34. यीशु दुसरी कथाओं की सिख दींद

यीशु ल पिता परमेश्वर का राज्य का बारा मा हैंकि भौत सी कथा सुणैनि। उदाहरण कु, ऊल बोलि, "पिता परमेश्वर कु राज्य एक रै का बीज का जन च जै तैं कै पुंगडा मा बुतै गये। तुम जंणदा छा कि रै कु बीज सैरा बीजों मा सबसे छुटटो हूंद।"

"पर रै कु बीज बढी के बगीचा का सैरा दलों मा सबसे बड़ो हवे जांद, इथग बड़ो कि चलखुडा ऐ के वेका फौंकों पर आराम करदींनि।"

यीशु ल एक हैंकी कथा बतै, "पिता परमेश्वर कु राज्य खमीर का जन च जै तैं ले के एक जनन आटा का गोली मा मिलै दींद तब उ सैरा आटा मा मिली जांद।"

"स्वर्ग कु राज्य वे खजाना का जन च जै तैं कैल पुंगडा मा छिपै दींनि। कै हैंका आदिम तैं उ खजाना मिली अर वेल वे तैं पांणै की भौत इच्छा कैरी। इलै वे तैं फिर दुबरा खडै दींनि। उ खुशी ल इथग भुरयूं छो कि वेल जै के अपड़ो सभि कुछ बेचि दींनि कि उ वे पुंगडा तैं खरीद साको जख उ खजाना छो।"

"स्वर्ग कु राज्य एक भौत कीमती शुद्ध मोती का जन भि च। जब मोतियों कु व्यापारी वे तैं पांद त उ वे तैं खरीदणु कु अपड़ो सभि कुछ बेचि दींद।"

उख कुछ लोग छा जु सुचदा छा कि पिता परमेश्वर ऊं तैं इलै स्वीकार करलो किलैकि उ भला काम कना छा। यु लोग ऊं लुखुं तैं तुच्छ मंणदा छा जु ऊं भला कामों तैं नि करदा छा। इलै यीशु ल ऊं तैं या कथा बतै; "द्वी आदिम छा अर द्वी ही प्रार्थना कनु कु मन्दिर मा गैनी। ऊं मा बट्टी एक चंगी लींण वलो छो, अर दुसरो एक धार्मिक अगवा छो।"

"वे धार्मिक अगवा ल इन के प्रार्थना कैरी की, 'हे पिता परमेश्वर, तेरु धन्वाद हो कि मि हैंका लुखुं का जन – जन कि डाकू, अन्यो कन वलो मनिख, व्यभिचारी, या इख तक कि इख मा खड़ा चुंगी लींण वला का जन एक पापी नि छो।'"

"उदाहरण कु, मि हर हफ्ता मा द्वी बार उपवास रखदु, अर मि मिलण वला धन अर सामान कु दसवां हिस्सा भि त्वे तैं दींदु।"

"पर उ चुंगी लींण वलो वे धार्मिक अगवा बट्टी भौत दूर खड़ो हवे गै। वेल मथी स्वर्ग का जना आँखा उठै के भि नि देखि। यांका बदला, वेल अपड़ी मुठ्ठी ल अपड़ी छाती तैं पीटी अर प्रार्थना कैरी, 'हे पिता परमेश्वर, किरपा कैरी के मि पर दया कैर किलैकि मि एक पापी आदिम छो।'"

फिर यीशु ल बोलि, "मि त्वे बट्टी सच बुल्णु छो, पिता परमेश्वर ल वे चुंगी लींण वला की प्रार्थना तैं सूंणी अर वे तैं धर्मी बतै। पर वेल वे धार्मिक अगवे की प्रार्थना तैं पसंद नि कैरी। पिता परमेश्वर हर एक घमंडी का मुंड तैं मूड़ी करलो, पर उ हर वे आदिम तैं सम्मान दयालो जु अफ तैं नम्र करद।"