12. जिबार

इसराइली लोक मिसर देश ले निकरी करी कुबे हरिक रलाय। हाँय मन येबे कमिया ना रलाय, आवरी हाँय मन वादा करला देश ने जायते रलाय। जोन पने इस्राइली लोक मागलाय, मिसर देशर लोक हाँय मनके हाँयसबू देलाय, अतक तक कि सोना, आवरी रूपा, आवरी मूल्यवान वस्तु। उजवा देशर किडिक लोक मापरूर उपरे बिसवास करलाय आवरी जैबे इसराइली लोक मिसर देश तानले निकरालाय तैबे हाँय मन पने तिकर सगे होयलाय।

मंजन बेरा बादरीर गोटक कुबे बड़े खबा तिकर छोमे -छोमे गला आवरी राती दाय ऐ जोयर खमा होय बार आय। मापरु हाँय बादरीर खबा आवरी जोयर खबा ताने रला, आकट तिकर सगे रला आवरी हाँय हीडबादाय तिकर संग देला। तीके मातर अतक करबार रला कि तार पिटी-पिटी जिबार।

किडिक समयार पाछे, फिरौन तार लोक मन बदललाय हाँयमन इसराइली लोक के आवरी कमिया बनायबार होयते रलाय, ऐइकाचे हाँय मन इसराइली लोकर पिटी -पिटी गलाय। मापरू तिकर मन के बदली देई रला। असन ऐइकाचे करला कसन बोलले चायते रला कि सबु ऐ जानोत कि फिरौन आवरी मिसरर लोकर सबु देवता मन ले हाँय, यहोवा, कुबे शक्तिबिता आय।

जैबे इसराइली लोक मिसरर सेनापति मनर आयबाटा के दखलाय तैबे हाँय मन जनलाय कि फिरौनर सेनपति आवरी लाल समुन्दर मोजी अटकला आत। हाँमन कुबे डरलाय आवरी कान्दते रलाय। हामी मिसर देश के कायकाचे छाड़लू। हामी मोरी जिबुबे।

मूसा इसराइली लोक के बोलला, ना डरा। मापरू आजी तोमर काचे जुध्द करसी आवरी तोमके बाचायसी “तैबे मापरू मूसा के बोलला” ऐ लोक के लाल समुंदर छोमे जिबा काचे बोल।

तैबे मापरू हाँय बादरीर खमा के धरी इसराइली लोक आवरी मिसरर लोकर मोजी सोगायला। कसन बोलले, मिसरर लोक इसराइली लोक के दखके ना सकोत।

मापरू मूसा के समुद उपरे तार हाथ के लमायबा काचे बोलला। आवरी मापरू लेहरा ले समुदर पानी के डेबरी आवरी बुजनी गुचाय देला, समुदर तानले गोटक बाट होयला।

इसराइली लोक आपनार दूनो बाटे पानीर खाती सगे सुकला भूई उपरे समुदर तानले होई करी गलाय।

तैबे मापरू हाँय बाटले बादरीर खमा के गुचायला। ऐइकाचे कि मिसरर लोक इसराइली लोकर बाची करी जिबाटा के दकोत। मिसरर लोक तीके द्खबा काचे तिकर पिटी -पिटी जिबार बिचार करलाय।

तैबे हाँयमन समुदर मोजीले हाँय बाट उपरले इसराइली लोकर पिटी -पिटी गलाय, मातर मिसरर लोक के भकवा करला, आवरी तिकर रथ के तेबाय देला हाँयमन चिचायलाय, फरहा इसराइली मनर बाटले मापरू जुद्ध करसी आचे।

सबू इसराइली लोक समुदर हाँय पाट केटलाय। तैबे मापरू मुसा के बोलला, कि आवरी हाँय पानी ताने हाथ लमाव।जैबे मूसा असन करला, तैबे पानी मिसरर सेनापति मनर उपरे होयला आवरी जसनर असन होयला। सबू मिसरर सेनापति मन बूढ़लाय।

जैबे इसराइली लोक दखलाय कि मिसरर लोक मरी गलाय, तैबे हाँय मन मापरुर उपरे बिसवास करलाय कि मूसा मापरु बाटले भविषदसागबा बिता रला।

इसराइली लोक ऐकाचे कुबे हरिक रलाय, कसन बोलले, मापरू हाँय मन के मोरबा तानले आवरी कमिया होयबा तानले बाचाय रला। येबे हाँयमन मापरू भजन करबार आवरी तार आज्ञा फालबा काचे निचिनता रलाय। इसराइली लोक आपनार आजादर परब मानबा आवरी मापरूर प्रसंशा करबा काचे। कतक गीत गायलाय। कसन बोलले, हाँय हाँय मन के मिसरर सेनापति मन ले बाचाय रला।

मापरू इसराइली लोक के रोजे बरस गोटक परब मानबा काचे आदेश देला। ऐ सुरता करबा काचे आय कि कसन मापरू मिसरर लोक के हाराय देला आवरी तिके कमिया होयबा तानले बाचायला। “येके फसल परब बोलबार आत।” एताने हाँयमन हेतार हरिक मानबा काचे गोटक अच्छा मेढाके पूजबार रला आवरी ताके पड़ायबार रला आवरी खमीर नोयलार रोटी सगे खायबार रला।