , घुबरी सु सेरु सिडं किहीबदजु निजु। झमु अन्दु संसार कु अंत थेयदी, अज्यु झमु र्खचु परमेश्‍वर थोलोग जो थेसी।

जब संसार कु अंत लयाड़ं तब थो लोग इदु बिर मीजन कु ताकु साथु थुमसयड़ं इदु शीनु कु नीनी। उइ थो लोग ताकु दलना लुड़ंनु मी रु चड़ंदा। इदोड़ं उइ मी दलना र्दद रु तियाड़ं अज्यु अफी सु हियाडंदा। खलन जो मी जेनु निनि घुबरी यीशु मा घरतु जीवन जीयसु ,इदकू परमेश्‍वर भा कु राज्य रु नि कु मा घरतु ढोयाड़ं।

यीशु सु अनमा लिसु कि इदु संसार कु अंत लिमु जयाड़ं तुकतू धरती रु थोकसायड़ं। इदु तरीका सु थोकते रायड़ं घुबरी इदु ता निजु। खलन इदु कु लगान्दी अनमा हुराड़ं लयाड़ं अज्यु इदु खु रु तुखू रु सुड़ंलन रायाड़ं। जब यीशु थोकते सु बिर ताकु मसीह जो किसेजुचु लि सिजलाड़ं र्खचु रीजाड़ं अज्यु इदजु खु रु छियाड़ंहन।

तब जो मसीह जन इता ले टाडंना निनि उइ खु रु अलन दीसु अज्यु इदु खीजु मसीहजन कु साथु ताकु लयहन जो सिजलाड र्खचु टाडंलन रिजीनी। उइसु बिर यीशु कु साथु लयाड़ं। इदकु नोगोन्दी यीशु अफी मीजन कु साथु रु सुयाड़ं। जब इदु साथु रु सुयड़ंनी ते इदु कु लगान्दी नोगोन्दी भुडंन आराम लयाड़ं।

यीशु सु इदु विश्‍वाश घानु बिर जन ताकु मुकुट दामु कु कुरीहमजी निजु। उइसु नोगोन्दी होना सु परमेश्‍वर कु साथु बिर ताकु चीज रु राज घाघदा। इदकु लगान्दी दलना शान्ती लयाड़ं।

खलन कि परमेश्‍वर इदु बिर कु न्याय घाघदा जो यीशु जो विश्‍वाश मुघा। उइसु उइ नरक रु घाघनदा। इदु उइ तियाड़ं अज्यु अफी सु हियाड़ंदा अज्यु नोगोन्दी होना काडंना सुयाड़ं। खजारी ना बुझने मी उइकु लगातार चिसालना सियाडंन अज्यु बु उइ जालन सु खजारी मुरुजाड़ं।

जब यीशु थोकते रानी ते इदु भुड़ंना रीती शीनु कु अज्यु इदकु राज्य खत्म घालो। इदु शीनु जो नरक घादघदा। इदु शीनु नोगोन्दी होना सु चिसलना सुयाड़ं , इदु बिर कु साथु घुबरी परमेश्‍वर कु काडंथे मनेमु कु नोगोन्दी शीनु कु काड़ंथे दीम कु चुनाव घासु।

खलन की आदम अज्यु हव्वा सु परमेश्‍वर कु काडंथे मुमानेसु अज्यु पाप जो संसार रु रेलन पिरा निजु। परमेश्‍वर सु उइ क्षाप दासु अज्यु उइ नष्ट घामु कु कोशिश घासु। खलन घुबरी ज्या परमेश्‍वर ताकु नुनु थो लोग अज्यु ताकु नुनु धरती कु रचना घाघदा जो शुद्ध लयाड़ं।

यीशु अज्यु इदकु मी नुनु धरती रु सुयाड़ं ,अज्यु उसी नोगोन्दी होना बिर चीज रु राज घाघदा। इदु मी जन सु मी रु ताकु मती सिदाघदा। थन घुबरी ले कमनु या दुखी ले मुलाड़ं उइ तियाड़ं। उइ काडंनु मुलाड़ं या मुसेजाड़ं। अज्यु इदोडं यानु मुलाड़ं। यीशु अफी राज्य रु न्याय अज्यु शान्ति कु साथु राज घाघदा। इदु नोगोन्दी होना अफी मीजन रकसा सुयाड़ं।