28. ଗମାଙ୍ ବେଣ୍ତିଆମର୍ରନ୍
ବଡିନ୍ନା, ଅବୟ୍ ଗମାଙ୍ ବେଣ୍ତିଆମର୍ରନ୍ ଯୀଶୁନ୍ ଆମଙ୍ ଇୟ୍ଲାୟ୍ ଡ ଲାୟ୍ ବର୍ରେ, “ଏ ମନଙ୍ ଗୁରୁ, ଏର୍ନଞୁଡନ୍ ଆନମେଙ୍ ଞନାଙନ୍ ଆସନ୍ ଞେନ ଇନି ଏଙ୍ଗାନାୟ୍?” ଯୀଶୁନ୍ ଆନିନ୍ ଆଡଅଙ୍ ବର୍ରେନ, “ଞେନ୍ ଇନି ଆସନ୍ ମନଙ୍ଡମ୍ ଗାମ୍ତିଁଞ୍?” ଅବୟ୍ନେ ତୁମ୍ ମନଙ୍ ଡକୋ ଡ ଆନିନ୍ ଈଶ୍ୱରନ୍। ବନ୍ଡ ଆମନ୍ ଏର୍ନଞୁଡନ୍ ଆନମେଙ୍ ଞନାଙନ୍ ଆସନ୍ ଇସୁମେଣ୍ତେନ୍ ଈଶ୍ୱରନ୍ ଆବ୍ନାୟଞ୍ଜି ଞଣ୍ତ୍ରମ୍ନା।
ଆନିନ୍ ବର୍ରେନ୍ “ଅଙ୍ଗା ଅଙ୍ଗା ଆବନାୟ୍ଜି ଞେନ୍ ଞଣ୍ତ୍ରନେନ୍ ଡେତେ?” ଯୀଶୁନ୍ ଗାମେନ୍ “ସମ୍ୱବ୍ମର୍ ଡଙ୍ନେ। ରାଉଡଙ୍ନେ। ପାତିଆବର୍ରନ୍ ବର୍ରଡଙ୍ନେ। ବାପ୍ପାନମ୍ ଡ ନନନମ୍ ଆଡଅଙ୍ ମାନ୍ନେଆ ଡ ତୟ୍ତୟ୍ସିଂନମ୍ ଆମର୍ରା ଆଡଅଙ୍ ପୁରାଡାନମ୍ ଅନ୍ତମ୍ ଲଡଜା।”
ବନ୍ଡ ତି ଆବେଣ୍ତିଆ ଆନିନ୍ ଆଡଅଙ୍ ବର୍ରେନ୍ “ଞେନ୍ କେନ୍ ଅଡକୋନ୍ ଆସନ୍ନାଞେନ୍ ସିଲଡ୍ ଞଣ୍ତ୍ରମଲନ୍ ଜିର୍ରତାୟ୍। ଏର୍ନଞୁଡେନ୍ ଆନମେଙ୍ ଆସନ୍ ଞେନ୍ ଇନି ଏଙ୍ଗାନାୟ୍?” ଯୀଶୁନ୍ ଆନିନ୍ ଆଡଅଙ୍ ଲଡଜେନ୍.
ଯୀଶୁନ୍ ଜାଲଙ୍ଲେ ବର୍ରେନ୍ “ଆମନ୍ ମନ୍ନଙ୍ ସାଜେଣ୍ତେନ୍, ଜିର୍ରା ଡ ଅଡକୋନ୍ ଜନବ୍ନମ୍ ଇୟ୍ତମ୍ମା ଡ ସନାୟ୍ସାୟମର୍ରଞ୍ଜି ଆଡଅଙ୍ ଦାନ୍ ଇୟ୍ତିୟା ଡ ଆମନ୍ ରୁଆଙନ୍ ଆତଙ୍କା ଞାଙତେ। ତି ଆତିକ୍କି ୟର୍ରନ୍ ଞେନ୍ ସଣ୍ତୋଞିଁୟ୍।
ଯୀଶୁନ୍ ଆବର୍ରନେ ବେଣ୍ତିଆମର୍ରନ୍ ଏଙ୍ଗାଲେ ଅମ୍ଡଙେନ୍, ଆନିନ୍ ମୁସୁକ୍କାଏନ୍, ଇନି ଆସନ୍ ଆନିନ୍ ଅବୟ୍ ଗମାଙ୍ମର୍ର ଡକୋଏନ୍ ଡ ଡିଅଙ୍ ତଙ୍କାନ୍ ଡକୋଏନ୍ ତି ଆତେ ଅନୁମ୍ରେଙନ୍ ଅସାୟ୍ଲୋ। ଆନିନ୍ ଆବ୍ୟର୍ର ମୁକ୍କାଲନ୍ ଯୀଶୁନ୍ ଆମଙ୍ ସିଲଡ୍ ଜିର୍ରେନ୍।
ତି ଆତିକ୍କି ଯୀଶୁନ୍ ଆ ଞନ୍ଙନେମର୍ରଞ୍ଜି ଆଡଅଙ୍ ବର୍ରେଞ୍ଜି, “ଗମାଙମର୍ରନ୍ ଈଶ୍ୱରନ୍ ଆରାଜ୍ୟ ଗନ୍ନେନ୍ ଗୋଗୋୟ୍ ଡ’ଣ୍ତ! ଓଃ, ଗମାଙ୍ମର୍ ରୁଆଙନ୍ ଆଗନ୍ନେ ସିଲଡ୍ ସୁ୍ଞ୍ଚିନ୍ ଆପତୁଡ୍ଗଡ୍ ଓଟନ୍ ଆଗନ୍ନେ ସଯ୍ୟ୍ଡମ୍।
ଯୀଶୁନ୍ ଆବର୍ରନ୍ ଆବର୍ରନେ ଏଙ୍ଗାଲେ ଞଙ୍ନେମର୍ରଞ୍ଜି ଅମ୍ଡଙେଞ୍ଜି ଆନିଞ୍ଜି ସାନ୍ନିଆଲେ ବର୍ରେଞ୍ଜି “ଏନେଲେ ଡେନ୍ ଆନ୍ନା ଅନୁରନ୍ ଞାଙତେ?”
ଯୀଶୁନ୍ ଞଙ୍ନେମର୍ରଞ୍ଜି ଆଡଅଙ୍ ଆଙାଙ୍ଲେ ବର୍ରେଞ୍ଜି “ମର୍ରାନ୍ ଆଗନିୟ୍ଗିୟ୍ଲୋଙ ଅଗଡେଲେ, ବନ୍ଡ ଈଶ୍ୱରନ୍ ଅଗନିୟ୍ଗିୟ୍ଲୋଙ ଅଡକୋନ୍ ଗଡେଲତେ।”
ପିତରନ୍ ଯୀଶୁନ୍ ଆଡଅଙ୍ ବର୍ରେନ୍ “ଇନ୍ଲେନ୍ ଅଡକୋନ୍ ଉମ୍ରେଙଲେ ଆମନ୍ ଏସନ୍ଡୋଙ୍ତମ୍। ଇଲ୍ଲେନ୍ ଆସନ୍ ଇନି ଞନାଙନ୍ ଡକୋ?”
ଯୀଶୁନ୍ ଗାମେନ୍ “ଅଙ୍ଗା ଆମନ୍ଡ୍ରା ଞେନ୍ ଆସନ୍ ଅସିଙନ୍, ଆଡୁକ୍ରିନ୍,ତନାନନ୍,ବାପ୍ପାନ୍,ନନନ୍,ପସିଜଞ୍ଜି ଡ ଅଡକୋନ୍ ଆବିତ୍ତିଞ୍ଜି ଉମ୍ରେଙତେ ଡ ବଶୁଆ ଗୁନା କେନ୍ ଆପୁର୍ତ୍ତିଲୋଙ୍ ଡ ଅନ୍ଞୁଡେନ୍ ଆନମେଙ୍ ଞାଙତେ। ବନ୍ଡ ଆପର୍ତମୁମର୍ରନ୍ ଲାଙଲେଡ୍ ତିକ୍କିତଜି, ଆତିକ୍କିମର୍ରଞ୍ଜି ଆମୁଙ୍ତଜି।
ବାଇବଲର ଏକ କାହାଣୀ:ମାଥିଉ ୧୯:୧୬-୩୦; ମାର୍କ ୧୦:୧୭-୩୧; ଲୂକ ୧୮:୧୮-୩୦
Free to use, adapt, and share under an open license (CC BY-SA 4.0).