31. ଯୀଶୁନ୍ ତୋଣ୍ତୋଡାଆଲୋଙନ୍ ତଙିୟ୍‌ତନେ

ତି ଆତିକ୍କି ଯିଶୁନ୍ ଞଙନେମରଞ୍ଜି ଆଡଅଙ୍ ଡୋଙ୍ଗାଲୋଙନ୍ ଡାୟ୍‌ଲେ ସମେୟଁଡ୍ରା ଆଅଡିଡ୍ ଗଡ୍ ଜନୁରନ୍ ଆସନ୍ ଅମ୍‌ରେଙେଞ୍ଜି। ଯୀଶୁନ୍ ମନ୍‌ଡ୍ରାଞ୍ଜି ଆରାପ୍ପାୟେନ୍ ସିଲଡ୍, ଆନିନ୍ ବେବ୍ବର୍ନେନ୍ ଆସନ୍ ଅବୟ୍ ବରୁନ୍ ଡାଜେନ୍। ଯୀଶୁନ୍ ତେତ୍ତେ ଆତୁନ୍‌ସନ୍ ଡକୋଏନ୍, ଆରି ଆନିନ୍ ତମ୍ପଗଲ୍ ତେତ୍ତେ ବେବ୍ବର୍‌ନେ।

ତି ଆବେଡା, ଞଙନେମରଞ୍ଜି ଆଡୋଙ୍ଗାଞ୍ଜି ସଲ୍ଲାୟେଞ୍ଜି, ବନ୍‌ଡ ଆମଡ୍ଡି ତଗଲନ୍ ଆନିଞ୍ଜି ସମେୟଁଡ୍ରାନ୍ ଆମଡ୍ଡି ତୁଙେଞ୍ଜି। ଆନିଞ୍ଜି ବାଡ’ଣ୍ତ ଡୋଙ୍ଗାନ୍ ସଲ୍ଲାୟେଞ୍ଜି ଇନି ଆସନ୍ ଗାମେଣ୍ତେନ୍ ଆମଙ୍‌ବାଗଡଞ୍ଜି ରୁଙ୍ଗେତିରନ୍ ଅଡୋଲାୟ୍।

ତି ଆତିକ୍କି ଯୀଶୁନ୍ ବେବ୍ବର୍ନେନ୍ ଅବ୍‌ଗଡେନ୍ କି ଆରି ଞଙନେମର୍‌ଞ୍ଜି ଆମଙ୍ ଜିର୍ରେନ୍। ଆନିନ୍ ସମେୟଁଡ୍ରାନ୍ ଆତୋଣ୍ତୋଡା ଲୋଙନ୍ ତଙିଲନ୍ ଡୋଙ୍ଗାଗଡ୍ ତଙିଲନ୍ ଜିର୍ରାୟ୍।

ଆନିଞ୍ଜି ଏଙ୍ଗାଲେ ଯୀଶୁନ୍ ଗିଜେଞ୍ଜି ତି ଆବେଡା ଞଙ୍‌ନେମର୍‌ଞ୍ଜି ବତଙେଞ୍ଜି, ଇନି ଆସନ୍ ଗାମେଣ୍ତେନ୍ ଆନିଞ୍ଜି ଅବୟ୍ ଭୁତ ଗିୟ୍‌ତଜି ଗାମ୍‌ଲେ ଇୟ୍ୟମେଞ୍ଜି। ଯୀଶୁନ୍ ଜନାଏନ୍ ଡ ଆନିଞ୍ଜି ବତଙ୍‌ତଜି ଗାମଲେ, ତି ଆସନ୍ ଆନିନ୍ ଆନିଞ୍ଜି ଆଡଅଙ୍ ଓଡେଲେ ବରେଞ୍ଜି “ବତଙଡଙ୍‌ବେନ୍! କେନ୍ ଞେନ୍ !”

ତି ଆତିକ୍କି ପିତରନ୍ ଯୀଶୁନ୍ ଆଡଅଙ୍ ବରେନ୍, “ଗୁରୁ, ତି ଆତେ ଆମନ୍ ଡେନ୍, ଆତୋଣ୍ତୋଡାନ୍ ତଙିଲନ୍ ଜନୁରନ୍ ଆସନ୍ ବାଞିୟ୍।” ଯୀଶୂନ୍ ପିତରନ୍ ଆଡଅଙ୍ ବରେନ୍ “ୟାଃଆ!”

ତି ଆସନ୍ ପିତରନ୍ ଡୋଙ୍ଗାନ୍ ସିଲଡ୍ ତୁଙଲନ୍ ଯୀଶୁନ୍ ଆମଙ୍ ଆତୋଣ୍ତୋଡାନ୍ ଜନୁରନ୍ ଆସନ୍ ଉଲ୍ଲନେ। ବନ୍‌ଡ ଅସୋୟ୍ ସଙାୟ୍ ଜିରେନ୍ ଆତିକ୍କି, ଆନିନ୍ ଯୀଶୁନ୍ ଆମଙ୍ ସିଲଡ୍ ଆବ୍‌ଡିଡ୍‌ମଃଲନ୍ ଡ ରିଙ୍ଗେତିରନ୍ ଗିଜେନ୍ ଆରି ଗୋଗୋୟ୍ ରିଙ୍ଗନ୍ ଆରିଙ୍ଗେତେନ୍ ଅମ୍‌ଲନେ।

ତି ଆସନ୍ ପିତରନ୍ ବତଙେନ୍ ଆରି ସମେୟଁଡ୍ରା ଲୋଙନ୍ ପତୁଲେନ୍। ଆନିନ୍ ବାବ୍ବାଲେ ବରନେ “ଗୁରୁ, ଞେନ୍ ଆଡଅଙ୍ ଅବ୍‌ମେଙିୟ୍!” ଯୀଶୁନ୍ ଅବ୍‌ତାଡନ୍ ଜିର୍ରେ ଆନିନ୍ ଆଡଅଙ୍ ଞମେନ୍। ତି ଆତିକ୍କି ଆନିନ୍ କପିତରନ୍ ଆଡଅଙ୍ ବରେନ୍ “ଏ ଅସୋୟଡର୍ନେମର୍, ଆମନ୍ ଇନି ଆସନ୍ ଅଡର୍ରନେ?”

ଏଙ୍ଗାଲେ ପିତରନ୍ ଡ ଯୀଶୁନ୍ ଡୋଙ୍ଗାଲୋଙନ୍ ଜିରେଞ୍ଜି, ଏତ୍ତେଲେ ଅବ୍‌ତାଡନ୍ ରିଙ୍ଗେନ୍ ରଏଏନ୍ ଡ ଡାଆନ୍ ଲବିଡ୍ଡିଏନ୍। ଞଙନେମର୍‌ଞ୍ଜି ସାନ୍ନିଆଏଞ୍ଜି। ଆନିଞ୍ଜି ଯୀଶୁନ୍ ଆଡଅଙ୍ ସେନ୍‌ଲେ ଗାମେଞ୍ଜି “ଆଜାଡିନ୍ ଆମନ୍ ଇଶ୍ୱରନ୍ ଆଡାଙ୍ଗଡା ଅନନ।”