12. ୧୨. ମାନ୍ଦା ଲୋକୁ ସୋତାସହାର୍
ଇସ୍ରାଏଲ୍ ଲୋକୁ ମିସର୍ଦି ବାଣାନ୍ ସୋସି ବିସ୍ତାର୍ ସାରଦା ମାର୍ହାର୍। ଇଏଲ୍ ୱାରୁ ସାକର୍ ସିଲେଣ୍ଡା ମାର୍ହାର୍, ମାରି ୱାରୁ ପାର୍ମାଣାମ୍ କିତି ଦେଶେମ୍ଦୁ ସନ୍ସି ମାର୍ହାର୍! ଇସ୍ରାଏଲ୍ଦି ଲୋକୁ ଇନିକାୱିଜୁ ମିଶରଦି ୱାରିଙ୍ଗ୍ ଲୋସ୍ତାର୍, ୱାରୁ ୱାରିଙ୍ଗ୍ ଆକେଙ୍ଗେ ୱିଜୁ ସିତାର୍,ଏଣ୍ଡେସ୍ଗି ବାଙ୍ଗାରାମ୍ ମାରି ୱେଣ୍ଡି ମାରି ଆଇ ନାଣ୍ତୋ ଦାରାଦି ସାମାନ୍ ସିତାର୍। ଆଇ ଦେଶେମ୍ତି ଏସୋ ଲୋକୁ ମାପ୍ରୁ ଡାଗ୍ରୁ ବିଶାସ୍ କିତାର୍ ମାରି ଏସ୍ତିୱାଲେ ଇସ୍ରାଏଲ୍ଦି ଲୋକୁ ମିସର୍ଦି ବାଣାନ୍ ସତାର୍ ୱାରୁ ବା ୱାରିୱାଲେ ସତାର୍।
ଦିନାମ୍ ୱେଡ଼ାଦୁ ଉଣ୍ଡ୍ରେ ପେରି ବାଦଡ଼୍ ୱାରି ଆଗ୍ଡ଼ି ଆଗ୍ଡ଼ି ସନ୍ସିମାର୍ହାତ୍, ମାରି ଆକା ନାଡ଼ା ୱେଡ଼ାଦୁ ବାଦଡ଼୍ ସିସୁ ୱାଜା ଆତାମାର୍ହାତ୍, ମାପ୍ରୁ ୱାରି ୱାଲେ ୱିଜୁଦିନାମ୍ ମାନ୍ଜି ମାର୍ହାନ୍ ମାରି ୱାରୁ ସନ୍ସିମାହି ୱେଡ଼ାଦୁ ୱାରିଙ୍ଗ୍ ସାରି ତୋରପ୍ସି ମାର୍ହାନ୍। ୱାରିଙ୍ଗ୍ ମାତର୍ ୱାନି ୱେନ୍କା ନେ ସନ୍ଡ୍ରେଙ୍ଗ୍ ମାର୍ହାତ୍।
ଏସୋ ୱେଡ଼ା ୱେନ୍କା, ଫାରୋ ମାରି ୱାରି ଲୋକୁ ୱାରି ମନ୍ଦିଙ୍ଗ୍ ଡ଼େପ୍ତାର୍। ମାରି ଇସ୍ରାଏଲ୍ତି ୱାରିଙ୍ଗ୍ ୱାରି ସାକାର୍ କିଦେଙ୍ଗ୍ ମାନ୍ସୁ କିତାନ୍। ଇୟାୱାନ୍ଦିଙ୍ଗ୍ ୱାରୁ ଇସ୍ରାଏଲ୍ତି ୱାରି ୱେନ୍କା ୱେନ୍କା ସର୍ହାର୍। ଇକାନ୍ ମାପ୍ରୁ ନେ ଜେ ଏୟେନ୍ଗି ୱାରି ମାନ୍ସୁଦିଙ୍ଗ୍ ବାଦ୍ଲେ କିତାମାର୍ହାନ୍, ୱାଣ୍ତ୍ରୁ ଇକା ଇୟାୱାନନ୍ଦିଙ୍ଗ୍ କିତାମାର୍ହାନ୍ ଜେ ୱଣ୍ତ୍ରୁ ମାନ୍ସୁ କିଜିମାର୍ହାନ୍ ଜେ ୱିଜୁ ଲୋକୁ ୱାନିଙ୍ଗ୍ ନେସିର୍ ୱାଣ୍ତ୍ରୁ ନେ ଯିହବା ମାପ୍ରୁ। ଫାରୋ ରାଜା ମାରି ମିଶର୍ ଦେସେମ୍ତି ୱିଜୁ ଦେୟାମ୍କାବାଣାନ୍ ଯିହବା ମାପ୍ରୁ ୱିଜୁରିଙ୍ଗ୍ ସାତୁତିକାନ୍।
ଏସ୍ତିୱାଲେ ଇସ୍ରାଏଲ୍ତିକାର୍ ମିଶର୍ତି ସେନାରିଙ୍ଗ୍ ୱାନିକା ସୁଡ଼୍ତି ୱେନ୍କା ମାରି ୱାରିଙ୍ଗ୍ ଜାଣାପଡ଼ାତାତ୍ ଜେ ଫାରରି ସେନାର୍ ମାରି ଏରାଙ୍ଗାଁ ସାମ୍ଦୁର୍ଦୁ ଲୋହି ଡ଼ୁଗିତାର୍। ମାରି ୱାରୁ ନାଣ୍ଡ ତିଲର୍ ମାରି ଆଡ଼୍ବାତାର୍, “ମାପୁ ଇନିଦାନିଙ୍ଗ୍ ମିଶର୍ ଦେଶେମ୍ ଡ଼ିସ୍ତାଟ୍ ମାପୁ ସାନାପ୍ଲେ!”
ମୋଶା ଇସ୍ରାଏଲତି ୱାରିଙ୍ଗ୍ ୱେର୍ତାନ୍, “ତିଲାଦେଙ୍ଗ୍ ଆଲେଦୁ! ମାପ୍ରୁ ନେରୁ ମି ୱାନ୍ଦିଙ୍ଗ୍ ଜୁଜାନାନ୍ ମିଙ୍ଗିଁ ରକିୟା କିନାନ୍।” ଦାନିୱେନ୍କା, ” ମାପ୍ରୁ ମୋଶାଦିଙ୍ଗ୍’ ୱେହ୍ତାନ୍, ଇୟା ଲୋକାଙ୍ଗ୍ ଏରାଙ୍ଗାଁ ସାମ୍ଦୁର୍ ଆଗ୍ଡ଼ି ବୁଲାଦେଙ୍ଗ୍ ୱେହ୍ଆ।”
ମାରି ବାଦଡ଼୍ତି ମୁଣ୍ତା ଇସ୍ରାଏଲତିୱାରି ମାରି ମିଶର୍ଦି ଦେସେମ୍ ଲୋକା ନାଣ୍ମି ୱାତାତ୍, ମାରି ନାଡ଼ାହି ସିସୁଦି ମୁଣ୍ତା ଆତାତ୍। ମିଶର୍ତିକାର୍ ନାଡ଼ାୱିଗ୍ଜି ଇସ୍ରାଏଲ୍ତି ଲୋକା ଡାଗ୍ରୁ ୱାଦେଙ୍ଗ୍ ଆଟ୍ଏତାର୍।
ମାପ୍ରୁ ମୋଶାଦିଙ୍ଗ୍ ୱାନି କିଉ ସାମ୍ଦୁର୍ ତରିନ୍ ତର୍ପ୍ତେଙ୍ଗ୍ ୱେର୍ତାନ୍, ୱେନ୍କା ମାପ୍ରୁ ଗାଲିଦାନ୍ ସାମ୍ଦୁର୍ଦି ଏରୁଦିଙ୍ଗ୍ ଉଣିତରିନ୍ ମାରି ଡେବ୍ରାତରିନ୍ ରିୟାଙ୍ଗାଁ କିତାନ୍। ମାରି ସାମ୍ଦୁର୍ ନାଣ୍ମି ଉଣ୍ତ୍ରେ ସାରି ଆନାତ୍।
ଇସ୍ରାଏଲତି ଲୋକୁ ସାମ୍ଦୁର୍ତି ରିୟାଙ୍ଗାଁମାନି ଏରୁଦିକାତି ସିଜି ୱାହ୍ତିବୁମିଦୁ ସାମ୍ଦୁର୍ ସିଜି ସର୍ହାର୍।
ନାସ୍ତିୱାଲେ ମାପ୍ରୁ ଆୟା ସାରିଦି ବାଦଡ଼୍ ମାରି ସିସୁଦି ମୁଣ୍ତା ମିଗୋ ଅତାନ୍, ନାସ୍ତିୱାଲେ ମିଶର୍ତିକାର୍ ଇସ୍ରାଏଲ୍ ଦେସେମ୍ତି ଲୋକାଙ୍ଗ୍ ସନିକା ସୁଡ଼୍ତାର୍। ମିଶର୍ତିକାର୍ ୱାରିଙ୍ଗ୍ ଆସ୍ତେଙ୍ଗ୍ ୱାରି ୱେନ୍କା-ୱେନ୍କା ସନ୍ଡ୍ରେଙ୍ଗ୍ ଆରାମ୍ କିତାର୍।
ଇୟାୱାନ୍ଦିଙ୍ଗ୍ ୱାରୁ ସାମ୍ଦୁର୍ଦି ସାରିସିଜି ଇସ୍ରାଏଲ୍ଦି ୱାରି ୱେନ୍କା ସର୍ହାର୍, ମାରି ମାପ୍ରୁ ମିଶର୍ ଦେଶେମ୍ତି ୱାରିଙ୍ଗ୍ ବାମା କିତାଡ଼ିସ୍ତାନ୍, ମାରି ୱାରି ରତ୍ଦିଙ୍ଗ୍ ଆଙ୍ଗିଁତାନ୍, ମାରି ୱାରୁ ଆଉଲି ଆଦେଙ୍ଗ୍ ଆସ୍ତାର “ଉହ୍ତୁ! ଇସ୍ରାଏଲ୍ଦି ୱାରିଙ୍ଗ୍ ମାପ୍ରୁ ଜୁଜ୍ କିଜିନାନ୍!”
ୱିଜୁ ଇସ୍ରାଏଲ୍ତିକାର୍ ସାମ୍ଦୁର୍ ଆୟାପାଡ଼୍କା ଇତାର୍, ୱେନ୍କା ମାପ୍ରୁ ମୋଶାଦିଙ୍ଗ୍ ୱେର୍ତାନ୍ ମାରିଡ଼େସି କିଉ ତର୍ପ୍ତେଙ୍ଗ୍ ୱେର୍ତାନ୍। ନାସ୍ତିୱାଲେ ମୋଶା ଆୟାୱାଜା କିତାନ୍ ମାରି ଏରୁ ମିଶର୍ ସେନାରି ମୁସ୍କୁ ୱାତାତ୍ ମାରି ସାମ୍ଦୁର୍ ଆଗ୍ଡ଼ିହି ଲେକ୍ନ ସମାନ୍ ଆତାତ୍। ମାରି ୱିଜୁ ମିଶର୍ତି ସେନାର୍ ମୁଡ଼୍ଗିତାର୍।
ଏସ୍ତିୱାଲେ ଇସ୍ରାଏଲତି ଲୋକୁ ସୁଡ଼୍ତାର୍ ମିସର୍ଦିକାର୍ ସାତାମାନାର୍, ଆୟାୱାନ୍ଦିଙ୍ଗ୍ ଇସ୍ରାଏଲ୍ଦି ଲୋକୁ ମାପ୍ରୁ ଡାଗ୍ରୁ ବିସ୍ବାସ୍ କିତାନ୍। ମାରି ୱାରୁ ବିସ୍ବାସ୍ କିତାର୍ ଜେ ମଶା ମାପ୍ରୁଦି ବାଣାନ୍ ୱାତିମାହି ବାବବାଦି ଲୋକୁ ମାର୍ହାନ୍।
ଇସ୍ରାଏଲ୍ଦି ଲୋକୁ ସାର୍ଦା ଆତାର୍, ମାତର୍ ୱାର ସାନିବାଣାନ୍ ମାରି ଗତିମୁର୍ଲିଦି ବାଣାନ୍ ମାପ୍ରୁ ୱାରିଙ୍ଗ୍ ଜିପିସ୍ତା ମାର୍ହାନ୍। ଇଏଲ୍ ୱାରୁ ମାପ୍ରୁଦି ପୁ଼ଜା ମାରି ମାପ୍ରୁଦି ମାଟା ଆସ୍ତେଙ୍ଗ୍ ମୁକ୍ଲେ ଆତାତ୍। ଇସ୍ରାଏଲ୍ଦି ଲୋକୁ ୱାରି ମୁକ୍ଲେଆତିଦିନାମ୍ ମାନାଦେଙ୍ଗ୍ ମାରି ମାପ୍ରୁଦି ପୁଜା କିଦେଙ୍ଗ୍ ପୁନି ପୁନି ପାଟେଙ୍ଗ୍ ପାରିତାର୍ ମାତର୍ ମାପ୍ରୁ ୱାରିଙ୍ଗ୍ ମିସର୍ରି ସେନାର୍ଦି ବାଣାନ୍ ଜିପିସ୍ତାନ୍।
ମାପ୍ରୁ ଇସ୍ରାଏଲ୍ ଲୋକାଙ୍ଗ୍ ୱିଜୁ ପାଟେଙ୍ଗ୍ ଉଣ୍ଡ୍ରେ ପଣ୍ଡୋୟ୍ କିଦେଙ୍ଗ୍ ଆଦେସ୍ ସିତାନ୍, ଇୟା ପଣ୍ଡୋୟ୍ ଇୟାୱାନ୍ଦିଙ୍ଗ୍ କିଜିମାହାର୍ ଜେ ମାପ୍ରୁ ଏମେ ୱାଜା ମିସର୍ଦି ଲୋକାଙ୍ଗ୍ ଆରା କିତାନ୍। ମାରି ୱାରିଙ୍ଗ୍ ଗତିମୁର୍ଲି ଆନିବାଣାନ୍ ମୁକ୍ଲେ କିତାନ୍। ଇୟା ପଣ୍ଡୋୟ୍ଦିଙ୍ଗ୍ ନିସ୍ତାର୍ ପଣ୍ଡୋୟ୍ ୱେର୍ତାର୍। ଇୟା ପଣ୍ଡୋୟ୍ କିଦେଙ୍ଗ୍ ୱାରିଙ୍ଗ୍ ଉଣ୍ଡ୍ରେ ଉଣ୍ଡ୍ରେ ନେଗି ମେଣ୍ଡା ବଲିଦାନ୍ କିଜି ମାରି ଦାନିଙ୍ଗ୍ ସୁର୍ଦେଙ୍ଗ୍ ମାର୍ହାତ୍ ମାରି ତାଡ଼ିସିଲି ରୋଟିଦି ୱାଲେ ତିନ୍ଡ୍ରେଙ୍ଗ୍ ମାର୍ହାତ୍।
ଜାତ୍ରା ପୁସ୍ତକ୍ ୧୨:୩୩ – ୧୫:୨୧ ଉଣ୍ଡେ ବାଇବଲଦି କାତାନି
Free to use, adapt, and share under an open license (CC BY-SA 4.0).