38. प्रभु यीशु ने पकड़वायो जाए है
हर साल, यहूदी लोग फसह रो तेवार मनावता हा। और यो अणां बारा मे एक उत्सव हो के कई शताब्दियां पेले परमेश्वरे वणांरे बापदादां ने मिस्र री गुलामी हुं छोड़ाया हा। पसे लगभग तीन साल रे बाद प्रभु यीशुए सार्वजनिक रूप हुं प्रचार करणों और शिक्षा देणीं आरम्भ किदी। पसे प्रभु यीशुए आपणें चेलां ने वतायो के वो वणांरे हातीं यरूशलेम मे फसह रा तेवार ने मनावणों चावे है, और यो भी के वो वटे मार डाल्यो जाएगा।
प्रभु यीशु रा चेलां मे एक यहूदा नाम रो व्यक्ति हो। और यहूदो चेलो रे धन री थैली राख्वा रो प्रभारी हो, पण अक्सर वो वणीं थैली मे हुं पईसा निकालीं लेतो हो। प्रभु यीशु और वणांरे चेलां रे हातीं यरूशलेम मे पोंचवा रे बाद यहूदो यहूदी अगुवां रे कोडे ग्यो। पसे वणीं धन रे बदला मे प्रभु यीशु ने वणांरे हातां मे पकड़ावणां रो प्रस्ताव राख्यो। क्योंकि वो जाणंतो हो के यहूदी अगुवा यो स्वीकार नी करता हा के प्रभु यीशु आवणां वालों मसीह हो। और वो यो भी जाणंतो हो के वा लोग वणांए मारी नाखवा चावता हा।
महायाजक रा केवा पे यहूदी अगुवां प्रभु यीशु ने वणांरे हातां मे पकड़ावणां रे लिए यहूदा ने तीस रूपा रा सिक्का दिदा। और यो वणींस प्रकार हुं वियो जिस्तर के परमेश्वर री ओर हुं बोलवा वालां लोगां केयूं हूँ के असो वेगा। पसे यहूदो मानी ग्यो और वणां धन ने लेईन परो ग्यो। पसे प्रभु यीशु ने गिरफ्तार करवा मे वणांरी मदद करवा रे लिए कणांक अवसर री खोज करवे लागो।
यरूशलेम मे, प्रभु यीशुए आपणें चेलां रे हातीं फसह रो तेवार मनायो। और फसह रा भोज रे दौरान, प्रभु यीशुए रोटी ने लेईन तोड्यी। पसे वणीं केयूं के, "अणीं रोटी ने लियो और खाओ। यो मारो शरीर है ज्यो मुं थांरे लिए देऊँ हूँ। और यो मारी याद मे करजो।" अणीं प्रकार हुं, प्रभु यीशुए केयूं के वो वणांरे लिए मरी जाएगा, अर्थात् वणांरे लिए वो आपणां शरीर ने बलि चढ़ाई देगा।
पसे प्रभु यीशुए एक दाखरस रो प्यालो लिदो और केयूं के, "अणांए पी लियो। क्योंकि यो नवी वाचा रो मारो लोई है ज्यो के मुं उंडेलूँगा ताकि परमेश्वर थांरे पापां ने माफ करे। और हर बार अणांने पीतां समय मारी याद मे अणांने करो ज्यो मुं अबार करी रेयो हूँ।"
पसे प्रभु यीशुए आपणें चेलां हुं केयूं के, "थां मे हुं एक जणों मईं पकड़वाएगा।" पसे चेला चौंक ग्या, और पुछवे लागा के कुँण असो काम करेगा। पसे प्रभु यीशुए केयूं के, "मारे पकड़ावणां वालों व्यक्ति वो है जणांए मुं यो रोटी रो टुकड़ों देऊँ हूँ।" पसे वणीं वो रोटी रो टुकड़ों यहूदा ने दिदो।
वणीं रोटी ने लेवा रे बाद, यहूदा मे शैतान हमाईं ग्यो। और यहूदो निकलिंन प्रभु यीशु ने गिरफ्तार करवा रे लिए यहूदी अगुवां री मदद करवा रे लिए वणां कोडे परो ग्यो। और यो रात रो समय हो।
भोजन रे बाद, प्रभु यीशु और वणांरे चेलां जैतून रा मंगरा पे परा ग्या। पसे प्रभु यीशुए वणांहुं केयूं के, "थां सब आज रात मने छोड़ दोगा। यो लिख्यो हको है के, 'मुं चरवाहा ने मारूँगा और सब भेड़ां तितर- बितर वेई जाएगा।'"
पतरसे जवाब दिदो के, "भलेई बिजा सब थने छोड़ी देईं, लेकिन मुं थने नी छोड़ूँगा!" पसे प्रभु यीशुए पतरस हुं केयूं के, "शैतान थां सबने लेई लेणों चावे है, पण हे पतरस, मईं थारे लिए प्रार्थना किदी है के थूं विश्वास हुं चुकी नी जाए। तौभी, आज रात, कुकड़ा रे बाँग देवा हुं पेले थूं तीन बार मारो इनकार करेगा के थूं मने जाणें भी नी है।"
पसे पतरसे प्रभु यीशु हुं केयूं के, "भलेई मुं मरी भी जाऊँ, तौभी मुं कदी भी थारो इनकार नी करूँगा!" और बिजां चेलां भी यूंईस केयूं।
पसे प्रभु यीशु आपणें चेलां रे हातीं गतसमनी नाम री जगापे ग्या। पसे प्रभु यीशुए आपणें चेलां हुं प्रार्थना करवा रे लिए केयूं, ताकि शैतान वणांरी परीक्षा नी करे। पसे प्रभु यीशु खुद भी प्रार्थना करवा रे लिए परो ग्यो।
प्रभु यीशुए तीन बार प्रार्थना किदी के, "हे मारा पिता, यदि सम्भव वे तो कृपा करिन यो दुःख रो प्यालो पीवा रे लिए मने मत दे। पण यदि लोगां रा पाप माफ किदा जावा रे लिए कोई ओर बिजो मार्ग नी है, तो थारेस इच्छा पुरी वे।" प्रभु यीशु बोत ही व्याकुल हो और वणांरो पसीनो लोई री बूँदां रे समान हो। और वणांए सामर्थ्य देवा रे लिए परमेश्वरे एक स्वर्गदूत ने भेज्यो।
हर बार प्रार्थना रे बाद, प्रभु यीशु आपणें चेलां रे कोडे पासो आयो, पण वा सब हुई रेया हा। और जेरां प्रभु यीशु तीसरी बार वणां कोडे आयो तो प्रभु यीशुए वणांहुं केयूं के, "जागी जाओ! क्योंकि मारे पकड़ावणां वालों अटे आवी ग्यो है।"
यहूदी अगुवां, सैनिकां, और एक बड़ी भीड़ रे हातीं यहूदो आयो। और वणांरे हातां मे तलवारां और लाठियाँ हीं। पसे यहूदे प्रभु यीशु रे कोडे आविन वणां हुं केयूं के, "हे गुरु, नमस्कार, "और वणांने चूम लिदो। और वणीं गिरफ्तार करवा रे लिए यहूदी अगुवां पे प्रकट करवा रे लिए असो किदो हो। पसे प्रभु यीशुए वणांहुं केयूं के, "हे यहूदा, कई थूं एक चुम्बन हुं मने पकड़वाईं रेयो है?"
जेरां वा सैनिक प्रभु यीशु ने पकड़ी रेया हा, तो पतरसे आपणीं तलवार निकाल्यी और महायाजक रा एक सेवक रो कान काट दिदो। पसे प्रभु यीशुए केयूं के, "तलवार ने छेटी कर! क्योंकि मुन आपणें पिता हुं मारो बचाव करवा रे लिए स्वर्गदूतां री एक सेना रे लिए विनती करी सकूँ हूँ। पण मने मारे पिता री वात ने माननी है।" और प्रभु यीशुए वणां व्यक्ति रो कान पासो जोड़िन ठीक करी दिदो। पसे सब चेला प्रभु यीशु ने छोड़िन भाग ग्या।
मत्ती 26:14-56; मरकुस 14:10-50; लूका 22:1-53; यूहन्ना 12:6; 18:1-11 हुं एक बाइबल री कहाणी
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।