25. ସନୁମନ୍ ଯୀଶୁନ୍ ଆଡଅଙ୍ ମାଲେନ୍‌

ଯୀଶୁନ୍ ତବ୍ବୁଡାଲନ୍ କି ଅବ୍‌ତାଙନ୍ ମଡିର୍‌ପୁରାଡାନ୍ ଆନିନ୍ ଆଡଅଙ୍ କିନ୍‌ଡ୍ରେଙନ୍ ଜନିରନ୍ ଆସନ୍ ବାଞେନ୍, ଅଙ୍ଗାଲୋଙ ଆନିନ୍ ବାକୁଡି ଡିନ୍ନା ଡ ବାକୁଡି ତଗଲ୍ ଆଡୋଲଜନ୍ ବେର୍ବରନେ। ତି ଆଇକ୍କି ସନୁମନ୍ ଯୀଶୁନ୍ ଆମଙ୍ ଜିର୍ରାୟ୍ ଆରି ଆନିନ୍ ଇର୍ସେନ୍ ଆଲନୁମ୍ ଆସନ୍ ତୋରେନ୍।

ସନୁମନ୍ କେନ୍ ଆତେ ବର୍ରନ୍ ଯୀଶୁନ୍ ଆଡଅଙ୍ ତୋରେନ୍, “ଆମନ୍ ଈଶ୍ୱରନ୍ ଆଡାଙ୍ଗଡା ଅନନ ଡେନ୍, କେନ୍ ଆରେଙଞ୍ଜି ରୁଟିନ୍ ଆଗନଡେଲ୍ ଆସନ୍ ବାଞା!”

ଯିଶୁ ଜାଲଙ୍‌ଲେ ବର୍ରେନ୍, ଈଶ୍ୱରନ୍ ଆବର୍ନେଲୋଙ୍ ଆଇଡିଡ୍‌ଡକୋ, “ମନ୍‌ଡ୍ରାନ୍ ରୁଟିନ୍ ତୁମ୍ ବାତ୍ତେ ଅନ୍‌ମେଙେ ବନ୍‌ଡ ଇଶ୍ୱରନ୍ ଆମୁକ୍କାଲୋଙନ୍ ଆଡରୁଙ୍‌ଲନାଞନ୍ ଡିଲେ ବର୍ନେନ୍ ବାତ୍ତେ ଅମେଙ୍‌ତେ!”

ତି ଆତିକ୍କି ସନୁମନ୍ ମନ୍ଦିରନ୍ ଆତୋଣ୍ତୋ ଓରୋଙ୍‌ଲେ ବର୍ରେନ୍ “ଆମନ୍‌ ଇଶ୍ୱରନ୍ ଆନନ୍ ଡେନ୍, ଜାୟ୍‌ତାନ୍ ଅନ୍ତିଃଡମ୍‌ନା, ଇନି ଆସନ୍ ଗାମେଣ୍ତେନ୍ ଅନିଡନ୍ ଡକୋ ଅଜଙନମ୍ ଏଙ୍ଗାଲେ ଅପ୍ପାରାଏ ତି ଆସନ୍ ଆମନ୍ ଆଡଅଙ୍ ତାକୋବ୍‌ଲେ ଆଞମନ୍ ଆସନ୍ ଇଶ୍ୱରନ୍ ଆକବରପାଙ୍‌ମର୍ରଞ୍ଜି ଆଡଅଙ୍ ବାଞ୍‌ତଜି।”

ବନ୍‌ଡ ଯୀଶୁନ ଶାସ୍ତ୍ରଲୋଙନ୍ ସିଲଡ୍ ସନୁମନ୍ ଜାଲଙେନ୍। ଆନିନ୍ ଗାମେନ୍ “ଈଶ୍ୱରନ୍ ଆବର୍ନେଲୋଙ୍, ଆନିନ୍ ଆମନ୍‌ଡ୍ରାଞ୍ଜି ବାଞ୍‌ତଜି ଆମ୍ୱେଞ୍ଜି ପ୍ରବୁବେନ୍ ଇଶ୍ୱରନ୍ ଆଡଅଙ୍ ଏମାଲ୍‌ଡଙେ।”

ତି ଆତିକ୍କି ସନୁମନ୍ ପୁର୍ତ୍ତିନଲୋଙନ୍ ଅଡକୋନ୍ ଆଡେସା ଡ ତେତ୍ତେ ଅଡକୋନ୍ ଆବିତ୍ତିଜି ଅବ୍‌ତୁଲେ ବର୍ରେନ୍ “ଆମନ୍ ଞେନ୍ ଆଡଅଙ୍ ବରୁମ୍‌ଲେ ଲୋମ୍‌ଲିଞ୍ ଡେନ୍ ଞେନ୍ କେନ୍ ଅଡକୋନ୍ ଆମନ୍ ତିୟତମ୍।”

ଯୀଶୁନ୍ ଜାଲଙେନ୍ “ସବ୍‌ଙାୟ୍‌ନା ସନୁମ୍! ଇଶ୍ୱରନ୍ ଆବର୍ନେଲୋଙ୍ ମନ୍‌ଡ୍ରାଞ୍ଜି ଆଡଅଙ୍ ବର୍ନରନ୍ ଡେଲୋ ଆମ୍ୱେନ୍ ପ୍ରବୁବେନ୍‌ତୁମ୍ ଏଲୋମ୍‌ତେ ଡ ଆନିନ୍ ତୁମ୍ ଏସେବାତେ।”

ଯିଶୁନ୍ ସନୁମନ୍ ଆତନୋର୍‌ଲୋଙ୍ ଆନିନ୍‌ଡମ୍ ଅତିୟ୍‌ଲନ୍ ତି ଆସନ୍ ସନୁମନ୍ ଆନିନ୍ ଆଡଅଙ୍ ଅମ୍‌ରେଙ୍‌ଲେ ଜିରେନ୍। ତି ଆତିକ୍କି କବରପାଙମର୍‌ଞ୍ଜି ଇୟ୍‌ଲେ ଯୀଶୁ ଆଡଅଙ୍ ସାକେଏଞ୍ଜି।