50. येसु मर्रा मल्सि वांतोर.
यह कहानी सुनें ऑडियो फ़ाइल · 7.3 MB
इस रिकॉर्डिंग के शब्द नीचे Aheri Gondi में दिए गए हैं।
येसु मर्रा मल्सि वांतोर. दग्गेरा-दग्गेरा रोंडु वेय्कुना(2000) वर्सानाल दुनियाता वेरे-वेरे जेगाने बचटूरो लोकुल्कु किरिस्तु येसुना बारेमता बेसता कबुरतुन केंजसंतुर. कलिसियांगुडा बेस बेरसंतां. दुनियाता आकिर आयाना रोजकुने मर्रा मल्सि वांतन इंचि येसु पोल्ले हीसि मत्तोर. इदवेरदाका अय्ते येसु मल्सि वायाहिल्लोर, गानि हीता पोल्लेतुन मात्रम ओर पुरागा कींतोर.
येसु मल्सि वांतोर इंचेके मनम एदुर हूळसेके मंतोम. इसोंटस्के, मनम मना पिस्वरतुन पवित्र इरसेके पेनदुक कदर दोर्काना पिस्वर पिसगोम इंचि पेन मनाहेंदाल आसे पळसंता. येसु इद बूमिपोर्रो मननेंके, “नावा सिस्युल्कु दुनियाते अन्नि जेगाने होंचि पेनदा राज्येम बारेमता बेसता कबुरतुन वेहानुर, अस्के दुनियाता आकिर आंता,” इंचि वेहचि मत्तोर.
बच्चुंगो जातिना लोकुल्कु मंतुर, ओर इदवेरदाकागुडा येसुना बारेमते केंजाहिल्लुर. येसु स्वर्गमते होनाका मुन्ने, ‘बोर अय्ते बेसता कबुर केंजाहिल्लुरो, असोंटा लोकुल्कुंक बेसता कबुर वेहाट,’ इंचि येसु ओना विस्वासुल्कुंक वेहतोर. “होंटु, होंचि अन्नि जातिना लोकुल्कुन विस्वासुल्क कीम्टु, पंटा कोताक वासि मंता,” इंचि येसु वेहचि मत्तोर.
येसु इल्हागुडा वेहचि मत्तोर, “वरोर सेवक ओना मालकुंकन्ना पेद्दा आयोर. ई दुनियाता कोन्नि पेद्दा लोकुल्कु नाकुन हय्साहिल्लुर, आनि नाहाटीं मीकुनगुडा ओर तिप्पल्क कीसि हव्कानुर. इद दुनियाते मिमेट परेसान आकिट, गानि गट्टिगा मंटु, बारित्ते इद दुनियापोर्रो राज्येम कियाना देय्यमतुन नना गेल्सतन. ओक्कला मिमेट आकिरदाका विस्वासमते निल्सि मनानय्ते, पेन मीकुन पिसागोटंता,” इत्तोर.
दुनियाता आकिर रोज वातस्के, लोकुल्कुना गति बतल आयार? इनना पोल्लेतुन ओना सिस्युल्कुंक बेस तेळियागोटसि वेहालय येसु ई वेसुडि वेहतोर. ओर इत्तोर, “बोरो मनकल ओना नेदे बेस पेडेक वीततोर. उंदि नर्का ओर निद्राते मननेंके ओना पगातोर वासि आ गोह्कुना पेडेकुने, केडा गोह्कुना पेडेक वीत्सि होत्तोर.”
“अव पेडेक मोलिय्तस्के, ओना जीतागाह्क हूळसि, ‘सामि, निमे अय्ते नीवा नेदे बेसता पेडेक वीत्सि मत्तिन. अयते इव्टे ई केडा गोह्कु बगाटाल वांता?’ इंचि पूसकीतुर. अस्के आ मालक, ‘बोरो नावा पगातोरे इल्हा किया पर्रांतोर, बोरो गानि ना पगातोर मंतोर,’ इंचि वेहतोर.”
“अस्के ओना जीतागाह्कु, ‘अय्ते मरि आ केडा गोह्कुना मोल्कन पीकिसि पोह्कोमा?’ इंचि इत्तास्के, मालक, ‘मन्नि! मिमेट अल्हा कियानय्ते अवुनतोनि गोह्कुना मोल्कनगुडा पीकंतिर. कोताक वायानदाका आगाट, कोयनेंके बोळसि पोहानाहाटीं आ केडा गोह्कुना मोल्कन उंदि जेगाते जमा कीम्टु आनि गोह्कुन बारे नावा गुम्मिते दोस्सट, इंचि इत्तोर.”
सिस्युल्कुंक इद वेसुडि तेळियाहिल्ले, अदुनहाटीं तेल्पिच्चि वेहा इंचि ओर विनंति कीतुर. अस्के येसु ओर्कु इल्हा वेहतोर. “बेसता पेडेक वीताना मनकल किरिस्तुना कबळ कियानोर आंद. नेली इत्ते दुनिया आंद. बेसता पेडेक इत्ते पेनदा राज्येमता लोकुल्कु आंद.”
“केडा गोह्कुना पेडेक इत्ते, आ पापि देय्यमता लोकुल्क आंद. आ मनकना पगातोर इत्ते, देय्यम आंद. ओर केडा गोह्कुना पेडेक वीत्सि मत्तोर. कोयमळ इत्ते ई दुनियाता आकिर आंद. आनि कोय्यानोर इत्ते पेनदा दूतां आंद.”
“दुनियाता आकिर रोजु वातस्के, बोर अय्ते देय्यमतोर मंतुर, ओर्कुन अंटोर्कुन पेनदा दूतां उंदगा जमा कींतां. पेनदा दूतां ओर्कुन उंदि बगा-बगा पोत्तना तळमिते वाटसींतां. अगा ओर इरगा तकलीपते पल्कु कोर्कसेके मनांतुर. गानि बोर अय्ते नीतिमंतुल्क मंतुर, येसुन पोर्रो विस्वासम कींतुर ओर पेनबाबाना राज्येमते पोळ्दुनालेसीं मेरसेके मनंतुर.”
दुनियाता आकिर रोजु वायाका मुन्नेन नना बूमिपोर्रो मल्सि वांतन इंचिगुडा येसु वेहतोर. ओर बल्हा अय्ते स्वर्गमते होत्तोर, अल्हेने ओर मल्सि वांतोर. इत्ते, ओनकु मेंदुल मनंता, मब्बुने, मब्बु तेर्पेनपोर्रो उद्दिसि ओर वायानुर. येसु मल्सि वातस्के, हासोत्ता हरेक विस्वासि, हातोरा लोप्पोटाल मर्रा जीवाते तेदानुर आनि मब्बुने होंचि येसुंक कलियानुर.
येसु वातस्के, बोर अय्ते विस्वासुल्क जीवाते मनंतुर, ओर अंटोर, हातोरव्टेटाल जीवाते तेदता विस्वासुल्कुने होंचि कलियांतुर. ओर अंटोरगुडा येसुनतोनि मनंतुर. अदंता आसोत्तस्के, येसु ओना लोकुल्कुनतोनि मनंतोर. ओर अंटोर कलियसि मनानय्ते ओरगा बस्केळ्ताहाटीं पुरागा सांति मनंता.
येसु ओनपोर्रो विस्वासम कीता हरेक मनकंक उंदि किरिटम हींतन इंचि पोल्ले हीसि मत्तोर. ओर बस्केळ्ताहाटीं पेनतोनि कलियसि हरेक वस्तुनपोर्रो राज्येम कींतुर. ओरगा पुरागा सांति मनंता.
गानि बोर अय्ते येसुनपोर्रो विस्वासम किय्युरो, ओर अंटोरद मात्रम पेन न्यायम कींता. ओर्कुन पेन नरकमते वाटसींता. अस्के ओर अगा बस्केळ्क अळसेके, पल्कु कोर्कसेके, तकलीप अरसेके मनानुर. बस्केन पिर्रुवा तळमि ओर्कुन बोळ्सेके मनंता आनि पुळ्कु ओर्कुन बस्केळ्क कोर्कसेके मनंतां.
येसु मल्सि वातस्के, ओर देय्यमता राज्येमतुन पुरागा नासडेम कींतोर. देय्यमतुन नरकमते वाटसींतोर. बोर अय्ते पेनदा पोल्लेन पोर्रो ताकाकोंटा, देय्यमता पज्जो होनमळतुन पेरकुत्तुर, ओर अंटोरतोनि देय्यम नरकमते बस्केळ्क वेसेके मनंता.
बारित्ते आदम, हव्वाल पेनदा पोल्लेता विरोदमते ताकिसि, पापमतुन इद दुनियाते तत्तुर. पेन ओर्कु सापनेम हीसि ओर्कुन नासडेम कियाना निरनायम कीता. गानि बदो उंदि रोजु पेन, पूना स्वर्गम आनि पूना बूमितुन तयार कींता, अव बस्केळ्ताहाटीं मनंतां. येसु आनि ओना लोकुल्कु आ पूना बूमिपोर्रो मंचेके, ओर बस्केळ्ताहाटीं अगाटा अन्निटवुनपोर्रो राज्येम कींतुर. येसु अंटोर लोकुल्कुना कळ्कुना एर उसमंतोर. इंका मुन्ने बोरे दुक्कमते आनि तिप्पल्कुने मन्नुर. ओर्कु अळा वायो, ओर बिमार अर्रुर, हायुर, अगा बतले तप्पुड कबाह्क जर्गों. येसु ओना राज्येमपोर्रो पुरागा न्यायमते, सांतिते राज्येम कींतोर. येसु बस्केळ्ताहाटीं ओना लोकुल्कुनतोने मनंतोर. मत्तयाल रासता बेसता कबुर पुस्तकता अद्याय 24:14, 28:18, 13:24-30, 36-42, 22:13; योहान रासता बेसता कबुर पुस्तकता अद्याय 15:20, 16:33; प्रकासित वाक्य पुस्तकता अद्याय 2:10, 20:10, 21:1-22:21; 1 तेसलोनि पुस्तकता अद्याय 4:13-5:11; याकोब पुस्तकता अद्याय 1:12 ताल ई वेसुडि येतमळ जर्गता.
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।