4. अब्राहम सोगी प्रमात्मै री वाचा

बाढ़ रै कई साला रै बाद, संसार मंज मतै मणु रैहंन्दै थीयै, अतै तिन्यै फिरी थऊँ प्रमात्मै रै अतै अक्की दूयै रै विरुद्ध पाप करू| क्योकि सो सब ही अक्क ही भाषा बलन्दै थीयै, ठेै ताई सो अक्क सोगी किठ्ठीयै अतै ससार जो भरी दीणै रै प्रमात्मै रै हुकमा रै बजाय अक्की नगर जी बणाऊ|

सो बड़ै घमंडी थीयै, अतै तिन्या जो किना जीवन जीणा चेहिंदा ठेरै बारै मंज सो प्रमात्मै रै हुकमा रा पालन करना ना चाहन्दै थीयै| ऐठी तक कि तिन्यै अक्क ऐसी मीनार जो बणाणा शुरू करू जेडी स्वर्गा तिकर पूजणी| प्रमात्मै हेरू कि अगर सो अक्क सोगी मिलिकरी बुराई करंदै रैहलै, ता सो मतै पापी कम्मा जो करी सकदै हिन्|

ठेरैताई प्रमात्मै तन्यारी भाषा जो मती लाग भाषा मंज बदली दिता अतै तिन्या मणु जो पुरै संसार मंज फलाई दित्ता| जैस नगर जो तिन्यै बणाणा शुरू करू थू सो बाबेल कहलऊ, जठेरा मतलब हा "गड़बड़ी"|

कई सो साला रै बाद, प्रमात्मै अब्राम नाम रै अक्की मणु सितै गल करी| प्रमात्मै तैस सितै बल्लू, “ अपणै देश अतै टबरा जो छड्डी करी तैस देशा जो चली गा जेड़ा मु तीजो दसणा| अऊँ तीजो आशीष दिल्ला अतै तीजो थऊँ अक्क बड्डी जात्ती बणाला|अऊँ तेरा नां महान करला| जेड़ा तीजो आशीष देया अऊँ तैसीयो आशीष दिल्ला, अतै जेड़ा तीजो ह्राप दिला तैसियो ह्राप दिल्ला| तेरै कारण संसार रै सारै कुल आशीष पल्लै|”

अत: अब्रामै प्रमात्मै री गल मन्नी| तिनी अपणै सबी सेबका अतै अपणी पुरी जायदाद समेत अपणी लाड़ी सारै जो लेऊ अतै तेस देशा जो, कनान देश जो चली गो जेड़ा प्रमात्मै तैसियो दस्सू थू|

जैहणैं अब्राम कनान पुजू ता प्रमात्मै तैस सितै बल्लू, “अपणी चोरुनी कनारी हेर| अऊँ तीजो एह पूरा देश दिल्ला अतै तेरै वंशज हमेशा ताई एस पुर अधिकार रखलै|” तैहणै अब्राम तैस देशा मंज बसी गो|

मलिकिसिदक नां रा आक्क जोआन थू जेड़ा सर्वोच्च प्रमात्मैरा याजक थू| आक्क धैड़ै जैहणै अब्राम युद्ध करनै रै बाद ईच्छु करदा थू ता सो अतै अब्राम मुळै| मलिकिसिदकै अब्रामा जो आशीष दिती अतै बल्लू "सर्वोच्च प्रमात्मै जो स्वर्ग अतै पृथ्वी रा मालक हा सो तीजो आशीष देया|” फिरी अब्रामै युद्ध मंज जीतूरी सबी चिजा रा दशमांश मलिकिसिदक जो दिता|

कई साल बीती गै, पर अल्ली भी अब्राम अतै सारै रा कोई पुत्र ना थू| प्रमात्मै अब्राम सितै गल करी अतै फिरी थऊँ प्रतिज्ञा करी करी कि तैस बलै अक्क पुत्र पैदा भूणा अतै जिंया अम्बरा मंज तारै हिन् तिन्या ही तसेरै मतै सारै वंशज भूणैं| अब्रामै प्रमात्मै री प्रतिज्ञा पुर विशवास करू|प्रमात्मै घोषणा करी कि अब्राम अक्क धर्मी जन थू क्योकि तिनी प्रमात्मै री प्रतिज्ञा पुर करू थू|

तैहणै प्रमात्मै अब्राम सितै अक्क वाचा बन्नी|समान्य रूप सितै, अक्क वाचा दूँ दला रै बिचा मंज अक्की दुयै ताई कम्मा जो करनै रा अक्क समझोता भुन्दा हा| प्रमात्मै अब्राम सितै सो प्रतिज्ञा तैहणै करी थी जैहणै अब्राम सोऊ करदा थू, पर सो तैहणै भी प्रमात्मै जो हुणी सकदा थू| प्रमात्मै बल्लू, “अऊँ तेरै शरीरा थऊँ पैदा करीके तीजो तेरा अक्क निज पुत्र दिल्ला| अऊँ तेरै वंशजा जो एह कनान देश दिंदा हा|” पर अल्ली भी अब्राम बलै कोई पुत्र ना थू|