30. ଯୀ୍ଶୁନ୍ ମଲ୍ଲୟ୍ ଅଜାର ଆମନ୍ଡ୍ରାଜି ଅବ୍ଜୋମ୍ତେ
ଗୋଗୋୟ୍ ଆନ୍ନା ଆନ୍ନା ଆସାଇରେଙ୍ ଅପୁଙ୍ବର୍ନେ ଡ ଞନଙନ୍ ଆତନିୟ୍ ଆସନ୍ ଯୀଶୁନ୍ ଆଞନଙନେମର୍ରଞ୍ଜି ଆଡଅଙ୍ ଆପ୍ପାୟେନ୍। ଯିଶୁନ୍ ଅଙ୍ଗାଲୋଙ୍ ଡକୋଲନେ ତି ତେତ୍ତେ ଆନିଞ୍ଜି ୟର୍ରଞ୍ଜି, ଇନିଃଇନି ଡେଲୋ ତି ଆତେ ଆନିଞ୍ଜି ଆନିନ୍ ଆଡଅଙ୍ ବରେଞ୍ଜି। ତି ସିଲଡ୍ ଯୀଶୁନ୍ ସମେୟଁଡ୍ରା ଆଅଡିଡ୍ ଗଡ୍ ଡକୋନ୍ ଅବୟ୍ ଆରୁଙ୍ଗ୍ରୁଙ୍ଗ୍ ଲୋଙନ୍ ଜନୁରନ୍ ଆସନ୍ ଆନିଞ୍ଜି ଆଡଅଙ୍ ବରେଞ୍ଜି।ତି ଆସନ୍, ଆନିଞ୍ଜି ଅବୟ୍ ଡୋଙ୍ଗାଲୋଙନ୍ ତଙ୍କୁମେଞ୍ଜି ଆରି ସମେୟଁଡ୍ରା ଆଅଡିଡ୍ ଗଡ୍ ଜିରେଞ୍ଜି।
ବନ୍ଡ ତେତ୍ତେ ଗୋଗୋୟ୍ ମନ୍ଡ୍ରାନ୍ ଆସନ୍ ଯୀଶୁ ଡ ଆଞଙନେମର୍ରଞ୍ଜି ଡୋଙ୍ଗାନ୍ ଅମ୍ରେଙଲେ ଜିରେଞ୍ଜି। ତି ଆମନ୍ଡ୍ରାଜି ଆମଙନ୍ ଆନିୟ୍ ଆସନ୍ ଆନିଞ୍ଜି ଆମୁଙ୍ ଆନେଙ୍ସମେୟଁଡ୍ରାନ୍ ଇର୍ରେଜିରେଞ୍ଜି। ତି ଆସନ୍ ଯୀଶୁନ୍ ଡ ଆଞଙନେମର୍ରଞ୍ଜି ଏଙ୍ଗାଲେ ତୁଙେଞ୍ଜି, ଗୋଗୋୟ୍ ମନ୍ଡ୍ରାନ୍ ସମେୟଁଡ୍ରାନ୍ ଆଅଡିଡ୍ ଗଡ୍ ଆନିଞ୍ଜି ଆଡଅଙ୍ ଜଗେଲେ ଡକୋଲଞ୍ଜି।
ଆନିଞ୍ଜି ୫୦୦୦ ଓବ୍ବାମରନ୍ ଡକୋଏଞ୍ଜି, ଆଇମର୍ରଞ୍ଜି ଡ ପସିଜଞ୍ଜି ଅଡିଡିଲନେ। ଯୀଶୁନ୍ କେନ୍ ଆମନ୍ଡ୍ରାଜି ଆଗ୍ରିଜେନ୍ ଇର୍ସୋୟୋମ୍ ଡାଏନ୍। ଯୀଶୁନ୍ ଆସନ୍ କେନ୍ ଆମନ୍ଡ୍ରଜି ଅବୟ୍ ତୁର୍ମେଃମ୍ମର୍ ତଡନ୍ ଆମେଣ୍ତାଜି ଆନ୍ତମ୍ ଡକୋଏଞ୍ଜି। ତିଆସନ୍ ଆନିନ୍ ଆନିଞ୍ଜି ଆଡଅଙ୍ ଞନଙନ୍ ଡ ଆନିଞ୍ଜିଲୋଙ ଆନାଜି ଅସୁଏଞ୍ଜି ଆନିଞ୍ଜି ଆଡଅଙ୍ ଅବ୍ସୁକାଏଞ୍ଜି।
ଆସାଲୁମନ୍, ଞଙନେମର୍ରଞ୍ଜି ଯୀଶୁନ୍ ଆଡଅଙ୍ ବର୍ରେଞ୍ଜି “ଓୟୋଁଙନ୍ ବ୍ବୁବେନ୍ନି ଡ ଆତୁୟା ଜନ୍ ଅନୁଙ୍ ଗଡାନ୍ ଅବୟ୍ତଡ୍। ମନ୍ଡ୍ରାଞ୍ଜି ଆପ୍ପାୟା ଏଙ୍ଗାଲେ ଆନିଞ୍ଜି ଜିର୍ରେ ତି ଜୋମ୍ଲେରପ୍ତିଏଜି।”
ବନ୍ଡ ଯୀଶୁନ୍ ଆଞଙ୍ନେମରଞ୍ଜି ଆଡଅଙ୍ ବର୍ରେଞ୍ଜି “ଆମ୍ୱେନ୍ ଆନିଞ୍ଜି ଆଡଅଙ୍ ଜନୋମନ୍ ତିୟ୍ବାଜି!” ଆନିଞ୍ଜି ଜାଲଙଲେ ବର୍ରଞ୍ଜି “ଇନ୍ଲେନ୍ ତି ଆତେ ଏଙ୍ଗାଲେ ତୁବ୍ଲେ ଏରପ୍ତିଆ? ଅମଙ୍ଲେନ୍ ମଲ୍ଲୟ୍ ରୁଟିନ୍ ଡ ବାଗୁ ଅୟନ୍ ଡକୋ।”
ଯୀଶୁନ୍ ଆଞଙ୍ନେମରଞ୍ଜି ଆଡଅଙ୍ ବରେଞ୍ଜି ମନ୍ଡ୍ରାଞ୍ଜି ତୋଣ୍ତୋଗାବ୍ ରେଙନ୍ ପଚାଶ ପଚାଶ ଏମେଲେ ତନକୁମନ୍ ଆସନ୍ ବର୍ବାଜି।
ତି ଆତିକ୍କି ଯିଶୁନ୍ ତି ପାଞ୍ଚଟା ରୁଟିନ୍ ଡ ବାଗୁ ଅୟନ୍ ପାଙଲେ ରୁଆଙ୍ଗଡ୍ ଆଙାଙେନ୍, ଆରି ତି ଆଜନୋମ୍ ଆସନ୍ ଈଶ୍ୱରନ୍ ସନେନନ୍ ତିୟେନ୍।
ତି ଆତିକ୍କି ଯୀଶୁନ୍ ରୁଟିନ୍ ଡ ଅୟନ୍ ସନ୍ନାସନ୍ନା ଏମେଲେ ରେବେନ୍। ଆନିନ୍ ତି ଆତେଜି ମନ୍ଡ୍ରାଞ୍ଜି ଆତନିୟ୍ ଆସନ୍ ଞଙନେମରଞ୍ଜି ଆଡଅଙ୍ ତିୟେଞ୍ଜି। ଞଙନେମରଞ୍ଜି ତି ଆଜନୋମ୍ ବାନ୍ତେଏଞ୍ଜି, ଆରି ଅନଞୁଲୋ। ଅଡକୋଞ୍ଜି ବୋଓପରାୟଁ ଜୋମେଞ୍ଜି।
ତି ଆତିକ୍କି, ଞଙନେମରଞ୍ଜି ମନ୍ଡ୍ରାଞ୍ଜି ଆଜନୋମ୍ଲୋଙ୍ ଆର୍ଲାଗାଏନ୍ ଆଜନୋମ୍ ରୁକ୍କୁଏଞ୍ଜି। ଅଡକୋନ୍ ଆଜନୋମ୍ ମଲ୍ଲୟ ରୁଟିନ୍ ଡ ବାଗୁ ଅୟଲୋଙନ୍ ଡେଲୋ।
ବାଇବଲର ଏକ କାହାଣୀ:ମାଥିଉ ୧୪:୧୩-୨୧; ମାର୍କ ୬:୩୧-୪୪; ଲୂକ ୯:୧୦-୧୭; ଯୋହନ ୬:୫-୧୫
Free to use, adapt, and share under an open license (CC BY-SA 4.0).