36. ଆନ୍ନାମୁକ୍କାନେ

ବମିୟ୍‌ତା ଯୀଶୁନ୍ ତି ଆଞଙ୍‌ନ୍ନେମରଞ୍ଜି ଲୋଙ୍ ୟାଗିମନ୍‌ଡ୍ରା ପିତର,ଯାକୁବ ଡ ଯୋହନ ଆନିନ୍‌ ସରିନ୍ ଓରୋଙେନ୍ । (ଯୋହନ ଆଞୁମ୍ ଯୀଶୁନ୍ ଆଞଙ୍‌ନ୍ନେମର୍ ଡ ଯୀଶୁନ୍ ଆଡଅଙ୍ ତବ୍ବୁବ୍‌ଡାନ୍ ଆତରିୟେନ୍ ଆଯୋହନ ଆବୟ୍ୟନ୍‌ତଡ୍ ।) ଆନିଞ୍ଜି ଆନିଞ୍ଜିଡମ୍ ବେବ୍ବର୍ନେନ୍ ଆସନ୍ ଅବୟ୍ ବରୁନ୍ ଜିରେଞ୍ଜି ।

ଯୀଶୁନ୍ ଏଙ୍ଗାଲେ ବେବ୍ବଲର୍ନେ, ତି ଆମୁକ୍କାନ୍ ଓୟୋଙନ୍ ଅନ୍ତମ୍ ସାଆର୍ ଡେଲୋ ଆରି ତି ଆସିନ୍‌ଡ୍ରି ସନାଆରନ୍ ଅନ୍ତମ୍ ଜେଏ ଡେଲୋ, ଅଙ୍ଗାଆତେ ପୂର୍ତ୍ତିଲୋଙନ୍ ଡକୋନ୍ ଅନ୍ନିଙ୍ ଆମନ୍‌ଡ୍ରା ତୁବ୍‌ଲେ ଅର୍ରପ୍ତିଏଜି ।

ତି ଆତିକ୍କି ମୋଶାନ୍ ଡ ଏଲିୟନ୍ ଅବ୍‌ତୁୟ୍‌ଲଞ୍ଜି । କେନ୍ ବାଗୁମନ୍‌ଡ୍ରା କେନ୍ ଆଗନଟେଜି ଶଅ ଶଅ ବର୍ଷେଙ୍ ଆମ୍ମୁଙ୍ କେନ୍ ଆପୂର୍ତ୍ତିଲୋଙ୍ ଡକୋଏଞ୍ଜି । ଆନିଞ୍ଜି ଯୀଶୁନ୍ ସରିନ୍ ଆରନବ୍ବୁନ୍‌ ଆବର୍ନେ କଡାଡ଼ିଲଞ୍ଜି, ଅଙ୍ଗା ଆତେ ଯିରୁଶାଲମଲୋଙ୍ ଗଟେରୟ୍‌ତେ ।

ଅଙ୍ଗାବେଡା ମୋଶାନ୍ ଡ ଏଲିୟନ୍ ଯିଶୁନ୍ ସରିନ୍ କଡାଡ଼ିଲଞ୍ଜି,ପିତରନ୍ ଯୀଶୁନ୍ ଆଡଅଙ୍ ବରେନ୍, “ଇନ୍‌ଲେଞ୍ଜି ତେନ୍ନେ ଡକୋ, କେନ୍ ଆତେ ମନଙ୍ ।ଇନ୍‌ଲେଞ୍ଜି ୟାଗି ଅସିଙନ୍ ଏତୁବ୍‌ତାୟ୍, ଆମନ୍ ଆସନ୍ ଅବୟ୍,ମୋଶାନ୍ ଆସନ୍ ଅବୟ୍ ଡ ଏଲିୟନ୍ ଆସନ୍ ଅବୟ୍ ।” ପିତରନ୍ ଇନି ବର୍ରନ୍ ତି ଆତେ ଆନିନ୍ ଅଜ୍ଜନାଲୋ ।

ଅଙ୍ଗାବେଡା ପିତରନ୍ କଡାଡ଼ିଲନ୍, ଅବୟ୍ ସାଆର୍‌ଡମ୍ ଆମେଗ ଜାୟତାନ୍ ଜିର୍ରାୟ୍ ଆରି ଆନିଞ୍ଜି ଆଡଅଙ୍ ଅବ୍‌ସସଏଞ୍ଜି ଆରି ମେଗଲୋଙନ୍ ସିଲଡ୍ କେନ୍ ଆସର୍ରଙ୍ ଅଡୋଲାୟ୍ “କେନ୍ ଡନୁଙ୍‌ୟୁମଅନନ୍‌ଞେନ୍ ଆନା ଆଡଅଙ୍ ଞେନ୍ ଲୋବତାୟ୍‌ । ତି ଆମଙନ୍ ଇନ୍‌ଲେନ୍ ସର୍ଡାଡମ୍ ।” ତି ୟାଗିମନ୍‌ଡ୍ରା ଞଙ୍‌ନ୍ନେମରଞ୍ଜି ବତଙ୍‌ଡାଲେ ଲବଲୋଙନ୍ ଗୋଙେଞ୍ଜି ।

ତି ଆତିକ୍କି ଯୀଶୁନ୍ ଆନିଞ୍ଜି ଆଡଅଙ୍ ସୁଙେଞ୍ଜି ଆରି ବର୍ରନ୍ “ବତଙ୍‌ଡଙ୍‌ବେନ୍ । ଡୋନାବା ।” ଆନିଞ୍ଜି ଏଙ୍ଗାଲେ ଏର୍ରେ ଗିଜେଞ୍ଜି,ଆନିଞ୍ଜି ଆବୟ୍‌ନେନ୍ ଯୀଶୁନ୍‌ତୁମ୍ ଗିଜେଞ୍ଜି ।

ଯୀଶୁନ୍ ଡ ତି ୟାଗି ଆଞଙ୍‌ନ୍ନେମରଞ୍ଜି ବରୁନ୍ ଆଜାୟ୍‌ତା ପଡ୍‌ଲନାଜି । ତି ଆତିକ୍କି ଯୀଶୁନ୍ ଆନିଞ୍ଜି ଆଡଅଙ୍ ଗାମେନ୍ “ତେନ୍ନେ ଇନିଜି ଡେଲୋ ତି ଆତେ ଆନ୍ନିଙ୍ ଏବର୍ଡଙେ, ଞେନ୍ ଲଃରବ୍ବୁତିଞ୍ ଡ ଆରି ୟର୍ମେଙ୍‌ତିଞ୍ । ତି ଆତିକ୍କି ଆମ୍ବେନ୍ ମନ୍‌ଡ୍ରାଞ୍ଜି ଆମଙ୍ ବର୍ନାବା ।”