24. ଯୋହନନ୍ ଯୀଶୁନ୍ ଆଡଅଙ୍ ତବ୍ବୁବ୍ଡାନ୍ ତିୟେନ୍
ଯିଖରିୟନ୍ ଡ ଇଲିଶାବେଥନ୍ ଆଅନନ୍ ଯୋହନନ୍ ସୋଡାଲେ ଅବୟ୍ ପୁର୍ବାଃତେବର୍ନେମର୍ର ଡେଲୋ । ଆନିନ୍ କିନ୍ଡ୍ରେଙନ୍ ଡକୋଲନେ,ଆଡଙନ୍ ଡ ପପ୍ପରନ୍ ଜୋମେନ୍ ଆରି ଓଟନ୍ ଆଉସାଲ ଜିଜିଲନେ ।
ଗୋଗୋୟ୍ ମନ୍ଡ୍ରାଞ୍ଜି ଯୋହନନ୍ ଆବର୍ନେ ଅମଙନ୍ ଆସନ୍ କିନ୍ଡ୍ରେଙନ୍ ଇୟ୍ଲାଜି । ଆନିନ୍ ଆନିଞ୍ଜି ଆଡଅଙ୍ ଅପୁଙ୍ବର୍ରେ ବର୍ରନ୍“ ଆବ୍ଡିବୁଡ୍ଡିନବା, ଇନି ଆସନ୍ ଗାମେଣ୍ତେନ୍ ଇଶ୍ୱରନ୍ ଆରାଜ୍ୟ ତୁୟାୟ୍ଡମ୍ ।
ମନ୍ଡ୍ରାଞ୍ଜି ଏଙ୍ଗାଲେ ଯୋହନନ୍ ଆବର୍ନେ ଅମ୍ଡଙେଞ୍ଜି, ଆନିଞ୍ଜିଲୋଙ ଗୋଗୋୟ୍ନେ ଆଇର୍ସେଞ୍ଜି ସିଲଡ୍ ଆବ୍ଡିଡ୍ବୁଡ୍ଡିଲଞ୍ଜି, ଆରି ଯୋହନନ୍ ଆନିଞ୍ଜି ଆଡଅଙ୍ ତବ୍ବୁବ୍ଡାନ୍ ତିୟେଞ୍ଜି । ଗୋଗୋୟ୍ ଡାର୍ମିକମର୍ରଞ୍ଜି ନିୟ୍ ଯୋହନନ୍ ଆସିଲୋଙ୍ ତବ୍ବୁବ୍ଡାନ୍ ଞନାଙନ୍ ଆସନ୍ ଇୟ୍ଲାଜି, ବନ୍ଡ ଆନିଞ୍ଜି ଅନାବ୍ଡିଡ୍ବୁଡ୍ଡିଲଞ୍ଜି ଡ ଇର୍ସେନ୍ ଅମୁର୍ସେଲଜି ।
ଯୋହନନ୍ ତି ଆଡାର୍ମିକନେତାଞ୍ଜି ଆଡଅଙ୍ ବର୍ରେଞ୍ଜି, “ଏ ୟଗାଜାଆଡନ୍ ଆକେଜ୍ଜାମର୍ଜି ! ଅମ୍ମୁର୍ସେନବା ଡ ଞଡ୍ରମ୍ବେଞ୍ଜି ଆବ୍ୟର୍ରବୁଡ୍ଡିନବା । ଅଙ୍ଗାଜି ଆରାନୁବ୍ ମନଙ୍ ଆଜଅ ଅନ୍ନଜଏ ତି ଆତେ ଡୟ୍ଲେ ସନେଡନ୍ ଡେତେ ଆରି ତଗୋଲୋଙନ୍ ସନେଡନ୍ ଡେତେ । “ତୁଙ୍ମଡ୍ଗିୟ୍ମରଞ୍ଜି ଇନିଜି ଇନିଜି ତି ଆବର୍ନେଲୋଙ୍ ବର୍ରନେଜି ଯୋହନନ୍ ତି ଆତେ ଗବ୍ଡେଲେନ୍” ଗିୟ୍ବା,ଞେନ୍ ଆମ୍ମୁଙ୍ ଅମଙ୍ବାବେନ୍ କବରପାଙ୍ମର୍ଞେନ୍ ଆପ୍ପାୟ୍ତାୟ୍ ଆନା ତଙର୍ବେନ୍ ଇୟ୍ତାୟ୍ ତୁବେ ।
ଅସୋୟ୍ ଯିହୁଦିମରଞ୍ଜି ଯୋହନନ୍ ଆଡଅଙ୍ ଆନିନ୍ କ୍ରିଷ୍ଟନ୍ ପଁ ଗାମ୍ଲେ ଅପ୍ପୁଙେଞ୍ଜି । ଯୋହନନ୍ ଜାଲଙ୍ଲେ ବର୍ରନ୍ “ଞେନ୍ କ୍ରିଷ୍ଟନ୍ତଡ୍,ବନ୍ଡ ଞେନ୍ ଆତିକ୍କି ଅବୟ୍ନ୍ନେ ଜିର୍ତାୟ୍ । ଆନିନ୍ ଡିୟ୍ତେ ଆସୋଡା ଡ ଆତାଲ୍ଜଙନ୍ ଆଜନିବାଡ୍ ଅନୁଜନ୍ ଆସନ୍ ଞେନ୍ କରମ୍ମାତଡ୍ ।”
ତି ଆବର୍ତାନ୍ ଯୋହନନ୍ ବାତ୍ତେ ତବ୍ବୁବ୍ଡାନ୍ ଆଡନେ ଆସନ୍ ଯୀଶୁନ୍ ଇୟ୍ଲାୟ୍ । ଯୋହନନ୍ ଏଙ୍ଗାଲେ ଆନିନ୍ ଗିଜେନ୍,ଆନିନ୍ ଗାମେନ୍ “କେର୍ ଗିୟ୍ବା ! ଈଶ୍ୱରନ୍ ଆତୁର୍ମେଣ୍ତାମର୍ ଆନା ପୁର୍ତ୍ତିନ୍ ଆଇର୍ସେ ଆବିଡାର୍ ବୋୟ୍ଲେ ପାଙ୍ତେ ।”
ଯୋହନନ୍ ଯୀଶୁନ୍ ଆଡଅଙ୍ ଗାମେନ୍”ଆମନ୍ ଆଡଅଙ୍ ତବ୍ବୁବ୍ଡାନ୍ ଆତନିୟ୍ ଆସନ୍ ଞେନ୍ କରମ୍ମାତଡ୍ । ଆର୍ପାୟ୍ ଆମନ୍ ଞେନ୍ ଆଡଅଙ୍ ତବ୍ବୁବ୍ଡାନ୍ ତିୟିଞ୍ ।” ବନ୍ଡ ଯୀଶୁନ୍ ଗାମେନ୍ “ଆମନ୍ ଞେନ୍ ଆଡଅଙ୍ ତବ୍ବୁବ୍ଡାନ୍ ତନିୟନ୍ ସନାୟ୍ସାୟ୍,ଇନିଆସନ୍ ଗାମେଣ୍ତେନ୍ କେନ୍ ଅନ୍ତମ୍ ଅଡକୋ ଡର୍ନେନ୍ ବରିୟ୍ ଡେତେ । ତି ଆସନ୍ ଯୋହନନ୍ ଆନିନ୍ ଆଡଅଙ୍ ତବ୍ବୁବ୍ଡାନ୍ ତିୟେନ୍, ଯୀଶୁନ୍ ଆଙ୍ଗିୟ୍ଜା ଇର୍ସେନ୍ ଅଲ୍ଲୁମ୍ଲୋ ଜାୟ୍ଡେନ୍ ।
ତବ୍ବୁବ୍ଡାନ୍ ଆଡରେନ୍ ଆତିକ୍କି ଯୀଶୁନ୍ ଡାଆଲୋଙନ୍ ସିଲଡ୍ ଡୋଲନ୍ ଜିର୍ରାୟ୍ ,ଈଶ୍ୱରନ୍ ଆପୁରାଡ଼ା ଅବୟ୍ କୁକ୍କୁରନ୍ ଅନ୍ତମ୍ ଅବ୍ତୁୟ୍ଲନ୍ ଆରି ତି ଆତେ ଜାୟ୍ତାନ୍ ଜିର୍ରେ ତି ଆତୋଣ୍ତୋନ୍ ଇୟ୍ଲାୟ୍ ତଙ୍କୁମେ । ତି ଆବନେଡା, ଈଶ୍ୱରନ୍ ଆସର୍ରଙ୍ ରୁଆଙନ୍ ସିଲଡ୍ ସଡ୍ଡାଏନ୍ ଆରି ଗାମେନ୍, “ଆମନ୍ ଡନୁଙ୍ୟୁମ୍ଅନ୍ଞେନ୍ ଆନା ଆମଙ୍ ସନର୍ଡାଞେନ୍ ଗୋଗୋୟ୍ ଡକୋ ।
ଈଶ୍ୱରନ୍ ଯୋହନନ୍ ଆଡଅଙ୍ ଆମ୍ମୁଙ୍ ବରେନ୍ “ଆମନ୍ ଆନା ତବ୍ବୁବ୍ଡାତେ ତି ଆତୋଣ୍ତୋନ୍ ମଡ଼ିର୍ ପୁରାଡାନ୍ ପଡ୍ତ୍ତନାୟ୍ ଆରି ଡକୋତନେ । ତି ଆମନ୍ଡ୍ରା ଈଶ୍ୱରନ୍ ଆଅନ୍ ।” ଆବୟ୍ୟନ୍ ଈଶ୍ୱରନ୍ ଡକୋ । ବନ୍ଡ ଯୋହନନ୍ ଏଙ୍ଗାଲେ ଯୀଶୁନ୍ ଆଡଅଙ୍ ତବ୍ବୁବ୍ଡାନ୍ ତିୟେନ୍, ଆନିନ୍ ବାପ୍ପାନ୍ ବର୍ନେନ୍ ଆବରର୍ତନେନ୍ ଅମ୍ଡଙେନ୍, ଈଶ୍ୱରନ୍ ଆଅନ୍ ଯୀଶୁନ୍ ଆଡଅଙ୍ ଗିଜେନ୍ ଆରି ମଡ଼ିର୍ପୁରାଡ଼ା ନିୟ୍ ଗିଜେନ୍ ।
ବାଇବଲଲୋଙନ୍ ଅବୟ୍ ଅନବ୍ଜଙ୍ବର୍: ମାଥିଉ ୩; ମାର୍କ ୧:୯-୧୧; ଲୂକ ୩:୧-୨୩
Free to use, adapt, and share under an open license (CC BY-SA 4.0).