2. पाप संसारे निकरीदादेय

आदम अर हूनेची डोकरी परमेश्वर दुवारा हूनांग करता बनाई होला हुन सुन्दर बनवाड़ायें रतेय खूबेय हरीक रहत। हूनियांगले कोहूँ कपड़ा ईलयत लेकिन हुन गोठ हूनांग लगले कोहूक घला लाज होताक इदिलो, कायंकी संसारे पाप ईरेहेय हूनी एक दम हुन बनवाड़ायें हिंडते रहिया आत अर परमेश्वर के गोठी यावते रहिया आत।

तबले हुन बनवाड़े एकठान सांप रेहेय हुन खुबेय चतुर रेहेय। हुन बायलिक समजावलो; का्य सही में परमेश्वर तुमक हुन बनवाड़े चाक कोंहू घला रूखे चा फरांग खाऊक मना करलो हाय।

हुन बायली उत्तर दिली, “परमेश्वर हमक बल्लो हाय कि हमी हुन सही अर गलत अकल चा रुख चा अलावा कही घला रूखे चा फर खाऊक सकासा। परमेश्वर हमक बल्लो हाय अगर तुमी हुन फरके खाहासे अर सिवासे तब तुमी मरा से।

हुन साँप बायलिक जवाब दिलो। “यो सही नोहोय तुमी ईमरास। परमेश्वर जानिदा हेय कि जिसे तुमी हुन फर के खाहासे तुमी परमेश्वर चो इसा होवासे अर हूना चो ईसा सही अर गलत के समजासे।

हुन बायली देखली की हुन फर मनभाऊ रेहेय अर अच्छा दीखते रेहेय। हुन बल समजदार बनुक चाहते रेहेय, याहायकरता हुनइती फर के टोडून खादली। फेर हुनइती आपला मानस के जो हुनेचा संग रेहेय हुन फर दिली अर हुन बल खादलो।

उबुकले, हुनइती देखली, अर हुनेक मालूम होलो कि हुन बांडा रहत। हुनइता पानांग एक लग सिलून भर हुनांग चा कपड़ा बनाउन हूनीइता आपला देह के ढाकुक कोसिस करत।

तब मानस अर हूनाची डोकरी इति हुन बनवाड़े टहलते रहत अर परमेश्वर चा राग के सुनला हूनी दुयेयझन परमेश्वर के देखुन लुकला। तब परमेश्वर मानस के चिचयावलो, “तुय कहा आसस ? “आदम जवाल दिलो, मै तुक बनवाडायें टहलते रहस अर सुनलेय अर मै भय होलेयं कायंकी मै बाड़ो रेहेय। याहायकरता मै लुकलेय”।

परमेश्वर समजावलो, “तुक कौन सांगलो कि तुय बाड़ो आसस ? का्य तुय हुन फर के खादलिसा हूनाक खाऊक मै तुक मनना करू रेहेय ? “मानस जवाब दिलो, “तुय मक हुन बायली दिलीस हूनेयईती मक हुन फर दिली। ”तब परमेश्वर बायलिक समजावलो, तुय यो का्य करलिस हुन बायली बल्ली, “साप मक धोका दिलो हाय।”

साप के बल्लो, “तुय शापित आस! तुय तुचा पूटा चा बल बाहाड़से अर माटीक चाटसे। तुय अर या बायली एक दुसरा संग रीस करदे, अर तुचा कड़हा अर हुनेचा कड़हा बल याहचा हूनाचा कड़हा संग घला याहचा हूनाचा संग रीस होदे। या बायली चा वंशज तुचा मुंडाक कुचलदे, अर तुय हूनांग चा रेडाक चाबसे।

तब परमेश्वर बायलीक बल्लो, “मै तुचा कड़हा जनमावता दाय खुबेय दुख: देयींन। तुय तुचा मानस के लालसा करसे, अर हुन तुक प्रभुता करीद।”

परमेश्वर मानस के बल्लो, “तुय तूची बायली चाक सुनलिसा अर माचा आज्ञाक ईमान्लिसा। याहायकता भूय शापित होलो, हाय अर तुक भोजन उगावता करता खुबेय मेहनत करुक पड़ीद। एभे तुय मर से अर तुचो देह माटीये मिलीद। “हुन मानस आपली बायली चो नाव हव्वा ठोवलो, हूनाचो अर्थ आय “ जीवन देवयी इति,” कायंकी हुन सपा जातियांग ची माईती होईद। अर परमेश्वर आदम अर हव्वाक जानवर चा चामेटा चो बनलो कपड़ा लायाव्लो।

फेर परमेश्वर बल्लो, “एभे सही अर गलत के जानुक मानेय माचो ईसाय होला, याहायकरता हूनांग हुन जीवन चा रुख चा फरके इखाऊक देते रेहेय कि हुन हमेशा करता जीवत रहोत। याहायकरता परमेश्वर आदम अर हव्वाक हुन बनवाड़ेले निकराव दिलो। अर परमेश्वर कोंहूक घला हुन जीवन चा रुख चा फर के खाऊक रोकता करता हुन बनवाड़े चा प्रवेशद्वार शक्तिशाली स्वर्ग इताक बसावदिलो।