34. यीसू दूजी कहाणिया स्खाहाँ

यीसूए परमेसरा रे राज्य रे बारे मन्झ दूजी बौह्त सारी कहाणिया सुणाई। उदाहरणा रे कठे, तिने बोल्या, "परमेसरा रा राज्य एक राई रे बीजा साहीं आ जेस जो केसीए आपणे डोर्हिया मन्झ बाही दितेया। तुस्से जाणहां ऐं कि राई रा बीज सारे बीजा मन्झा ले सभी ले छोटा हूंहाँ।"

पर जेबे राई का बीज बधी जाहाँ ता से बगीचे रे सारे बूटे मन्झ सभी ले बडा हुई जाहाँ, इतना बडा हुई जां कि चिड़ू आई किन्हें तेसरे पांगे प्रयाले अराम करहा ऐ।

यीसूए एक दूजी कहाणी दसी, "परमेसरा रा राज स्जेड़े साहीं आ जेस जो लई किन्हें एक ज्नाने आटे रे पेड़ु मन्झ म्लाई देहीं तेबे से सारे आटे मन्झ फैल्ही जाहाँ।"

स्वर्गा रा राज तेस खजाने साहीं आ जेस जो केसीए डोर्हिया मन्झ ल्कोई दितेया। केसी दूजे म्हाणुँ जो, से खजाना मिली गया होर तिने तेस जो पाणे री बौह्त इच्छा कीती। इधी कठे तिने से दुबारा दबाई दितेया। से खुसी किन्हें इतना भर्ही गईरा था कि तिने जाई किन्हें आपणा सभ कुछ बेची दितेया ताकि से तेस्सा डोर्हिया जो मूले लेई सके जेथी से खजाना था।

स्वर्ग रा राज एक बौह्त कीमती खरे मोती साहीं भी आ। जेबे कोई मोतिया रा वपारी तेस जो पाई लैहां ता से तेस जो मूले लैणे रे कठे आपणा सभ कुछ बेची देहां।

तेथी कुछ लोक थे जो सोच्हा ऐ थे कि परमेसरा स्यों इधी कठे मन्नी लैणे क्यूंकि स्यों भले काम करेया करहा ऐ। ये लोक एह्ड़े लोका जो बेकार मन्हां ऐं थे जो भले काम नी करदे थे। इधी कठे यीसूए तिन्हा जो ये कहाणी दसी: "दो आदमी थे होर दुहें ईं प्रार्थना करणे रे कठे मन्दरा मन्झ गए। तिन्हा मंझा ले एक चुंगी लेणे वाला था, होर दूजा एक धार्मिक अगुवा था।"

तिने धार्मिक अगुवे इहाँ करी किन्हें प्रार्थना कीती, 'हे परमेसर, तेरा धन्यवाद हो कि हांऊँ दूजे लोका साहीं– जिहां डाकू, बेन्यायी करने वाला म्हाणुँ, व्यभिचारी, या एथी तक कि हांऊँ एथी जेड़ा आदमी आ तेस सेंईं चुंगी लेणे वाले साहीं एक पापी भी नी आ।'

उदाहरणा रे कठे, हांऊँ हर हप्ते मन्झ दो बार उपवास रख्हा, होर हांऊँ मुंजो मिलणे वाले ढब्बे होर चीजा रा दसुआं हिस्सा तुजो देहां।

पर से चुंगी लेणे वाला तेस धार्मिक अगुवे ले बौह्त दूर खड़ा हुई गया। तिने ऊपर स्वर्गा वखा जो हाखिया भी नी चकी। एता ते बजाए, तिने आपणी मुट्ठी किन्हें आपणी छाती पीटी होर प्रार्थना कीती, 'हे परमेसर, मेरे पर दया कर क्यूंकि हांऊँ एक पापी आ।'

फेरी यीसूए बोल्या, "हांऊँ तुस्सा किन्हें सच बोल्हा, परमेसरे तेस चुंगी लेणे वाले री प्रार्थना सुणी होर तेस जो धर्मी बोल्या। पर तिने तेस धार्मिक अगुवे री प्रार्थना पसंद नी किती। परमेसर हर एक घमंडी रा मूंड थाले करणा, पर तेस हर तेस आदमी री इज्जत करणी जो आपु जो नम्र करहा।"