9. ୯. ମାପ୍ରୁ ମଶାଦିଙ୍ଗ୍ କୁକ୍ତାନ୍
ଯୋଶେଫ୍ରି ସାତିୱେନ୍କା ୱାନି ୱିଜୁ ଜାତିଦି କୁଟୁମ୍ ମିଶରଦୁ ମାର୍ହାର୍। ଆକାର୍ ମାରି ୱାରି କୁଟୁମ୍ ଆକାର୍ ନାଣ୍ଡ ପାଟେଙ୍ଗ୍ ମାଣ୍ଡ୍ରେଙ୍ଗ୍ ମାହାର୍ ମାରି ୱାରିଙ୍ଗ୍ ନାଣ୍ଡ କଢୋ କୋକ୍ରା ଜନମ୍ ଆତାର୍। ୱାରିଙ୍ଗ୍ ଇସ୍ରାଏଲ ଦୋରୁ କୁକ୍ତାର୍।
ଏସ ଏସ ପାଟେଙ୍ଗ୍ ୱେନ୍କା, ଇସ୍ରାଏଲତି ଲୋକୁ ନାଣ୍ଡୋ ଆତାର୍, ମାରି ମିଶର ଦେଶେମ୍ତିକାର୍ ଯୋଶେଫ୍ଦି ବାଣାନ୍ ସାର୍ଦା ଆଏଣ୍ଡା ମାର୍ହାର୍ ମାରି ଇସ୍ରାଏଲ୍ତି ଲୋକାୱାନ୍ଦିଙ୍ଗ୍ ନାଣ୍ଡୋ ପାଣି କିଜିମାର୍ହାର୍। ଆୟାକାର୍ ଇସ୍ରାଏଲ୍ ଲୋକାଙ୍ଗ୍ ତିଏଲାଦେଙ୍ଗ୍ ଆସ୍ତାର୍, ମାତର୍ ୱାରୁ ନାଣ୍ତ ଲୋକୁ ମାର୍ହାର୍। ଆୟାୱାନ୍ଦିଙ୍ଗ୍ ଆୟାୱେଡ଼ାଦୁ ମାରି ଫାରୋ ମିଶରଦୁ ସାସନ୍ କିଜି ମାର୍ହାନ୍ ମାରି ଇସ୍ରାଏଲଦି ଲୋକାଙ୍ଗ୍ ମିଶ୍ରିୟରି ଲୋକୁଦି ଦାସ୍କିତାନ୍।
ମିଶରିୟର୍ ଇସ୍ରାଏଲ୍ତି ୱାରିଙ୍ଗ୍ ଗୁଜାମ୍ଦୁ ପିଣ୍ଡିସ୍ତାର୍ ମାରି ୱିଜୁ ଗଡ଼ ତିଆର୍ କିଦେଙ୍ଗ୍ ବିଜାର୍ କିତାନ୍। ଆୟା କାସ୍ଟାମ୍ ପାଣି ୱାରି ଜିଉଦୁ ଦୁକାମ୍ କାସ୍ଟାମ୍ କିତାତ୍, ମାରି ୱାରିଙ୍ଗ୍ ମାପ୍ରୁ ଆର୍ଶିବାଦ କିତାନ୍, ମାରି ୱାରିଙ୍ଗ୍ ନାଣ୍ଡ କଡ଼ କୋକ୍ରା ଆତାର୍।
ଫାରୋ ସୁଡ଼ୁତାନ୍ ନେ ଇସ୍ରାଏଲତି ୱାରିଙ୍ଗ୍ ନାଣ୍ଡ କଡ଼ର୍ ନାଣ୍ଡ ପୁଟ୍ତାର୍, ଆୟାୱାନ୍ଦିଙ୍ଗ୍ ଆକାନ୍ ନିଜେ ଲକାରିଙ୍ଗ୍ ଇସ୍ରାଏଲଦି ୱିଜୁ କଡ଼ କୋକ୍ରାରିଙ୍ଗ୍ ନିଡ଼ି ଗାଡ଼ାଦୁ ପୋକ୍ସି ଢ଼େଇଦେଙ୍ଗ୍ ମାଟା ସିତାନ୍।
ଅରେତ୍ ଇସ୍ର।ଏଲ୍ ଆଡ଼ିସି ଉଣ୍ଡ୍ରି କଡ଼ ଜନମ୍ କିତାତ୍। ଆକାତ୍ ମାରି ୱାନି ମାସିଙ୍ଗ୍ ଏସ ଆତାତ୍ ନାସଡ଼୍ ଦିନାମ୍କୁ କଡ଼ଦିଙ୍ଗ୍ ମାରାକ୍ତା ମାହାର୍।
ନାସ୍ତିୱାଲେ କଡ଼ରି ବୁବା ମାରି ୟାୟା ନାଣ୍ଡ ୱେଡ଼ାଦୁ ମାରାକ୍ସି ଆଟ୍ଏତାତ୍, ଆକେଙ୍ଗ୍ ୱାନିଙ୍ଗ୍ ସାଏଣ୍ଡାନେ ଜିପିସ୍ତେଙ୍ଗ୍ ଉଣ୍ଡ୍ରେ ଦେଲ୍ଜି ମାହି ଟପିଲୋଇ ନିଡ଼ି ଗାଡ଼ା ଗାଟ୍ତୁ ଏରୁଦୁ ନାଡ଼େଙ୍ଗ୍ ନାଣ୍ମି ୱାନିଙ୍ଗ୍ ଇଟ୍ତାର୍। ୱାରି ପେରିବିବି ଦାନିଙ୍ଗ୍ ଇନିକା ଆନାତ୍, ସୁଡ଼୍ଦେଙ୍ଗ୍ ଇଜି ଆକୋ ମାନ୍ଜି ସୁଡ଼୍ଜି ମାର୍ହାତ୍।
ଫାରୋଦି ଆଇଲି ଡ଼ଙ୍ଗାଁଦିଙ୍ଗ୍ ମାରି ଆୟା ଲୋଇ ସୁଡ଼୍ତାତ୍। ନାସ୍ତିୱେଡ଼ାଦୁ ଆକାତ୍ ଉଣ୍ଡ୍ରେ କଡ଼ ସୁଡ଼୍ତେ, ଆକାତ୍ ୱାନିଙ୍ଗ୍ ନିଜେ କଡ଼ୱାଜା କିଜି ଅତାତ୍। ଆକାତ୍ କଡ଼ଦି ନିଜେଦି ୟାୟ ଇଜି ନେସ୍ଏଣ୍ଡା ଇସ୍ରାଏଲ କୁଟୁମ୍ତି ଅରେଦ୍ ଆଡ଼୍ସିଦି କଡ଼ଦିଙ୍ଗ୍ ଦାନିପାଲୁ ଉଟ୍ପିସ୍ତେଙ୍ଗ୍ ପାଣିଦୁ ଇଟ୍ତାର୍। ନାସ୍ତିୱାଲେ କଡ଼ ପେରିକାନ୍ ଆତାନ୍ ୱାନିଙ୍ଗ୍ ୟାୟାଦି ପାଲୁ ଉଟ୍ପିସ୍ସ୍ତେଙ୍ଗ୍ ଆଏତ୍, ଦାନିଙ୍ଗ୍ ଆକାତ୍ ଫାରୋଦି ଆଇଲିଦିଙ୍ଗ୍ ଡ଼େପ୍ସି ସିତାତ୍, ଏହେନ୍ଗି ୱାନି ଦୋରୁ ମଶା ଇଟ୍ତାର୍।
ଉଣ୍ଡ୍ରେଦିନାମ୍, ଏସ୍ତିୱାଲେ ମୋଶା ପେରିକାନ୍ ଆତିୱେନ୍କା ଆକାନ୍ ସୁଡ଼୍ତାନ୍, ଅରେନ୍ ମିଶରିୟ ଇସ୍ରାଏଲତି ଦାସ୍ଦିଙ୍ଗ୍ ଡ଼େଇଜିନାନ୍। ମୋଶା ୱାରି ଇସ୍ରାଏଲ ଲୋକୁଦିଙ୍ଗ୍ ରକ୍ଷାକିଦେଙ୍ଗ୍ ଚେସ୍ଟା କିତାନ୍।
ନାସ୍ତିୱାଲେ ମୋଶା ନେସ୍ତାନ୍, ଏୱେର୍ ସୁଡ଼୍ଏର୍, ଆକାନ୍ ମିଶରିୟଦିଙ୍ଗ୍ ଗୁତ୍ତାନ୍ ମାରି ୱାନି ମେନ୍ଦଲଦିଙ୍ଗ୍ ମୁସ୍ତାନ୍ ମାରି ଅରେନ୍ ଲୋକୁ ମୋଶା ଇନିକା କିତା ମାର୍ହାନ୍, ସୁଡ଼୍ତାନ୍।
ନାସ୍ତିୱାଲେ ଫାରୋ ନେସ୍ତାତ୍ ଗାନି ମୋଶା ଇନିକା କିତାନ୍,ଆକାନ୍ ୱାନିଙ୍ଗ୍ ଡ଼େଇଦେଙ୍ଗ୍ ବିଚାର୍ କିତାନ୍। ମାରି ମୋଶା ମିଶରଦାଣ୍ ମାଣୁଭୁମିଦୁ ଉରୁକ୍ତାନ୍। ଫାରରି ସେନାର୍ ଆବେନୁ ଦାନିଙ୍ଗ୍ ରେବାଦେଙ୍ଗ୍ ଆଟ୍ଏତାର୍।
ମିଶରଦାନ୍ ଆକରାଣ୍ ମାଣୁଭୁମିଦୁ ମୋଶା ଅରେନ୍ ଗାଉଡ଼ୁଏନ୍ ଆତାନ୍। ଆୟା ୱାଡ଼ିଦୁ ଉଣ୍ଡ୍ରେ ରିପାୱାଲେ ଆକାନ୍ ପେଡ଼ିକିତାନ୍ ମାରି ରୁଣ୍ଡି କଡ଼ର୍ ଆତାର୍।
ମୋଶା ୱାରି ମାମ୍ସିରି ମେଣ୍ଡା ଗରିଏଙ୍ଗ୍ ମାନ୍ଦା ମେପ୍ସି ମାର୍ହାନ୍, ଆକାନ୍ ଉଣ୍ଡ୍ରେ ବୁଟାଦୁ ସିସୁ କାସ୍ନିକା ସୁଡ଼୍ତାନ୍ ଏମେକାଗି ସିରୁକି ଆଏଣ୍ଡା କାସ୍ସି ମାର୍ହାତ୍। ଆକା ସୁଡ଼୍ଦେଙ୍ଗ୍ ଆୟା ଦୁପା ଡାଗ୍ରୁ ସର୍ହାନ୍। ଏସ୍ତିୱାଲେ ୱାଣ୍ଡ୍ରୁ ଦାନି ଡାଗ୍ରୁ ସର୍ହାନ୍ ଆଦେଙ୍ଗ୍ ମାପ୍ରୁ ୱାନିଙ୍ଗ୍ ୱେର୍ତାନ୍। “ହେ ମଶା, ନି ଜଡ଼୍କୁ କୁତ୍ଆ। ନିନୁ ଉଣ୍ଡ୍ରି ପବିତ୍ର ବାଡ଼ିଦୁ ନିଲ୍ତିମାନି।”
ମାରି ମାପ୍ରୁ ୱେହ୍ତାନ୍, “ନାନୁ ନିଜେ ଲୋକାଦି ଦୁକାମ୍ ସୁଡ଼୍ଜିନା। ନାନୁ ନିଙ୍ଗିଁ ଫାରୋଦି ଡ଼ାଗ୍ରୁ ପୋକ୍ନା ମାତର୍ ନିନୁ ଇସ୍ରାଏଲତି ୱାରିଙ୍ଗ୍ ମିଶର୍ ଦେଶେମ୍ତି ଦାସ୍ରି ବାଣାନ୍ ସୋପ୍ସି ତାଗା। ନାନୁ ୱାରିଙ୍ଗ୍ କିଣାନ ଦେଶେମ୍ ସିନା, ଆୟା ଦେଶେମ୍ଦିଙ୍ଗ୍ ଏହେଙ୍ଗଁ ନାନୁ ଆବ୍ରାହାମ୍, ଇସାକ ମାରି ଯାକୁବଦିଙ୍ଗ୍ ପର୍ମାଣାମ୍ କିତାମାନା।
ମୋଶା ୱେନ୍ବାତାନ୍,“ଜଦି ଲୋକୁ ନେସ୍ତେଙ୍ଗ୍ ଆଟ୍ନାର୍ ନାଙ୍ଗିଁ ଏହେର୍ ପୋକ୍ତାର୍, ନାନୁ ୱାରିଙ୍ଗ୍ ଇନିକା ୱେହନା?” ମାପ୍ରୁ ୱେର୍ତାନ୍,“ ମାପୁ ମାନାପ୍ ତୋ ମାନାପ୍।” ୱାରିଙ୍ଗ୍ ୱେର୍ଆ,’ ମାପୁ ମାନାପ୍’ ମିଡ଼ାଗ୍ରୁ ନାଙ୍ଗି୍ଁ ପୋକ୍ତା ମାନାନ୍”। ୱାଣ୍ଡ୍ରୁ ଇକାବା ୱେର୍ତାନ୍, ନାନୁ ମି ଆଗ୍ଡ଼ିରି ଲୋକୁ ଆବ୍ରାମ୍, ଇସାକ, ମାରି ଯାକୁବଦି ମାପ୍ରୁ। ୱିଜୁଦିନାମ୍ ୱାନ୍ଦିଙ୍ଗ୍ ଇକା ନାଦୋରୁ।
ମୋଶା ତିଏଲାଜି ମାହାନ୍ ମାରି ଫାରୋ ଡ଼ାଗ୍ରୁ ସଣ୍ଡେଙ୍ଗ୍ ଇଷ୍ଟାମ୍ କିଏଣ୍ଡା ମାର୍ହାନ୍, ମାତର୍ ଆକାନ୍ ଅଡ଼୍ବିତାନ୍, ଆକାନ୍ ନେଗେଣ୍ଡ୍ ୱାର୍ଗିଦେଙ୍ଗ୍ ଆଟ୍ଏନ୍, ମାରି ମାପ୍ରୁ ମୋଶାଦି ବାଇ, ହାରଣଦିଙ୍ଗ୍ ୱାନିଙ୍ଗ୍ ସାୟାମ୍ କିଦେଙ୍ଗ୍ ଇଜି ପୋକ୍ତାନ୍।
ଜାତ୍ରା ପୁସ୍ତକ୍ ୧-୪ ଦି ବାଇବଲ୍ ଦି କାତାନି
Free to use, adapt, and share under an open license (CC BY-SA 4.0).