31. प्रभु यीशु पाणी पे चाले है

पाँच हजार लोगां ने भोजन करावा रे बाद, प्रभु यीशुए आपणें चेलां हुं नाव मे जावा रे लिए केयूं। और वणीं वणांने झील रे दूसरी पार जावा रे लिए केयूं, जबकि वो थोड़ाक समय रे लिए वटेस ठेर ग्यो। और पसे चेलां परा ग्या और प्रभु यीशुए वणीं भीड़ ने विदा किदी, ताकि वा आपणें घरे परा जाए। और अणांरे बाद, प्रभु यीशु प्रार्थना करवा रे लिए मंगरा मे परो ग्यो। और वटे वो बिल्कुल अकेलो हो, और पसे वणीं देर रात तक प्रार्थना किदी।

और वणां समय, चेलां आपणीं नाव ने चलावतां हका जाई रेया हा, पण वायरो वणांरे विरुद्ध बोत ही जोर हुं वाजीं रेयो हो। और बोत ही रात वेई जावा रे बाद भी वा केवल झील रे वचीस पोंच्या हा।

और वणां समय प्रभु यीशुए प्रार्थना करणीं समाप्त किदी और आपणें चेलां रे कोडे पासो जाणों आरम्भ किदो। और पसे वो नाव री तरफ जावा रे लिए पाणी रे ऊपर चालवे लागो।

और पसे चेलां वणांने देख्यो। और एकदम समकीं ग्या, क्योंकि वणां होस्यो हो के वो एक भूत है। लेकिन प्रभु यीशु जाणंतो हो के वा समकीं ग्या हीं, अणीं वाते वणीं वणांने आवाज देईन केयूं के, "समको हके, यो मुं हूँ!"

और पसे पतरसे प्रभु यीशु हुं केयूं के, "हे प्रभु, यदि यो थूं है तो मने भी पाणी पे चालिन थारे कोडे आवणां रो आदेश दे।" और पसे प्रभु यीशुए पतरस हुं केयूं के,"आवी जा!"

और पसे पतरस नाव हुं उतरी ग्यो और प्रभु यीशु रे कोडे जावा रे लिए पाणी री सतह पे चालणों आरम्भ किदो। पण थोड़ेक छेटी जाईन, वणीं आपणीं आँखां ने प्रभु यीशु हुं फेर लिदी और वणीं लैरां ने देखणों और वणां तेज वायरा ने मेहसूस करणों आरम्भ कर दिदो।

और पसे पतरस एकदम समकीं ग्यो और वो पाणी मे डूबणें लागो। और पसे वो ऊँची आवाज हुं चिल्लायो के, "हे प्रभु, मने वचाड़!" और पसे प्रभु यीशुए वणांस समय आपणों हाथ बढ़ाविन वणांने पकड़ लिदो। और पसे वणीं पतरस हुं केयूं के, "थारो विश्वास बोत ही कम है! थने सुरक्षित राखवा रे लिए तईं मारापे भरोसो क्यूं नी किदो?"

और पसे प्रभु यीशु और पतरस पासा वणीं नाव पे चढ़ी ग्या, और पसे तुरन्त वायरो वाजणों बंद वेई ग्यो। और पसे झील रो पाणी एकदम शान्त वेई ग्यो। और पसे चेलां चकित वेईन प्रभु यीशु रे हामे आपणां घुटणां टेक दिदा। और पसे वणां प्रभु यीशु री आराधना किदी और वणांहुं केयूं के, "सई मे थूं परमेश्वर रो बेटो है।"