27. ମନଙ୍ ଶମିରୋଣୀୟନ୍ ଆନବ୍‌ଜଙବର୍ର

ବଡିନ୍ନା, ଅବୟ୍ ଯହୁଦୀ ଶାସ୍ତ୍ରନ୍ ଜନାମରନ୍ ଯୀଶୁନ୍ ଆମନାଲ୍ ଆସନ୍ ବରେନ୍, “ଗୁରୁ, ଅନଞୁଡେନ୍ ଆନମେଙ୍ ଆଞନାଙ୍ ଆସନ୍ ଞେନ୍ ଇନି ଲୁମାୟ୍?” ଯୀଶୁନ୍ ଜାଲଙଲେ ବରେନ୍ “ଅନୋକ୍କା ଲୋଙନ୍ ଇନି ଆଇଡିଡ୍ ଡକୋ?”

ଶାସ୍ତ୍ରନ୍ ଜନାମରନ୍ ଗାମେନ୍ ଈଶ୍ୱରନ୍ ଆନୋକ୍କା ଗାମନ୍ତେ ଆମ୍ୱେନ୍ ପ୍ରବୁ ଈଶ୍ୱରବେନ୍ ଆଡଅଙ୍ ଅଡକୋ ପୁରାଡାବେନ୍, ଅଡକୋ ପ୍ରାନାବେନ୍, ଅଡକୋ ବୋର୍ସାବେନ୍ ଡ ଅଡକୋ ବୁଡ୍ଡିବେନ୍ ତିୟଲେ ଲଡୟ୍‌ବା। ଆରି ତୟ୍‌ତୟ୍‌ସିଂବେନ୍ ଆମନ୍‌ଡ୍ରା ଆଡଅଙ୍ ପୁରାଡାବେନ୍ ଅନ୍ତମ୍ ଲଡୟବା।” ଯୀଶୁନ୍ ଜାଲଙଲେ ବରେନ୍ “ଆମନ୍ ଆଜାଡିବର୍ର ବର୍ରନ୍! ତି ଆତେ ଲୁମ୍ମା ଆମନ୍ ଅମେଙତମ୍।”

ବନ୍‌ଡ ଶାସ୍ତ୍ରନ୍ ଜନାମରନ୍ ଆନିନ୍‌ଡମ୍ ଡାର୍ମିକ ଗନାମ୍‌ଡମନ୍ ଆସନ୍ ବର୍ରେନ୍, “ତୟ୍‌ତୟ୍‌ସିଂମର୍ ଞେନ୍ ଆନା?”

ଯୀଶୁନ୍ ଶାସ୍ତ୍ରନ୍ ଜନାମରନ୍ ଅବୟ୍ ଅନବ୍‌ଜଙବରନ୍ ବର୍ରେ ଜାଲଙେନ୍। “ଅବୟ୍ ମନ୍‌ଡ୍ରାନ୍ ଯିରୁଶାଲମନ୍ ସିଲଡ୍ ତଙର୍ ଗଡ୍ ଯୀରିହୋନ୍ ଜିରେନ୍।”

ମନ୍‌ଡ୍ରାନ୍ ଆଜନୁର୍‌ବେଡାନ୍, ଅବୟ୍ ରାଉମର୍ରଞ୍ଜି ଆସିଲୋଙ୍ ସନମନ୍ ଞାଙେନ୍। ଆମଙନ୍ ଡକୋନ୍ ଅଡକୋନ୍ ଆବିତ୍ତିଜି ଆନିଞ୍ଜି ପାଙେଞ୍ଜି ଆରି ଆନିନ୍ ଆଡଅଙ୍ ରନବ୍ବୁ ଜାୟ୍ ସମେଞ୍ଜି। ସିଲଡନ୍ ଆନିଞ୍ଜି ଜିରେଞ୍ଜି।

ତି ଆବେଡା ଅବୟ୍ ଯିହୁଦୀ ପୁର୍‌ପୁର୍‌ମରନ୍ ତି ଆତଙର୍ ଗଡ୍ ଜିରେନ୍। ଏଙ୍ଗାଲେ ତି ଆପୁର୍‌ପୁର୍‌ମର୍ ସନମ୍‌ଞାଙମରନ୍ ଆଅମ୍‌ଲୁଡ୍ ଗିଜେନ୍ ଆନିନ୍ ଆନ୍ନା ଆତଙର୍ ଗଡ୍ ଜିରେନ୍, ଆନା ସନାୟୁମସାୟ୍ ମରନ୍ ଆମଙ୍ ସିଲଡ୍ ଆବ୍‌ୟର୍‌ମୁକ୍କାଲନ୍ ଜିରେନ୍।”

“ତି ଆତିକ୍କି, ତି ଆତଙର୍ ଗଡ୍ ଅବୟ୍ ଲେବୀୟନ୍ ଜିର୍ରାୟ୍। (ଲେବୀୟ୍ ଗାମେନଣ୍ତେନ୍ ଅବୟ୍ ଯୀହୁଦୀଞ୍ଜି ଆକେଜ୍ଜା ଆନାଜି ପୁର୍‌ପୁର୍‌ମରଞ୍ଜି ମନ୍ଦିରନ୍ ଆକାବାଡା ମାୟେଞ୍ଜି)। ଲେବୀୟନ୍ ଜାୟ୍ ତଙରନ୍ ଆନ୍ନାଗଡ୍ ଆଙାଙ୍‌ଲେ ଜିରେନ୍ ତି ଆବାଉଲ୍ଲିମର୍ ଆନା ଆଡଅଙ୍ ରାଉମର୍ରଞ୍ଜି ରାଉଲଞ୍ଜି ଆରି ସମ୍‌ଲେ ଜିରେଞ୍ଜି।”

“ତି ଆତିକ୍କି ଅଙ୍ଗାଆମନ୍‌ଡ୍ରା ତି ଆତଙର୍ ଗଡ୍ ଜିରେନ୍ ଆନିନ୍ ଅବୟ୍ ଶମିରୋଣୀୟ୍ ମର୍ ଡକୋଏନ୍। (ଶମିରୋଣିୟଞ୍ଜି ଗାମେଣ୍ତନ୍ ଯିହୁଦିଞ୍ଜି ଆକେଜ୍ଜା ଆନାଜି ଆନ୍ନା ଆଡେସା ସିଲଡ୍ ବିବାଲଞ୍ଜି)। ଶମିରୋଣିୟଞ୍ଜି ଡ ଯିହୁଦିଞ୍ଜି ଅଲ୍‌ସଙ୍ଗତ୍ତାଏଞ୍ଜି ବନ୍‌ଡ ଶମିରୋଣିୟ ମରନ୍ ଏଙ୍ଗାଲେ ତି ଯିହୁଦିମରନ୍ ଗିଜେନ୍, ଆନିନ୍ ଆଡଅଙ୍ କାନକାରମ୍ ଡାଏନ୍। ତି ଆସନ୍ ଆନିନ୍ ଆଡଅଙ୍ ସେବାଏନ୍ ଆରି ଆପାରାରେଙନ୍ ଗଗ୍ଗଡେନ୍।”

“ତି ଆତିକ୍କି ଶମିରୋଣୀୟନ୍ ତି ଆମନ୍‌ଡ୍ରା ଅବ୍‌ଡୋଲେ ଆଗଦଲୋଙନ୍ ଅବ୍‌ତଙ୍‌କୁମ୍‌ଲେ ତୁୟାୟ୍ ଅବୟ୍ ଡରକୋନେସିଂଲୋଙ୍ ଓରୋଙେନ୍ ଅଙ୍ଗାଲୋଙ୍ ଆନିନ୍ ଆଡଅଙ୍ ସାକ୍କେଏନ୍।”

“ଆବାର୍ତ୍ତାନ୍, ତି ଶମିରୋଣିୟମରନ୍ ଆଜନିରନ୍ ଉଲନେ। ତି ଡରକୋନେସିଙନ୍ ଡକୋନ୍ ଆମନ୍‌ଡ୍ରା ଅସୋୟ୍ ଡାବ୍ବୋନ୍ ତିୟ୍‌ଲେ ଗାମେନ୍“ ଆନିନ୍ ଆଡଅଙ୍ ସାକ୍କେଆ ଆରି ଆମନ୍ କେନ୍ ସିଲଡ୍ ଗୋଗୋୟ୍ ଡାବ୍ବୋନ୍ ସାରେଏଣ୍ତେନ୍, ଞେନ୍ ଯର୍ନେଞେନ୍ ଆଡିତ୍ ତି ଆସନାରେଡାବ୍ ଇୟ୍‌ତାୟ୍ ସୁଜ୍ଜାୟ୍‌ନାୟ୍।”

ତି ସିଲଡ୍ ଯୀଶୁନ୍ ତି ଆନୋକ୍କା ଜନନାମରନ୍ ବରେନ୍ “ଆମନ୍ ଇନି ଈୟ୍ୟମ୍‌ତେ? କେନ୍ ୟାଗି ମନ୍‌ଡ୍ରାଲୋଙ୍ ଆନା ରାଉମରଞ୍ଜି ଆସିଲୋଙ୍ ଆପରଡେଏନ୍ ଅମନ୍‌ଡ୍ରା ଆତୟ୍‌ଲିସିଙ୍ ଆନାଆତେ ରାଉଲଞ୍ଜି ଡ ସମେଞ୍ଜି ? ଆନିନ୍ ଜାଲଙ୍‌ଲେ ବର୍ରନ୍, “ଆନା ଆନିନ୍ ଆଡଅଙ୍ କାନକାରମ୍ ଗାମେନ୍ ଆନିନ୍ । “ଯୀଶୁନ୍ ଆନିନ୍ ଆଡଅଙ୍ ଗାମେନ୍ “ଆମନ୍ ଜିରା ଆରି ତି ଆନ୍ତମ୍ ଲୁମା।”