13. ୧୩. ଇସ୍ରାଏଲ୍ଦିୱାଲେ ମାପ୍ରୁଦି ନିୟମ୍
ଇସ୍ରାଏଲ୍ଦି ଲୋକାଙ୍ଗ୍ ଏରାନି ସମ୍ଦୁର୍ଦାନ୍ ନାପ୍ସି ଅତି ୱେନ୍କା, ମାପ୍ରୁ ୱାରିଙ୍ଗ୍ ବାମିଭୁମି ସିଜି ସିନୟ ଦୋରୁତି ଗରୋତୁ ଅତାର୍। ଇକା ଆୟା ଗରୋନୁ ଏମେ ବାନୁ ମୋଶା କାସ୍ସିମାହି ବୁଟା ସୁଡ଼୍ତାମାର୍ହାନ୍, ୱାରୁ ଆୟା ଗରୋନୁସାଲୁ ନିଜେଦି ଗୁଡାକିତା ମାର୍ହାର୍।
ମାପ୍ରୁ ମୋଶା ମାରି ଇସ୍ରାଏଲ୍ତି ଲୋକାଙ୍ଗ୍ ୱେର୍ତାନ୍, “ ମିଙ୍ଗିଁ ୱିଜୁ ଦିନାମ୍ ନା ନିୟମ ମାନାଦେଙ୍ଗ୍ ଆନାତ୍ ମାରି ଏମେ ପାର୍ମାଣାମ୍ ନାନୁ ମିୱାଲେ ତହ୍ସିନାନ୍ ଆୟା ପାର୍ମାଣାମ୍ଦୁ ମାନାଦେଙ୍ଗ୍ ମାନାତ୍। ଜଦି ମିରୁ ଇହୁ କିନିଦେର୍, ମାରି ମିରୁ ନା ନାଣ୍ଡୋଦାରାଦି ସମ୍ପତି, ଯାଜକରି ରାଜି, ମାରି ଉଣ୍ଡ୍ରେ ପବିତ୍ର କୁଟୁମ୍ ଆନାତ୍”
ମୁଣ୍ଡ୍ରିଦିନାମ୍ ଲୋଇ ୱାରୁ ନିଜେଦିଙ୍ଗ୍ ତିଆର୍ କିତାର୍ ଜେ ମାପ୍ରୁ ୱାରିଡାଗ୍ରୁ ୱାଜି ମାନ୍ଡ୍ରେଙ୍ଗ୍ ଆଟ୍ନାର୍। ନାସ୍ତିୱାଲେ ମାପ୍ରୁ ସିନୟ୍ ଗରୋତି କାଡାଦୁ ରେତାର୍। ନାସ୍ତିୱେଡ଼ାଦୁ ୱାଣ୍ତ୍ରୁ ୱାତାନ୍ ଭୁମି କାଦ୍ଲିତାତ୍, ଝିଟ୍କି ମେର୍ଶନାତ୍, ଗୋଇ ଇମିତାତ୍, ମାରି ମରିଦି ନାଣ୍ଡୋ ସବଦ୍ ଆତାତ୍। ନାସ୍ତିୱାଲେ ମୋଶା ନିଜେ ଗରୋନୁ ମସ୍କୁ ଏକ୍ତାନ୍।
ନାସ୍ତିୱାଲେ ମାପ୍ରୁ ଲୋକାୱାଲେ ଉଣ୍ଡ୍ରେ ପାର୍ମାଣାମ୍ ତହ୍ତାନ୍, “ନାନୁ ମି ମାପ୍ରୁ ଯିହବା। ଏୟେନ୍ଗି ମିଙ୍ଗିଁ ମିସର୍ଦେଶ୍ଦି ଗତିମୁର୍ଲି ଆତିବାଣାନ୍ ଢିସ୍ପିସ୍ତାନ୍। ଆଇ ଦେୟାମ୍ତି ପୁଜା କିମାଟ୍।”
ଦେୟାମ୍ ତିଆର୍ କିମାଟ୍ ମାରି ୱାରି ପୁଜା କିମାଟ୍, ମାତର୍ ନାନୁ, ଯିହବା, ମି ଅରେନ୍ ମାତର୍ ମାପ୍ରୁ। ନା ଦୋରୁଦାନ୍ ନାନିକା କିମାଟ୍। ବିସ୍ରାମ୍ ଦିନାମ୍ଦିଙ୍ଗ୍ ପବିତ୍ର ୱାଜା ମାନାଦେଙ୍ଗ୍। ଆଇୱାଜା ଆରୁଦିନାମ୍ ଲୋଇ ମି ନିଜେଦି ୱିଜୁ ପାଣି କିନିଦେର୍, ମାରି ଏଡ଼ୁଦିନ୍ ମି ୱାନ୍ଦିଙ୍ଗ୍ ବିସ୍ରାମ୍ଦିନ୍ ଆନାତ୍ ମାରି ନାଙ୍ଗିଁ ଅଡ଼୍ବିନି ଦିନାମ୍ ଆତାତ୍।”
ନିଜେ ୟାୟା ମାରି ବୁବାଦିଙ୍ଗ୍ ମାନାଦୁ। ଲୋକାଙ୍ଗ୍ ଡ଼େଇମାଟ୍। ଦାରିପାଣି କିମାଟ୍। ଡ଼ଙ୍ଗାକିମାଟ୍ କିମାଟ୍, ମିଡାଗ୍ରୁ ମାନି ୱାନି ଆଡ଼୍ସିଦିଙ୍ଗ୍, ୱାରି ଇଲୁ, ମାରି ଦାନିଙ୍ଗ୍ ଇନିକାବା ଜିନିସ୍ଦି ଅତେଙ୍ଗ୍ ମାନ୍ସୁ କିମାଟ୍।”
ମାପ୍ରୁ ୱାରିଙ୍ଗ୍ ସିତିମାହି ନିୟମ୍ ମାନାଦେଙ୍ଗ୍ ୱିଜେରେ ଉଣ୍ଡ୍ରେ ମାନ୍ସୁ ଆତାର୍। ୱାରୁ ମାରି ମାପ୍ରୁଦି ଲୋକୁ ଆଦେଙ୍ଗ୍ ମାରି ୱାରି ପୁଜା ଆରାଦନା କିଦେଙ୍ଗ୍ ଉଣ୍ଡ୍ରେ ମାନ୍ସୁ ଆତାର୍।
ମାପ୍ରୁ ଇସ୍ରାଏଲ୍ଦିକାର୍ ଉଣ୍ଡ୍ରେ ପେରି ସାମ୍ଡା – କୁଡ଼୍ନି ସାମ୍ଡା କିଦେଙ୍ଗ୍ ୱେର୍ତାନ୍। ମାପ୍ରୁ ଟିକ୍-ଟିକ୍ ୱେର୍ତାନ୍ ଜେ ଇୟା ସାମ୍ଡ଼ାଦିଙ୍ଗ୍ ଏଣ୍ଡେସ୍ ତିୟାର୍ ଆନାତ୍, ମାରି ଆୟାଲୋଇ ଇନି ଇନି ଜିନିଷ୍ ଇଡ୍ନାର୍। ୱାଣ୍ତ୍ରୁ ୱାରିଙ୍ଗ୍ ଉଣ୍ଡ୍ରେ ପେରି ପାର୍ଦା ବା ତିଆର୍ କିଦେଙ୍ଗ୍ ୱେର୍ତାନ୍ ଏୟେନ୍ଗି ଆୟା ସାମ୍ଡାଦିଙ୍ଗ୍ ରୁଣ୍ଡି ବାଗ୍ କିନାନ୍। ମାପ୍ରୁ ଆୟା ପାର୍ଦା ୱେନ୍କା ବାକ୍ରାଦୁ ୱାଜି ମାଞ୍ଜିନାନ୍। ଏମେ ବାଡିଦୁ ମାପ୍ରୁ ମାର୍ହାନ୍ ଆୟା ବାକ୍ରାଦୁ ପେରି ଯାଜକ ୱାନ୍ଦିଙ୍ଗ୍ ଅନୁମତି ମାର୍ହାତ୍।
ୱାରିଙ୍ଗ୍ ୱାରି କୁଡ୍ନି ସାମ୍ଡା ଏଦ୍ରୁ ଉଣ୍ଡ୍ରେ ପେରି ବେଦି ତିଆର୍ କିଦେଙ୍ଗ୍। ଏମେଲୋକୁ ମାପ୍ରୁଦି ନିୟମ୍ ମାନାଏନ୍ ୱାଣ୍ତ୍ରୁ ଉଣ୍ଡ୍ରେ ଜାନ୍ତୁ ଅସି ଆୟା ବେଦିଦୁ ବଲିଦାନ୍ କିନାନ୍। ନାସ୍ତିୱାଲେ ଯାଜକ ଆୟା ଜାନ୍ତୁଦିଙ୍ଗ୍ ମାପ୍ରୁଦି ୱାନ୍ଦିଙ୍ଗ୍ ବଲିଦାନ୍ୱାଜା ଆୟା ବେଦିଦୁ ବଲିଦାନ୍ ଆଡ୍ଗିସ୍ନାନ୍। ମାପ୍ରୁ ୱେର୍ତାନ୍ ଜେ ବଲିଦାନ୍କିତିମାହି ଜାନ୍ତୁଦି ନେତେର୍ ଆୟା ଲୋକୁଦି ପାପାମ୍ଦିଙ୍ଗ୍ ପ୍ଡିକ୍ନାତ୍। ଇୟାୱାଜା, ମାପ୍ରୁ ଆୟା ପାପାମ୍ଦିଙ୍ଗ୍ ସୁଡ଼୍ଏନ୍। ଆୟା ଲୋକୁ ମାପ୍ରୁ ଏଦ୍ରୁ ପବିତ୍ର ଆନାନ୍। ମାପ୍ରୁ ମୋଶାଦି ତଡ଼ାନ୍ ହାରଣ ମାରି ହାରଣ କୁଟୁମ୍ଦିଙ୍ଗ୍ ମାପ୍ରୁଦି ଯାଜକ ଆନିୱାନ୍ଦିଙ୍ଗ୍ ଆସ୍କିତାନ୍।
ନାସ୍ତିୱାଲେ ମାପ୍ରୁ ଇୟା ପାଦି ନିୟମ୍ଦିଙ୍ଗ୍ ରୁଣ୍ଡି କାଲ୍କୁ ପାଟାଦୁ ରାସ୍ସି ମୋଶାଦିଙ୍ଗ୍ ସିତାନ୍। ମାପ୍ରୁ ମାନାଦେଙ୍ଗ୍ ୱାରିଙ୍ଗ୍ ନାଣ୍ଡୋ ନିୟମ୍ ସିତାନ୍। ମାପ୍ରୁ ପାର୍ମାଣାମ୍ କିତାନ୍ ଜେ ଜଦି ଆୟାକାର୍ ଇୟା ନିୟମ୍ ମାନାନାର୍ ମାରି ମାପ୍ରୁ ୱାରିଙ୍ଗ୍ ଆର୍ଶିବାଦ୍ କିନାନ୍ ମାରି ୱାରିଙ୍ଗ୍ ରକ୍ଷା କିନାନ୍। ମାତର୍ ମାପ୍ରୁ ୱେର୍ତାନ୍ ଜେ ଜଦି ୱାରୁ ଇଆକା ମାନାଏତିଙ୍ଗା ମାରି ୱାଣ୍ତ୍ରୁ ୱାରିଙ୍ଗ୍ ଡଣ୍ଡ୍ ସିନାନ୍।
ଏସୋଦିନାମ୍ ଲୋଇ, ମୋଶା ସିନୟ୍ ଗରୋତି କାଡ଼ାଦୁ ମାର୍ହାନ। ୱାଣ୍ତ୍ରୁ ମାପ୍ରୁଦିଙ୍ଗ୍ ୱାର୍ଗିଜି ମାର୍ହାନ୍। ମାତର୍ ଲୋକୁ ୱାଣ୍ତ୍ରୁ ଢେସି ୱାନିକା କାପ୍କିଜି କିଜି ୱାନ୍ଦିତାର୍। ଇୟାୱାନ୍ଦିଙ୍ଗ୍ ଇସ୍ରାଏଲ୍ଦି ଲୋକୁ ହାରଣ ଡାଗ୍ରୁ ବାଙ୍ଗାରାମ୍ ଆସ୍ସି ୱାତେ ମାରି ୱାନିଙ୍ଗ୍ ଉଣ୍ଡ୍ରେ ଦେୟାମ୍ ତିଆର୍ କିଦେଙ୍ଗ୍ ୱେହ୍ତେ ଜେ ମାପ୍ରୁଦିଙ୍ଗ୍ ଢିସ୍ସି ଦେୟାମ୍ଦିଙ୍ଗ୍ ପୁଜା କିନାପ୍। ଇୟାୱାଜା, ୱାରୁ ମାପ୍ରୁଦି ବିରୁଦ୍ଦୁ ଉଣ୍ଡ୍ରେ ପେରି ପାପାମ୍ କିତାର୍।
ହାରଣ ଆୟା ବାଙ୍ଗାଁରାମ୍ଦିଙ୍ଗ୍ ଉଣ୍ଡ୍ରେ ବାସିପିଲା ୱାଜା ଦେୟାମ୍ ତିଆର୍ କିତାନ୍। ୱାରୁ ଆୟା ଦେୟାମ୍ଦିଙ୍ଗ୍ ପୁଜା କିଦେଙ୍ଗ୍ ଆରାମ୍ କିତାର୍ ମାରି ବଲିଦାନ୍ ସିତାର୍! ୱାରି ପାପାମ୍ ୱାନ୍ଦିଙ୍ଗ୍ ମାପ୍ରୁ ୱାରି ଡାଗ୍ରୁ ନାଣ୍ଡୋ ରିସା ଆତାନ୍। ୱାଣ୍ତ୍ରୁ ୱାରିଙ୍ଗ୍ ସେଏଣ୍ଡା କିଦେଙ୍ଗ୍ ମାନ୍ସୁ କିତାନ୍। ମାତର୍ ମୋଶା ୱାରିଙ୍ଗ୍ ଡ଼େୟ୍ଇ ୱାନ୍ଦିଙ୍ଗ୍ ମାପ୍ରୁଦିଙ୍ଗ୍ ବାତିମାଲିତାନ୍। ମାପ୍ରୁ ୱାନି ପାର୍ତନା ୱେନ୍ଜି ୱାରିଙ୍ଗ୍ ସେଏଣ୍ଡା କିଏତାନ୍।
ୱେନ୍କା ମୋଶା ସିନୟ୍ ଗରୋତାନ୍ ରେସି ୱାତାନ୍। ମାପ୍ରୁ ବାଣାନ୍ ରାସାତି ପାଦି ନିୟମ୍ତି ରୁଣ୍ଡି କାଲ୍କୁ ପାଟା ମୋଶା ଆସ୍ତା ମାର୍ହାନ୍। ମାରି ନାସ୍ତିୱାଲେ ଆୟା ଦେୟାମ୍ଦିଙ୍ଗ୍ ସୁଡ଼୍ତାନ୍, ନାସ୍ତିୱାଲେ ୱାଣ୍ତ୍ରୁ ନାଣ୍ଡୋ ରିସା ଆଜି ଆୟା କାଲ୍କୁ ପାଟାଦିଙ୍ଗ୍ ଗୁଣ୍ଡ୍ଗୁଣ୍ଡା କିତାନ୍।
ମାରି ମୋଶା ଆୟା ଦେୟାମ୍ଦିଙ୍ଗ୍ ଆଟ୍କ୍ତାନ୍ ମାରି ନୁର୍ଜି ଦୁରୁ କିତାନ୍, ମାରି ଆୟା ଦୁରୁଦିଙ୍ଗ୍ ଏରୁଦୁ କୁଢ୍ପ୍ସି ଆୟା କା ଆୟାଲୋକାଙ୍ଗ୍ ଉଟ୍ପିସ୍ତାନ୍। ମାପ୍ରୁ ୱାରିମୁସ୍କୁ ଉଣ୍ଡ୍ରେ କାଷ୍ଟାମ୍ ପକିସ୍ତାନ୍ ମାରି ୱାରିଲୋଇହାନ୍ ଏସୋଲୋକୁ ସାତାର୍।
ଏମେ କାଲୁଦି ପାଟାଦିଙ୍ଗ୍ ମୋଶା ରୁକ୍ତା ମାର୍ହାନ୍ ୱାନି ବାଡିଦୁ ୱାଣ୍ତ୍ରୁ ପାଦି ନିୟମ୍ଦି ପୁନି କାଲ୍କୁ ପାଟେଙ୍ଗ୍ ତିଆର୍ କିତାନ୍। ମାରି ୱାଣ୍ତ୍ରୁ ଆୟା ଗରୋତୁ ଏକ୍ତାନ୍ ମାରି ପାର୍ତନା କିତାନ୍ ଜେ ମାପ୍ରୁ ୱାନିର୍ କେମା କିହା। ମାପ୍ରୁ ମୋଶାଦି ପାର୍ତନା ୱେନ୍ଜି ୱାରିଙ୍ଗ୍ କେମା କିତାନ୍। ପୁନି ପାଟାଦୁ ପାଦି ନିୟମ୍ ଆସ୍ସି ସିନୟ୍ ଗରୋତାନ୍ ରେସି ୱାତାନ୍। ନାସ୍ତିୱାଲେ ମାପ୍ରୁ ସିନୟ୍ ଗରୋତାନ୍ ପାର୍ମାଣାମ୍କିତିମାହି ଦେଶେମ୍ ସାନ୍ଦି ଇସ୍ରାଏଲ୍ଦି ଲୋକାଙ୍ଗ୍ ସାରି ତର୍ପ୍ସି ଆତାନ୍।
ଯାତ୍ରା ପୁସ୍ତକ୍ ୧୯ -୩୪ ଦି ଉଣ୍ଡ୍ରେ ବାଇବଲ୍ତି କାତାନି
Free to use, adapt, and share under an open license (CC BY-SA 4.0).