14. जंगल मा भटकना

फेन ओहर सिनै पर्वत ले आघू ओमन के अगुवाई करिसI ओहर ओमन ला परतिज्ञा के देश मा ले जाये बर चाहत रिहिसI ए देश कनान घोले कहलात रिहिसI परमेश्वर बादर के खम्भा मा ओमन के आघू -आघू रेंगिस, अउर ओमन ओकर पिछु -पिछु चलिनI

ए कनानीमन परमेश्वर के स्तुति नी करत रिहिन अउर ओकर आज्ञा ला नी मानत रिहिनI ओमन झूठा देवतामन के पूजा करत रिहिन अउर बनेच ख़राब काम करत रिहिनI

परमेश्वर हर इस्रैलीमन ले कहिस, ‘’जेत्की जहान तुमन ओ परतिज्ञा के देश ला जाहा सबेच कनानीमन ठी ले छुटकरा पा लिहI ओमन ठी समझोता नी करिह अउर ओमन ठी विवाह नी करिहI तू मन ला ओमन के सब मूर्ति मनला नष्ट करे बर हेI अगर तुमन मोर आज्ञा नी मानिह, त तुमन मोर अलावा ओमन के देवतामन के पूजा करे बर लगिहI‘’

जब इस्रैली कनान के सीमा मा पहुंचिन, मूसा हर इस्राएल के हर एक गोत्र ले एक -एक ठी पुरुषमन ला चुनीसI ओहर ओमन ला जाके ओ देश के भेद ले बर निर्देश दिस कि देखें कि ओहर कैसन देश हेI ओमन ला ओ कनानीमन के भेदमन ला घोले लेना रिहिस कि देखिहीं कि ओमन बलशाली रिहिन या दुर्बल रिहिनI

ओ बारह पुरुषमन पुरे कनान मा होअत चालीस दिन के यात्रा करिन अउर फेन ओमन वापिस लौट आइन ओमन मनसेमन ला बताईन, ’’ओ देश हर बहुत उपजाऊ हे अउर खेतीमन बनेच जियादा हें!’’ लेकिन दस खोजीमन किहीन, ‘’ओमन के नगर बनेच मजबूत हे अउर ओमन लम्बा चउडा आहें! अगर हमन ओमन के उपर हमला करबो, त निश्चित रूप ले ओ हमनला हरा दिहि अउर हमन ला मार डालीहीI’’

तुरतेच कालेब और यहोशू आने दू भेदियामन कहिन, ‘’ए सत्य हे की कनान के मनसेमन लम्बा अउर चउड़ा अउर बलशाली हवें, परन्तु निश्चित रूप से हमन ओमन ला हरा सकबोI परमेश्वर हमर बर लड़ाई करिही!’’

लेकिन मनसेमन कालेब अउर यहोशू के नी सुनिनI ओमन मूसा अउर हारून ला रिसा होगिन अउर कहिन, ’’तुमन हमन ला इ डरावनी जगह मा काबर ले के आये ह? हमन ला मिश्र मा ही रहेबर रिहिसI अगर हमन ओ देश मा जाथन त हमन लड़ाई मा मारे जाबो, अउर कनान के मनसेमन हमर घर वाली अउर लइकामन ला नउकर बना लीहीI’’ ओ मनसेमन ओमन ला फेन मिश्र ला ले जाये खातिर एक ठी आने मनसे ला खड़े करे बर चाहत रिहिनI

जब उ मनसेमन हर इसने किहिन तहां परमेश्वर बनेच रिसा होगे रिहिसI ओहर मिलाब वाले तम्बू मा आइस अउर कहिस, ’’तुमन मोर विरुद्ध लड़ाई करे हव, इकरे बर तुमन सबो झन ला इ जंगल मा घुमे बर लागिहिI सबझन जोन बीस बछर के हे या ओकर ले जादा उम्र के हे ओठी मर जाही अउर कभू घोले ओ देश मा जा नी सके जोनला में तुमन ला देथोI केवल कालेब अउर यहोशू प्रवेश करिहींI’’

जेतकी जहान मनसेमन हर परमेश्वर ला एसने कहत सुनिन, त ओमन दुःखी होगिन काबर कि ओमन पाप करे रिहिनI इकरे बर ओमन कनान देश मा चढ़ाई करे के निर्णय करिनI मूसा हर ओमन ला, नीजाये बर चेताइस काबर कि ओमन के संग मा परमेश्वर नी जाये, लेकिन ओमन ओकर नी सुनिनI

परमेश्वर इ युद्ध मा ओमन के संग मा नी गे रिहिस, इकरेबर कनानीमन ओमन ला पराजीत कर दीइन अउर ओमन के बनेच झन ला मार दीइनI तहां इस्रैलीमन कनान ले वापिस मुड़ गिनI आगे चालीस बछर ले, ओमन जंगल मा एती-ओती घुमत रिहिनI

इस्रेली मनसेमन ले जंगल मा भटके के चालीस बछर के दौर मा, परमेश्वर हर ओमन के जरूरत मन ला पूरा करिसI ओहर ओमन ला सरग ले ’’मन्ना’’ कथें रोटी ला दिसI ओहर बटेर मनके गदा ला (जोन मध्यम आकार के पक्षी होथे) ओमन के डेरा मा भेजिस ताकि ओमन करा खाए बर मास होयI ओ पूरा समय, परमेश्वर हर ओमन के कपड़ामन अउर जूतामन ला फाटे ले बचाए राखिसI

यहाँ तक परमेश्वर हर ओमन के पिए के पानी ला चमत्कारी रूप ले चट्टान में ले पानी ला निकारिसI लेकिन इ सब के उपरान्त, घोले इस्रैलीमन परमेश्वर अउर मूसा के विरुध शिकायत करिन अउर कुरबूराइनI तभोले, परमेश्वर विश्वासयोग्य रिहिसI ओहर जोन परतिज्ञा करे रिहिस कि ओ अब्राहम, इसहाक, अउर याकूब के पुरखा बर करिही ओला ओहर करिसI

एक अउर समय जब ओ मनसेमन ठी पानी नी रिहिस, परमेश्वर हर मूसा ला कहिस, ‘’चट्टान ले गोइठ कर, अउर ओमें ले पानी निकलहीI’’ परन्तु मूसा हर चट्टान ले गोइठ नी करिसI एकरे बदला, ओ हर छड़ी ले चट्टान ला दू बार मारिसI ए रीती मा ओहर परमेश्वर के आदर नी करिसI सब बर पिए खातिर चट्टान ले पानी हर नीकर आइस, परन्तु परमेश्वर मूसा ले रिसा होगिसI ओहर कहिस, ‘’काबर तें हर एसन करे हस, इकरे बर तै परतिज्ञा के देश मा परवेश नी करन सकसI

जब इस्रैली मन चालीस बछर ले जंगल मा भटक चुके रिहिन, तब जोन मन परमेश्वर के विरुध लडे रिहिस ओमन सब मर गे रिहीनI तब परमेश्वर ओमन ला फेन ले ओ परतिज्ञा देश के सीमना तक ले गिस, अब मूसा बनेच बुढा हो गे रिहिस, एकरे बर परमेश्वर हर मनसेमन के अगुवाई करे में ओकर सहायता करे बर यहोशू ला चुनिस परमेश्वर हर मूसा ला ए परतिज्ञा करे रिहिस कि एक दिन ओहर ओ मनसेमन के पास मूसा के जैसन एक भविष्यवक्ता भेजिसI

तहाँ परमेश्वर हर मूसा ला एक पहाड़ की चोटी पर जाये बर कहिस ताकि ओहर प्रतिज्ञा देश ला देख सकेI मूसा हर ओ प्रतिज्ञा के देश ला देखिसI परन्तु परमेश्वर हर ओला ओमे प्रवेश करे के अनुमति नी दीसI तब मूसा मर गिस, अउर इस्रैली मन तीस दिन ले शोक मनाइन यहोशू ओमन के नुआ अगुवा बन गिसI यहोशू एक बढियाँ अगुआ रिहिस काबर कि ओहर परमेश्वर ठी भरोसा करिस अउर ओकर बात ला मानिसI