2. पाप अणा संसार मे प्रवेश करे है

आदम और वणांरे घेरवालीं परमेश्वर रे द्वारा वणांरे लिए वणाया ग्या वणां सुंदर वगीचा मे रेतां हकां बोत ही खुश हा। और वणां मे हुं कोई भी कपड़ां नी पेरता हा, तौभी अणी वाते वणां मे हुं कणां ने शर्मिंदा नी किदो हो, क्योंकि अणा संसार मे जणां दनां मे पाप नी हो। और वा रोज वणां वगीचा मे फरता हा और परमेश्वर हुं वात करता रेता हा।

लेकिन वणां वगीचा मे एक हाँप हो। और वो बोत ही चालक हो। और वणे वणीं स्त्री हुं पुछयूं के, "कई सई मे परमेश्वरे थां हुं अणा वगीचा रा कणां भी रूंकडा रा फल ने खावा हुं मना किदो है?"

पसे वणीं स्त्रीए वणांने जवाब दिदो के, "परमेश्वरे मां हुं केयूं है के वणा भला और बुरा रे ज्ञान रा रुंकडा रे अलावा कणा भी रुंकडा रा फल ने खाई सको हो। और परमेश्वरे मां हुं केयूं है के अगर थां वणां फल ने खादो है या पसे वणांने अडिया भी हो, तो थां मरी जाओगा।"

पसे वणीं हाँपे स्त्री ने जवाब दिदो के, "ये वात सई नी है! थां नी मरोगा। परमेश्वर जाणे है के जिस्तर ही थां वणा फल ने खाओगा, थांं परमेश्वर रे हरिका वेई जाओगा और वणारे समान भला और बुरा ने हमजवे लागी जाओगा।

पसे वणी स्त्रीए देख्यूं के वो फल बोत ही मनभावनो हो और बोत ही हवादे भी दिखाई देतो हो। और वे भी हमझदार वणवीं चावती ही, अणी वाते वणींए फल ने तोडिन खाई लिदो। और पसे आपणें पति ने ज्यो वणींरे हातिंस रेतो हो वणांने भी दिदो और वणीं भी वणां फल ने खाई लिदो।

जणीस समय वणारी आँखां खुली ग्यी, और वणांने पतो चाल्यो के वा नागा हीं। पसे वणां पांनां ने एक हातीं हिविन वणांरा कपड़ां वणाविन वणांहुं आपणें शरीरां ने ढाँकवा री कोशिश किदी।

पसे वणीं आदमीए और वणांरे घेरवालिंए वणां वगीचा मे फरतां हकां परमेश्वर री आवाज ने हुण्यी और पसे वा दोई परमेश्वर हूं हपी ग्या। पसे परमेश्वरे वणां आदमी ने आवाज लगाई के, "थूं कटे है?" और पसे आदमे जवाब दिदो के, "मईं थने वगीचा मे टहलतो हको हुण्यो, अणी वाते मुं समकी ग्यो हो, क्योंकि मुं नागो हो। अणी वाते मुं हपी ग्यो।"

पसे परमेश्वरे पुछयूं के, "तई कणीं वतायो के थूं नागो है? कई तईं वो फल खादो है जणाए खावा रे लिए मईं थने मना किदो हो?" पसे आदमे जवाब दिदो के, "तई मने ज्या ये स्त्री दिदी है वणीएस मने वो फल खावा रे लिए दिदो हो।" पसे परमेश्वरे वणीं स्त्री हुं पुछयूं के, " तई यो कई किदो है?" पसे वणीं स्त्रिए केयूं के, "हाँपे मने धोखो दिदो है।"

पसे परमेश्वरे वणां हाँप हुं केयूं के, "थूं शापित है! अणी वाते अबार थूं आपणां पेट रे बल चालेगा और मिट्टी छाटेगा। और थूं और ये स्त्री एक बिजा हुं घृणा करोगा, और थारी संतानां और वणीरी संतानां भी एक बिजा हुं घृणा करेगा। और अणी स्त्री रो वंशज थारे सिर ने कुचलेगा, और थूं वणारी एड़ी ने डसेगा।"

पसे परमेश्वरे वणीं स्त्री हुं केयूं के, "मुं थारे बच्चां ने जन्मावा ने बोत ही पीडादायक करुंगा। और थूं आपणें पति हुं लालसा करेगा, और वो थारा पे प्रभुता करेगा।"

पसे परमेश्वरे आदम हुं केयूं के, "तई आपणें घेरवालीं री वात हुण्यी है और मारी आज्ञा ने नी मान्यी है। अणी वाते ये जगा शापित वेयी है, और तई अनाज उगावा रे लिए बोत ही कठिन परिश्रम करवा री आवश्यक्ता वेगा। और अबार थूं मरी जाएगा, और थारो शरीर मिट्टी मे मली जाएगा।" पसे आदमे आपणें घेरवालीं रो नाम हव्वा राख्यो, जणारो अर्थ है "जीवन आलवा वाली" क्योंकि वा सब जातियाँ री माता वेगा। पसे परमेश्वरे आदम और हव्वा ने जनावर री खाल हुं वण्यां हका कपड़ां पेराया।

पसे परमेश्वरे केयूं के, "अबार भला और बुरा ने जाणवा हुं मनक आपणें हरिकोस वेई ग्यो है, अणी वाते वणांने अबार वणा जीवन रे रुंकडा रा फल ने नी खावे देणो चावे ताकि वा सदा रे लिए जीवता रेईं।" अणी वाते परमेश्वरे आदम और हव्वा ने वणां वगीचा हुं बाण्णे निकाली दिदा। पसे परमेश्वरे कणां ने भी वणां जीवन रा रुंकडा रो फल खावा हुं रोकवा रे लिए वणां वगीचा रा प्रवेश द्वार पे शक्तिशाली स्वर्गदूतां ने बैठाई दिदा।