2. पाप संसार मंज इन्दा हा

आदम अतै तसेरी लाड़ी प्रमात्मै दोआरा त्यांरै तांई बणायै गै सुंदर बगीचै मंज रैहदैं बड़ै खुश थीयै| तिन्या मंज थऊँ कोई भी ओढणा ना लंदा थू, फिरी भी एहै गल्लै तिन्या मंज थऊँ कसी जो शर्मिन्दा ना करूरा थू, क्योकि संसार मंज पाप ना थू| सो अक्सर तैस बगीचै मंज घूमदैं रैहदैं थीयै अतै प्रमात्मै सीतै गल्ला करन्दै थीयै|

लेकिन तैस बगीचै मंज आक्क कीड़ा थू| सो बड़ा ही धूर्त थू| तिनी तैसा जनानी थऊँ पुछु, “ के सचमुच प्रमात्मै तुसू सितै एस बगीचै रै कसी भी रुखा रै फळा जो खाणै थऊँ ना करुरी हा?”

तैहै जनानीयै जबाब दित्ता, प्रमात्मै असू सितै बलुरा हा कि अहै तैस अतै बुरै रै ज्ञाना रै रुखा रै अलावा कसी भी रुखा रा फळा जो खाई सकदैं हिन्| प्रमात्मै असू सितै बल्लू हा कि अगर तूहै तै फळा जो खऊ या तैस जो छु भी, ता तुसू मरी गाणा|”

तिनी कीड़ै जनानी जोजवाब दित्ता, “एह सच निया! तुसू न मरना| प्रमात्मा जाणदा हा कि जिंया ही तुहै तैस फळा जो खल्लै, तुहै प्रमात्मै रै समान भूची गाणा अतै तसेरै समान भलै अतै बुरै जो समझणा लगणा|”

तैहै जनानीयै हेरू कि सो फळ खाणैं मंज मना जो भाणै बाळा थू अतै सुआद हुजदा थू|सो भी समझदार बणना चाहन्दी थी, ठेरैतांई तैहै फळा जो त्रोड़ी करी खाई लेऊ|फिरी तैहै अपणै लाड़ै जो जेड़ा तैहा सोगी थू सो फळ दित्ता अतै तिनी भी खाई लेऊ|

अचानक ही तसेरी हाख्री खुली गेइ अतै तिन्यायो पता लगा कि सो नंगै थीयै| तिन्यै पत्रा जो अक्क सोगी सी करी तन्यारै ओडण बणाइकरी तिन्या सितै अपणै शरीरा जो ढ़कणै री कोशिश करी|

तैहणै मड़द अतै तसेरी लाड़ीयै तैस बगीचै मज घूमदै प्रमात्मै री अवाजा जो हुणु| सो धोई प्रमात्मै थऊँ लुकी बैहै| तैहणै प्रमात्मै मड़दा जो अवाज लगाई, “ तू कठी हा?” आदमै जबाब दित्ता,” मेंई तुसियो बगीचै मंज घूमदै हुणु, अतै अऊँ डरी गो थू, क्योकि अऊँ नंगा थू| ठेरैतांई अऊँ लुकी बैहु|"

फिरी प्रमात्मै पुछु, "तीजो कुणी दसु कि तू नंगा हा?” कै तेंई सो फळ खऊ हा जेसियो खाणै तांई मेंई तीजो ना करुरी थी?” मड़दै जवाब दित्ता, “ तुहै मिंजो जेड़ी जनानी दितुरी हा एहै ही मिंजो सो फळ दित्ता|” तैहणै प्रमात्मै जनानी थऊँ पुछु, “ तैंई एह कै करू हा?” तैहै जनानीयै बल्लू, “कीड़ै मिंजो धोखा दित्ता हा|”

प्रमात्मै कीड़ै सितै बल्लू, “ तू हरापित हा! तू अपणै पेटा रै भारै चलला अतै चीक चटणीया| तू अतै एह जनानी अक्की दुयै सितैनफरत करनीया, अतै तेरी ओलादी अतै तसेरी ओलादी भी अक्की दुयै सितै नफरत करनीया| एसा जनानी रा वंशज तेरै हैरा जो दरड़ना, अतै तुद सेरी एड़ी जो डसणा|”

तैहणै प्रमात्मै जनानी सितै बल्लू, “अऊँ तेरी ओलाद पैदा करनै री पीड़ा जो बधाला| तुद अपणै लाड़ै थऊँ लालसा करनीया, अतै सो तीजो पुर प्रभुता करला|”

प्रमात्मै मड़दा सितै बल्लू, “तेंइ अपणी लाड़ी री हुणी हा अतै मेरी आज्ञा ना मन्नी हा| ठेरैतांई भूमि ह्रापित भुई हा, अतै तीजो खाणा उगाणै ताई कठण मेहनत करनै री जरुरत भूणी हा| अबै तुद मारी गाणा, अतै तेरा शरीर चिक्का मंज मिली गाणा|” तिनी मड़दै अपणी लाड़ी रा नां हव्वा रखु, जठेरा मतलब हा "जीवन दीणै वाली", क्योकि सो सभी जात्ती री माता भूणी हा| अतै प्रमात्मै आदम अतै हव्वा जो जानवरा री खल्ला सितै बणुरै ओडण पनाए|

फिरी प्रमात्मै बल्लू, “अबै भलै अतै बूरै जो जाणनै थऊँ मणु इंदै सामान भूची गो हा, ठेरैताई तिन्यायो तैस जीवन रै रुखा फळा जो ना खाणा दीणा चहिंदा कि सो सदा ताई जिन्दैं रैहन|” ठेरैताई प्रमात्मै आदम अतै हव्वा जो तैस थऊँ बाहर कड्डी दित्ता| अतै प्रमात्मै कसी जो भी तैस जीवन रै रुखा रै फळा जो खाणै थऊँ रोकणै ताई तै बगीचै रै प्रवेशद्वार पुर शक्तिशाली स्व्रगदुता जो बहाली दित्ता