33. ଜମ୍ମଲ୍ ବୁବ୍ବୁନ୍ନେମରନ୍ ଆ ଅନବ୍‌ଜଙ୍‌ବର୍‌

ବଡିନ୍ନା, ଯୀଶୁନ୍ ଅନେଙ୍ ସମେୟଁଡ୍ରାଲୋଙନ୍ ଗୋଗୋୟ୍ ମନ୍‌ଡ୍ରାଞ୍ଜି ଆଡଅଙ୍ ଞନଙନ୍ ତିୟେନ୍। ଗୋଗୋୟ୍ ମନ୍‌ଡ୍ରାଞ୍ଜି ଅନମ୍‌ଡଙନ୍ ଆସନ୍ ଯୀଶୁନ୍ ଆମଙ୍ ଇୟ୍‌ଲାଜି ଆରି ମନ୍‌ଡ୍ରାଞ୍ଜି ଏଙ୍ଗାଲେ ମନଙ୍ ଞନଙନ୍ ତିୟ୍‌ଲେ ରପ୍ତିତେ ତି ଆସନ୍ ଆନିନ୍ ଆନେଙ୍‌ସମେୟଁଡ୍ରାନ୍ ଅବୟ୍ ଡୋଙ୍ଗାଲୋଙନ୍ ତଙ୍କୁମେନ୍ ଆରି ମନ୍‌ଡ୍ରାଞ୍ଜି ଞନଙନ୍ ତିୟେନ୍।

ଯୀଶୁନ୍ କେନ୍ ଆ ଅନବ୍‌ଜଙ୍‌ବର୍ ବରନ୍। “ଅବୟ୍ ଜମ୍ମଲ୍ ବୁବ୍ବୁନ୍ନେମରନ୍ ଜମ୍ମଲ ବୁଡନ୍‌ ଆସନ୍ ଡୁଙ୍‌ଲନେ। ଆନିନ୍ ଏଙ୍ଗାଲେ ଆସିଲୋଙନ୍ ଜମ୍ମଲଞ୍ଜି ବୁଡେନ୍, ଲାଙଲେଡ୍ ତଙରନ୍ ଅସେଡେନ୍ ଆରି ଅନ୍ତିଡଞ୍ଜି ଇୟ୍‌ଲେ ତି ଆଜମ୍ମଲ୍ ଇୟ୍‌ଲାୟ୍‌ ଜୋମେଞ୍ଜି।”

“ଆନ୍ନା ଜମ୍ମଲଞ୍ଜି ଅରେଙଲ ରେଙନ୍ ଅସେଡେନ୍, ଅଙ୍ଗାଲୋଙ୍ ଅସୋୟ୍‌ଲବନ୍ ଡକୋଏନ୍। ଅରେଙଲ ରେଙନ୍ ଆଜମ୍ମଲ୍ ଲ ପଡାବ୍‌ଲାୟ୍,ବନ୍‌ଡ ଆଜଡନ୍ ଲବନ୍ ଆଅମ୍ ଅଣ୍ତ୍ରଙ୍ ଜିର୍ରେ, ତି ଆସନ୍ ଓୟୋଙନ୍ ଆଡ୍ରୁଙ୍‌ଲନାଙନ୍ ଡ ଆଡ୍ରାଗାଏନ୍ ,ଆନୁବନ୍ ରବ୍ବୁଏନ୍।”

“ଲାଙଲେଡ୍ ଜମ୍ମଲଞ୍ଜି ଅବ୍ବାନୁବ୍‌ରେଙନ୍ ଗଲୋଏନ। ତି ଆତେ ଅଡକୋନ୍ ସୋରାଡାଏନ୍,ବନ୍‌ଡ ଅବ୍ବାନୁବଞ୍ଜି ଆନିଞ୍ଜି ଆଡଅଙ୍‌ ଲଃଲ୍ଲଡାଜେଞ୍ଜି। ତି ଆସନ୍ ଅବ୍ବାନୁବ୍‌ରେଙନ୍ ଆଗ୍ରଲୋଏନ୍ ଆଜମ୍ମଲ ଅସୋଡାଲୋ, ଇନିଙ୍ ଅନଜଲୋ।”

“ଆନ୍ନା ଜମ୍ମଲଞ୍ଜି ମନଙ ଲବରେଙନ୍ ଗଲୋଏନ୍। ଏଙ୍ଗାଲେ ଜମ୍ମଲନ୍ ବନୁଡନ୍ ଡେନ୍, ତି ଅଡକୋନ୍ ଆଜମ୍ମଲ୍ ସୋଡାଡାଲେ ତିରଶ, ୟାକୁଡ୍ଡି ଡ ଏନେଲେ ଶହେ ଗୁନା ଜାୟଁ ଅଜଏନ। ଆନା ଆଲୁଡ୍ ଡକୋ ଆନିଞ୍ଜି ଅମ୍‌ଡଙ୍‌ବା।”

କେନ୍ ଆନବ୍‌ଜଙ୍‌ବର୍‌ଲୋଙ ଞଙ୍‌ନେମରଞ୍ଜି ବାଉଲ୍ଲିଡେଲୋଜି। ତି ଆସନ୍ ଯୀଶୁନ୍ ଅବ୍‌ଗନ୍‌ଲୁଡ୍‌ଲେ ବରେଞ୍ଜି, “ଜମ୍ମଲନ୍ ଗାମେଣ୍ତେନ ଈଶ୍ୱରନ୍ ଆବର୍ନେ। ତଙରନ୍ ଗାମେଣ୍ତେନ ତି ଆମନ୍‌ଡ୍ରା ଆନା ଈଶ୍ୱରନ୍ ଆବର୍ନେ ଅମଡଙ୍‌ତେ, ବନ୍‌ଡ ଅଗନ୍‌ଲୁଡେଜି ଆରି ସନୁମନ୍ ତି ଆବର୍ନେ ରାଉଲନ୍ ପାଙ୍‌ତେ।”

“ଅରେଙଲବନ୍ ତି ଆମନ୍‌ଡ୍ରା ଆନା ଇଶ୍ୱରନ୍ ଆବର୍ନେ ଅମ୍‌ଡଙ୍‌ତେ ଡ ସଡ୍ରାନ୍ ବାତ୍ତେ ତି ଆତେ ଜାତଜି। ବନ୍‌ଡ ଏଙ୍ଗାଲେ ଆନିଞ୍ଜି ଡଣ୍ତନ୍ ଡ ଡନଣ୍ତାୟନ୍ ଞାଙତଜି, ଆନିଞ୍ଜି ମୋସାତଜି।”

“ଅବ୍ବାରେଙନ୍ ଆଲବ ତି ଆମନ୍‌ଡ୍ରା ଆନା ଈଶ୍ୱରନ୍ ଆବର୍ନେ ଅମ୍‌ଡଙ୍‌ତେ, ବନ୍‌ଡ ଏଙ୍ଗାଲେ ଓୟୋଁଙନ୍ ଜିର୍‌ତାୟ୍, ସନାକେନ୍, ଆନର୍ଜେନ୍ ଇଶ୍ୱରନ୍ ଲୋଙନ୍‌ ଆଲନଡୟ୍ ଅସୋୟ୍‌ତେ।” ଡ, ଆନିନ୍ ବର୍ନେନ୍ ଅମ୍‌ଡଙ୍‌ତେ ଡ ଅନଜଏ।”

“ବନ୍‌ଡ ମନଙ୍ ଲବନ୍ ତି ଆମନ୍‌ଡ୍ରା ଆନା ଈଶ୍ୱରନ୍ ଆବର୍ନେ ଅମ୍‌ଡଙତେ, ଡର୍ରତନେ ଆରି ଅଜତେ।”