15. ୧୫. ସପତ୍ କିତିମାର୍ହି ଦେଶେମ୍
ୱିଜୁ ୱିଜିତି ୱେନ୍କା, ଇସ୍ରାଏଲ୍ ଲୋକୁ କିଣାନ୍ ଦେଶେମଦୁ ଡୁଗ୍ନି ୱେଡା ୱାତାମାହାତ୍। ଆୟା ଦେଶେମ୍ଦୁ ଯିରିହୋ ଦୋରୁତି ଉଣ୍ଡ୍ରେ ଗଡ଼୍ ମାର୍ହାତ୍। ୱାନି ରକିୟାକିନି ୱାନ୍ଦିଙ୍ଗ୍ ଆୟା ସାରିବେଡ଼୍ତି ସାତୁ ପାସରି ମାର୍ହାତ୍। ଯିହୋଶୂୟ ଆୟା ଗଡ଼୍ଦୁ ରୁଣ୍ଡି ମାରାଗ୍ଜି କାବୁର୍ ତାନି ଲୋକାଙ୍ଗ୍ ପକ୍ତାନ୍। ଆୟା ଗଡ଼୍ଦୁ ରାହାବ୍ ଦୋରୁତି ଉଣ୍ଡ୍ରେ ଦାରିଣି ଆଡ୍ସି ମାର୍ହାତ୍। ଆୟା ଆଡ଼୍ସି ମାରାଗ୍ଜି କାବୁର୍ତାନି ରିଏର୍ ଲୋକାଙ୍ଗ୍ ମାରାକ୍ତାତ୍, ମାରି ମାରିୱେନ୍କା ୱାଦୁ ୱାରିଙ୍ଗ୍ ଗଡ଼୍ଦାନ୍ ରକିୟାଆଜି ଆତ୍ରେ ସନ୍ଣ୍ଡ୍ରେଙ୍ଗ୍ ସାହାଯ୍ୟ କିତାତ୍। ୱାଦୁ ଇୟାୱାନ୍ଦିଙ୍ଗ୍ ଇକା କିତାତ୍ ଜେ ୱାଦୁ ମାପ୍ରୁ ଡାଗ୍ରୁ ବିସ୍ବାସ୍କିଜି ମାର୍ହାତ୍। ଏମେ ୱେଡ଼ାଦୁ ଇସ୍ରାଏଲ୍ଦି ଲୋକୁ ଯିରିହୋଦିଙ୍ଗ୍ ନାସ୍ଟୁ କିନାର୍ ଆୟାୱାଲେ ରାହାବ୍ ମାରି ନିଜେ ପରିବାର୍ଦିଙ୍ଗ୍ ଜିପିସ୍ନିୱାନ୍ଦିଙ୍ଗ୍ ପର୍ମାଣାମ୍ କିତାନ୍।
ଇସ୍ରାଏଲ୍ଦି ଲୋକାଙ୍ଗ୍ ପାର୍ମାଣାମ୍କିତି ଦେଶେମ୍ଦୁ ଢୁଗ୍ନିୱାନ୍ଦିଙ୍ଗ୍ ଯର୍ଦନ ଗାଡା ନାଦେଙ୍ଗ୍ ମାର୍ହାତ୍। ମାପ୍ରୁ ଯିହୋଶୂୟଦିଙ୍ଗ୍ ୱେର୍ତାନ୍, “ ଯାଜକରିଙ୍ଗ୍ ପର୍ତୁମ୍ଦୁ ସନ୍ଣ୍ଡ୍ରେଙ୍ଗ୍ ସିଦୁ“ ଏସ୍ତିୱାଲେ ଯାଜକର୍ ଯର୍ଦନ ଗାଡାଦୁ ପାଦାମ୍ ପକ୍ତାର୍ ମାରି ଏରୁ ସନିକା କକୋ ଆତାତ୍, ଏଣ୍ତେସ୍ଗି ଏସ୍ରାଏଲ୍ ଲୋକୁଦିଙ୍ଗ୍ ୱାହ୍ତି ଭୁମିସିଜି ଗାଡା ଆୟା ପାଡ଼୍କା ସନ୍ଡ୍ରେଙ୍ଗ୍ ଆଟ୍ନାର୍।
ଆୟା ଲୋକୁ ଯର୍ଦନ ଗାଡାନାତି ୱେନ୍କା ମାପ୍ରୁ ଯିହୋଶୂୟଦିଙ୍ଗ୍ ୱେହ୍ତାନ୍ ଜେ ଯିରହୋଦିଙ୍ଗ୍ ଢେଇଦେଙ୍ଗ୍ ଜାଗ୍ରତ୍ ଆଜିମାଣ୍ଡ୍ରୁ, ମାରିବା ଆକା ପେରି ସାତୁଦି ଗଡ଼୍ ମାର୍ହାତ୍। ମାପ୍ରୁ ୱାରିଙ୍ଗ୍ ୱେର୍ତାନ୍ ଜେ ୱାରି ଯାଜକର୍ ମାରି ସେନାର୍ ଆରୁଦିନାମ୍ ସାନ୍ଦି ଗଡ଼୍ଦି ସାରିବେଡ଼୍ତି ତିର୍ୱିଦେଙ୍ଗ୍ ମାନାତ୍। ମାରି: ଯାଜକ ମାରି ସେନାର୍ ଇୟାୱାଜା କିତାର୍।
ମାରି ଏଡ଼ୁ ଦିନାମ୍ଦୁ ଇସ୍ରାଏଲ୍ତିକାର୍ ଆୟା ଗଡ଼୍ଦି ସାରିବେଡ଼୍ତି ଏଡ଼ୁଜାରିଙ୍ଗ୍ ମାରି ବା ତିର୍ୱିତାର୍। ୱାରି ଗଡ଼୍ଦିଙ୍ଗ୍ ସାରିବେଡ଼୍ତି ଏଡ଼ୁଜାରିଙ୍ଗ୍ ତିର୍ୱିତି ୱେନ୍କା ଯାଜକର୍ ନିଜେ ମୋରି ଉକ୍ତାର୍, ମାରି ସେନାର୍ ନାଣ୍ଡୋ ଆଉଲିଆତାର୍।
ଆୟା ୱେନ୍କା ଯିରିହୋତି ସାରିବେଡ଼୍ତିତି ଗଡା ରୁଙ୍ଗିତା ସର୍ହାତ୍! ଏଣ୍ଡେସ୍ ମାପ୍ରୁ ୱେହ୍ତାମାହାନ୍ ଆୟାୱାଜା ଇସ୍ରାଏଲ୍ତିକାର୍ ଗଡ଼୍ତି ୱିଜୁ ସାମାନ୍ଦିଙ୍ଗ୍ ନାସ୍ଟୁ କିତାର୍। ୱାରୁ ମାତର୍ ରାହାବ ମାରି ୱାରି ପରିବାର୍ଦିଙ୍ଗ୍ ଢିସ୍ତାର୍, ଏୟେତ୍ଗି ଇସ୍ରାଏଲ୍ତିକାତ୍ ଆତା ମାର୍ହାତ୍। ଏସ୍ତିୱାଲେ କିଣାନ୍ତି ଆଇ ଲୋକୁ ୱେହାର୍ ଜେ ଇସ୍ରାଏଲ୍ତିକାର୍ ଯିରିହୋଦିଙ୍ଗ୍ ନାସ୍ଟୁ କିତାମାନାର୍ ଆଦେଙ୍ଗେଁ ୱାରୁ ତିଲାତାର୍ ଜେ ଇସ୍ରାଏଲ୍ତିକାର୍ ୱାରିଙ୍ଗ୍ବା ଢେଇନାର୍।
ମାପ୍ରୁ ଇସ୍ରାଏଲ୍ଦିୱାରିଙ୍ଗ୍ ଆଦେସ୍ ସିତାମାର୍ହାନ୍ ଜେ କିଣାନ୍ଦୁ ମାନ୍ଜିନି ଇନି ଜାତିତିକାର୍ ନେଗେଣ୍ଡ୍ କୁଡ଼୍ଜି ସାନିକା କିମାଟ୍। ମାତର୍ ଗିବିୟ ଦୋରୁଦି ଉଣ୍ଡ୍ରେ କିଣାନ୍ ଜାତି ଯିହୋଶୂୟଦିଙ୍ଗ୍ ବାଣ୍ଡିସ୍ତାନ୍ ଜେ ୱାରୁ କିଣାନ୍ଦାନ୍ ଆକ ଉଣ୍ଡ୍ରେ ବାଡିଦୁ ମାନ୍ଜିନି ଲୋକୁ। ୱାରୁ ଯିହୋଶୂୟଦିଙ୍ଗ୍ ୱାରିୱାଲେ ନେଗେଣ୍ଡ୍ ମାଣ୍ଡ୍ରେଙ୍ଗ୍ ପାର୍ମାଣାମ୍ କିଦେଙ୍ଗ୍ ବାତିମାଲିତାର। ଯିହୋଶୂୟ ମାରି ଆଇ ଇସ୍ରାଏଲ୍ତି ନେତାର୍ ମାପ୍ରୁଦିଙ୍ଗ୍ ୱେନ୍ବାଏତାର୍ ଜେ ୱାରିଙ୍ଗ୍ ଇନିକା କିଦେଙ୍ଗ୍ ଦର୍କାର୍। ଇୟା ବାଦ୍ଲୁଦାନ୍, ୱାରୁ ଗିବିୟନିୟରିୱାଲେ ନେଗେଣ୍ଡା ମାର୍ହାର୍।
ମୁଣ୍ଡ୍ରିଦାନାମ୍ ୱେନ୍କା ଇସ୍ରାଲ୍ଏଲ୍ଦି ୱାରିଙ୍ଗ୍ ନେସ୍ତେଙ୍ଗ୍ ଆଟ୍ତାର୍ ଜେ ଗିବିୟନିୟତି ଲୋକୁ କିଣାନ୍ ଦେଶେମ୍ଦୁ ମାନ୍ଜିନାର୍। ଇସ୍ରାଏଲ୍ଦିକାର୍ ରିସା ଆତାର୍ ମାତର୍ ଗିବିୟନିୟଦି ଲୋକୁ ୱାରିଙ୍ଗ୍ ଦକାସିତାର୍। ମାତର୍ ୱାରୁ ୱାରିୱାଲେ କିତିମାହି ପାର୍ମାଣାମ୍ ରୁକ୍ଏତାର୍ ମାତର୍ ମାପ୍ରୁଦି ଆଗ୍ଡି କିତାମାହାର୍। ମାରି ଏସୋୱେଡ଼ା ୱେନ୍କା, କିଣାନ୍ଦୁ ମାନ୍ଜିନି ଉଣ୍ଡ୍ରେ ଆଇଜାତିତିକାର୍, ଅମୋରିୟତିକାର୍ ରାଜାର୍ ୱେଣ୍ଡ୍ରେଙ୍ଗ୍ ଆଟ୍ତାର୍ ଜେ ଗିବିୟନିୟଦି ଇସ୍ରାଏଲତିକାର୍ ୱାରିୱାଲେ ପାର୍ମାଣାମ୍ କିତାମାନାର୍, ଇୟାନୁଣ୍ଡିଙ୍ଗ୍ ୱାରୁ ନିଜେ ନିଜେ ସେନାର୍ ଉଣ୍ଡ୍ରେ ଡାଗ୍ରୁକିଜି ଉଣ୍ଡ୍ରେ ପେରି ସେନାର୍ ତିଆର୍ କିତାର୍ ମାରି ଗିବିୟନିୟ ମୁସ୍କୁ ଢେଇତାର୍। ଗିବିୟନିୟର୍ ଯିହୋଶୂୟଦିଙ୍ଗ୍ ୱାରିଙ୍ଗ୍ ସହାଜ୍ୟକିନି ୱାନ୍ଦିଙ୍ଗ୍ ଉଣ୍ଡ୍ରେ କାବୁର୍ ପୋକ୍ତାର୍।
ମାରି: ଯିହୋଶୂୟ ଇସ୍ରାଏଲ୍ତି ସେନାରିଙ୍ଗ୍ ଉଣ୍ଡ୍ରେବାନୁ କିତାର୍ ମାରି ଗିବିୟନିୟଦି ଡାଗ୍ରୁ ଇଦେଙ୍ଗ୍ ନାଡ଼ାୱିଗ୍ଜି ବୁଲାତାର୍। ସାଲ୍ଦି ସାଲ୍ଦି ୱାରୁ ଅମୋରିୟଦି ସେନାଦିଙ୍ଗ୍ କାବା କିତାର୍ ମାରି ୱାନି ମୁସ୍କୁ ଢେଇତାର୍।
ଆୟାଦିନ୍ ମାପ୍ରୁ ଇସ୍ରାଏଲ୍ତି ଲୋକାୱାନ୍ଦିଙ୍ଗ୍ ଜୁଜ୍ କିତାନ୍। ୱାଣ୍ତ୍ରୁ ଅମୋରୀୟଦିଙ୍ଗ୍ କାବା କିତାନ୍ ମାରି ୱାଣ୍ତ୍ରୁ ପେରି ପେରି ଆଣ୍ଡ୍ରିଗା କାଲ୍କୁ ଆର୍ପ୍ସି ନାଣ୍ଡୋ ଅମୋରୀୟ ଲୋକାଙ୍ଗ୍ ସାଗୁମାର୍ଗା ଢେଇତାନ୍।
ମାପ୍ରୁ ୱେଡ଼ାଦିଙ୍ଗ୍ ୱିଜୁ ବାଦଡ୍ଦି ଉଣ୍ଡ୍ରେଡାଗ୍ରୁ ଇଟ୍ତାନ୍ ମାତର୍ ଅମୋରୀୟରିଙ୍ଗ୍ ପୁରାପୁରି ହାରା କିଦେଙ୍ଗ୍ ଇସ୍ରାଏଲ୍ଦି ୱାରିଙ୍ଗ୍ ନାଣ୍ଡୋ ୱେଡ଼ା ପାଏଆନାର୍। ଆୟା ନାଣ୍ତିଙ୍ଗ୍, ମାପ୍ରୁ ଇସ୍ରାଏଲ୍ଦିୱାନ୍ଦିଙ୍ଗ୍ ଉଣ୍ତ୍ରେ ପେରି ଜିଦ୍ ଦୁ ଜିଣାତାନ୍।
ମାପ୍ରୁ ଆୟା ସେନାର୍ରିଙ୍ଗ୍ ଆରାକିତି ୱେନ୍କା, ନାଣ୍ଡୋ କିଣାନିୟ ଜାତିତି ଲୋକୁ ଇସ୍ରାଏଲ୍ ମୁସ୍କୁ ଡ଼େଇଦେଙ୍ଗ୍ ଉଣ୍ଡ୍ରେବାନୁ ଆତାର୍। ଯିହୋଶୂୟ ମାରି ଇସ୍ରାଏଲ୍ତିକାର୍ ୱାରିମୁସ୍କୁ ଜୁଦ୍କିଜି ୱିଜୁ ନାସ୍ଟୁ କିତାର୍।
ଇୟା ଜୁଦ୍ ୱେନ୍କା, ମାପ୍ରୁ ଇସ୍ରାଏଲ୍ତି ୱିଜୁ କୁଟୁମ୍ଦିଙ୍ଗ୍ ପାର୍ମାଣାମ୍କିତି ଦେଶେମ୍ଦୁ ୱାରି ନିଜେ ନିଜେଦି ବାଟା ସିତାନ୍। ଦାନିୱେନ୍କା ମାପ୍ରୁ ଇସ୍ରାଏଲ୍ତି ୱିଜୁ ସାନ୍ଦିଦୁ ଶାନ୍ତି ସିତାନ୍।
ଏସ୍ତିୱାଲେ ଯିହୋଶୂୟ ଡକ୍ରା ଆତାନ୍ ୱାଣ୍ତ୍ରୁ ଇସ୍ରାଏଲ୍ଦି ୱିଜୁ ଲୋକାଙ୍ଗ୍ ଅର୍ସେ କୁକ୍ତାନ୍। ଦାନିୱେନ୍କା ଯିହୋଶୂୟ ଆୟା ଲୋକାଙ୍ଗ୍ ଅଡ଼୍ପୁ କିବିସ୍ତାନ୍ ଜେ ୱାରୁ ଆୟା ପାର୍ମାଣାମ୍ଦିଙ୍ଗ୍ ମାନାନି ୱାନ୍ଦିଙ୍ଗ୍ ପାର୍ମାଣାମ୍ କିତାମାର୍ହାନ୍ ୱାରୁ ମାପ୍ରୁ ୱାରିୱାଲେ ସିନୟ ଗରୋତୁ ତହ୍ତା ମାର୍ହାର୍। ଆୟା ଲୋକୁ ମାପ୍ରୁଦି ୱାଲେ ବିସ୍ବାସ୍ଦାନ୍ ମାନ୍ଣ୍ଡ୍ରେଙ୍ଗ୍ ମାରି ୱାନି ନିୟମ୍ ମାନାନିୱାନ୍ଦିଙ୍ଗ୍ ପାର୍ମାନାମ୍ କିତାନ୍।
ଯିହୋଶୂୟ ୧ -୨୪ ଦି ଉଣ୍ଡ୍ରେ ବାଇବଲତି କାତାନି
Free to use, adapt, and share under an open license (CC BY-SA 4.0).