37. ଯୀଶୁନ୍ ଲାଜାରନ୍ ଆଡଅଙ୍ ରନବୁନ୍ ସିଲଡ୍ ଅବ୍ଡୋଏନ୍
ବଡିନ୍ନା, ଯୀଶୁନ୍ ଅବୟ୍ କବରନ୍ ଞାଙେନ୍ ଡ ଲାଜାରନ୍ ଗୋଗୋୟ୍ ଅସୁତ୍ତେ । ଲାଜାରନ୍ ଡ ଆବାଗୁତନାନଞ୍ଜି, ମରୀୟମନ୍ ଡ ମାର୍ଥାନ୍ ଯୀଶୁନ୍ ଆଗଡିଡମନ୍ ଡକୋଏଞ୍ଜି । ଯୀଶୁନ୍ ଏଙ୍ଗାଲେ କବରନ୍ ଅମ୍ଡଙେନ୍, ଆନିନ୍ ଗାମେନ୍ “କେନ୍ ଆସୁ ରନବୁଲୋଙନ୍ ଅନ୍ଗଡେଃ, ବନ୍ଡ କେନ୍ ଆତେ ଈଶ୍ୱରନ୍ ଆସନେନ୍ସେନ୍ ଆସନ୍ ଡେତେ ।” ଯୀଶୁନ୍ ଆଗଡିଞ୍ଜି ଆଡଅଙ୍ ଲଡଜେଞ୍ଜି, ବନ୍ଡ ଆନିନ୍ ଅଙ୍ଗାଲୋଙ ଡକୋଲନେ ତେତ୍ତେ ବାଗୁଡିନ୍ନା ଡକୋଲନେ ।
ବାଗୁଡିନ୍ନା ଆତିକ୍କି, ଯୀଶୁନ୍ ଆଞଙ୍ନେମରଞ୍ଜି ବରେନ୍, “ୟବା, ଇନ୍ଲେନ୍ ଯିହୂଦା ଗଡାନ୍ ଏଜିର୍ବା ।” ଞଙ୍ନେମରଞ୍ଜି ଜାଲଙ୍ଲେ ବରେଞ୍ଜି “ଗୁରୁ, ନମିନମି ମନ୍ଡ୍ରାଞ୍ଜି ଆମନ୍ ଆଡଅଙ୍ ସନମ୍ୱବ୍ ଆସନ୍ ଗବ୍ରିୟମଲଞ୍ଜି!” ଯୀଶୁ ଗାମେନ୍ “ଗଡିଲେନ୍ ଲାଜାରନ୍ ଲୁଡେନ୍, ଆରି ଞେନ୍ ଆନିନ୍ ନିଆତି ଅନବ୍ଡୋନ୍ ପଡେତେ ।”
ଯୀଶୁନ୍ ଆଡଅଙ୍ ଞଙନେମରଞ୍ଜି ଜାଲଙଲେ ବରେଞ୍ଜି “ଗୁରୁ, ଲାଜାରନ୍ ଆଲୁଡ୍ଲୁଡ୍ଡେନ୍ ଆନିନ୍ ଡୋତନେ ।” ତି ଆତିକ୍କି ଯୀଶୁ ଆନିଞ୍ଜି ଅବ୍ଜନାଲେ ବରେଞ୍ଜି “ଲାଜାରନ୍ ଆରବ୍ବୁ । ଞେନ୍ ସଡ୍ରାତିଁ ଡ ଞେନ୍ ତେତ୍ତେ ଅଡକୋଲିୟଁ, ଏଙ୍ଗାଲେ ଆମ୍ୱେଞ୍ଜି ଅମଙ୍ଞେନ୍ ଏଡର୍ରତନେ ।”
ଯୀଶୁନ୍ ଏଙ୍ଗାଲେ ଲାଜାରନ୍ ଆଗଡାଲୋଙ୍ ତୁଙେନ୍, ଲାଜାରନ୍ ତିଲ୍ଲେ ଉଞ୍ଜିଡିନ୍ନା ଡେଏନ୍ । ମାର୍ଥାନ୍ ଯୀଶୁନ୍ ରବାଙ୍ଲେ ବରେନ୍ “ପ୍ରବୁ ଆନମ୍ ତେନ୍ନେ ଡକୋଲ୍ନନଙ୍, ବୋଞାଙଞେନ୍ ଅର୍ରବୁଏବନ୍ । ବନ୍ଡ ଞେନ୍ ଡର୍ରତନାୟ୍ ଡ ଆମନ୍ ଇଶ୍ୱରନ୍ ଇନି ବେତେ ଆନିନ୍ ଆମନ୍ ଆଡଅଙ୍ ତିୟତମ୍ ।”
ଯୀଶୁନ୍ ଜାଲଙ୍ଲେ ବରେନ୍ “ଞେନ୍ ୟର୍ମେଙନ୍ ଡ ପ୍ରାନାନ୍ । ଆନା ଞେନ୍ ଆଡଅଙ୍ ଡର୍ତନେ, ଆନିନ୍ ରବୁଏନ୍ ଜାୟ୍ ଡେନ୍ ଆନିନ୍ ଅମେଙ୍ତେ । ଅଙ୍ଗା ଆମନ୍ଡ୍ରା ଅମଙଞେନ୍ ଡର୍ରତନେ ଆନିନ୍ ଆଗିଁୟ ଅର୍ରବୁଏନ । ଆମ୍ୱେନ୍ କେନ୍ ଆତେ ଏଡର୍ତନ୍ ପଂ?” ମାର୍ଥାନ୍ ଜାଲଙଲେ ବରେନ୍, “ଓଓଃ ଗୁରୁ! ଞେନ୍ ଡର୍ତନାୟ୍ ଡ ଆମନ୍ ଈଶ୍ୱରନ୍ ଆଡାଙ୍ଗଡଅନନ କ୍ରୀଷ୍ଟନ୍ ।”
ତି ଆତିକ୍କି ମରିୟମନ୍ ତୁଙ୍ଲାୟ୍ । ଆନିନ୍ ଯୀଶୁନ୍ ଆଜଙ୍ଗ୍ ଞମଲେ ଗାମେନ୍ “ପ୍ରବୁ, ଆମନ୍ ତେନ୍ନେ ଡକୋଲନ୍ନଙ୍ ବୋଞାଙଞେନ୍ ଅର୍ରବୁଏ ବନ୍ । “ଯୀଶୁନ୍ ଆନିଞ୍ଜି ବରେଞ୍ଜି “ଆମ୍ୱେନଞ୍ଜି ଲାଜାରନ୍ ଅଙ୍ଗାଲୋଙ୍ ଏଡକୋଏନ୍?” ଆନିଞ୍ଜି ଗାମେଞ୍ଜି “ମଶାନ୍ନିଲୋଙନ୍ । ୟବା ଆରି ଆୟ୍ଗିୟବା । “ତି ଆତିକ୍କି ଯୀଶୁନ୍ ୟେଏନ୍ ।
ମଶାନ୍ନିନ୍ ଅବୟ୍ ଲୋଓଙ୍ ଡକୋଏନ୍ ଆରି ଆମୁକ୍କାନ୍ ଅବୟ୍ ଅରେଙନ୍ ଆତିୟତିୟ୍ ଡକୋଏନ୍ । ଯୀଶୁନ୍ ଏଙ୍ଗାଲେ ମଶାନ୍ନିଲୋଙନ୍ ତୁଙେନ୍, ଆନିନ୍ ଆନିଞ୍ଜି ଆଡଅଙ୍ ବରେଞ୍ଜି “ଅରେଙନ୍ ଗଡାୟ୍ବା ଆରି ଡେବ୍ବା ।” ବନ୍ଡ ମାର୍ଥାନ୍ ଗାମେନ୍ “ଆନିନ୍ ରବ୍ବୁଡାଲେ ଉଞ୍ଜି ଡିନ୍ନା ଡେଲୋ । ତି ଆତେ ଅଲ୍ଲସଅଏ ।”
ଯିଶୁନ୍ ଜାଲଙଲେ ବରେନ୍ “ଞେନ୍ ଇନି ଆସନ୍ ଆମ୍ୱେଞ୍ଜି ଆଡଅଙ୍ ଅବର୍ରରବେନ୍ ପଂ ଆମ୍ୱେଞ୍ଜି ଅମଙ୍ଞେନ୍ ଅଡର୍ରନେ ଡେନ୍ ଈଶ୍ୱରନ୍ ଆସନେନ୍ସରନ୍ ଏଗିୟ୍ତେ? ତି ଆସନ୍ ଆନିଞ୍ଜି ଅରେଙନ୍ ଗଡାୟଲେ ଡେଃଡେଞ୍ଜି ।
ତି ଆତିକ୍କି ଯୀଶୁନ୍ ରୁଆଙ୍ଗଡ୍ ଆଙାଙ୍ଲେ ବର୍ରନ୍ “ବାପ୍ପା, ବେର୍ବନେଞେନ୍ ଆର୍ରମଡଙେନ୍ ଆସନ୍ ସେନ୍ତମ୍ । ଞେନ୍ ଜନା ଡ ଆମନ୍ ଡିତାନ୍ ବର୍ନେଞେନ୍ ଅମଡଙ୍ତେ, ବନ୍ଡ ତେନ୍ନେ ଡିଅଙ୍ଗ୍ ମନ୍ଡ୍ରାଞ୍ଜି ଡକୋଜି ଆନିଞ୍ଜି ଆସନ୍ ଞେନ୍ କେନ୍ ଆତ୍ତେ ବର୍ତନାୟ୍ ।” ତି ଆତିକ୍କି ଯୀଶୁନ୍ ଅବ୍ସର୍ରଙ୍ଲନ୍ ବର୍ରନ୍ “ଲାଜାର, ଡୁଙ୍ଲନ୍ ଜିର୍ରାୟ୍ ।”
ତି ଆସନ୍ ଲାଜାରନ୍ ଡୁଙଲନ୍ ଜିର୍ରାୟ୍! ତି ଆବେଡା ନିୟ୍ ଆନିନ୍ ମଶାନ୍ନିନ୍ ଆସିଡ୍ରିନ୍ ବାତ୍ତେ ଆୟୁମ୍ୟୁମ୍ ଡକୋଏନ୍ । ଯୀଶୁନ୍ ଆନିଞ୍ଜି ଆଡଅଙ୍ ବରେଞ୍ଜି “ମଶାନ୍ନିନ୍ ଆସିଡ୍ରି ଆଡଅଙନ୍ ସିଲଡ୍ ତବ୍ବଲେ ଆନିନ୍ ଅବ୍ନୁରବା!” ଯୀଶୁନ୍ କେନ୍ ଆସାନିଆଲୁମ୍ ଲୋଙ୍ ଗୋଗୋୟ୍ ଯିହୂଦିଞ୍ଜି ଆମଙନ୍ ଡର୍ରଞ୍ଜି ।
ବନ୍ଡ ଯିହୁଦୀଞ୍ଜି ଆଡର୍ମନେତାଜି ଆସାଙ୍ୟମେଞ୍ଜି, ତି ଆସନ୍ ଆନିଞ୍ଜି ଏଙ୍ଗାଲେ ଯୀଶୁ ଆରି ଲାଜାରନ୍ ସମ୍ୱତଜି ରୁକ୍କୁଲନ୍ ତଙରନ୍ ସାଜେଞ୍ଜି ।
ବାଇବଲର ଏକ କାହାଣୀ:ଯୋହନ ୧୧:୧-୪୬
Free to use, adapt, and share under an open license (CC BY-SA 4.0).