29. ଇର୍ସୋୟୋମ୍ ତଡ୍ନ୍ ଆକମ୍ୱାରୀ ଆନବ୍ଜଙ୍ବର୍
ବଡିନ୍ନା, ପିତରନ୍ ଯୀଶୁନ୍ ବରେନ୍, “ଗୁରୁ, ବୋଞାଙ୍ଞେନ୍ ଞେନ୍ ଆଡଅଙ୍ ସଙ୍ଗତାଲେ ଇର୍ସେନ୍ ଲୁମେନ୍ ଡେନ୍ ଞେନ୍ ଡିଅଙ୍ଗ୍ ତର ଆନିନ୍ ଆଡଅଙ୍ ତମ୍ମାଡାୟ୍? ଇନି ସାତତର ଜାୟ୍?” ଯୀଶୁନ୍ ଗାମେନ୍ “ସାତତର ତଡ୍, ବନ୍ଡ ସାତତର ସତୁରିଗୁନା ଜାୟ୍!” କେନ୍ଲୋଙ୍, ଯୀଶୁନ୍ ଆବର୍ରନ୍ ଆଗରାମ୍ଗାମ୍ ଡକୋଏନ୍ ଡ ଇନ୍ଲେନ୍ ଡିତାନ୍ ତନମାଡନ୍ ତନିୟନ୍ ଡେତେ। ତି ଆତିକ୍କି ଯୀଶୁନ୍ ଅବୟ୍ ଅନବ୍ଜଙ୍ବରନ୍ ବର୍ରନେ।
ଯୀଶୁନ୍ ଗାମେନ୍ “ଈଶ୍ୱରନ୍ ଆଡେସା ବୟ୍ ରାଜାରନ୍ ଅନ୍ତମ୍ ଏଙ୍ଗାଲେ ଆନିନ୍ ଆକମ୍ୱାରୀଞ୍ଜି ସରିନ୍ ତଙ୍କୁମଲେ ଡନିଡିନ୍ ଅନବ୍ଗଡନ୍ ଆସନ୍ ଗବ୍ରିୟ୍ୟଲଞ୍ଜି। ଆକମ୍ୱାରୀଞ୍ଜି ଲୋଙ୍ ଅବୟ୍ନେ ୨,୦୦,୦୦୦ ବର୍ଷେଙ୍ ଗୋଗୋୟ୍ ଡାବୋନ୍ ସାଉଲନେ।”
ଇନି ଆସନ୍ଡେନ୍ ତି ଆକମ୍ୱାରୀ ଡାବୋନ୍ ସୁଜାୟଲନ୍ ଅରପ୍ତିଲୋ, ତି ଆସନ୍ ରାଜାନ୍ ଗାମେନ୍ “କେନ୍ ଆମନ୍ଡ୍ରା ଡ କେନ୍ ଆକୁତ୍ତମାଞ୍ଜି କମ୍ୱାରୀନ୍ ଆସନ୍ ତମ୍ଲେ ଡାବୋନ୍ ସୁଜାୟ୍ନେତୋ।”
ତି ଆକମ୍ୱାରୀ ରାଜା ଆଜଙ୍ଗନ୍ ୟମ୍ଲେ ବରନେ “ଞେନ୍ ଆଡଅଙ୍ କାନକାରମ୍ଲେ ଜଗେଇଁୟ୍, ଆରି ଞେନ୍ ଅମଙ୍ନମ୍ ସାଉନ୍ ଡକୋନ୍ ଅଡକୋନ୍ ଆସାଉ ଞେନ୍ ସୁଜାୟ୍ତନା। ‘ରାଜାନ୍ ତି ଆକମ୍ୱାରୀ ଆଡଅଙ୍ ଇର୍ସୋୟୋମ୍ଡାଏନ୍, ତି ଆସନ୍ ଆନିନ୍ ଅଡକୋନ୍ ଆସାଉନ୍ ଅମ୍ରେଙେନ୍।”
ବନ୍ଡ ତି ଅକମ୍ୱାରୀ ଏଙ୍ଗାଲେ ରାଜାନ୍ ଆମଙ୍ ସିଲଡନ୍ ଜିରେନ୍, ତି ଆବେଡା ଆନିନ୍ ଆଗଡିକମ୍ୱାରୀନ୍ ରବାଙେନ୍ ଆନା ଆମନ୍ ସିଳଡ୍ ଉଞ୍ଜି ଆଙ୍ଗାୟ୍ ଆସାଉ ଆସୁଜାନେନ୍ ଡକୋଏନ୍। ତି ଆକମ୍ୱାରୀ ଆଗଡିକମ୍ୱାରୀନ୍ ଆସଙ୍କା ଞମେନ୍ ଡ ବରେନ୍ “ମଙଞେନ୍ ସିଲଡ୍ ଆପ୍ରାଙେନ୍ ଆସାଉ ସୁଜାୟ୍ନା!’
“ଆଗଡିକମ୍ୱାରୀନ୍ ତି ଆକମ୍ୱାରୀ ଆଜଙ୍ଗ୍ଞମ୍ଲେ ବରେନ୍ ‘ କାନ୍କାରମ୍ଲେ ଞେନ୍ ଆଡଅଙ୍ ଜଗେଇଁୟ୍, ଆରି ଞେନ୍ ଆସ୍ରାଉଲନାଞନ୍ ଆସାଉ ଆମନ୍ ଆଡଅଙ୍ ଆବ୍ୟର୍ରତମ୍। ବନ୍ଡ ତି ଆତେ ଏର୍ତନୁବନ୍ ଆନିନ୍ ସାଉନ୍ ଅରଙ୍ସୁଜାନେନ୍ ଜାୟ୍ ବଣ୍ତିସିଂ ଲୋଙନ୍ ଡକୋଏନ୍।
“ଅଙ୍ଗା ଆକମ୍ୱାରୀଜି କେନ୍ ଆତେ ଗିଜେଞ୍ଜି, ଆନିଞ୍ଜି ସାନ୍ନିଏଞ୍ଜି। ଆନିଞ୍ଜି ରାଜାନ୍ ଆମଙ୍ ଇୟେଞ୍ଜି ଡ ଅଡକୋନ୍ ଆବରନେ ଲିବରେଜି।
ରାଜା ତି ଆକମ୍ୱାରୀ ଓଡ୍ଡେଲେ ବରେନ୍, ‘ଆମନ୍ ଅବୟ୍ ପେଲ୍ଲା କମ୍ୱାରୀ!” ଆମନ୍ ଞେନ୍ ଆଡଅଙ୍ ତନମାଡନ୍ ଆବ୍ରେଲିଞନ୍ ଞେନ୍ ସାଉନମ୍ ଅସକୋନ୍ ଅମ୍ରେଙ୍ଲାୟ୍! ଆମନ୍ ନିୟ୍ ଏତ୍ତେଲେମା ଲୁମ୍ତେବନ୍। ରାଜା ଗୋଗୋୟ୍ ବରାବେନ୍ ଡ ଆନିନ୍ ତି ଆକମ୍ୱାରୀ ଆଡଅଙ୍ ସାଉନ୍ ଅରଙ୍ସୁଜାନେନ୍ ଜାୟ୍ ବଣ୍ତିସିମଲୋଙନ୍ ଡକୋଏନ୍।
ତି ଆତିକ୍କି ଯୀଶୁନ୍ ଗାମେନ୍ “ଆନାଜି ଆବୋଞାଙଞ୍ଜି ଆଡଅଙ୍ ତନମାଡନ୍ ଅତିୟେଜି ରୁଆଙବାପ୍ପାଞେନ୍ ଜାୟ୍ ଆନିଞ୍ଜି ଲୋଙ୍ ଏତ୍ତେଲେମା ଲୁମ୍ତେ।
ବାଇବଲର ଏକ କାହାଣୀ:ମାଥିଉ ୧୮:୨୧-୩୫
Free to use, adapt, and share under an open license (CC BY-SA 4.0).