9. महापरू मूसा के हागदेयुआय
युसूफर मोरला लार पाचे हातार सबु लोकबाक मिसर ने बोसी गला। हाय आवरी तार बोन्स कतक बोरस ले मिसरी ने रेलाय आवरी हायमन खुबे पीला जनमालाय हाय इस्रायली बोला गलाय।
कतक सों बोरस पाचे, इसरायली लोक गिनती खुबे बड़ी जाई रेला। आवरी मिसरी लोक एबे ये गोट काचे आभारी ना रेलाय तिकर सायता करबा काचे युसूफ खुबे काय काय करलाय। हाय इस्रायली मन ले डरी गलाय कयकाचे कसन कि हाय गिनती ने तिकर ले खुबे रेलाय। ऐई काचे हाय बेरा मिसर ने शासन करबा बीता फिरोन इस्रायली मन के मिसरी मन दास बनाय देला।
मिस्री मन इस्रायली मन के खुबे ले इमारत आवरी येती ले कतक नगर के बनाय बा काचे मोजबुर करलाय। हाय मोसकिल काम के तिकर जिआन के बोडे तखलीफ़ दाय बनाय देलाय, मातर महापरू टिके आशीष देला आवरी तीके आवरी खुबे संतान जनम होयला।
फिरोन दकला कि इस्रायली के खुबे संतान जनम होते रेलाय, ऐई काचे हाय अपनार लोक मन के इस्रायली मन के सबु पीला मन के नील नदी ने पाकी करी मारी देबार हुकुम देला।
गोटक बिसेष इस्रायली बायले ने गोटक पीला के जनम देला। हाय आवरी हतार मुनुस जतक तिकर ले होयके सकला हाय बेटा के लुकाय करी सोंगे रेलाय
जड़ दाय हाय पीलार माँ –बाबा हाके आवरी खुबे लुकाय के ना सकलाय, तेबे हायमन हाके मरा जीबा थानले बचायबा काचे गोटक पोरबा बीती टुकना ने नील नदीर रेटे बड़े चारार मोजी सोंगाय देलाय। हातार बड़े बोहीन ने ये दखबा काचे हातार छान बिन करला कि तार संगे काय होयसी।
फिरोन र बेटी ने हाके दखि करी हतार भीतरे ओनाजारला। जड़ दाय हाय गोटक पीला के दखला तेबे हाय हाके खुदर पीला समजी करिधरला। हाय गोटक इसरायली बायले के हाके गोरोस खुआयबा काचे बुता ने सोंगायला, बिना ये जानी कि हाय पिलार सतर माँ रेला। जद दाय हाय पीला अडक बड़े होयला कि एबेर हाके हातार माँर गोरोस ना लागुआय, तेबे हाय फ़िरोन र बेटी के लयूडाय देयुआय, हातार नाम मूसा रेला।
गोटक दिन, जड़ दाय, मूसा बड़े होयला, तेबे हाय दकला कि गोटक मिस्री गोटक इसरायली के पीटते रेला। मूसा खुदर संगर इस्रायली के बचायबार कोसीस करला।
जड़ दाय मूसा बिचार करला कि हाके कोनी ना दखलातेबे हाय मिस्री के मारी देला आवरी हातार लास के तोपी देला। मातर कुसा जोन करी रेला हाके कोनी दखि रेला।
फिरोन के पता चली गला कि मूसा काय करी रेय। हाय हाके मार डाल बार कोसीस करला, मातर मूसा मिस्र ले झारे पोरायला। फिरोनर सेनिक हाके हायती डगर के न सकलाय।
मिस्र ले धुर झारे गोटक धोरी बनिगला। हेती हाय गोटक बायले ले बीबा करला आवरी दुयटा पीला जनमायलाय।
मूसा अपनार सतरा र भेड़र खुडा र देख रेक करते रेला। गोटक दिन, हाय गोटक जरते रेबा बूटा के दखला जोन भोसम होयला बिना जारते रहे। हाय हाके दकबा काचे बुटार लगे गला। जड़ दाय हाय हातार खुबे लगे रेला तेबे महापरू हाके गोटायला। हाय बोलला, ”ए मूसा, अपनार जूता के उतराय देस। तुय गोटक पोवित्र जगहां ने आचीस।
महापरू बोलला, ”मुय खुदर लोकर दुकमन के दकली। मुय तोके फिरोनर लगे पोटायबी ताकि तुय इस्रायली मन के मिस्र र दास मन ले निकराय आनबिस। मुय तीके कनान देश देबी, हाय देस जेक मुय अब्राहम, इसहाक आवरी याकूब ले किरिया रेली।”
मूसा पोचारला, ”लोक मोन जानबा चायबाय कि मोके कोनपोटायला आचे करी तेबे मुय काय करबी?”महापरू बोलला, ”जोन मुय आय सो मुय आय। हायमन ले बोल, ”महापरू तोमार लगे पोटायला आचे। तिकर ले एबी बोल मुय तोमर पुरबोज अब्राहम, इसहाक आवरी याकूबर महापरू यहोवा आय मोर ये नाम रोजकाचे आय।
मूसा डर बार आय आवरी फिरोन लगे जिबा र ना चायते रयूआय कसन कि हाय बिचार करला कि मुय अच्छा ले बोल के ना सकी, ऐई काचे महाप्र्रू मूसा र भाई, हारून के तार सायता करबा काचे पोटायला।
निर्गम अध्याय 1-4 ले गोटक बाईबलर काआनी
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।