14. ୧୪. ମାଣୁ ଭୁମିଦୁ ସାରି ବାଣାତାର୍
ମାପ୍ରୁ ଇସ୍ରାଏଲ୍ ଲୋକାଙ୍ଗ୍ ଆୟା ନିୟମ୍ ୱେତେଙ୍ଗ୍ ୱିସ୍ତାନ ହେଏଦି ୱାରିୱାଲେ ତହ୍ତିମାହି ୱାନି ସପତ୍ ନୁଣ୍ଡିଙ଼୍ଗ୍ ମାନାଦେଙ୍ଗ୍ ମାନାତ୍। ମାରି ମାପ୍ରୁ ୱାରିଙ୍ଗ୍ ସିନୟ ଗରୋତାନ୍ ଆଗ୍ଡି ସାରି ତର୍ପ୍ତାନ୍। ୱାଣ୍ଡ୍ରୁ ୱାରିଙ୍ଗ୍ ସପତ୍ କିତିମାହି ଦେଶେମ୍ଦୁ ଅତେଙ୍ଗ୍ ଇଷ୍ଟାମ୍କିତାନ୍। ଇଆ ଦେଶେମ୍ଦିଙ୍ଗ୍ କାନାନ୍ ୱେହ୍ସି ମାହାର୍। ମାପ୍ରୁ ବାଦଡ୍ଦି ମୁଣ୍ଡାଆଜି ୱାରିଙ୍ଗ୍ ଆଗ୍ଡି-ଆଗ୍ଡି ସହାନ୍, ମାରି ୱାରୁ ୱାନି ୱେନ୍କା-ୱେନ୍କା ସହାର୍।
ମାପ୍ରୁ ଆବ୍ରାହାମ୍, ଇସାକ୍ ମାରି ଯାକ୍ବଦିଙ୍ଗ୍ ପାର୍ମାଣାମ୍କିତା ମାର୍ହାନ୍ ଗାନି ୱାଣ୍ଡ୍ରୁ ସପତ୍ତି ଆୟା ଦେଶେମ୍ ୱାରି କୁଟୁମ୍ଦିଙ୍ଗ୍ ସିନାନ୍, ମାତର୍ ଇୟାୱେଡାଦୁ ଆବେ ନାଣ୍ଡୋ ଜାତି ମାନ୍ଜି ମାର୍ହାର୍। ଆୟାକାର୍ କିଣାନିୟ ୱେର୍ସିମାର୍ହାର୍। ଇଆ କିଣାନିୟତିକାର୍ ମାପ୍ରୁଦି ଆରାଧନା କିଏଜି ମାର୍ହାର୍ ମାରି ଆକାର୍ ୱାନି ନିୟମ୍ ମାନାଏତାର୍। ଆୟାକାର୍ ମିଚ୍ ଦେୟାମ୍ଦିଙ୍ଗ୍ ଆରାଧନା କିଜିମାର୍ହାର୍ ମାରି ନାଣ୍ଡୋ ସେଈ ପାଣି କିଜି ମାର୍ହାର୍।
ମାପ୍ରୁ ଇସ୍ରାଏଲ୍ଦି ୱାରିଙ୍ଗ୍ ୱେର୍ତାନ୍, “ଏସେଙ୍ଗ୍ ମିରୁ ଆୟା ସପତ୍ଦି ଦେଶେମ୍ଦୁ ସନିଦେର୍ ମାରି ଆବେଣି ୱିଜୁ କିଣାନିୟର୍ତି ବାଣାନ୍ ଅଲ୍ଗା ଆଦୁ। ୱାରି ୱାଲେ କୁଡ୍ଜି ମାନ୍ମାଟ୍ ମାରି ଦାନିଙ୍ଗ୍ ପେଡ଼ି କିମାଟ୍। ମିଙ୍ଗିଁ ୱାରିଙ୍ଗ୍ ୱିଜୁ ଦେୟାମ୍ଦିଙ୍ଗ୍ ପୁରାପୁରି ୱାଜା ସେଏଣ୍ଡା କିଦୁ। ଜଦି ମିରୁ ନା ନିୟମ୍ ମାନାଇଦେର୍, ମାରି ମିରୁ ନା ବାଦ୍ଲୁଦାନ୍ ଆୟା ଦେୟାମ୍କାଙ୍ଗ୍ ସେବା କିନିଦେର୍।
ଏସ୍ତିୱାଲେ ଇସ୍ରାଏଲ୍ତି ଲୋକୁ କାନାନ୍ ଦେଶେମ୍ଦି ଗାଟୁଦୁ ଇତାର, ମୋଶା ଇସ୍ରାଏଲଦି ୱିଜୁ କୁଟୁମ୍ଦିଙ୍ଗ୍ ଉଣ୍ଡ୍ରେ ଉଣ୍ଡ୍ରେ କିଜି ପାନେଣ୍ଡୁ ମେମାର୍ କଢୋରିଙ୍ଗ୍ ଆସ୍ କିତାନ୍। ୱାଣ୍ଡ୍ରୁ ଆୟାକାର୍ ସନ୍ସି ଆୟା ଦେଶେମ୍ ଏନେଟ୍ ୱାଜା ମାନାତ୍ ଇକା ମାରାଗ୍ଜି ସୁଡ୍ଦେଙ୍ଗ୍ ଆଦେଶ୍ ସିତାନ୍। ୱାରିଙ୍ଗ୍ ଆୟା କିଣାନିୟତିକାର୍ ସାତୁ ମାନାର୍ ନା ସାତୁ ସିଲିକାନ୍ ସୁଡ୍ଦେଙ୍ଗ୍ ଇଜି ୱେର୍ତାନ୍।
ଆୟାକାର୍ ପାନେଣ୍ଡୁ ମେମାର୍ଙ୍ଗୁଁ ୱିଜୁ କିଣାନ ଦେଶେମ୍ଦୁ ୪୦ ଦିନ୍ ବୁଲାତାର୍ ମାରି ଢେସି ୱାହ୍ତାର୍। ୱାରୁ ଲୋକାଙ୍ଗ୍ ୱେହ୍ତାର୍, “ଆୟା ଦେଶେମ୍ ଚାସ୍ ବାସ୍ କିଦେଙ୍ଗ୍ ନେଗେଣ୍ଡ୍ ମାରି ଆବେ ନାଣ୍ଡୋ କାଏଙ୍ଗ୍ ଆସ୍ନେ!” ମାତର୍ ମାରାଗେତିମାର୍ହି ଡ଼ଙ୍ଗାଁର୍ହୁଁ ପାଦି ମାନ୍ସି ୱେର୍ତାର୍,“ ୱାରି ଦେଶେମ୍ ନାଣ୍ଡୋ ସାତୁତିକା ମାରି ଆବେଣି ଲୋକୁ ପେରି ପେରିକାର୍! ଜଦି ମାଡୁ ୱାରିଙ୍ଗ୍ ଡେଇଦେଙ୍ଗ୍ ସନାଟ୍, ଆୟାକାର୍ ସତ୍ନେ ମାଙ୍ଗିଁ ହାରା କିନାର୍ ମାରି ମାଙ୍ଗିଁ ଢେଇନାର୍।”
ଦାପ୍ରେ ଦାପ୍ରେ କାଲେବ୍ ମାରି ଯିହୋଶୂୟ ଆୟା ରିଏର୍ ମାରାଗ୍ଜିମାହି ଡଙ୍ଗାର୍ହୁଁ ୱେର୍ହ୍ତାର୍, “ଇକା ସତ୍ ଆବେଣି ଲୋକୁ ନିହିକାର୍ ମାରି ସାତୁତିକାର୍ ମାନାର୍, ମାତର୍ ସତ୍ନେ ୱାରିଙ୍ଗ୍ ମାଡୁ ହାରା କିଦେଙ୍ଗ୍ ଆଟ୍ନାଟ୍! ମାପ୍ରୁ ମାୱାନ୍ଦିଙ୍ଗ୍ ଜୁଦ୍ କିନାନ୍!”
ମାତର୍ ଲୋକୁଙ୍ଗ୍ କାଲେବ୍ ମାରି ଯିହୋଶୂୟଦି ମାଟା ୱେନ୍ଏତାର୍। ଆୟାକାର୍ ମୋଶା ମାରି ହାରୋଣଦିଙ୍ଗ୍ କାକାଆଜି ୱେର୍ତାର୍, “ମିରୁ ମାଙ୍ଗିଁ ଇନିଦାନିଙ୍ଗ୍ ତିଏଲାନି ବାଡିଦୁ ତାତିଦେର୍? ମାଙ୍ଗିଁ ମିସର୍ ଦେଶେମ୍ଦୁ ନେ ମାଣ୍ଡ୍ରେଙ୍ଗ୍ ମାହାତ୍। ଜଦି ମାଡୁ ଆୟା ଦେଶେମ୍ଦୁ ସନାପ୍ ମାରି ମାପୁ ଜୁଦ୍ଦାନ୍ ସାଦେଙ୍ଗ୍ ଆନାତ୍, ମାରି କିଣାନ୍ ଦେଶେମ୍ଦୁ ଲୋକୁ ମା ଆଡ୍ସିକାଙ୍ଗ୍ ମାରି କଢୋରିଙ୍ଗ୍ ଦାସ କିନାର୍।” ଆୟାକାର୍ ୱାରିଙ୍ଗ୍ ମିସର୍ ଦେଶେମ୍ଦୁ ମାରିଢେସ୍ସି ଅତେଙ୍ଗ୍ ଇଜି ଆଇ ଉଣ୍ଡ୍ରେ ମୁର୍ଲଦିଙ୍ଗ୍ ନେତାୱାଜା ଆସ୍କିଦେଙ୍ଗ୍ ଇଚାକିଜି ମାର୍ହାର୍।
ଏସ୍ତିୱାଲେ ଆୟା ଲୋକୁ ଇୟାୱାଜା ୱେହ୍ତାର୍ ଆଦେଙ୍ଗେ ମାପ୍ରୁ ନାଣ୍ଡୋ କାକା ଆତାମାହାନ୍। ୱାଣ୍ଡ୍ରୁ କୁଡ୍ନିକା ସାମ୍ଡାଦୁ ୱାତାର୍ ମାରି ୱେର୍ତାର୍, “ମିରୁ ମାବିରୁଦ୍ଦାନ୍ ପାପାମ୍ କିତିମାନିଦେର୍ ଇୟାୱାନ୍ଦିଙ୍ଗ୍ ମିରୁ ୱିଜେରେ ଇୟା ଗରୋତୁ ବାଣାୟ୍ଆନିଦେର୍। ଏମେକାର୍ ଇର୍ୱାୟ୍ ପାଟେଙ୍ଗ୍ ମାରି ୱାନିବାଣାନ୍ ନାଣ୍ଡୋ ୱିଜୁ ଲୋକୁ ଆବେ ସାନାର୍ ମାରି ଏସେଙ୍ଗ୍ବା ଆୟା ପର୍ମାଣାମ୍ କିତି ଦେଶେମ୍ଦୁ ଢୁଗ୍ଦେଙ୍ଗ୍ ଆଟ୍ଏର୍ ଏମେକା ନାନୁ ମିଙ୍ଗିଁ ସିଜିନା। ମାତର୍ କାଲେବ ମାରି ଯିହୋଶୂୟ ଢୁଗ୍ନାର୍।”
ଏସେଙ୍ଗ୍ ଲୋକାଙ୍ଗ୍ ମାପ୍ରୁ ଇକା ୱେହ୍ନିକା ୱେର୍ହାର୍, ମାରି ୱାରୁ ଦୁକାମ୍ ଆତାର୍ ମାତର୍ ଆୟାକାର୍ ପାପାମ୍ କିତାମାହାର୍। ଇୟାୱାନ୍ଦିଙ୍ଗ୍ ୱାରୁ କିଣାନ୍ଦି ଲୋକାଙ୍ଗ୍ ଢେଇଦେଙ୍ଗ୍ ମାନ୍ସୁ କିତାର୍। ମୋଶା ୱାରିଙ୍ଗ୍ ସନ୍ଇ ୱାନ୍ଦିଙ୍ଗ୍ ଚେତାକିତାନ୍ ମାତର୍ ମାପ୍ରୁ ୱାରି ୱାଲେ ସନ୍ଏନ୍, ମାତର୍ ଆୟାକାର୍ ମୋଶାଦି ମାଟା ୱେନ୍ଏତାର୍।
ମାପ୍ରୁ ଇୟା ଜୁଦ୍ଦୁ ୱାରିୱାଲେ ସନ୍ଏଣ୍ଡା ମାର୍ହାନ୍, ଇୟାୱାନ୍ଦିଙ୍ଗ୍ କିଣାନିଲୋକୁ ୱାରିଙ୍ଗ୍ ହାରା କିତାନ୍ ମାରି ୱାରି ଲୋଇ ଏସୋ ଲୋକାଙ୍ଗ୍ ଢେଇତାର୍। ନାସ୍ତିୱାଲେ ଇସ୍ରାଏଲ୍ତି ଲୋକୁ କିଣାନ୍ଦାନ୍ ମକୋମ୍ ମାର୍ସି ୱାତାର୍। ଆଗ୍ଢି ନାଲ୍ପାୟ୍ ପାଟେଙ୍ଗ୍ ନାସେଣାନ୍, ଆୟାକାର୍ ମାଣୁ ଭୁମିଦୁ ଇନିଙ୍ଗାଁ ଆନିଙ୍ଗାଁ ଆଜି ସାରି ବାଣ୍ଆଜି ବୁଲାଜି ମାର୍ହାର୍।
ଇସ୍ରାଏଲ୍ଦି ଲୋକୁ ନାଲ୍ପାୟ୍ ପାଟେଙ୍ଗ୍ ମାଣୁ ଭୁମିଦୁ ବୁଲାନି ୱେଡାଦୁ, ମାପ୍ରୁ ୱାରିଙ୍ଗ୍ ଦର୍କାର୍ତି ସାମାନ୍ କାପ୍କିବିସ୍ତାନ୍। ୱାଣ୍ଡ୍ରୁ ୱାରିଙ୍ଗ୍ ସରଗ୍ତ “ମାନ୍ନା” ଦରୁଦି ରୁଟି ସିତାନ୍। ଆକାନ୍ ୱାରି ବାଡିଦୁ ଭାଟୋଇ ପଟି (ଇନିକାଗି ନାଣ୍ମି ୱାଜା ପଟିଙ୍ଗ୍) ମାନ୍ଦା ପକ୍ତାନ୍ ଜେ ୱାରିନୁଣ୍ଡିଙ୍ଗ୍ ତିଣ୍ଡ୍ରେଙ୍ଗ୍ କାଣ୍ଡା ମାନ୍ଜିନାତ୍। ଆୟା ୱିଜୁ ୱେଡାଦୁ, ମାପ୍ରୁ ୱାରି ସକା ମାରି ଜଡ଼୍କୁ ଫାଟ୍ଦେଙ୍ଗ୍ ସିଏତାର୍।
ଇୟାୱାଜା ମାପ୍ରୁ ୱାରିୱାନ୍ଦିଙ୍ଗ୍ ଉଣ୍ଡେଙ୍ଗ୍ଇଜି ଚମତ୍କାର୍ଦାନ୍ କଲୁଦାନ୍ ଏରୁ ସପ୍ତାନ୍। ମାତର୍ ଇୟାୱିଜୁ କିତିୱେନ୍କା, ଇସ୍ରାଏଲ୍ତି ଲୋକୁ ମାପ୍ରୁ ବିରୁଦ୍ ମାରି ମୋଶା ବିରୁଦ୍ଦାନ୍ ୱେର୍ତାର୍ ମାରି ମାନ୍ସୁ-ମାନ୍ସୁ ଲୋଇ ଦସ୍ ସିତାର୍। ମାରିବା, ମାପ୍ରୁ ବିଷାସ୍ଦାନ୍ ମାନାନ୍। ଆକାନ୍ ଏମେ ସପତ୍ ଆବ୍ରାହାମ୍, ଇସାକ୍, ମାରି ଯାକ୍ବଦିଙ୍ଗ୍ କିତାମାର୍ହାନ୍ ଗାନି ୱାଣ୍ଡ୍ରୁ ୱାରି କୁଟୁମ୍ଦିଙ୍ଗ୍ କିନାନ୍ ୱାଣ୍ଡ୍ରୁ ଆୟାକା କିତାନ୍।
ଆଇ ଉଣ୍ଡ୍ରେ ୱେଡାଦୁ ନାସ୍ତିୱାଲେ ଆୟା ଲୋକା ଡାଗ୍ରୁ ଏରୁ ସିଲେଣ୍ଡା ମାର୍ହାତ୍, ମାପ୍ରୁ ମୋଶାଦିଙ୍ଗ୍ ୱେର୍ତାନ୍.“ ପିଡ୍ପିକାଲୁଦିଙ୍ଗ୍ ମାଟା ୱେର୍ହା, ମାରି ଆବେଣାନ୍ ଏରୁ ସୋନେ୍।” ମାତର୍ ମୋଶା ପିଡ୍ପିକାଲୁଦିୱାଲେ ୱାର୍ଗିଏତାନ୍। ମାରି ୱେର୍ହେନି ବାଦ୍ଲୁ, ଆକାନ୍ ବାଡିଗାଦାନ୍ ପିଡ୍ପିକାଲୁଦିଙ୍ଗ୍ ରିଜା ଢେଇତାନ୍। ଇୟାୱାଜା ଆକାନ୍ ମାପ୍ରୁଦିଙ୍ଗ୍ ମାନାଏତାନ୍। ୱିଜେରିୱାନ୍ଦିଙ୍ଗ୍ ଉଣିୱାନ୍ଦିଙ୍ଗ୍ ଏରୁ ତୋ ସତେ ୱାତେ ମାତର୍ ମାପ୍ରୁ ମୋଶାଦିଙ୍ଗ୍ କାକା ଆତାମାର୍ହାନ୍। ୱାଣ୍ଡ୍ରୁ ୱେର୍ତାନ୍, “ମାତର୍ ନିନୁ ଇୟାୱାଜା କିତି, ଇୟାୱାନ୍ଦିଙ୍ଗ୍ ନିନୁ ସପତ୍ କିତି ଦେଶେମ୍ଦୁ ଢୁଗ୍ଦେଙ୍ଗ୍ ଆଟ୍ଇ।”
ନାସ୍ତିୱାଲେ ଇସ୍ରାଏଲ୍ଦି ଲୋକୁ ନାଲ୍ପାୟ୍ ପାଟେଙ୍ଗ୍ ମାଣୁ ଭୁମିଦୁ ସାରି ବାଣାତି ୱେନ୍କା, ନାସ୍ତିୱାଲେ ଏମେକାର୍ଗି ମାପ୍ରୁ ବିରୁଦ୍ଦୁ ନିଙ୍ଗିଁତା ମାର୍ହାର୍ ୱିଜୁ ଲୋକୁ ସାତାର୍। ନାସ୍ତିୱାଲେ ମାପ୍ରୁ ଆୟା ଲୋକାଙ୍ଗ୍ ମାରି ଅର୍ସୁ ଆୟା ସପତ୍କିତି ଦେଶେମ୍ଦି ଗାଟୁଦୁ କୁକ୍ତା ଅତାନ୍। ମୋଶା ଡକ୍ରା ଆତା ମାହାନ୍, ଇୟାୱାନ୍ଦିଙ୍ଗ୍ ମାପ୍ରୁ ଲୋକାଙ୍ଗ୍ ସାରି ତର୍ପ୍ନିୱାନ୍ଦିଙ୍ଗ୍ ମୋଶାୱାଲେ ଯିହୋଶୂୟଦିଙ୍ଗ୍ ଆସ୍ କିତାନ୍। ମାପ୍ରୁ ମୋଶାଦିଙ୍ଗ୍ ଇୟାୱାଜା ସପତ୍ କିତାମାର୍ହାନ୍ ଗାନି ଆକାନ୍ ଉଣ୍ଡ୍ରେ ଦିନାମ୍ ମୋଶାୱାଜା ଉଣ୍ଡ୍ରେ ବାବବାଦି ଲୋକ୍ଦିଙ୍ଗ୍ ପକ୍ନାନ୍
ଦାନିୱେନ୍କା ମାପ୍ରୁ ମୋଶାଦିଙ୍ଗ୍ ଉଣ୍ଡ୍ରି ଗରୋତି କାଡାଦୁ ସନ୍ଣ୍ଡ୍ରେଙ୍ଗ୍ ୱେର୍ତାନ୍ ମାରି ୱାଣ୍ଡ୍ରୁ ସପତ୍ କିତି ଦେଶେମ୍ ସୁଡ୍ଦେଙ୍ଗ୍ ଆଟ୍ନାନ୍। ମୋଶା ସପତ୍ କିତି ଦେଶେମ୍ଦିଙ୍ଗ୍ ସୁଡ୍ତାନ୍ ମାରି ମାପ୍ରୁ ୱାନିଲୋଇ ସନ୍ରେଙ୍ଗ୍ ସାରି ସିଏତାନ୍। ଦାନିୱେନ୍କା ମୋଶା ସାତାନ୍, ମାରି ଇସ୍ରାଏଲ୍ତିକାର୍ ମୁପାୟ୍ ଦିନାମ୍ ୱାନିୱାନ୍ଦିଙ୍ଗ୍ ଆଡ୍ବାତାର୍। ଯିହୋଶୂୟ ୱାରି ପୁନି ନେତା ଆତାନ୍। ଯିହୋଶୂୟ ଅରେନ୍ ନେଗି ନେତା ମାର୍ହାନ୍ ମାତର୍ ଆକାନ୍ ମାପ୍ରୁଦିଙ୍ଗ୍ ବର୍ସା କିତାନ୍ ମାରି ୱାନି ମାଟା ମାନାତାନ୍।
ଯାତ୍ରା ପୁସ୍ତକ୍ ୧୬ -୧୭, ଗଣନା ୧୦ -୧୪; ୨୦;୨୭; ଦ୍ୱିତିୟ ବିବରଣି ୩୪ ଦି ଉଣ୍ଡ୍ରେ ବାଇବଲ୍ଦି କାତାନି
Free to use, adapt, and share under an open license (CC BY-SA 4.0).