10. ୧୦. ପାଦି ମର୍ଡି
ମାପ୍ରୁ ମୋଶା ମାରି ହାରଣଦିଙ୍ଗ୍ ଜାଗ୍ରତ୍ କିବିସ୍ତାନ୍ ଜେ ଫାରୋ ରାଜାଦି ଗାର୍ବାମ୍ କାହ୍ଇକା ଆନାତ୍। ଏସେଙ୍ଗ୍ ୱାରୁ ଫାରୋ ରାଜା ଡାଗ୍ରୁ ସହାର୍ ମାରି ୱାରୁ ୱେର୍ତାର୍, “ଇସରାଏଲ୍ଦି ମାପ୍ରୁ ଇୟାୱାଜା ୱେହ୍ସିନାନ୍, ‘ନା ଲୋକାଙ୍ଗ୍ ସନ୍ଣ୍ଡ୍ରେଙ୍ଗ୍ ସିଆ!”’ ମାତର୍ ଫାରୋ ୱାରି ମାଟା ୱେନ୍ଏତାନ୍ ମାରି ଇସ୍ରାଏଲ୍ଦି ୱାରିଙ୍ଗ୍ ଡ଼ିସ୍ନି ବାଦ୍ଲୁ ୱାଣ୍ତ୍ରୁ ୱାରିଙ୍ଗ୍ ନାଣ୍ତୋ କାଷ୍ଟାମ୍ ପାଣି କିଦେଙ୍ଗ୍ ବିଜାର୍ କିତାନ୍।
ଫାରୋ ଆୟା ଲୋକାଙ୍ଗ୍ ସନ୍ଣ୍ଡ୍ରେଙ୍ଗ୍ ସିନିୱାନ୍ଦିଙ୍ଗ୍ ଜାରିଦିଙ୍ଗ୍ ଜାରି ମନାକିଜି ମାର୍ହାନ୍। ଆୟାୱାନ୍ଦିଙ୍ଗ୍ ମାପ୍ରୁ ମିସର୍ ଦେଶେମ୍ଦୁ ପାଦି ତିଲାନିନାନି ମର୍ଡି ପୋକ୍ତାନ୍। ଇୟା ମର୍ଡିଦି ବାଣାନ୍, ମାପ୍ରୁ ଫାରୋଦିଙ୍ଗ୍ ତର୍ପ୍ତାନ୍ ଜେ ୱାଣ୍ତ୍ରୁ ଫାରୋ ମାରି ମିସର୍ ଦେସେମ୍ଦି ୱିଜୁ ଦେୟାମ୍କା ବାଣାନ୍ ନାଣ୍ତୋ ସାତୁତିକାନ୍ ମାର୍ହାନ୍।
ମାପ୍ରୁ ନିଡ଼ି ଗାଡାଦିଙ୍ଗ୍ ନେତେର୍ଦାନ୍ ବାଦ୍ଲେ କିତାନ୍, ମାତର୍ ଫାରୋ ଇୟେଲ୍ବା ଇସ୍ରାଏଲ୍ଦି ୱାରିଙ୍ଗ୍ ସନ୍ଣ୍ଡ୍ରେଙ୍ଗ୍ ସିଏତାନ୍।
ମାପ୍ରୁ ୱିଜୁ ମିସର୍ ଦେସେମ୍ଦୁ କାପ୍କିଙ୍ଗ୍ଙ୍ଗା ପୋକିସ୍ତାନ୍। ଫାରୋ କାପ୍କିଙ୍ଗ୍ଙ୍ଗା ଆଙ୍ଗ୍ଦେଙ୍ଗ୍ ମୋଶାଦିଙ୍ଗ୍ ବାତିମାଲିତାନ୍। ମାରି ୱିଜୁ କାପକିଙ୍ଗ୍ ସାତିୱେନ୍କା, ଫାରୋ ୱାନି ଜିଉଙ୍ଗ୍ କାର୍ହିକା କିତାନ୍ ମାରି ଇସ୍ରାଏଲ୍ଦି ଲୋକାଙ୍ଗ୍ ମିସର୍ଦାନ୍ ଆତେର୍ ସନ୍ଡ୍ରେଙ୍ଗ୍ ସିଏଣ୍ତା ଆଜିନାନ୍।
ଆୟାୱାନ୍ଦିଙ୍ଗ୍ ମାପ୍ରୁ ଦୁଡ଼ିପେନୁକୁ ପିଡ଼୍କୁ ମର୍ଡ଼ି ପୋକ୍ତାନ୍। ଦାନିୱେନ୍କା ୱିଞ୍ଜେଙ୍ଗାଣି ମର୍ଡି ପୋକ୍ତାନ୍। ଫାରୋ ମୋଶା ମାରି ହାରଣଦିଙ୍ଗ୍ କୁକ୍ତାନ୍ ମାରି ୱେହ୍ତାନ୍ ଜଦି ୱାରୁ ମର୍ଡିଦିଙ୍ଗ୍ ଆଡିନାର୍, ଆଦେଙ୍ଗ୍ ଇସ୍ରାଏଲ୍ଦିକାର୍ ମିସର୍ ଡ଼ିସ୍ସି ସଣ୍ଡ୍ରେଙ୍ଗ୍ ଆଟ୍ନାର୍। ନାସ୍ତିୱାଲେ ମୋଶା ପାର୍ତନା କିତାନ୍, ଆଦେଙ୍ଗ୍ ମାପ୍ରୁ ୱିଞ୍ଜେଙ୍ଗା ମିସର୍ଦାନ୍ ଗୁସାକିତାନ୍। ମାତର୍ ଫାରୋ ୱାନିଜିଉଦିଙ୍ଗ୍ ସାତୁକିତାନ୍ ମାରି ଆୟା ଲୋକାଙ୍ଗ୍ ସନ୍ଡ୍ରେଙ୍ଗ୍ ସିଏତାନ୍।
ଦାନିୱେନ୍କା ମାପ୍ରୁ ୱିଜୁ କେଡ଼ିଇଙ୍ଗାଁଣି କଡିଙ୍ଗ୍ ଆୟାୱିଜୁ ମିଶର୍ ଲୋକାଦି ମାହାତ୍, ନେଗେଡ଼୍ ଆଏଡ଼ା ସାପିସ୍ସି କୁମାକିତାନ୍। ମାରି ଫାରୋଦି ଜିଉ ସାକ୍ତି ଆତାତ୍, ମାରି ଆକାନ୍ ଇସ୍ରାଏଲ୍ଦି ୱାରିଙ୍ଗ୍ ଡ଼ିସ୍ଏତାତ୍।
ମାରି ମାପ୍ରୁ ମୋଶା ଫାରୋଦି ଆଗ୍ଡ଼ି ସାମ୍ନାଦୁ ନିରୁ ପକ୍ତେଙ୍ଗ୍ ୱେର୍ତାନ୍। ନାସ୍ତିୱାଲେ କିତାନ୍ ମାରି ଆକାନ୍ ମିଶର୍ତି ୱାରି ତଲୁମିଗ କାସ୍ଟାମ୍ ପୁଜାଦି ଗାଉତ ରିତାତ୍, ମାରି ଇସ୍ରାଏଲ୍ତି ୱାରିଙ୍ଗ୍ ଆଏତାତ୍। ମାପ୍ରୁ ଫାରୋଦିଙ୍ଗ୍ ଜିଉ ଲୋଇ ସାକ୍ତି କିତାନ୍, ମାରି ଫାରୋ ଇସ୍ରାଏଲ୍ଦୁ ଡ଼ିସ୍ଏତାନ୍।
ଦା’ନି ୱେନ୍କା, ମାପ୍ରୁ ଆଣ୍ଡ୍ରିଗା କାଲ୍କୁ ଏସଡ଼୍ ତାସ୍ବାସ୍ ସେଏଣ୍ଡା କିତାନ୍, ମାରି ଏମେକାର୍ ଆଇବାନୁ ସନ୍ସି ସାତାର୍। ଫାରୋ ମୋଶା ମାରି ହାରଣଦି କୁକ୍ତାନ୍ ମାରି ୱେତାନ୍, “ନାନୁ ପାପାମ୍ କିତାମାନା। ମିରୁ ସଣ୍ଡ୍ରେ ଆଟ୍ଇଦେର୍”। ଆୟାନୁଣ୍ଡି ପାର୍ତନା କିତାନ୍, ମାରି ବାଦଡ଼୍ଦାନ୍ ଆଣ୍ଡ୍ରିଗା କାଲ୍କୁ ଆର୍ଦେଙ୍ଗ୍ ବନ୍ଦ୍ ଆତାତ୍।
ମାତର୍ ମାରି ଡ଼େସି ପାପାମ୍ କିତାନ୍ ମାରି ୱାନି ଜିଉ ସାକ୍ତି କିତାନ୍। ଆକାନ୍ ଇସ୍ରାଏଲ୍ଦି ୱାରିଙ୍ଗ୍ ସଣ୍ଡ୍ରେଙ୍ଗ୍ ଡ଼ିସ୍ତେ ଅଟ୍ଏତାନ୍।
ଆୟାନୁଣ୍ତିଙ୍ଗ୍ ମାପ୍ରୁ ଗାଙ୍ଗାଡ଼ୁଦି ମର୍ଣ୍ଡି ପକ୍ତାନ୍ ମାରି ମିଶର୍ ୱିଜୁ ୱିଦିତେ। ଆୟା ପାସି ଆଣ୍ଡ୍ରିଗା କାଲ୍କୁଣାନ୍ ସେଏଣ୍ତ୍ ଆଏଣ୍ଡା ମାହାତ୍ ଆୟା ୱିଜୁ ଇୟା ଗାଙ୍ଗାଡ଼ୁଙ୍ଗ୍ ସେଏଣ୍ତ୍ କିତେ ଡ଼ିସ୍ତେ।
ଦାନିୱେନ୍କା ମାପ୍ରୁ ସିକାଟିଦିଙ୍ଗ୍ ପକ୍ତାନ୍ ଆକା ମୁଣ୍ଡ୍ରିଦିନାମ୍ ୱିଜୁ ମାର୍ହାତ୍। ଇକା ନିସା ସିକାଟି ମାହାତ୍ ଜେ ମିଶର୍ଦି ଲୋକୁ ୱାରି ଇଲ୍କୁ ଡ଼ିସ୍ତେଙ୍ଗ୍ ଆଟ୍ଏଜି ମାର୍ହାର୍। ମାତର୍ ଏମେ ଜାଗାଦୁ ଇସ୍ରାଏଲ୍ଦି କାର୍ ମାନ୍ଜି ମାହାର୍ ଆବେ ଜାଇ ମାର୍ହାତ୍।
ଇୟା ନଟା ମର୍ଣ୍ଡି ଆତିୱେନ୍କା ୱିଜୁ ଫାରୋ ଇସ୍ରାଏଲ୍ଦି ୱାରିଙ୍ଗ୍ ଡ଼ିସ୍ଏତାନ୍। ଆୟାୱାନ୍ଦିଙ୍ଗ୍ ଫାରୋ ୱେନ୍ତିଙ୍ଗ୍ ମାପ୍ରୁ ଉଣ୍ଡ୍ରେ ୱିଜ୍ନି ମାର୍ଣ୍ଡି ପକ୍ତେ ନିୟମ୍ କିତାନ୍। ଇକା ଫାରୋଦି ମନ୍ସୁଦିଙ୍ଗ୍ ଡ଼େପ୍ତେଙ୍ଗ୍ ଆଟ୍ନାତ୍।
ଯାତ୍ରା ପୁସ୍ତକ୍ ୫-୧୦ଦି ଉଣ୍ତ୍ରେ ବାଇବଲ୍ ଦି କାତାନି
Free to use, adapt, and share under an open license (CC BY-SA 4.0).