16. ୧୬. ଉଦାର୍କିନି ଲୋକୁ
ଯିହୋଶୁୟ ସାତି ୱେନ୍କା ଇସ୍ରାଏଲ୍ତିକାର୍ ମାପ୍ରୁଦିଙ୍ଗ୍ ମାନାଏତାର୍। ୱାରୁ ମାପ୍ରୁଦି ନିୟମ୍ ମାନାଏତାର୍, ମାରି ୱାରୁ ଆୟା ପାର୍ମାଣାମ୍ଦି ଦେସେମ୍ଦାନ୍ ଏଞ୍ଜିତି ଲୋକୁ କିଣାନ୍ତି ୱାରିଙ୍ଗ୍ ଆତ୍ରେ ଫୋକ୍ଏତାର୍। ଇସ୍ରାଏଲ୍ଦିକାର୍ ନିଜେଦି ସତ୍ ମାପ୍ରୁ ଯିହୋବାଦିଙ୍ଗ୍ ଡ଼ିସ୍ସି କିଣାନ୍ତି ଦେୟାମ୍ଙ୍ଗା ଉପାସନା କିଦେଙ୍ଗ୍ ଆରାମ୍ କିତାର୍। ଇସ୍ରାଏଲ୍ଦିୱାରି ଡାଗ୍ରୁ ଏମେ ରାଜାବା ସିଲେଣ୍ଡା ମାର୍ହାର୍, ଆୟାୱାନ୍ଦିଙ୍ଗ୍ ଏୟେନ୍ଗି ଏମେକା ନେଗେଣ୍ଡ୍ ଲାଗେଆଜିମାର୍ହାତ୍ ୱାରୁ ଆକା କିଜିମାର୍ହାର୍।
ମାପ୍ରୁଦି ଆଦେସ୍ ମାନାଇ ୱାନ୍ଦିଙ୍ଗ୍ ଇସ୍ରାଏଲ୍ତିକାର୍ ଉଣ୍ଡ୍ରେ ଉପାୟ ଆରାମ୍ କିତାର୍ ଇକା ଏସୋଜାରିଙ୍ଗ୍ ମାରିଅର୍ସୁ କିତାର୍। ଇୟା ଉପାୟ ଇୟାୱାଜା ସାଲାତାତ୍: ଏସୋ ପାଟେଙ୍ଗ୍ ସାନ୍ଦି ଇସ୍ରାଏଲ୍ଦିକାର୍ ମାପ୍ରୁଦି ଆଦେସ୍ ମାନାଏତାର୍, ଆୟାୱାନ୍ଦିଙ୍ଗ୍ ମାପ୍ରୁ ୱାରିଙ୍ଗ୍ ୱାରି ସତ୍ରୁଦିବାଣାନ୍ ଆରାକିଜି ଡଣ୍ଡ୍ ସିଜିମାର୍ହାର୍। ଇୟା ସତ୍ରୁର୍ ଇସ୍ରାଏଲ୍ଦିୱାରି ସାମାନ୍ ଡଙ୍ଗା କିଜି ଅସିମାର୍ହାର୍, ୱାରିଙ୍ଗ୍ ସମ୍ପତିଦିଙ୍ଗ୍ ସେଏଣ୍ଡ୍ କିଜିମାହାର୍, ମାରି ୱାରି ଡାଗ୍ରୁହାନ୍ ଏସୋ ଲୋକାଙ୍ଗ୍ ସାଗୁ ଡ଼େଇଜି ମାର୍ହାର୍। ମାରି ଏସ୍ତିୱାଲେ ଇସ୍ରାଏଲ୍ଦି ସତ୍ରୁର୍ ୱାରି ମୁସ୍କୁ ଏସୋ ପାଟେଙ୍ଗ୍ ସାନ୍ଦି କାଷ୍ଟାମ୍ ସିଜି ମାର୍ହାର୍, ଦାନିୱେନ୍କା ଇସ୍ରାଏଲ୍ଦିକାର୍ ନିଜେଦି ପାପାମ୍ଦିଙ୍ଗ୍ ମାନାଜି ମାର୍ହାର୍ ମାରି ମାପ୍ରୁଦିବାନୁ ୱାରିଙ୍ଗ୍ ଜିପିସ୍ନିୱାନ୍ଦିଙ୍ଗ୍ ପାର୍ତନା କିଜି ମାର୍ହାର୍।
ଏସୋଜାରିଙ୍ଗ୍ ଏସେଙ୍ଗ୍ ଇସ୍ରାଏଲ୍ଦିକାର୍ ପାପାମ୍ମାନାଜି ମାହାର୍ ମାରି ମାପ୍ରୁ ୱାରିଙ୍ଗ୍ ଜିପିସ୍ସି ମାର୍ହାନ୍। ୱାଣ୍ତ୍ରୁ ଉଣ୍ଡ୍ରେ ଜିପିସ୍ନି ଲୋକୁୱାଜା ଇୟାୱାଜା କିଜି ମାହାନ୍-ଅରେନ୍ ଇୟାୱାଜାତି ଲୋକୁ ଏୟେନ୍ଗି ୱାରି ଶତ୍ରୁଙ୍ଗା ବିରୁଦ୍ଦୁ ଜୁଜାକିଜି ମାର୍ହାନ୍ ମାରି ୱାରିଙ୍ଗ୍ ହାରାକିଜି ମାର୍ହାନ୍। ଏସ୍ତିୱାଲେ ଦେଶେମ୍ଦୁ ସାନ୍ତି ମାନ୍ଜି ମାହାତ୍ ମାରି ଆୟା ଜିପିସ୍ନି ଲୋକୁ ୱାରି ମୁସ୍କୁ ନେଗେଣ୍ଡା ୱାଜା ଶାସନ୍ କିଜିମାର୍ହାନ୍। ମାପ୍ରୁ ଆୟା ଲୋକାଙ୍ଗ୍ ଜିପିସ୍ନିୱାନ୍ଦିଙ଼୍ଗ୍ ନାଣ୍ଡୋ ଜିପିସ୍ନି ଲୋକୁଦିଙ୍ଗ୍ ପୋକ୍ତାନ୍। ମାପ୍ରୁ ଡାଗ୍ରୁ ମାନ୍ଜିନି ଶତ୍ରୁ ଜାତି, ମିଦ୍ଦିୟନିୟ ୱାଜା ଇସ୍ରାଏଲ୍ଦିକାର୍ ହାରା କିଦେଙ୍ଗ୍ ମାରି ଇୟାୱାଜା କିତାର୍।
ମିଦ୍ଦିୟନିୟର୍ ଏଡ଼ୁ ପାଟେଙ୍ଗ୍ ସାନ୍ଦି ଇସ୍ରାଏଲ୍ଦିକାର୍ ତାସ୍ଦିଙ୍ଗ୍ ଡଙ୍ଗାକିଜି ମାର୍ହାର୍। ଇସ୍ରାଏଲ୍ଦିକାର୍ ନାଣ୍ଡୋ ତିଲାତାର୍, ମାରି ୱାରିଙ୍ଗ୍ ସାରାଲୋଇ ମାରାଗ୍ଜି ମାହାର୍ ଏନେଟ୍ଗି ମିଦ୍ଦିୟନିୟର୍ ୱାରିଙ୍ଗ୍ ରେବାଦେଙ୍ଗ୍ ଆଟ୍ଏର୍। ସାରାସାରି ୱେଡ଼ାଦୁ, ୱାଣ୍ତ୍ରୁ ୱାରିଙ୍ଗ୍ ଜିପିସ୍ନିୱାନ୍ଦିଙ୍ଗ୍ ମାପ୍ରୁଦିଙ୍ଗ୍ କୁକ୍ତାର୍।
ଗିଦିୟୋନ ଦରୁଦି ଅରେନ୍ ଇସ୍ରାଏଲ୍ତି ଉଣ୍ଡ୍ରେ ମେମାର୍ ମାର୍ହାନ୍। ଉଣ୍ଡ୍ରେ ଦିନାମ୍, ୱାଣ୍ତ୍ରୁ ଅରେନ୍ ତର୍ଇ ବାଡିଦୁ ଗଦ୍ମୁ ସାଡ଼୍ଜି ମାହାନ୍ ଏନେଟ୍ଗି ମିଦ୍ଦିୟନିୟଦି ଲୋକୁ ଆକା ଡଙ୍ଗାଁ କିଦେଙ୍ଗ୍ ଆଟ୍ଏର୍। ଯିହୋବାଦିଙ୍ଗ୍ ସର୍ଗଦୁତ୍ ଗିଦିୟୋନ ଡାଗ୍ରୁ ୱାଜି ୱାନିଙ୍ଗ୍ ୱେହ୍ତାନ୍, “ଏ ସାତୁମାନି ଲୋକୁ, ମାପ୍ରୁ ମିୱାଲେ ମାନାନ୍। ସଣ୍ଡ୍ରୁ ମାରି ଇସ୍ରାଏଲ୍ଦିକାର୍ ମିଦ୍ଦିୟନିୟର୍ ବାଣାନ୍ ରକିୟା କିୟା।”
ଗିଦିୟୋନଦି ବୁବାଡାଗ୍ରୁ ଦେୟାମ୍ଦିଙ୍ଗ୍ ଦାନ୍ତହୋ୍ତେଙ୍ଗ୍ ଉଣ୍ଡ୍ରେ ବେଦି ମାର୍ହାତ୍। ପାର୍ତୁମ୍ଦି ମାଟା ଏମେକାଗି ମାପ୍ରୁ ଗିଦୋନଦିଙ୍ଗ୍ କିଦେଙ୍ଗ୍ ୱେହ୍ତାନ୍ ୱାଣ୍ତ୍ରୁ ଆୟା ବେଦିଦିଙ୍ଗ୍ ରୁକ୍ତେଙ୍ଗ୍ ମାର୍ହାତ୍। ମାତର୍ ଗିଦିୟନ୍ ଲୋକାଙ୍ଗ୍ ତିଲାଜି ମାର୍ହାନ୍, ଆୟାୱାନ୍ଦିଙ୍ଗ୍ ୱାଣ୍ତ୍ରୁ ନାଡ଼ା ଆନିଦାନିଙ୍ଗ୍ କାପ୍ କିଜିମାର୍ହାନ୍। ଆୟାୱାନ୍ଦିଙ୍ଗ୍ ୱାଣ୍ତ୍ରୁ ଆୟା ବେଦିଦିଙ୍ଗ୍ ରୁକ୍ସି କୁଟ୍କୁଟା କିତାନ୍। ୱାଣ୍ତ୍ରୁ ମାପ୍ରୁଦି ଉଣ୍ଡ୍ରେ ପୁନି ବେଦି ତିଆର୍ କିତାନ୍ ମାରି ୱାନି ମୁସ୍କୁ ମାପ୍ରୁଦିଙ୍ଗ୍ ବଲିଦାନ୍ କିତାନ୍।
ଆୟାସାଲ୍ଦିହି ଦିନାମ୍ ଲୋକୁ ସୁଡ଼୍ତାର୍ ଜେ ଏମେ ଲୋକୁ ବେଦି ରୁକ୍ସି କୁଟ୍କୁଟା କିତାମାର୍ହାନ୍, ଆୟାୱାନ୍ଦିଙ୍ଗ୍ ୱାରୁ ନାଣ୍ଡୋ ରିସା ଆତାର୍। ୱାରିଙ୍ଗ୍ ଗିଦିୟନଦିଙ୍ଗ୍ ଡ଼େଇଦେଙ୍ଗ୍ ୱାରି ଇଲୁଦୁ ସର୍ହାର୍, ମାତର୍ ଗିଦିୟନ୍ଦି ବୁବା ୱେର୍ତାନ୍, “ମିରୁ ଇନିଦାନିଙ୍ଗ୍ ମି ଦେୟାମ୍ଦିଙ୍ଗ୍ ସାହାଯ୍ୟ କିଦେଙ୍ଗ୍ ସେଷ୍ଟାକିଜିନିଦେର୍? ଜଦି ୱାଣ୍ତ୍ରୁ ଦେୟାମ୍ଆତିମାହିଙ୍ଗା ଆହୁଇଙ୍ଗାଁ ଦାନିଙ୍ଗ୍ ନିଜେଦି ରକ୍ଷା କିଦେଙ୍ଗ୍ ସିଆ!” ମାତର୍ ୱାଣ୍ତ୍ରୁ ଇୟାୱାଜା ୱେର୍ତାନ୍ ଆୟାୱାନ୍ଦିଙ୍ଗ୍ ଲୋକୁ ଗିଦିୟନ୍ଦିଙ୍ଗ୍ ଡ଼େଏତାର୍।
ଇସ୍ରାଏଲ୍ଦିକାର୍ ୱାରି ସାମାନ୍ଡଙ୍ଗା କିନିୱାନ୍ଦିଙ୍ଗ୍ ମିଦ୍ଦିୟନିୟତି ଲୋକୁ ମାରିଅର୍ସୁ ୱାତାର୍। ୱାରୁ ନିସୋ ଲୋକୁ ମାହାର୍ ଗାନି ଲେକିସ୍ତେଙ୍ଗ୍ ଆଟ୍ଏର୍। ଗିଦିୟୋନ ୱାରି ବିରୁଦ୍ଦାନ୍ ଯୁଜ୍ କିଦେଙ୍ଗ୍ ଇସ୍ରାଏଲ୍ଦି ୱାରିଙ୍ଗ୍ ଉଣ୍ଡ୍ରେବାନୁ କୁକ୍ତାନ୍। ଗିଦିୟୋନ୍ ମାପ୍ରୁଦିଙ୍ଗ୍ ରୁଣ୍ଡି ସିନ୍ ଲସ୍ତାନ୍ ଏମେଦାଣାନ୍ଗି ୱାଣ୍ତ୍ରୁ ନେସ୍ତେଙ୍ଗ୍ ଇଜି ୱାଣ୍ତ୍ରୁ ନିଜାମେନେ ଇସ୍ରାଏଲ୍ଦିଙ୍ଗ୍ ଲୋକାଙ୍ଗ୍ ଜିପିସ୍ତେଙ୍ଗ୍ ୱେହ୍ସିମାର୍ହାନ୍।
ପାର୍ତୁମ୍ଦି ଚିନ୍ଦିଙ୍ଗ୍, ଗିଦିୟୋନ ମେଣ୍ଢାତି ତୋଲୁ ଭୁମିଦୁ ଇଡ୍ଜି ମାପ୍ରୁଦିଙ୍ଗ୍ ୱେହ୍ତାନ୍ ଗାନି ସାଲ୍ଦିହି ମାସୁଏରୁ ମାତର୍ ମେଣ୍ଢା ଆୟାତୋଲୁଦି ମାରି ଭୁମି ମୁସ୍କୁ ଆର୍ମାକିଉ। ମାପ୍ରୁ ଇଆୱାଜା ନେ କିତାନ୍। ଆଗ୍ଡ଼ିହି ନାଡ଼ା, ୱାଣ୍ତ୍ରୁ ମାପ୍ରୁଦିଙ୍ଗ୍ ୱେହ୍ତାନ୍ ଜେ ଭୁମି ଉଦ୍ଜି ସନିତ୍ ମାତର୍ ମେଣ୍ଢା ତୋଲୁ ୱାର୍ସିମାଡ୍ରେ। ମାପ୍ରୁ ଇୟାୱାଜା କିତାନ୍। ଆୟା ରୁଣ୍ତି ସିନ୍ଦି ୱାନ୍ଦିଙ୍ଗ୍ ଗିଦିୟୋନ ବିସ୍ବାସ୍ କିତାନ୍ ଜେ ମାପ୍ରୁ ନିଜାମେନେ ମାନ୍ସୁ କିତାନ୍ ଜେ ୱାଣ୍ତ୍ରୁ ଇସ୍ରାଏଲ୍ଦି ଲୋକାଙ୍ଗ୍ ମିଦ୍ଦିୟନିୟରି ବାଣାନ୍ ଜିପିସ୍ନାନ୍।
ନାସ୍ତିୱାଲେ ଗିଦିୟୋନ ସେନାରିଙ୍ଗ୍ ନିଜେଦି ଡାଗ୍ରୁ କୁକ୍ତାନ୍ ମାରି ୩୨,୦୦୦ ମେମାର୍ ୱାତାର୍। ମାରି ମାପ୍ରୁ ୱାନିଙ୍ଗ୍ ୱେହ୍ତାନ୍ ଗାନି ଇକା ତୋ ନାଣ୍ତୋ ମାନାତ୍। ମାରି: ଗିଦିୟୋନ ଆୟାୱିଜୁ ୨୨,୦୦୦ ସେନାରିଙ୍ଗ୍ ମାରିଡ଼େସି ଇଲୁକାଙ୍ଗ୍ ପୋକ୍ତାନ୍ ଏମେଲୋକୁ ଯୁଜ୍କିଦେଙ୍ଗ୍ ତିଲାଜି ମାର୍ହାର୍। ମାପ୍ରୁ ଗିଦିୟୋଦିଙ୍ଗ୍ ୱେହ୍ତାନ୍ ଜେ ଇୟେଲ୍ବା ଇୟାଲୋକୁ ନାଣ୍ଡୋ ମାନାର୍। ଆୟାୱାନ୍ଦିଙ୍ଗ୍ ଗିଦିୟୋନ ୩୦୦ ସେନାରିଙ୍ଗ୍ ଡ଼ିସ୍ସି ଆୟାୱିଜେରିଙ୍ଗ୍ ଇଲିକାଙ୍ଗ୍ ପୋକ୍ତାନ୍।
ଆୟାନାଡ଼ା ମାପ୍ରୁ ଗିଦିୟୋନଦିଙ୍ଗ୍ ୱେର୍ତାନ୍, “ମିଦ୍ଦିୟନିୟତିକାର୍ ମାନ୍ଜିନି ଗୁଡ଼ାଦୁ ସନ୍ଣ୍ଡ୍ରୁ ମାରି ୱାରୁ ୱାର୍ଗିନିକା ନିନୁ ୱେନ୍ହା। ଏସ୍ତିୱାଲେ ନିନୁ ୱେନି ଗାନି ୱାରୁ ଇନିକା ୱାର୍ଗିଜିନାର୍ ମାରି ନିନୁ ୱାରିୱାଲେ ଯୁଦ୍ କିଦେଙ୍ଗ୍ ତିଲାଇ।” ଆୟାୱାନ୍ଦିଙ୍ଗ୍ ଆୟାନାଡ଼ା, ଗିଦିୟୋନ ୱାରି ମାନ୍ଜିନି ଗୁଡ଼ାସାଲୁ ସହାନ୍ ମାରି ମିଦ୍ଦିୟନିୟତିକାର୍ ସେନାର୍ ୱାନି ତଡ଼ୁଦିଙ୍ଗ୍ ୱାଣ୍ତ୍ରୁ ୱାର୍ଗିନିକା ୱେହାନ୍ ଏମେକାଗି ୱାନି ଲବେଉ ସୁଡ଼୍ତାମାର୍ହାନ୍। ୱାରି ତଡ଼ୁ ୱେର୍ତାନ୍, “ଇୟା ଲବେହି ଅର୍ତ ଆଜିନାତ୍ ଗିଦିୟୋନଦି ସେନାର୍ ମିଦ୍ଦିୟନିୟତିକାର୍ ସେନାରିଙ୍ଗ୍ ହାରା କିନାର୍!” ଏସ୍ତିୱାଲେ ଗିଦିୟୋନ ଇକା ୱେହାନ୍ ୱାଣ୍ତ୍ରୁ ମାପ୍ରୁଦିଙ୍ଗ୍ ଉପାସନା କିତାନ୍।
ଦାନିୱେନ୍କା ଗିଦିୟୋନ ନିଜେ ସିନାରିଙ୍ଗ୍ ଡାଗ୍ରୁ ମାରିଡ଼େସି ୱାତାନ୍ ମାରି ୱାରି ୱିଜେରିଙ୍ଗ୍ ଉଣ୍ଡ୍ରେ-ଉଣ୍ଡ୍ରେ ମୋରି, ଉଣ୍ଡ୍ରେ ସିକ୍ଲାତି କେଲୁ, ମାରି ଉଣ୍ଡ୍ରେ ସିସୁସୁଡା ସିତାନ୍। ଆୟାକାର୍ ଆୟା ଗୁଡ଼ାଦି ସାରିସୁରୁଲା ଉଣ୍ତାତାର୍ ଏମେ ବାଡିଦୁ ମିଦ୍ଦିୟନିତିକାର୍ ଗୁରିତା ମାର୍ହାର୍। ଗିଦିୟୋନଦି ୩୦୦ ସେନାର୍ ନିଜେ ସିସୁସୁଡାଙ୍ଗା ଆୟା କେଲୁଦୁ ପିଡ଼୍କ୍ତା ମାର୍ହାର୍ ଇୟାୱାନ୍ଦିଙ୍ଗ୍ ମିଦ୍ଦିୟନିୟତିକାର୍ ଆୟା ସିସୁସୁଡାଦି ଜାଇଦିଙ୍ଗ୍ ସୁଡ଼୍ଦେଙ୍ଗ୍ ଆଟ୍ଏତାର୍।
ଦାନିୱେନ୍କା ଗିଦିୟୋନଦି ୱିଜୁ ସେନାର୍ ନିଜେ କେଲ୍କାଙ୍ଗ୍ ଅର୍ସେଦେବା ରୁକ୍ତାର୍ ଗାଦେମ୍ ସିସୁସୁଡାଦି ସିସୁଦିଙ୍ଗ୍ ତର୍ପ୍ତାନ୍। ୱାରି ନିଜେ ମୋରିଙ୍ଗ୍ ଉକ୍ତାର୍ ମାରି ସେଉଡ଼ୁ ଆତାର୍, “ଯିହୋବା ମାପ୍ରୁ ବାଣାନ୍ ଗିଦିୟୋନଦି କୁଡ଼ାମ୍!”
ମାପ୍ରୁ ମିଦ୍ଦିୟନିୟରିଙ୍ଗ୍ କାବା କିତାଡ଼ିସ୍ତାନ୍, ଇୟାୱାନ୍ଦିଙ୍ଗ୍ ୱାରୁ-ୱାରୁ ଡ଼େଇଜି ସାତାର୍। ଦାପ୍ରେ, ଗିଦିୟୋନ କାବୁର୍ଅନି ଲୋକୁଦିଙ୍ଗ୍ ମାରି ନଣ୍ଡୋ ଆୟା ଇସ୍ରାଏଲ୍ଦିୱାରିଙ୍ଗ୍ ମିଦ୍ଦିୟନିୟରିଙ୍ଗ୍ ଉଲ୍ପ୍ତେଙ୍ଗ୍ ସାହାଯ୍ୟ କିଦେଙ୍ଗ୍ ୱାନିଙ୍ଗ୍ ପୋକ୍ତାନ୍। ୱାରୁ ୱାରି ଡାଗ୍ରୁହି ନାଣ୍ଡୋ ଲୋକାଙ୍ଗ୍ ସାପିସ୍ତାର୍ ମାରି ଏଞ୍ଜିତିମାହି ଲୋକାଙ୍ଗ୍ ଉଲ୍ପ୍ସି ଉଲ୍ପ୍ସି ୱାରିଙ୍ଗ୍ ଇସ୍ରାଏଲ୍ ଦେସେମ୍ଦାନ୍ ସପ୍ତା ଡ଼ିସ୍ତାର୍। ଆୟା ଦିନାମ୍ ୧,୨୦,୦୦୦ ମିଦ୍ଦିୟନିୟର୍ ସାତାର୍। ଇୟାୱାଜା ମାପ୍ରୁ ଇସ୍ରାଏଲ୍ଦିୱାରିଙ୍ଗ୍ ଜିପିସ୍ତାର୍।
ଆୟା ଲୋକୁ ଗିଦିୟୋନଦିଙ୍ଗ୍ ନିଜେଦି ରାଜା କିଦେଙ୍ଗ୍ ମାନ୍ସୁକିଜି ମାର୍ହାର୍, ମାରି ଗିଦିୟୋନ ୱାରିଙ୍ଗ୍ ଇକା କିଦେଙ୍ଗ୍ ସିଏତାନ୍, ମାତର୍ ୱାଣ୍ତ୍ରୁ ୱାରିଙ୍ଗ୍ ଆୟା ବଙ୍ଗାରାମ୍ଦି ଡାବୁ ଲସ୍ତାନ୍ ଏମେକାଗି ୱାରୁ ମିଦ୍ଦିୟନିୟରି ବାଣାନ୍ ରେଲ୍ଜିତାତା ମାର୍ହାର୍। ଗିଦିୟୋନଦିଙ୍ଗ୍ ୱାରୁ ନାଣ୍ଡୋ ବାଙ୍ଗାରାମ୍ ସିତାର୍।
ଦାନିୱେନ୍କା ଗିଦିୟୋନ ଆୟା ବାଙ୍ଗାରାମ୍ଦାନ୍ ଉଣ୍ଡ୍ରେ ଆୟାୱାଜାତି ସୋକା ତିଆର୍ କିତାନ୍ ଏୟେର୍ଗି ପେରିଜାଜକ୍ ଆରାଜି ମାର୍ହାନ୍। ମାତର୍ ଆୟା ଲୋକୁ ଦାନିଙ୍ଗ୍ ଉଣ୍ଡ୍ରେ ଦେୟାମ୍ ୱାଜା ଉପାସନା କିଦେଙ୍ଗ୍ ଆରାମ୍ କିତାର୍। ମାରି ମାପ୍ରୁ ମାରିଡ଼େସ୍ସି ଇସ୍ରାଏଲ୍ ଲୋକାଙ୍ଗ୍ ଡଣ୍ଡ୍ ସିତାନ୍ ମାତର୍ ୱାଣ୍ତ୍ରୁ ଦେୟାଦି ଉପାସନା କିତାମାର୍ହାର୍। ମାପ୍ରୁ ଇସ୍ରାଏଲ୍ଦି ସାତ୍ରୁରିଙ୍ଗ୍ ଇସ୍ରାଏଲ୍ଦିୱାରିଙ୍ଗ୍ ହାରାକିଦେଙ୍ଗ୍ ସାତୁ ସିତାନ୍। ୱିଜୁତି ୱେନ୍କା ୱାରୁ ମାପ୍ରୁଦି ବାଣାନ୍ ନେଗିୱାନ୍ଦିଙ୍ଗ୍ ପାର୍ତନା କିତାର୍, ମାରି ମାପ୍ରୁ ୱାରିଙ୍ଗ୍ ଜିପିସ୍ନିୱାନ୍ଦିଙ୍ଗ୍ ମାରି ଉଣ୍ଡ୍ରେ ରକ୍ଷାକିନି ଲୋକୁଦି ୱାନି ଡାଗ୍ରୁ ପୋକ୍ତାନ୍।
ଇୟାମାଟା ଏସୋ ତର୍ ଗଟେ ଆତାତ୍: ଇସ୍ରାଏଲ୍ଦିକାର୍ ପାପାମ୍ କିନାର୍, ମାପ୍ରୁ ୱାରିଙ୍ଗ୍ ଡଣ୍ଡ୍ ସିଜି ମାର୍ହାନ୍, ୱାରୁ ମାନ୍ସୁଦିଙ୍ଗ୍ ଡ଼େପ୍ସି ମାହାର୍, ମାରି ୱାରିଙ୍ଗ୍ ଜିପିସ୍ତେଙ୍ଗ୍ ଆଇୱାନିଙ୍ଗ୍ ପକ୍ସି ମାର୍ହାନ୍। ଏସୋ ବରଷ୍ ନାସେଣାନ୍, ମାପ୍ରୁ ଏସୋ ଜିପିସ୍ନି ଲୋକାଙ୍ଗ୍ ପକ୍ତାନ୍ ଏମେକାର୍ଗି ଇସ୍ରାଏଲ୍ଦିୱାରିଙ୍ଗ୍ ୱାରି ଶତ୍ରୁଦି ବାଣାନ୍ ଜିପିସ୍ତାନ୍।
ୱିଜିତି ୱେନ୍କା, ଆୟା ଲୋକୁ ଆଇ ଦେଶେମ୍ତି ଲେକେନ୍ ମାପ୍ରୁଦିଙ୍ଗ୍ ନିଜେୱାନ୍ଦିଙ୍ଗ୍ ଉଣ୍ଡ୍ରେ ରାଜା ଲସ୍ତାନ୍। ଆୟକାର୍ ନିନି ରାଜା ଇଚା କିଜିମାହାର୍ ଜେ ନିହିକାନ୍ ମାରି ସାତୁ ତିକାନ୍ ମାନିନ୍, ମାରି ଏହେନ୍ ୱାରିଙ୍ଗ୍ ଜୁଜ୍ଦୁ ସାର୍ରି ତର୍ପ୍ନାନ୍। ମାପ୍ରୁଦିଙ୍ଗ୍ ଇକା ଲସ୍ନିକା ମାନ୍ସୁ ରେଏତାତ୍, ମାତର୍ ୱାଣ୍ଡ୍ରୁ ୱାରିଙ୍ଗ୍ ନାନିରାଜାନେ ସିତାନ୍ ଆୟାୱାଜା ଆୟାକାର୍ ଲସ୍ତାମାର୍ହାର୍।
ବିଚାର୍ କର୍ତା ୧-୩; ୬-୮; ୧ ଶାମୁଏଲ୍ ୧-୧୦ ଦି ଉଣ୍ଡ୍ରେ ବାଇବଲଦି କାତା
Free to use, adapt, and share under an open license (CC BY-SA 4.0).