34. ଯୀଶୁନ୍ ଅନବ୍‌ଜଙ୍‌ବରନ୍ ବାତ୍ତେ ଞନଙନ୍ ତିୟ୍‌ତେ

ଈଶ୍ୱରନ୍ ଆରାଜ୍ୟ ଆବର୍ନେ ଯୀଶୁନ୍ ଗୋଗୋୟ୍ ଅନବ୍‌ଜଙ୍‌ବରନ୍ ବାତ୍ତେ ବର୍ରନେ । ଆନିନ୍ ଗାମେନ୍ “ରୁଆଙ୍‌ରାଜ୍ୟ ଅବୟ୍ ସୋରିଷନ୍ ଆବାୟ୍ ଅନ୍ତମ୍ ଅଙ୍ଗାଆତେ ଅବୟ୍‌ନ୍ନେ ଆବସେଙ୍ ଲୋଙନ୍ ଗୁଏନ୍ । ଆମ୍ୱେଞ୍ଜି ଜନାବେନ୍ତୋ ଡ ସୋରିଷନ୍ ଆବାୟ୍ ଅଡକୋ ଆବାୟ୍ ସିଲଡ୍ ସନ୍ନା ଡକୋ ।

“ବନ୍‌ଡ ଏଙ୍ଗାଲେ ସୋରିଷନ୍ ଆବାୟ୍ ସୋଡାତେ,କେନ୍‌ଆତେ ଆଡକୋ ବସେଙନ୍ ଆନୁବ୍ ସିଲଡ୍ ଜବ୍ର ସୋଡା ଡେତେ ଡ ଅନ୍ତିଡଞ୍ଜି ଜିର୍ରେ ତି ଆକେଣ୍ତାର୍‌ରେଙ୍ ଡକୋତଞ୍ଜି ।”

ଯୀଶୁନ୍ ଆରି ଅବୟ୍ ଅନବ୍‌ଜଙ୍‌ବରନ୍ ବର୍ରନେ“ଈଶ୍ୱରନ୍ ଆରାଜ୍ୟ ଅବୟ୍ ଆବ୍‌ଡାର୍‌କାରନ୍ ଅନ୍ତମ୍ ଅଡକୋନ୍ ଅନ୍‌ଡ୍ରଙ୍ ମାୟ୍‌ନେନ୍ ଜାୟ୍ ଅସୋୟ୍ ମଇଦାଲୋଙନ୍ ମାୟ୍‌ତନେ ।

“ଈଶ୍ୱରନ୍ ଆରାଜ୍ୟ ଆରିନିୟ୍ ଆସସନ୍ ଆବିତ୍ତି ଅନ୍ତମ୍ ଅବୟ୍‌ନ୍ନେ ପାଙ୍‌ଲେ ବସେଙଲୋଙନ୍ ଇୟ୍‌ଲେ ସଲେ ଡକ୍କୋଏନ୍ । ଆନ୍ନା ଆମନ୍‌ଡ୍ରା କେନ୍ ଆବିତ୍ତି ଞାଙେନ୍ ଡ ଆରି ତିଲ୍ଲେ ଡକ୍କୋଏନ୍ । ଆନିନ୍ ଏତ୍ତେଲେ ସର୍ଡାଏନ୍ ଡ ଆନିନ୍ ଜିର୍ରେ ଅଡକୋ ବସେଙନ୍ ଞନିନ୍ ଆସନ୍ ଅଡକୋ ବସେଙନ୍ ତମେନ୍ ଡ, ତି ଆଡାବ୍ବୋ ଞନ୍‌ଡ୍ରମେନ୍ ।”

“ଈଶ୍ୱରନ୍ ଆରାଜ୍ୟ ଆରି ଅବୟ୍ ଜବ୍ର ମଡଗା ମଣିଅରନ୍ ଅନ୍ତମ୍ । ଏଙ୍ଗାଲେ ଅବୟ୍ ମଣିଆରନ୍ ଆବେବାରମର୍ କେନ୍ ଆତେ ଗିଜେନ୍,ଆନିନ୍ ଜିର୍ରେ ଅଡକୋନ୍ ଆବିତ୍ତିନ୍ ତମ୍‌ଲେ କେନ୍ ଆତେ ଞନି ଆସନ୍ ତି ଆଡାବ୍ବୋ ଞନ୍‌ଡ୍ରମେନ୍ ।”

ତି ଆତିକ୍କି ଯୀଶୁନ୍ ଅମନ୍‌ଡ୍ରାଞ୍ଜି ଆଡଅଙ୍,ଆନିଞ୍ଜି ଆମନଙ୍ ଲନୁମନ୍‌ଲୋଙନ୍ ଡର୍ରନ୍ ଆନ୍ନାମରଞ୍ଜି ସଙ୍ଗତ୍ତା ଆରବ୍‌ମେତେଞ୍ଜି ଆବର୍ନେଲୋଙ୍ ଅବୟ୍ ଅନବ୍‌ଜଙ୍‌ବରନ୍ ବର୍ରନେ । “ବାଗୁମନ୍‌ଡ୍ରା ବେବ୍ବର୍ନେନ୍ ଆସନ୍ ମନ୍ଦିରସିଙନ୍ ଇୟେଞ୍ଜି । ଆନିଞ୍ଜିଲୋଙ୍ ଅବୟ୍‌ନେ ପାନ୍ନୁବେଡ୍ଡାବ୍‌ମର୍ ଡ ଆରିଅବୟ୍‌ନେ ଡରମ୍ମଗୁରୁ ।”

“ତି ଆଡରମ୍ମଗୁରୁ କେନ୍ ଏନ୍ନେଲେ ବେବ୍ବର୍ରନ୍, ଏ ଈଶ୍ୱର ଞେନ୍ ଆମନ୍ ଆଡଅଙ୍ ସେନ୍‌ନ୍ତମ୍ ଆନ୍ନା ଆମନ୍‌ଡ୍ରାଜି ଅନ୍ତମ୍ ଞେନ୍ ଇର୍ସେମର୍‌ତଡ୍, ଏଙ୍ଗାଲେ ଅବୟ୍ ରାଉମରନ୍, ଇର୍ସେମରନ୍, ଡାରିମରନ୍, ଅଡେ କେନ୍ ଆପାନୁବେଡ୍ଡାବ୍‌ମର୍ ଅନ୍ତମ୍ ତଡ୍ ।”

“ଆଗରାମ୍‌ଗାମନ୍ ଅନ୍ତମ୍, ଞେନ୍ ବପାଲ୍ଲିନ୍ ବାଗୁତର ଆନମ୍‌ମ୍ଫୋଙନ୍ ଡକୋତନାୟ୍ ଆରି ଞରାଙ୍‌ତାଞନ୍ ଆଡାବ୍ବୋଲୋଙ୍ ସିଲଡ୍ ଡ ଜନବ୍‌ଲୋଙନ୍ ଅଡକୋନ୍ ଦଶ ପାଲ୍ ପାଲ୍ ତିୟ୍‌ତାୟ୍ ।

“ବନ୍‌ଡ ପାନୁବେଡ୍ଡାବ୍‌ମରନ୍ ଡରମ୍ମଗୁରୁ ସିଲଡ୍ ସଞାୟ୍ ତନଙେନ୍, ଆରି ରୁଆଙନ୍ ଆନାଙାଙ୍ ଆସନ୍ ଅବ୍ବୋର୍ସାଲୋ । ଆରି ଆନିନ୍ ଆମାୟଙନ୍ ଆସିନ୍ ବାତ୍ତେ କୁମ୍‌ସିଲନ୍ ତିଡ୍‌ଲନ୍, ଆରି ବେବ୍ବର୍ରନ୍, “ଏ ଈଶ୍ୱର, ଞେନ୍ ଆଡଅଙ୍ କାନକାରମ୍ ଗାମିଞ୍,ଇନିଆସନ୍ ଗାମେଣ୍ତେନ୍ ଞେନ୍ ଅବୟ୍ ଇର୍ସେମର୍ ।”

ଡ ଯୀଶୁନ୍ ଗାମେନ୍, “ଞେନ୍ ଆମ୍ୱେଞ୍ଜି ଆଜାଡିନ୍ ବର୍ତବେନ୍, ଈଶ୍ୱରନ୍ ପାନୁବେଡ୍ଡାବ୍‌ମରନ୍ ଆବେବ୍ବର୍ ଅମଡଙେନ୍ ଆରି ଆନିନ୍ ଆଡଅଙ୍ ଡରମ୍ମମର୍ ଗାମ୍‌ଲେ ଡିଏନ୍ । ବନ୍‌ଡ ଡର୍ମ୍ମଗୁରୁ ଆବେବ୍ବର୍ ଅନ୍ନମ୍‌ଡଙ୍‌ଲୋ । ଆନା ଆନିନ୍‌ଡମ୍ ସୋଡା ଗାମ୍‌ଡମ୍‌ତନ୍ ଈଶ୍ୱରନ୍ ଆନିନ୍ ଅବ୍‌ସେଡ୍‌ତେ, ଆରି ଆନା ଆନିନ୍‌ଡମ୍ ଅବ୍‌ସନ୍ନାତନ୍ ଈଶ୍ୱରନ୍ ଆନିନ୍ ଆଡଅଙ୍ ଅବ୍‌ଡୋତେ ।