35. କାନ୍କାରମ୍ଗିୟ୍ ବାପ୍ପାନ୍ ଆ ଅନବ୍ଜଙବର୍
ବଡିନ୍ନା, ଯୀଶୁନ୍ ଗୋଗୋୟ୍ ପାନୁବେଃମରଞ୍ଜି ଡ ଇର୍ସେମରଞ୍ଜି ଆନାଜି ଞଙନେନ୍ ଆନମ୍ଡଙ୍ ଆସନ୍ ରୁକ୍କୁଲଞ୍ଜି, ଆନିଞ୍ଜି ଞନଙନ୍ ତିୟେଞ୍ଜି।
ତେତ୍ତେ ଲାଙଲେଡ୍ ଡର୍ମଗୁରୁଞ୍ଜି ଯୀଶୁନ୍ ଇର୍ସେମରଞ୍ଜି ସରିନ୍ କୁଲମ୍ନ ଆନ୍ତମ୍ ଆଞଡ୍ରମ୍ଲନ୍ ଆତେ ଗିଜେଞ୍ଜି, ଆରି ତର୍ଡମ ଆନିଞ୍ଜି ଆସଙ୍ଗତାଲୋଙ କଡାଡିଲଞ୍ଜି। ତି ଆସନ୍ ଯୀଶୁନ୍ ଆନିଞ୍ଜି ଅବୟ୍ ଅନବ୍ଜଙ୍ବର୍ ବରେଞ୍ଜି।
“ଅବୟ୍ ମନ୍ଡ୍ରା ଆମଙ୍ ବାଗୁ ଆଡାଙ୍ଗଡଅନନ ଡକୋଏନ୍ । ଆସନ୍ନା ଡାଙ୍ଗଡଅନନ ଆବାପ୍ପାନ୍ ବରେନ୍, ‘ବାପ୍ପା, ବିତ୍ତିଲୋଙନ୍ ବନ୍ତାଲୋଙଞେନ୍ ଇନି ଡକୋ ତି ଆତେ ଞେନ୍ ସାୟ୍ତାଃ!’ ତି ଆସନ୍ ଆବାପ୍ପାଞ୍ଜି ବାଗୁ ଅନନଲୋଙ୍ ଆବିତ୍ତିନ୍ ବନ୍ତାଏନ୍ ।”
“ଆସନ୍ନା ଡାଙ୍ଗଡାଅନନ ଆମଙନ୍ ଡକୋନ୍ ଅଡକୋନ୍ ରୁକ୍କୁଡାଲେ ସଙାୟ୍ ଜିରେନ୍ ଆରି ଇର୍ସେନ୍ ଲୁମନ୍ ଆସନ୍ ଆବିତ୍ତିନ୍ଜି ଅବ୍ଞୁଡେନ୍ ।”
“ତି ଆତିକ୍କି, ଆସନ୍ନା ଡାଙ୍ଗଡଅନନ ଅଙ୍ଗା ଆଡେସା ଡକୋଲନେ ତି ଆଡେସାଲୋଙ୍ କାନ୍ତାରାଏନ୍, ଆରି ଜନୋମନ୍ ଆଞ୍ନି ଆସନ୍ ଆମଙନ୍ ତଙ୍କାତଡ୍ ଡେଏନ୍ । ତି ଆସନ୍ କିମ୍ୱୋନଞ୍ଜି ଆଜନୋମ୍ଜୋମ ତୁମ୍ ଆନିନ୍ ଞାଙେନ୍ । ଆନିନ୍ କନାର୍କାରମନ୍ ଆରି ଆଡୋଲେୟ୍ ଡକୋଏନ୍ ଡ ଆନିନ୍ କିମ୍ୱୋନଞ୍ଜି ଆଜନୋମ୍ ଜନୋମନ୍ ଆସନ୍ ଇସୁମେନ୍ ।”
“ଆତନିକି, ଆସନ୍ନା ଡାଙ୍ଗଡା ଅନନ ଆନିନ୍ଡମ୍ ବର୍ରନେ ‘ଞେନ୍ ଇନି ଏଙ୍ଗାତନାୟ୍? ବାପ୍ପାଞେନ୍ ଆକମ୍ୱାରୀଜି ଅଡକୋଞ୍ଜି ଆସନ୍ ଗୋଗୋୟ୍ ଜନୋମନ୍ ଡକୋ, ଆରି ଞେନ୍ ତେନ୍ନେ ଡୋଲେୟ୍ଲୋଙନ୍ ରବ୍ବୁତିଁ । ଞେନ୍ ବାପ୍ପାଞେନ୍ ଆମଙ୍ ଜିର୍ରତେ ଡ ଞେନ୍ ଆକମ୍ୱାରିଲୋଙ୍ ଅବୟନେ ଏମେଲେ ଡନକୋନ୍ ଆସନ୍ ତି ବର୍ରନାୟ ।”
“ତି ଆସନ୍ ଆସନ୍ନା ଡାଙ୍ଗଡାଅନନ୍ ଆବାପ୍ପାନ୍ ଆମଙ୍ ୟର୍ନେନ୍ ଆସନ୍ ଡୁଙ୍ଲନେ । ଆନିନ୍ ଏଙ୍ଗାଲେ ସଙାୟ୍ ଡକୋଏନ୍, ଆବାପ୍ପାନ୍ ସଙାୟ୍ ସିଲଡ୍ ଗିୟ୍ଲେ ଆର୍ଗୁଡିଡାଏନ୍ । ଆନିନ୍ ଆଡାଙ୍ଗାଡା ଅନନ୍ ଆମଙ୍ ଇର୍ରେ କୋଣ୍ତୋଏ ଡ ଜୋର୍ଜୋର୍ରେନ୍ ।
“ଅନନ୍ ବର୍ରନ୍ ବାପ୍ପା, ଞେନ୍ ଈଶ୍ୱରନ୍ ଡ ଆମନ୍ ସଙ୍ଗତ୍ତାଲେ ଇର୍ସେନ୍ ଲୁମ୍ଲାୟ୍ । ଅନନମ୍ ଗାମ୍ଲେ ଅନୋଡ୍ଡେନ୍ ଆସନ୍ ଞେନ୍ ଯୋଗ୍ୟତଡ୍ ।”
“ବନ୍ଡ ତି ଆବାପ୍ପାନ୍ ଆକମ୍ୱାରିମରଞ୍ଜିଲୋଙ୍ ଅବୟ୍ନ୍ନେ ବରେନ୍, ଲଜିର୍ ଇୟ୍ଲେ ଅଡକୋନ୍ ସିଲଡ୍ ମନଙ୍ ଆସିନ୍ଡ୍ରି ଇୟ୍ପାଙ୍ବା ଆରି ତି ଆତେ ଅନ୍ଞେନ୍ ଅବ୍ଡ୍ରବା ! ତି ଆଅଣ୍ତେର୍ସିନ୍ ଲୋଙନ୍ ଏନ୍ସି ଡ ଆତାଲ୍ଜଙ୍ଲୋଙନ୍ ସିପିଲିନ୍ ତିୟ୍ବା । ତି ସିଲଡ୍ ମନଙ୍ ଆଅନ୍ତାଙ୍ ରବ୍ବୁବା ଆରି ଇନ୍ଲେନ୍ ଜୋମ୍ଲେ ଏସର୍ଡାନେବା । ଇନି ଆସନ୍ ଗାମେଣ୍ତେନ୍ ଅନ୍ଞେନ୍ ରବୁଏନ୍ବନ୍, ବନ୍ଡ ନମି ଆନିନ୍ ଆମେଙ୍ ଡକୋ ! ଆନିନ୍ ଅସେଡେନ୍ବନ୍, ବନ୍ଡ ନମି ଞାଙ୍ଲାୟ୍ !”
“ତି ଆସନ୍ ମନ୍ଡ୍ରାଞ୍ଜି ସର୍ଡାନେନ୍ ଉଲଞ୍ଜି। ତି ଆଡିନ୍ନା କୋତ୍ତାନ୍ ଆରଲନୁମ୍ଲନ୍ ଆସୋଡା ଡାଙ୍ଗଡାଅନନ୍ ଅସିଙନ୍ ଜିର୍ରାୟ୍ । ଆନିନ୍ କନନନ୍ ଡ ତଙ୍ସେଙନ୍ ଆସନଡ୍ଡା ଅମ୍ଡଙେନ୍ ଡ଼ ଇନି ଡେତେ ଗାମ୍ଲେ କାବ୍ବାଏନ୍ ।”
“ତି ଆସନ୍ନା ବୋଞାଙନ୍ ଆଜରିର୍ରାଞନ୍ ଆସନ୍ କେନ୍ ଅଡକୋନ୍ ଆସର୍ଡା ଡେତେ ଗାମ୍ଲେ ଏଙ୍ଗାଲେ ଆସୋଡା ଅନନ୍ ଗିଜେନ୍ ,ତି ଆବେଡା ଆନିନ୍ ବରାବେନ୍ ଡ ଅମ୍ମସିଙନ୍ ଅଗ୍ଗନ୍ଲନ୍ । ତି ଆବାପ୍ପାନ୍ ଇୟ୍ଲାୟ୍ ଆରି ଆନିଞ୍ଜି ସରିନ୍ କେନ୍ ଆସର୍ଡାନେଲୋଙ୍ ସର୍ଡାନା ଗାମ୍ଲେ ବରେନ୍, ବନ୍ଡ ଆନିନ୍ ଇଜ୍ଜା ଗାମେନ୍ ।
ଆସୋଡା ଅନନ୍ ଆବାପ୍ପାନ୍ ଆଡଅଙ୍ ବରେନ୍ “ଡିୟ୍ତେ ବର୍ଷେଙ୍ ଞେନ୍ ଡର୍ରନ୍ ଲନୁମ୍ନମ୍ ଲୁମ୍ଲେ ଜିର୍ରାୟ୍ ! ଞେନ୍ ଆଙ୍ଗିୟ୍ ବର୍ନେନମ୍ ଅନ୍ନାଲ୍ଲେଲାୟ୍,ଡେଲଜନଙ୍ ଡେନ୍ ଞେନ୍ ଆସନ୍ ଅବୟ୍ ଆଅନ୍ମ୍ମେଡ୍ ନିୟ୍ ଅତ୍ତିୟ୍ଲିଞ୍,ଏଙ୍ଗାଲେ ଗଡିଞେଞ୍ଜି ସରିନ୍ ସର୍ଡାଲନ୍ ରପ୍ତିତାୟ୍ । ବନ୍ଡ କେନ୍ ଡାଙ୍ଗଡା ଅନ୍ନମ୍ କାଜ୍ଜାନିୟ୍ ବିତ୍ତିନମ୍ଜି ଅବ୍ଞିଡ୍ଡାଲେ ଅସିଙନ୍ ୟର୍ରନାୟ୍, ଆମନ୍ ଆନିନ୍ ଆସନ୍ ଅଡକୋନ୍ ସିଲଡ୍ ଆଜେଲ୍ଜେଲନ୍ ଆଅନ୍ତାଙ୍ ରବ୍ବୁଏନ୍ !”
“ଆବାପ୍ପା ଜାଲଙେନ୍ ‘ଅଅନ୍, ଆମନ୍ ଡିତାନ୍ ଞେନ ସରିନ୍ ଡକୋ, ଆଙ୍ଗାତେ ଞେନ୍ଆତେ ତି ଆତେ ଆମନ୍ଆତେ। ବନ୍ଡ ଇନ୍ଲେନ୍ ଆସନ୍ ସର୍ଡାନେନ୍ ଲନୁମନ୍ ଡକୋଏନ୍ । ଇନିଆସନ୍ ଗାମେନ୍ଣ୍ତେନ୍ ଓବ୍ବାନମ୍ ରବୁଏନ୍,ବନ୍ଡ ନମି ଆମେଙ୍,ଆନିନ୍ ଅସେଡେନ୍ ବନ୍ଡ ନମି ଞାଙ୍ଲନ୍ !”
ବାଇବଲର ଏକ କାହାଣୀ:ଲୂକ ୧୫: ୧୧-୩୨
Free to use, adapt, and share under an open license (CC BY-SA 4.0).