32. ଯୀଶୁନ୍ ଅବୟ୍ ଆମବୁଡ୍ମରନ୍ ଡ ଅବୟ୍ ଆସୁ ଆଇମରନ୍ ଅବ୍ସୁକ୍କାତେ
ବମିୟ୍ତା, ଯୀଶୁନ୍ ଡ ଆଞଙ୍ନ୍ନେମରଞ୍ଜି ଅବୟ୍ ଡୋଙ୍ଗାଲୋଙନ୍ ଡାୟ୍ଲେ ଗରାଶିୟବାଜି ଆଡ୍ରକୋତଞ୍ଜି ବୋଙ୍ସଙ୍ଡାନ୍ ଆଅଡିଗଡ୍ ଇୟେଞ୍ଜି ।
ଏଙ୍ଗାଲେ ଆନିଞ୍ଜି ବୋଙ୍ସଙ୍ଡାନ୍ ଆଅଡିଗଡ୍ ତୁଙେଞ୍ଜି,ଅବୟ୍ ଆମବୁଡ୍ମରନ୍ ଯୀଶୁନ୍ ଆମଙ୍ ଇର୍ରାୟ୍ ।
କେନ୍ ଆମନ୍ଡ୍ରା ଏତ୍ତେଲେ ଆବୋର୍ସା ଡକୋଏନ୍ ଅନ୍ନିଙ୍ ଆମନ୍ଡ୍ରା ଆନିନ୍ ଆଡଅଙ୍ ଞମ୍ଲେ ଅର୍ରପ୍ତିଲଜି । ମନ୍ଡ୍ରାଞ୍ଜି ଆସିନ୍ ଆଜଙନ୍ ଶିଙ୍କୁଡିନ୍ ବାତ୍ତେ ଜିଲେ ଡକ୍କୋଏଞ୍ଜି । ବନ୍ଡ ଆନିନ୍ ତି ଆତେଜି ଅବ୍ତଡାଜେନ୍ ।
ମନ୍ଡ୍ରାନ୍ ତେତ୍ତେରେଙ୍ ଡକୋନ୍ ତରିଲ୍ନ୍ନେରେଙନ୍ ଡକୋଲନେ । କେନ୍ ଆମନ୍ଡ୍ରା ଡିତାନ୍ ତମ୍ୱା ତଗଲ୍ ଅକ୍କରାନ୍ ବାବ୍ବବ୍ଲେ ଡକୋଲନ୍ । ଆନିନ୍ ସିନ୍ଡ୍ରିନ୍ ଅଜ୍ଜିଜିଲନ୍ ଆରି ନମିନ୍ ନମିନ୍ ଅରେଙନ୍ ବାତ୍ତେ ଆନିନ୍ଡମ୍ ତିଡ୍ଲନ୍ ।
ଏଙ୍ଗାଲେ ଆନିନ୍ ଯୀଶୁନ୍ ଆମଙ୍ ତୁଙ୍ଲାୟ୍, ଆନିନ୍ ତି ଆମୁକ୍କାବାନ୍ ତୁଡୁମେନ୍ । ଯୀଶୁନ୍ ତି ଆବୁତ ଆଡଅଙ୍ ବରେନ୍ “କେନ୍ ଆମନ୍ଡ୍ରା ଆମଙ୍ ସିଲଡ୍ ଡୁଙ୍ଲନ୍ଜିରାୟ୍ !”
ଆମବୁଡ୍ମରନ୍ ଆକ୍କରାନ୍ ଅବ୍ସର୍ରଙ୍ଲନ୍ ବର୍ରନ୍ “ଏ ଈଶ୍ୱରନ୍ ଆଅନ୍ ଯୀଶୁନ୍ ଆମନ୍ ସରିନ୍ ଞେନ୍ ଇନି ଡକୋ ? କାନକାରମ୍ ଗାମିୟ୍ ଞେନ୍ ଆଡଅଙ୍ ଡଣ୍ତନ୍ ତିୟଡଙିୟ୍ !” ତି ସିଲଡ୍ ଯୀଶୁନ୍ ତି ବୁତନ୍ ଆଡଅଙ୍ ବରେନ୍ “ଅଞୁମ୍ନମ୍ ଇନି ? ଅନିନ୍ ଜାଲଞେନ୍ “ଅଞୁମ୍ଞେନ୍ ଆକୁଡାୟ୍, ଇନିଆସନ୍ ଗାମେଣ୍ତେନ୍ ଇନ୍ଲେନ୍ ଗୋଗୋୟ୍ନ୍ନେଡମ୍ ।” (ରୋମୀୟ ସିପାଇନ୍ ଅକୁଡାୟ୍ଲୋଙ୍ ଡକୋନ୍ ଗୋଗୋୟ୍ ମାଡିଞ୍ ଆତେ ଆବୟ୍ ଆରୁକ୍କୁମର୍।)
ବୁତଞ୍ଜି ଯୀଶୁନ୍ ଆଡଅଙ୍ କାକୁର୍ତ୍ତିଲନ୍ ବରେଞ୍ଜି “କାନକାରମ୍ ଗାମ୍ଲେନ୍ ଇନ୍ଲେନ୍ ଆଡଅଙ୍ ସଣ୍ତିଲେନ୍ ସିଲଡ୍ ଆନ୍ନାରେଙ୍ ଆପ୍ପାୟ୍ଡଙ୍ଲେନ୍!” ତି ଆତୟ୍ତଜନ୍ ଅବୟ୍ ବରୁରେଙନ୍ କିମ୍ୱୋନଞ୍ଜି ଜୋମ୍ଜୋମ୍ଲଞ୍ଜି । ତି ଆସନ୍ ବୁତଞ୍ଜି ଯୀଶୁନ୍ ଆଡଅଙ୍ କାକୁର୍ତ୍ତିଲନ୍ ବରେଞ୍ଜି “ତି ଆପାଲ୍ନ୍ତେଙ୍ ଇନ୍ଲେନ୍ ଆଡଅଙ୍ ତି ଆକିମ୍ୱୋନ୍ଞ୍ଜିଲୋଙ୍ ଆପ୍ପାୟ୍ଲେନ୍ !” ଯୀଶୁନ୍ ଗାମେନ୍ “ଜିର୍ବା!“
ବୁତଞ୍ଜି ତି ଆମନ୍ଡ୍ରା ସିଲଡ୍ ଡୁଙ୍ଲନ୍ କିମ୍ୱୋନଞ୍ଜିଲୋଙ୍ ଗନେଞ୍ଜି । ତି ଆକିମ୍ୱୋନ୍ଞ୍ଜି ତୋଣ୍ତୋନ୍ ସିଲଡ୍ ଇର୍ରେ ସମୟଁଡ୍ରାଲୋଙନ୍ ବୁବ୍ବ୍ଡାଲେ ରବୁଏଞ୍ଜି । ତେତ୍ତେ ବାଗୁ ମାଡିଞ୍ କିମ୍ୱୋନନ୍ ଡକୋଏଞ୍ଜି ।
ଅଙ୍ଗା ଆମନ୍ଡ୍ରାଜି କିମ୍ୱୋନଞ୍ଜି ତୁରେଞ୍ଜି ଆନିଞ୍ଜି ଇନିଡେଲୋ ତିଆତେ ଗିଜେଞ୍ଜି, ଆନିଞ୍ଜି ଗଡାନ୍ ଇର୍ରେ ଜିରେଞ୍ଜି ଆରି ଯୀଶୁନ୍ ଇନିଜି ଲୁମେନ୍ ତି ଆତେ ମନ୍ଡ୍ରାଞ୍ଜି ଆଡଅଙ୍ ବରେଞ୍ଜି । ଗଡାନ୍ ସିଲଡ୍ ମନ୍ଡ୍ରାଞ୍ଜି ଇୟ୍ଲେ ଆନା ଆମ୍ମୁଙ୍ମା ଆମବୁଡ୍ ଡକୋଲନ୍ ତି ଆମନ୍ଡ୍ରା ଆଡଅଙ୍ ଇନି ଡେଲୋ ତିଆତେ ଗିଜେଞ୍ଜି । ଆନିନ୍ ଲବଡ୍ଡିଡମ୍, ସିନ୍ଡ୍ରି ଜିଜିଲନ୍ ମନଙ୍ ବୁଡ୍ଡିନ୍ ବାତ୍ତେ ମନଙ୍ମରନ୍ ଅନ୍ତମ୍ ଆତଙ୍କୁମ୍ ଡକୋଲନ୍ ।
ମନ୍ଡ୍ରାଞ୍ଜି ଗୋଗୋୟ୍ ବତଙେଞ୍ଜି ଆରି ଅସଣ୍ତିଞ୍ଜି ସିଲଡ୍ ଯୀଶୁନ୍ ଆଡଅଙ୍ ଜନିରନ୍ ଆସନ୍ ବରେଞ୍ଜି । ତି ଆସନ୍ ଯୀଶୁନ୍ ଡୋଙ୍ଗାଲୋଙ୍ନ ଡାୟ୍ଲେ ଜନିରନ୍ ଆସନ୍ ଅବ୍ଜାଡାଲନ୍ । ଅଙ୍ଗା ଆମନ୍ଡ୍ରା ଆମବୁଡ୍ ଡକୋଲନ୍ ଆନିନ୍ ଯୀଶୁନ୍ ସରିନ୍ ଜନିରନ୍ ଆସନ୍ କାକୁର୍ତ୍ତିଲନ୍ ।
ବନ୍ଡ ଯୀଶୁନ୍ ଆନିନ୍ ଆଡଅଙ୍ ବରେନ୍ “ଇଜ୍ଜା,ଞେନ୍ ଗାମ୍ତାୟ୍,ଆମନ୍ ଅସିଙ୍ନମ୍ ଜିରା ଆରି ଗଡିନମ୍ଜି ଡ କୁଲମ୍ନମ୍ଞ୍ଜି ଈଶ୍ୱରନ୍ ଉପ୍ରେଙ୍ନମ୍ ଇନିଜି ଲୁମେନ୍ ଡ ଉପ୍ରେଙ୍ନମ୍ ଅଙ୍ଗା ଆକାନାର୍କାରମ୍ ଅବ୍ତୁୟ୍ଲମ୍ ତି ଆଡକୋନ୍ ଇୟ୍ବର୍ନା ।”
ତି ଆସନ୍ ତି ଆମନ୍ଡ୍ରା ଆତଙର୍ଗଡନ୍ ଜିରେନ୍ ଆରି ଯୀଶୁନ୍ ଆଉପ୍ରେଙନ୍ ଇନିଜି ଲୁମେନ୍ ତି ଅଡକୋନ୍ ଆବର୍ରନେ ଅବ୍ଜନାଏନ୍ । ଆନାଜି ଆବର୍ନେନ୍ ଅମ୍ଡଙେଞ୍ଜି ଆନିଞ୍ଜି ସାନ୍ନିଆଜେଞ୍ଜି ।
ଯୀଶୁନ୍ ସମୟଁଡ୍ରାନ୍ ଆଅଡିଗଡ୍ ୟର୍ରନେ । ଆନିନ୍ ତେତ୍ତେ ତୁଙେନ୍ କି, ଗୋଗୋୟ୍ ମନ୍ଡ୍ରାନ୍ ରୁକ୍କୁଲଞ୍ଜି ଆରି ଆଡଅଙ୍ ୟବେଞ୍ଜି । ଆରୁକ୍କୁମର୍ଲୋଙନ୍ ଅବୟ୍ ବାରବର୍ଷେଙ୍ ଡେଏନ୍ ଅବୟ୍ ପ୍ରଦରରୋଗବଜନ୍ ଡକୋଏନ୍ । ଆନିନ୍ ଗୋଗୋୟ୍ ବଇଦମରଞ୍ଜି ଆମଙ୍ ଇୟ୍ଲେ ମନନଙନ ଆସନ୍ ଗୋଗୋୟ୍ ଡାବ୍ବୋନ୍ ସାରେଏନ୍ ବନ୍ଡ ଆଡଅଙନ୍ ବଡିନାନ୍ କି ବଡିନ୍ନାନ୍ ମନଙ୍ତଡ୍ ଡେଏନ୍ ।
ଆନିନ୍ ଅମ୍ଡଙେନ୍ ଡ ଯୀଶୁନ୍ ଗୋଗୋୟ୍ ଅସୁମରଞ୍ଜି ଅବ୍ସୁକ୍କାଏନ୍ ଆରି ଇୟ୍ୟମେନ୍ “ଞେନ୍ ଜନା ଡ ଯୀଶୁନ୍ ଆସିନ୍ଡ୍ରି ସୁଙେଲାୟ୍ଡେନ୍ ଞେନ୍ ମନଙ୍ତିଞ୍ !” ତିଆସନ୍ ଆନିନ୍ ଯୀଶୁନ୍ ଆକିଣ୍ତୋଙ୍ଗଡ୍ ଜିର୍ରେ ଆସିନ୍ଡ୍ରି ସୁଙେଏନ୍ । ଏଙ୍ଗାଲେ ଆନିନ୍ ସିନ୍ଡ୍ରିନ୍ ସୁଙେଏନ୍ ଅବ୍ତାଡନ୍ ଆମିଞାମନ୍ ଅଞଡେନ୍ !
ଅବ୍ତାଡନ୍ ଯୀଶୁନ୍ ଅମ୍ଲନେ ଡ ଆମଙନ୍ ସିଲଡ୍ ବୋର୍ସାନ୍ ଜିରେନ୍ ଗାମ୍ଲେ ରପ୍ତି ଜନାଏନ୍ । ତିଆସନ୍ ଆନିନ୍ ଆୟର୍ଗୁଡିଲନ୍ ବର୍ରେଞ୍ଜି “ଆନା ଞେନ୍ ଆଡଅଙ୍ ସୁଙଲିଞ୍ ।”
ଞଙ୍ନ୍ନେମରଞ୍ଜି ଜାଲଙ୍ଲେ ବରେଞ୍ଜି “ଅମଙ୍ନମ୍ ଏର୍ରେ ଗୋଗୋୟ୍ ମନ୍ଡ୍ରା ଡକୋଜି ଆରି ଅମଙ୍ନମ୍ ୟବ୍ତମଞ୍ଜି । ଞେନ୍ ଆନା ସୁଙଲିଞ୍?” ଗାମ୍ଲେ ଇନିଆସନ୍ ବର୍ତନେ ? ତି ଆଇମର୍ ଯୀଶୁନ୍ ଆମୁକ୍କାବା ତୁଡୁମେନ୍, ଆନିନ୍ ତରକ୍କେଏନ୍ ଡ ଗୋଗୋୟ୍ ବତଙେନ୍ । ଆନିନ୍ ଇନି ଲୁମେନ୍, ତି ଆତେଜି ଆନିନ୍ ବରେନ୍ ଡ ଆନିନ୍ ସୁକ୍କାଏନ୍ । ଯୀଶୁନ୍ ଆନିନ୍ ଆଡଅଙ୍ ବରେନ୍ ଡର୍ନେନମ୍ ଆମନ୍ ଅବ୍ସୁକ୍କାଲମ୍ । ସୟୁନ୍ ବାତ୍ତେ ଜିରା ।”
ବାଇବଲର ଏକ କାହାଣୀ:ମାଥିଉ ୮:୨୮-୩୪; ୯:୨୦-୨୦; ମାର୍କ ୫:୧- ୨୦; 5: ୨୪b-୩୪; ଲୂକ ୮:୨୬-୩୯; ୮: ୪୨b-୪୮
Free to use, adapt, and share under an open license (CC BY-SA 4.0).