11. ୧୧. ନିସ୍ତାର୍ ପାଣ୍ତୋଇ୍
ମାପ୍ରୁ ମୋଶାଦିଙ୍ଗ୍ ମାରି ହାରୋଣଦିଙ୍ଗ୍ ରାଜା ଫାରୋ ଡାଗ୍ରୁ ଇକା ୱେର୍ତେଙ୍ଗ୍ ପୋକ୍ତାନ୍ ଜେ ଇସ୍ରାଏଲ୍ଦି ଲୋକାଙ୍ଗ୍ ସନ୍ଡ୍ରେଙ୍ଗ୍ ସିଆ। ୱାରୁ ରାଜାଦିଙ୍ଗ୍ ଜାଗ୍ରତ୍ କିବିସ୍ତାନ୍ ଜେ ଜଦି ୱାଣ୍ତ୍ରୁ ୱାରିଙ୍ଗ୍ ସନ୍ଡ୍ରେଙ୍ଗ୍ ସିଏନ୍ ମାରି ମାପ୍ରୁ ମିଶର ଦେସେମ୍ତି ଲୋକାଦି ମାରି ଜାନ୍ତୁଙ୍ଗାଁଣି ୱିଜୁ ପରତୁମ୍ ଜନମ୍ ଆତିମାହି ୱାନ୍କାଙ୍ଗ୍ ସାପିସ୍ନାନ୍। ଫାରୋ ରାଜା ଇକା ୱେନ୍ଜି ବା ମାପ୍ରୁ ଡାଗ୍ରୁ ବିସ୍ବାସ୍ କିଦେଙ୍ଗ୍ ମାରି ୱାନି ମାଟା ମାନାଦେଙ୍ଗ୍ ମାନ୍ସୁ କିଏତାନ୍।
ୱାନିଡ଼ାଗ୍ରୁ ବିସ୍ବାସ୍ କିଜିମାହି ଲୋକା ୱାନ୍ଦିଙ୍ଗ୍ ମାପ୍ରୁ ୱାରି ପରତୁମ୍ ଜନମ୍ ଆତି ୱିଜୁ ୱାନ୍କାଙ୍ଗ୍ ରକ୍ଷା କିଦେଙ୍ଗ୍ ଉଣ୍ଡ୍ରେ ଉପାଇ ଜଗେକିତାନ୍। ୱିଜୁ ପରିବାର୍ଦିଙ୍ଗ୍ ଉଣ୍ଡ୍ରେ ନେଗିମେଣ୍ତା ରେବାଜି ଦାନିଙ୍ଗ୍ କାତ୍ତେଙ୍ଗ୍ ମାର୍ହାତ୍।
ମାପ୍ରୁ ଇସ୍ରାଏଲ୍ଦି ୱାରିଙ୍ଗ୍ ମେଣ୍ଢାତି ନେତେର୍ ତାସି ୱାରି ଦୁୱାର୍ ବନ୍ଦ୍ ସାରିବେଡ଼୍ତି ଉସ୍ତେଙ୍ଗ୍ ୱେହ୍ତାମାର୍ହାନ୍। ୱାରିଙ୍ଗ୍ ଆୟା ମେଣ୍ତାଦି କାଣ୍ତା ସୁର୍ଜି ମାରି ଦାନିଙ୍ଗ୍ ତାଡ଼ିସିଲି ରୁଟି ଦାପ୍ରେ ତିଣ୍ଡ୍ରେ ୱେର୍ତାନ୍। ୱାରୁ ଆୟା ଖାଦି ଉଟି ୱେନ୍କା ଗାଜିବିଜି ମିଶର ଦେଶେମ୍ଦିଙ୍ଗ୍ ଡ଼ିସ୍ସି ସନ୍ଡ୍ରେଙ୍ଗ୍ ତିୟାର୍ ଆଜି ମାନ୍ଡ୍ରେଙ୍ଗ୍ ୱେହ୍ତାମାର୍ହାନ୍।
ମାପ୍ରୁ ୱାରିଙ୍ଗ୍ ଏଣ୍ତେସ୍ ଆଦେସ୍ ସିତାମାର୍ହାନ୍ ୱାରୁ ଆୟାୱାଜାନେ କିତାର୍। ମାଜେର୍ ନାଡ଼ାଦୁ, ମାପ୍ରୁ ୱିଜୁ ପାର୍ତୁମ୍ ଜନମ୍ଆତି କଡ଼ରିଙ୍ଗ୍ ଡ଼େଇଜି ଡ଼େଇଜି ମିଶର ଦେସେମ୍ ନାଣ୍ମି ସିଜି ସର୍ହାନ୍।
ଇସ୍ରାଏଲ୍ତି ୱିଜୁଲୋକା ଦୁୱାର୍ ବନ୍ଦ୍ଦୁ ନେତେର୍ ଆଡ୍ଗିତା ମାର୍ହାତ୍, ଇୟାୱାନ୍ଦିଙ୍ଗ୍ ମାପ୍ରୁ ୱାରି ଇଲ୍କାଙ୍ଗ୍ ଡିସ୍ତାନ୍। ୱାରି ଇଲୁଲୋଇମାହି ଜିଜେରେ ନେଗେଣ୍ତ୍ ମାର୍ହାର୍। ମେଣ୍ତାପିଲାଦି ନେତେର୍ ୱାନ୍ଦିଙ୍ଗ୍ ୱାରୁ ରକିୟା ପାଏଆତାମାର୍ହାର୍।
ମାତର୍ ମିଶର୍ତି ଲୋକୁ ମାପ୍ରୁଦିଙ୍ଗ୍ ମାରି ୱାନି ନିୟମ୍ଦିଙ୍ଗ୍ ବିସ୍ବାସ୍ କିଏଣ୍ତାମାର୍ହାର୍। ଇୟାୱାନ୍ଦିଙ୍ଗ୍ ମାପ୍ରୁ ୱାରି ଇଲ୍କାଙ୍ଗ୍ ଡ଼ିସ୍ଏତାନ୍। ମାପ୍ରୁ ମିଶର୍ଦି ଲୋକାଙ୍ଗ୍ ୱିଜୁ ପର୍ତୁମ୍ ଜନମ୍ତି କଡ଼ରିଙ୍ଗ୍ ସାପିସ୍ତାନ୍।
ମିଶରଦି ଲୋକା ୱିଜୁ ପର୍ତୁମ୍ ଜନମ୍ଆତି କଡ଼ର୍ ସାତାର୍, ଜଇଲ୍ଦୁ ତହ୍ତିମାହି ପର୍ତୁମ୍ ଜନମ୍ଦାନ୍ ଫାରୋଦି ପର୍ତୁମ୍ ଜନମ୍ତିକାର୍ ୱିଜେରେ ସାତାର୍। ନାଣ୍ଡ ମିଶରିୟ ଲୋକୁ ୱାରି ଲୋଇହି ଦୁକାମ୍ ୱାନ୍ଦିଙ୍ଗ୍ ଆଡ଼୍ବାତାର୍ ମାରି ଆଉଲି ଆତାର୍।
ଆୟାନାଡ଼ା ଫାରୋ ମୋଶା ମାରି ହାରଣଦିଙ୍ଗ୍ କୁକ୍ସି ୱେହ୍ତାନ୍ “ଇସ୍ରାଏଲ୍ତି ଲୋକାଙ୍ଗ୍ ଅସି ଗାଜିବିଜି ମିଶର୍ ଦେଶେମ୍ ଡ଼ିସ୍ସି ସନ୍ଆ !” ମିଶର୍ତି ଲୋକୁ ବା ଇସ୍ରାଏଲତି ୱାରିଙ୍ଗ୍ ଗାଜିବିଜି ମିଶର୍ ଦେସେମ୍ ଡ଼ିସ୍ସି ସନ୍ଡ୍ରେଙ୍ଗ୍ ୱେର୍ତାନ୍।
ଯାତ୍ରା ପୁସ୍ତକ୍ ୧୧:୧-୧୨:୩୨ଦି ଉଣ୍ଡ୍ରେ ବାଇବଲ୍ ତି କାତାନି
Free to use, adapt, and share under an open license (CC BY-SA 4.0).