2. पाप मंजपुर ने इलोर

आदम आउर हुनचो बायले महा परबु, हुन मन काजे बनालो सुन्दर टोटा ने खुबे हरिक ने रते रओतI आउर हुन मन ले कोनी बले फोटही नी पिन्दते रला, फेर बले हुन मनके लाज नी लागते रयेI कसन बल्ले मंजपुर ने पाप नी रये, हुन मन हुन टोटा ने बुलते फिरते रओत, आउर महा परबु के गोठीयाते रओत।

फेर बले हुन टोटा ने गोटक साँप रयेI हुन खुबे चतुर रये, हुन साँप हुन बायले के पोचारली, "काय सते महा परबु तुमके ऐ टोटा चो कोनी बले रुक चो पाक के खातो काजे मना करलो से?"

हुन बायले साँप के बोलली, "महा परबु हाम के बललो से की हुन अच्छा आउर गलत ज्ञान चो रुक के छाड़ून कोनी बले रुक चो पाक फल खाउक सकास, आउर महा परबु हामके बललो से की तुमी अच्छा आउर गलत ज्ञान चो पाक के खादले आउर छीवले मोरासे।"

हुन साँप बायले के सांगली, "ए सते नुवाय! तुमी नी मोरास, महा परबु जानेसे की तुमी हुन पाक के खादले हुनचो असन होवासे, आउर हुनचो असन सते आउर गलत समझुक सका से।

हुन बायले दखली की हुन रुक चो पाक खातो काजे भावते रयेI आउर सुंदर दका देते रये, आउर हुन समझदार बनुक चाहते रये, हुनी काजे हुन पाक के टुटाउन खादली आउर हुन आपलो मनुक के बले हुन पाक के दिली जोन हुनचो सगे रये, आउर हुन बले खादलो।

तुरते, हुन मन चो आइंक ने दका दिली, आउर हुन मन जानला की हामी नांगड़ा आसूI आउर हुन मन पान मनके सिलून फोटही बनाऊन आपलो घागर के ढापतो उवाट करला।

जिद्लदाय मनुक आउर हुनचो बायले हुन टोटा ने बुलते रओत हुनि बेरा महा परबु चो गोट के सुनला आउर हुन दुनो लुकला, उद्लीदायं महा परबु आदम के हाग दिलो आउर बललो, "तुई कहा आसीस?" आदम बललो, "टोटा ने बुलते तुचो हाग देतोर के सुनले आउर मय डरू रये! कसन बलले मय लुंगी नी पिंदु रये। हुनी काजे लुकु रयेI"

फेर महा परबु पचारलो, "तुके कोन सांगलो की तुई नांगड़ा आसीस काय तुई हुन पाक के खाद्लिस जोन पाक के मय तुके नि खा बोलू रये, हुन मनुक बललो, "मोके हुन बायले पाक के दिली, फेर महा परबु हुन बायले के बललो, "तुई असन कसन करलीस हुन बायले बोलली, "हुन साँप मोके बहकाउन दिली।"

महा परबु साँप के बललो, "तुके शराप देयसे! तुई पेट चो ताकत ने बूलसे, आउर माटी के चाटसे, तुई आउर ऐ बायले आपस ने दका दकी नी होवासे, तुचो पिला झीला आउर हुनचो पिला झीला बले दका दकी नी होदे, ऐ बायले चो पिला झीला तुमके मारदे आउर तुई हुन मनके चाबसे।

आउर महा परबु हुन बायले के बोललो, "मय तुचो नंगत चो दुका के बड़ायेंदेI आउर खुबे डन्ड करेंदे, आउर तुई तुचो मनुक के मन करसे आउर हुन तुके द्खेदे।

महा परबु मनुक के बोललो, "तुई तुचो बायले चो गोट के धरलीस आउर मोचो गोट के नी मानलिस, हुनी काजे भुई के शराप देयंसे, आउर तुचो खातो काजे तुके खुबे डंड ले बुता करुक पड़ेदे। आउर तुई मोरसे, आउर तुचो देय माटी ने मिलुन जायदे। हुन मनुक आपलो बायले चो नाव हव्वा संगालो जेचो अरथ आय; जीव देतो बिती सब पुरखा चो आया। आउर महा परबू आदम आउर हव्वा के जीव धारी मन चो चामड़ी ले लूंगी बनाउन पिन्दालो।

फेर महा परबु बललो, "ऐबे सत आउर गलत के जानतो काजे मनुक अमचो असन होलासे, हुनी काजे हुन मन के हुन जीवन चो रुक चो पाक के नी खाऊक देतोर आय, की हुन मन खुबे दिन जिओतI हुनि काजे महा परबू हुन टोटा ले ओलतो बाट ने बलशाली सरगदूत मनके राका संगालो। हुन थाने कोनी बले हुन जीवन चो रुक चो पाक खाऊक नि सकोत।