26. ଯୀଶୁନ୍ ଆସେବାନ୍ ସୁସୁଏନ୍‌

ସନୁମନ୍ ଆତନୋର୍‌ଲୋଙ୍ ଜିନୟେନ୍ କି, ଯୀଶୁନ୍ ମଡିର୍‌ପୁରାଡାନ୍ ଆବୋର୍ସା ବାତ୍ତେ ଆନିନ୍ ଆଡ୍ରକୋନେନ୍‌ ଗାଲିଲିନ୍ ୟର୍ରନେ । ଯୀଶୁନ୍ ଞନଙନ୍ ତିୟ୍‌ଲେ ଆନ୍ନା ଆନ୍ନା ଆଡ୍ରକୋନେରେଙ୍‌ ବୁଲେଏନ୍ । ଅଡକୋ ମନ୍‌ଡ୍ରାନ୍ ଆବର୍ରନେ ମନଙ ଗାମେଞ୍ଜି ।

ଯୀଶୁନ୍ ଅଙ୍ଗା ନାଜରିତଲୋଙନ୍ ଆସନ୍ନାନ୍ ସିଲଡ୍ ଡକୋଲନେ, ତି ଆଗଡାଲୋଙ ଇୟେନ୍ । ଲୋଲୋନେ ଡିନ୍ନାଇଙନ୍ ଆନିନ୍ ମନ୍ଦିରସିଙନ୍ ଇୟେନ୍ । ଆସିଲୋଙନ୍ ନଳାନ୍ ଅନ୍ତମ୍ ଆବଃଇ ତନିୟନ୍ ଡେଲୋ ଏଙ୍ଗାଲେ ଆନିନ୍ ଯିଶାଇୟ୍ ପୁର୍ବାଃତେବର୍ନେମରନ୍ ଆବଃଇ ପଡେତନେ । ଯୀଶୁନ୍ ନଳଅନ୍ତମ୍ ଆବଃଇ ରୋଏନ୍ ଡ ତେତ୍ତେ ସିଲଡ୍ ଅସୋୟ୍ ବର୍ନେ ମନ୍‌ଡ୍ରାନ୍‌ଜି ଆମୁକ୍କାବା ପଡେଲନେ ।

ଯୀଶୁନ୍ ପଡେଲନ୍ “ଇଶ୍ୱରନ୍ ଆପୁରାଡା ଞେନ୍ ତିୟଲିଞ୍‌ ଏଙ୍ଗାଲେ ଡୋଲୟ୍‌ମର୍ଞ୍ଜି ଆମଙ୍ ମନଙବରନ୍ ଅପୁଙବର୍ତନାୟ୍, ବଣ୍ତିମର୍‌ଞ୍ଜି ଅନୁରନ୍ ଆବର୍‌ନେ, ଆକାଡୁମରଞ୍ଜି ଗନିଜନ୍ ଆବର୍ନେ ଆରି, କନଞନ୍ ତନିଡନ୍ ଆରଞାଙ୍‌ନ୍ତେଞ୍ଜି ଆମନ୍‌ଡ୍ରାଜି ଅନୁରନ୍ ଆବର୍ନେ ଅପୂଙ୍‌ବର୍ତନାୟ୍ । କେନ୍‌ଆତେ ଡିତାନ୍ଆପ୍ରବୁ ଆସନାୟୁମ୍ ଆବର୍ଷେଙ୍ ।”

ତି ଆତିକ୍କି ଯୀଶୁନ୍ ତଙ୍କୁମେନ୍, ଅଡକୋଞ୍ଜି ଆନିନ୍ ଆଡଅଙ୍ ତୁୟାୟ୍ ସିଲଡ୍ ଗିଜେଞ୍ଜି । ଯୀଶନ୍ ଶାସ୍ତ୍ରଲୋଙନ୍ ଅଙ୍ଗା ଆତେ ପଡେଲନେ ତି ଆତେ କ୍ରିଷ୍ଟନ୍ ଆଡଅଙ୍ ଆରବ୍‌ତୁୟ୍‌ତେନ୍ ଆନିଞ୍ଜି ଜନାଏଞ୍ଜି । ଯୀଶୁନ୍ ଗାମେନ୍ “ଞେନ୍ ଅଙ୍ଗା ଆବାକ୍ୟ ପଡେଲନାୟ୍ ତିଆତେ ନମି ଗଟେତେ ।” ଅଡକୋ ମନ୍‌ଡ୍ରାନ୍ ସାନ୍ନିଆଏଞ୍ଜି । ଆନିଞ୍ଜି ଗାମେଞ୍ଜି “କେନ୍ ଆତେ ଇନି ଯୋସେଫନ୍ ଆଡାଙ୍ଗଡା ଅନ୍‌ତଡ୍ ?”

ତି ସିଲଡ୍ ଯୀଶୁନ୍ ଗାମେନ୍” କେନ୍ ଆତେ ଆଜାଡିନ୍ ଡ ଅନ୍ନିଙ୍ ଆପୁର୍ବାଃତେ ବର୍ନେମର୍‌ଜି ଆଗଡାଲୋଙଞ୍ଜି ଜନାଜାନ୍ ଅଡ୍ଡେଏ । ଏଲିୟ ପୁର୍ବାଃତେ ବର୍ନେମରନ୍ ଆଡିନ୍ନା ଇସ୍ରାଏଳୋଙ୍ ଜବ୍ର ଜୁଆର୍‌ବଜନ୍ ଡକୋଏଞ୍ଜି । ବନ୍‌ଡ ଏଙ୍ଗାଲେ ୟାଗି ବର୍ଷେଙ୍ କାନ୍ତାରାଏନ୍ ଈଶ୍ୱରନ୍ ଏଲିୟ ଆଡଅଙ୍ ଇସ୍ରାଏଲ ଲୋଙନ୍ ଡକୋନ୍ ଅବୟ୍ ଜୁଆର୍‌ବଜନ୍ ଆମଙ୍ ଏର୍ପନତାୟନ୍ ଆନ୍ନା ଆଡେସାଲୋଙ୍ ଡକୋନ୍ ଅବୟ୍ ଜୁଆର୍‌ବଜନ୍ ଆମଙ୍‌ ଆପ୍ପାୟେନ୍ ।”

ଯୀଶୁନ୍ ବର୍ରନ୍ ପାଙେନ୍ “ଆରି ଇଲିଶାୟ ପୁର୍ବାଃତେ ବର୍ନେମରନ୍ ଆଡିନ୍ନା ଉସାଲ୍‌ରୋଗରନ୍ ଇସ୍ରାଏଲ ଲୋଙ୍ ଜବ୍ର ଡକୋଏନ୍ । ବନ୍‌ଡ ଇଲିଶାୟ ଆନିଞ୍ଜି ଆଡଅଙ୍ ଅନ୍ନବ୍‌ସୁକ୍କାଲଜି । ଆନିନ୍ ଇସ୍ରାଏଲନ୍ ଆବନେରା ଡେସାନ୍ ଅବୟ୍ ସିପାଇଞ୍ଜି ଆସୋଡା ନାମାନନ୍ ଆଡଅଙ୍ ଅବ୍‌ସୁକ୍କାଏନ୍ । ଅଙ୍ଗା ଆମନ୍‌ଡ୍ରାଜି ଯୀଶୁନ୍ ଆବର୍ନେ ଅମ୍‌ଡଙଞ୍ଜି ଆନିଞ୍ଜି ଯିହୁଦୀ ଡକୋଏଞ୍ଜି । ତି ଆସନ୍ ଆନିଞ୍ଜି ଏଙ୍ଗାଲେ କେନ୍ ଆବର୍ନେ ଅମ୍‌ଡଙଞ୍ଜି, ଆନିଞ୍ଜି ଆଉପ୍ରେଙନ୍ ଗୋଗୋୟ୍ ବରାବେଞ୍ଜି ।

ନାଜରିତବାଜି ମନ୍ଦିରସିଂ ସିଲଡ୍ ଯୀଶୁନ୍ ଆଡଅଙ୍ ଅମ୍‌ଡୁଙଲ୍ଲେ ତୋଣ୍ତୋନ୍ ସିଲଡ୍ ସେଲ୍ଲେ ରନବ୍ବୁନ୍‌ ଆସନ୍ ତେତ୍ତେ ଓରୋଙ୍‌ଲାଜି । ବନ୍‌ଡ ଯୀଶୁନ୍ ମନ୍‌ଡ୍ରାଗଡନ୍ ଜିର୍ରେ ନାଜରିତ ଗଡାନ୍ ସିଲଡ୍ ଡୁଙ୍‌ଲନ୍ ଜିରେନ୍ ।

ତି ଆତିକ୍କି ଯୀଶୁନ୍ ଗାଲିଲିରେଙନ୍ ଇୟେନ୍,ଗୋଗୋୟ୍ ମନ୍‌ଡ୍ରାଞ୍ଜି ଆମଙନ୍ ଇୟ୍‌ଲେଞ୍ଜି । ଅଙ୍ଗା ଆମନ୍‌ଡ୍ରାଜି ଗିୟ୍‌ଲେ ଅରପ୍ତିଏଜି, ତଙିଲନ୍ ଅର୍ରପ୍ତିଲଜି, ଅନ୍‌ମଡଙ୍‌ଲେ ଅରପ୍ତିଏଜି ଡ ଆନିଞ୍ଜି ଗୋଗୋୟ୍ ଅସୁମରଞ୍ଜି ଓରୋଙଲାଜି ।

ଭୁତଞମ୍‌ମରଞ୍ଜି ଯୀଶୁନ୍ ଆମଙ୍ ଓରୋଙ୍‌ଲାଜି । ଯୀଶୁନ୍ ଆବନାଞ୍ ବାତ୍ତେ ଭୁତଞ୍ଜି ମନ୍‌ଡ୍ରାଞ୍ଜି ଆମଙ୍ ସିଲଡ୍ ଡୁଙଲନ୍ ଜିର୍ରେଞ୍ଜି, ଆରି ଲାଙଲେଡ୍ ବେଳାନ୍ ବାବ୍ବାଲେ ବର୍ରଞ୍ଜି “ଆମନ୍ ଇଶ୍ୱରନ୍ ଆଡାଙ୍ଗଡା ଅନନ!” ଗୋଗୟ୍‌ନେ ସାନ୍ନିଆଏଞ୍ଜି ଡ ଈଶ୍ୱରନ୍ ଆଡଅଙ୍ ପୁର୍ରେଞ୍ଜି ।

ତି ଆତିକ୍କି ଯୀଶୁନ୍ ବାରଟା ମନ୍‌ଡ୍ରାଞ୍ଜି ଆଡଅଙ୍ ବାସ୍ସେଏନ୍ ଆନାଜି ଆନାପ୍ପାୟ୍ ଞଙ୍‌ନେନର୍ରଞ୍ଜି ଗନାମନ୍ ଡେଏନ୍ । ଞଙ୍‌ନେମର୍ରଞ୍ଜି ଯୀଶୁନ୍ ବାତ୍ତେ ଡକୋଲଞ୍ଜି ଡ ଆନିନ୍ ସିଲଡ୍ ଞଙ୍‌ଲଞ୍ଜି ।