8. ୮. ମାପ୍ରୁ ଯୋଶେଫ ମାରି ୱାରି ପରିବାର୍ଦିଙ୍ଗ୍ ଜିପିସ୍ତାନ୍
ନାଣ୍ଡ ପାଟେଙ୍ଗ୍ ୱେନ୍କା ଏସେଙ୍ଗ୍ ଯାକୁବ ଡକ୍ରା ଆତାନ୍, ୱାଣ୍ତ୍ରୁ ୱାନି ଲାଡ୍ଦି ମାରିନ୍ ଯୋଶେଫଦିଙ୍ଗ୍ ୱାନି ମେଣ୍ତେଙ୍ଗା ଜାତୁନ୍ କିଜିମାହି ତଡ଼ାନ୍ରିଙ୍ଗ୍ ସୁଡ଼୍ନି ୱାନ୍ଦିଙ୍ଗ୍ ପୋକ୍ତାନ୍।
ଯୋସେଫରି ତଡ଼ାନ୍କୁ ୱାନିଙ୍ଗ୍ ଆଙ୍କ୍କାର୍ ଆଜିମାର୍ହାର୍, ମାତର୍ ୱାରିବୁବା ୱାନିଙ୍ଗ୍ ନାଣ୍ଡ ଜିଉନୋଜି ମାର୍ହାନ୍, ମାରି ଯୋଶେଫ ଲୋପ୍କୁ ସୁଡ଼୍ତା ମାର୍ହାନ୍ ଜେ ୱାଣ୍ତ୍ରୁ ୱାରି ସାସନ୍ କିନାନ୍। ଏସ୍ତିୱାଲେ ଯୋଶେଫ୍ ୱାରି ଡାଗ୍ରୁ ଇତାନ୍, ୱାରୁ ୱାନିଙ୍ଗ୍ ତହ୍ତାର୍ ମାରି ୱାନିଙ୍ଗ୍ ସାକର୍ କଡ଼୍ନି ୱାରି ଡାଗ୍ରୁ ପର୍ତାନ୍।
ଯୋଶେଫଙ୍ଗାଁ ତଡ଼ାନ୍କୁ ଇଣ୍ଡ୍ର ୱାନି ଆଗ୍ଡ଼ି ଯୋଶେଫଦି ସକା କିସ୍ସି ସିତାନ୍ ମାରି ଦାନିଙ୍ଗ୍ ଗରିୟାତି ନେତେର୍ଦାନ୍ ଉତ୍ତାର୍,। ଦାନିୱେନ୍କା ୱାରୁ ଆୟାସକାଦିଙ୍ଗ୍ ନିଜେଦି ବୁବାଦିଙ୍ଗ୍ ତୋର୍ପତାର୍ ଏମେଦାଣାନ୍ଗି ୱାଣ୍ତ୍ରୁ ଅଡ଼୍ବିନାନ୍ ଜେ ଉଣ୍ଡ୍ରି ବନୁତି ଜାନ୍ତୁ ଯୋଶେଫଦିଙ୍ଗ୍ ସାୟାମାର୍ଗା ଡ଼େଇତାମାନାତ୍। ଯାକୁବ ନାଣ୍ଡ ଦୁକାମ୍ ଆତାନ୍।
ସାକର୍ କଡ଼୍ନିକାର୍ ଯୋଶେଫଦିଙ୍ଗ୍ ମିଶରଦୁ ଅତାର୍। ମିଶର ଉଣ୍ଡ୍ରି ପେରିକା, ମାରି ଶାକ୍ତିତି ଦେଶେମ୍ ମାର୍ହାତ୍ ମାରି ନିଡ଼ି ଗାଡ଼ା ଡ଼ାଗ୍ରୁ ମାର୍ହାତ୍। ଆୟା ସାକର୍ କଡ଼୍ନିକାର୍ ଯୋଶେଫଦିଙ୍ଗ୍ ଉଣ୍ଡ୍ରି ଗତିମୁର୍ଲି ୱାଜା ଅରେନ୍ ଦନି ସର୍କାର୍ ଅଦିକାରି ସାଉକାର୍ ଡାଗ୍ରୁ ପର୍ତାର୍। ଯୋଶେଫ ୱାନି ମାଲିକ୍ଦିଙ୍ଗ୍ ନେଗିସେବା କିତାନ୍, ମାରି ମାପ୍ରୁ ଯୋଶେଫଦିଙ୍ଗ୍ ଆର୍ଶିବାଦ୍ କିତାନ୍।
ୱାରି ମାଲିକ୍ଦି ଆଡ଼୍ସି ୱାନି ୱାଲେ ଗୁର୍ଦେଙ୍ଗ୍ ସେଷ୍ଟା କିତାତ୍, ମାତର୍ ଇୟାୱାଜା ଯୋଶେଫ ମାପ୍ରୁ ବିରୁଦ୍ଦାନ୍ ପାପାମ୍ କିଦେଙ୍ଗ୍ ମନାକିତାନ୍। ୱାଦୁ ରିସା ଆତାତ୍ ମାରି ବାଣ୍ଡିସ୍ସି ଯୋଶେଫଦିଙ୍ଗ୍ ଦୋସ ସିତାତ୍ ଇୟାୱାନ୍ଦିଙ୍ଗ୍ ୱାନିଙ୍ଗ୍ ତୋହ୍ତାର୍ ମାରି ଜଇଲ୍ଦୁ ପୋକ୍ତାର୍। ଇୟାୱାଜା ନେ ଜଇଲ୍ଦୁ ବା ଯୋଶେଫ ମାପ୍ରୁଦି ୱାନ୍ଦିଙ୍ଗ୍ ନିକାମେ ମାର୍ହାନ୍, ମାରି ୱାନିଙ୍ଗ୍ ମାପ୍ରୁ ଆର୍ଶିବାଦ୍ କିତାନ୍।
ରୁଣ୍ତି ପାଟେଙ୍ଗ୍ ୱେନ୍କା ଯୋଶେଫ ଦୋସି ଆଏଣ୍ତା ବା ଜଇଲ୍ଦୁ ମାର୍ହାନ୍, ଉଣ୍ତ୍ରେ ନାଡ଼ା ପାରୋ, ଏଣ୍ତେସ୍ଗି ମିଶରିୟ ଲୋକୁ ନିଜେଦି ରାଜାଦିଙ୍ଗ୍ କୁକ୍ସିମାର୍ହାର୍, ରୁଣ୍ତି ଲପ୍କୁ ସୁଡ଼୍ତାନ୍, ଏମେକାଗି ୱାନିଙ୍ଗ୍ ନାଣ୍ତୋ ବାମା କିତାଡ଼ିସ୍ତାତ୍। ୱାନି ଇନି ଅଜାକିନିକାନ୍ ୱାନି ଆୟା ଲପ୍କୁଣି ଅର୍ତ ୱେହ୍ତେଙ୍ଗ୍ ଆଟ୍ଏତାର୍।
ଯୋଶେଫ୍ଦିଙ୍ଗ୍ ଲୋପ୍କା ଅର୍ଥ ୱେହ୍ତେଙ୍ଗ୍ ମାପ୍ରୁ ସାକ୍ତି ସିତାମାହାନ୍, ମାରି ଆୟାୱାନ୍ଦିଙ୍ଗ୍ ଫରୋ ଯୋଶେଫ୍ଦିଙ୍ଗ୍ ଜଇଲ୍ଦାନ୍ ନିଜେଦି ଡାଗ୍ରୁ କୁକ୍ତାନ୍। ଯୋଶେଫ ୱାନି ଆୟା ଲବେହି ଅର୍ତ ୱେନିସ୍ସି, ମାରି ୱେର୍ତାନ୍ ଏଡ଼ୁ ପାଟେଙ୍ଗ୍ ନାଣ୍ତୋ ଦିନ୍ସୁ ୱେନ୍କା ମାପ୍ରୁ ଏଡ଼ୁ ପାଟେଙ୍ଗାଁଣି ମରୁଡ଼ି ପୋକ୍ତେଙ୍ଗ୍ ସନ୍ସିନାନ୍।
ଫାରୋ ଯୋଶେଫ ମୁସ୍କୁ ନିସା ସାର୍ଦା ଆତାନ୍ ଜେ ୱାଣ୍ତ୍ରୁ ୱାନିଙ୍ଗ୍ ମିଶର୍ତି ରୁଣ୍ତି ସାକ୍ତିତି ଲୋକୁ ୱାଜା ନିଲ୍ପ୍ତାନ୍।
ଯୋଶେଫ ଏଡ଼ୁ ପାଟେଙ୍ଗାଁଣି ନେଗି ଦିନ୍ସୁ ୱେଡ଼ାଦୁ ନାଣ୍ତୋଦାଣ୍ ନାଣ୍ତୋ ଖାଦି ଉଣ୍ଡାକିଜି ଇଡ୍ଦେଙ୍ଗ୍ ୱେର୍ତାନ୍। ଏସେଙ୍ଗ୍ ଏଡ଼ୁ ପାଟେଙ୍ଗାଁଣି ମରୁଡ଼ି ଆତାତ୍, ମାରି ଯୋଶେଫ ଲୋକାଙ୍ଗ୍ ଆୟା ଖାଦିଦିଙ୍ଗ୍ ପୋର୍ତାନ୍ ଏମେବାଣାନ୍ଗି ୱାରୁ ଉଣିୱାନ୍ଦିଙ୍ଗ୍ ନାଣ୍ଡୋ ପୁଟ୍ନାତ୍।
ମରୁଡ଼ି ୱାହି ମିସର୍ଦୁ ସିଲେଣ୍ତା ମାର୍ହାତ୍, ମାତର୍ କିଣାନ୍ଦୁ ବା ଏମେବାନୁ ଯାକୁବ ମାରି ୱାରି ପରିବାର୍ ମାନ୍ଜି ମାର୍ହାର୍।
ଇୟାୱାନ୍ଦିଙ୍ଗ୍ ୱାରିଙ୍ଗ୍ ଯାକୁବ ୱାନି ପେରି କଢୋରିଙ୍ଗ୍ ଖାଦି କଡ଼୍ଦେଙ୍ଗ୍ ମିଶରଦୁ ପକିସ୍ତାନ୍। ନାସ୍ତିୱାଲେ ୱାରୁ ଖାଦି କଣ୍ଡେଙ୍ଗ୍ ଯୋଶଫ୍ଦି ଆଗ୍ଡି ନିଲ୍ତାମାର୍ହାର୍ ୱାରୁ ଯୋଶେଫ୍ଦିଙ୍ଗ୍ ପୋଲିସ୍ତେଙ୍ଗ୍ ଆଟ୍ଏତାର୍। ମାରି ଯୋଶେଫ ୱାରିଙ୍ଗ୍ ପୋଲିସ୍ତାନ୍।
ୱାରୁ ମୋନ୍ଡ଼େପ୍ତାର୍ ନୋ ସିଲେ ସୁଡ଼୍ନି ୱାନ୍ଦିଙ୍ଗ୍, ଯୋଶେଫ୍ ୱାରିଙ୍ଗ୍ ୱେର୍ତାନ୍, “ନାନୁ ମି ତଡ଼ାନ୍ ଯୋଶେଫ୍!’ ତିଲାମାଟ୍ ଏସେଙ୍ଗ୍ ମିରୁ ନାଙ୍ଗିଁ ଗତିମୁର୍ଲିୱାଜା ପୋର୍ତି ମାହିଦେର୍ ନାସ୍ତିୱାଲେ ମିରୁ ଗତିମୁର୍ଲିକିଜି ପୋର୍ତିଦେର୍, ମାରି ମାପ୍ରୁ ନାଷ୍ଟୁଦିଙ୍ଗ୍ ନେଗିବାଣାନ୍ ଡ଼େପ୍ତାନ୍, ମାରି। ମିଶରଦୁ ୱାଜିମାଣ୍ତ୍ରୁ ୱାରୁ ମାରି ମିଙ୍ଗିଁ ମାରି ମିୱାନ୍ଦିଙ୍ଗ୍ ପରିବାର୍ଦି ୱାନ୍ଦିଙ୍ଗ୍ କାପ୍କିବିସ୍ତେଙ୍ଗ୍ ଆଟ୍ନା।
ନାସ୍ତିୱାଲେ ଯୋଶେଫରି ତଡ଼ାନ୍କୁ ଇଣ୍ତ୍ରୱାତାର୍ ମାରି ୱାରିବୁବା, ଯାକୁବଦିଙ୍ଗ୍ ୱେହ୍ତାର୍ ଇଏଲ୍ବା ଯୋଶେଫ ଜିଉମାହାନ୍, ୱାଣ୍ତ୍ରୁ ନାଣ୍ତସାର୍ଦା ଆତାନ୍।
ଯାକୁବ ଡକ୍ରା ଆତିଙ୍ଗାଁ ବା, ମାରି ୱାଣ୍ତ୍ରୁ ୱାରିପରିବାର୍ ୱାଲେ ମିଶରଦୁ ବୁଲାଜିସର୍ହାର୍ ମାରି ଆବେ ୱାଣ୍ତ୍ରୁ ୱାରିୱାଲେ ମାର୍ହାର୍। ଯୋକୁବ ସାତି ଆଗ୍ଡି, ୱାଣ୍ତ୍ରୁ ୱାରିଙ୍ଗ୍ ୱିଜୁ କଢୋରିଙ୍ଗ୍ ଆର୍ଶିବାଦ୍ କିତାନ୍।
ପାର୍ମାଣାମ୍ଦି ନିୟମ୍ ଏମେ ମାପ୍ରୁ ଆବ୍ରାମ୍ଦି ୱାଲେ କିତାମାର୍ହାନ୍ ଇକା ୱାଣ୍ତ୍ରୁ ଇସାକ୍ ଦାନିୱେନ୍କା ଯାକୁବ ମାରି ପାନେଣ୍ତୁ କଡ଼ର୍ ମାରି ୱାରି ପରିବାର୍ଦୁ ୱାତାତ୍, ଆୟା ପାନେଣ୍ତୁ କଡ଼ରି କୁଟୁମ୍ ଇସ୍ରାଏଲ୍ଦି ପାନେଣ୍ତୁ କୁଟୁମ୍ ଆତାର୍।
ଆଦିପୁସ୍ତକ୍ ୩୭-୫୦ ଦି ଉଣ୍ତି କାତାନି
Free to use, adapt, and share under an open license (CC BY-SA 4.0).