42. यीशु सरग लउट जाथे

जोन दिन परमेश्‍वर हर यीशु ला मरे मा ले जिलाय रिहिस, ओकर दूठन चेलामन तीर के गांव मा जात रिहिनI जात जात ओमन यीशु के संग मा जोन होय रिहिस, ओकर बारे मा गोठियात रिहिन, ओमनला विश्वास रिहिस कि ओहर मसीह रिहिस, परन्तु तभोले ओहर मार डाले गे रिहिस। अब ओ महिलामन गोठियात रिहिन कि ओहर फेन जीवित हो गे हे। ओमन नी जानत रिहिन कि कोन गोइठ ला विश्वास करेके चाहीं।

यीशु हर ओमनके तीर मा आके ओमन संग रेंगे के शुरु करिस, लेकिन ओमन ओला चीन्‍हे नी सकिन। ओहर ओमन ले पूछिस कि ओमन काकर बारे मा गोठियात हें। ओमनहर ओला पाछु के दिनमन मा यीशु के संग जोन होए रिहिस ओ सब घटना के बारे मा बताईंन। ओमन सोंचत रिहिन कि ओ कोनो परदेशी मनसे ठी गोठियात हें जोन नी जानत रिहिस कि यरुसलेम मा का होए रिहिस।

तहां यीशु हर ओमनला समझाईस कि परमेश्‍वर के वचन मसीह के बारे मा का कहत हे। बनेच पहले, भविष्‍यद्वक्‍तामन हर कहे रिहिन कि खराब मनसेमन मसीहा ला दू:ख दिहिं अउर मार डालिहीं। लेकिन भविष्‍यद्वक्‍तामन हर इला घोले कहे रिहिन कि ओहर तीसर दिन मा जी उठीही।

जब ओमन ओ नगर ला पहूंचिन जोनकरा ओ दूनों रुकना चाहत रिहिन, तब तक लगभग सांझ हो गे रिहिस। ओमन यीशु ला ओमनके संग मा रुके बर कहिन, अतः ओहर ओमन के संग मा एकठन घर ला गिस। ओमन अपन रथिया के खाना ला खाय बर बइठ गिन। यीशु हर एकठन रोटी ला लिस ओकर बर परमेश्‍वर ला धन्यवाद दीस, अउर फेन ओला टोरिस। अचानक ले, ओमन जान लिन कि ओहर यीशु रिहिस। लेकिन ओईच बेरा, ओहर ओमनके आँखी ले ओझल होगिस।

उ दुनों हर एक-दुसर ले कहिन, “ओहर यीशु रिहिस! इकरबर जब ओहर हमनला परमेश्वर के वचन ला समझाए रिहिस त हमन बनेच खुश रहेन!’’ तुरतेच, ओमन निकर के वापिस यरूशलेम ला गिन। जब ओमन पहूँचिन त ओमन चेलामन ला बताईन, “यीशु जीयत हे! हमन ओला देखे हन!”

जब चेलामन गोठियात रिहिन, यीशु अचानक ले उ कमरा मा ओमनके संग परगट होईस। ओहर कहिस, ”तुमनला शाँति मिले! “चेलामन हर सोचिन कि ओहर कोनो भूत रिहिस, लेकिन यीशु हर कहिस, “तुमन काबर डरत ह? तुमन इला काबर नी सोचथ कि इहर सही मा मैं, यीशु हं? मोर हाथ अउर गोड़ ला देख। भूतमन ठी इसने शरीर नी होए जइसन कि मोरठी हे। “इला दिखाय बर कि ओहर कोनो भूत नी रिहिस, ओहर खायेबर कुछु मांगिस। ओमन ओला मछरी के एकठन कूटी ला दीन, अउर ओहर ओला खा लिस।

यीशु हर कहिस, “मोर बारे मा परमेश्वर के वचन जोन कुछु घोले कथे ओहर सब घटिही। मैहर तुमनला बता दे रहें कि इकर होना जरुरी हे।“ तहाँ यीशु हर ओमनला परमेश्वर के वचन ला अच्‍छा ले समझाईस। ओहर कहिस, “बनेच आघु भविष्‍यद्वक्‍तामन हर लिखे रिहिन कि मईच, मसीह ला दु:ख उठाना पडिही, मरे बर होही अउर फेन तीसर दिन मरे मा ले जी उठे बर होही।“

“उ भविष्‍यद्वक्‍तामन इला घोले लिखे रिहिन कि मोर चेलामन परमेश्वर के वचन के परचार करिहीं। ओमन हर एक ला पश्‍चाताप करे बर बताहीं। अगर ओमन ईसने करिहीं त परमेश्वर ओमनके पापमन ला क्षमा करिही। मोर चेलामन इ संदेश के परचार करना यरूशलेम ले शुरु करिहींI तहां ओमन सब जगह सब जाति मा जाहीं। तुमन मोर हर एकठन बूता के साखी ह जोन मैहर करें, अउर कहे रहें, अउर सबके घोले जोन मोर संग होइस।“

आही ते चालीस दिनमन के बेरा मा, यीशु अपन चेलामन ले कई बार प्रकट होईस। एक घा त ओहर एकेच बेरा मा पाँच सौ ले जादा मनसेमन ठी प्रकट होईस! ओहर अपन चेलामन ला कई तरिका ले साबित करिस कि ओहर जीयत रिहिस, अउर ओहर ओमनला परमेश्वर के राज्‍य के बारे मा शिक्षा दीस।

यीशु हर अपन चेलामन ला कहिस, “परमेश्‍वर हर मोला सरग अउर पृथ्‍वी के हरेक के उपर शासन करे के अधिकार दे हे। इकरबर, अब मैं तुमनला कहत हं: जाके सब जाति के मनसेमन ला चेला बनाहा। इसने करे बर, तुमन ओमनला पिता, पुत्र अउर पवित्र आत्मा के नाम ले बतिस्मा देना हे। जोन कुछु घोले मैं तुमनला आदेश दे हं उ सब गोठमन ला मानेबर घोले तुमन ओमनला सिखाना हे। सूरता राखिह, मैं हमेशा तुँहर संग रिहों।“

यीशु के मरे मा ले जी उठे के चालिस दिन के बाद, ओहर अपन चेलामन ला कहिस, “जब ले कि मोर पिता तुमनला सामर्थ नी दीही तब तक यरूशलेम मा रुके रिहI ओहर तुमहर बर पवित्र आत्‍मा भेजे के दूवारा एइसन करिही।“ तहाँ यीशु सरग मा चल दीस, अउर एकठन बादल हर ओला ओमनके आंखी ले लुका दीस। सरग मा यीशु सब चीजमन के ऊपर शासन करे बर परमेश्वर के जऊनी अंग बइठ गिस।