17. ୧୭. ଦାଉଦ୍ଦି ୱାଲେ ମାପ୍ରୁଦି ନିୟମ୍
ଶାଉଲ ଇସ୍ରାଏଲ୍ଦି ପର୍ତୁମ୍ ରାଜା ମାହାନ୍।,ଏଣ୍ଡେସ୍ ଆକାର୍ ମନ୍ସୁ କିଜିମାହାର୍ ନାନିକାନ୍ ଆକାନ୍ ନିହିକାନ୍ ମାରି ସୁନ୍ଦ୍ରାଦିକାନ୍ ମାହାନ୍। ଇସ୍ରାଏଲ୍ଦି ମୁସ୍କୁ ଶାସନଦି ପର୍ତୁମ୍ ଏସୋ ବର୍ଷ ଶାଉଲ ଉଣ୍ଡ୍ରେ ନେଗି ରାଜା ମାହାନ୍। ମାତର୍ ୱାୟାୱେନ୍କା ଆକାନ୍ ଉଣ୍ଡ୍ରେ ସେହେଣ୍ଡାତି ଲୋକୁ ଆତାନ୍ ଏହେନ୍ଗି ମାପ୍ରୁଦି ମାଟା ମାନାଏତାନ୍, ଇୟାୱାନ୍ଦିଙ୍ଗ୍ ମାପ୍ରୁ ଉଣ୍ଡ୍ରେ ଆଇ ଲୋକୁଦିଙ୍ଗ୍ ଆସ୍କିତାନ୍ ଏହେନ୍ଗି ଉଣ୍ଡ୍ରେ ଦିନାମ୍ ୱାନିଜାଗାଦୁ ରାଜା ଆନାନ୍।
ମାପ୍ରୁ ଦାଉଦ ଦୋରୁଦି ଉଣ୍ଡ୍ରେ ଇସ୍ରାଏଲ୍ଦି ମୁର୍ଲି ମେମାର୍ଦିଙ୍ଗ୍ ଆସ୍କିଜି ଉଣ୍ଡ୍ରେ ଦିନାମ୍ ସାଉଲଦି ବାଡିଦୁ ରାଜା ଆନିୱାନ୍ଦିଙ୍ଗ୍ ତିଆର୍ କିଦେଙ୍ଗ୍ ଆରାମ୍ କିତାର୍। ଦାଉଦ ବେତଲିହିମ ଗଡ୍ଦୁ ଉଣ୍ଡ୍ରେ ଗାଉଡୁଏନ୍ ମାହାନ୍। ଆଇ ଆଇ ୱେଡାଦୁ, ନାସ୍ତିୱେଡାଦୁ ଦାଉଦ ୱାରି ବୁବାଦି ମେଣ୍ଡେଙ୍ଗାଁ ସୁଡ୍ଜି ମାହାନ୍ ନାସ୍ତିୱାଲେ ୱାଣ୍ଡ୍ରୁ ସିଂହଦି ମାରି ଅଡ୍ଜୁଦିଙ୍ଗ୍ ଢେଇତା ମାହାନ୍ ମାତର୍ ୱାରିଙ୍ଗ୍ ଆଙ୍ଗ୍ଦେଙ୍ଗ୍ ୱାତେମାହେ। ଦାଉଦ ଅରେନ୍ ଦାର୍ମୁତିକାନ୍ ମାରି ପବିତ୍ର ଲୋକୁ ମାହାନ୍। ଆକାନ୍ ମାପ୍ରୁଦି ମୁସ୍କୁ ବିସାଷ କିଜି ମାହାନ୍ ମାରି ୱାନି ମାଟା ୱେନ୍ଜି ମାହାନ୍।
ନାସ୍ତିୱାଲେ ଦାଉଦ ମୁର୍ଲିନେ ମାହାନ୍, ଆକାନ୍ ନିହକା ଆଜି ବାଲ୍ସ୍ତିକାନ୍ ଗୋଲିୟାତଦି ବିରୁଦ ଜୁଦ୍ ଆତାନ୍। ଗୋଲିୟାତ ଆରେନ୍ ବେସି ନେଗିକାନ୍ ସେନା ମାହାନ୍। ୱାଣ୍ଡ୍ରୁ ବେଶି ସାତୁଦିକାନ୍ ମାହାନ୍ ମାରି ପକାପାକି ତିନ୍ ମିଟର୍ ନିହିକାନ୍ ମାହାନ୍! ମାତର୍ ମାପ୍ରୁ ଗୋଲିୟାତଦିଙ୍ଗ୍ ଢ଼େଇଦେଙ୍ଗ୍ ମାରି ଇସ୍ରାଏଲ୍ଦିୱାରିଙ୍ଗ୍ ଜିପିସ୍ତେଙ୍ଗ୍ ଦାଉଦଦିଙ୍ଗ୍ ସାହାଜ୍ୟ କିତାନ୍। ଏୟା ୱେନ୍କା, ଦାଉଦ ଇସ୍ରାଏଲ୍ଦି ଶତ୍ରୁଦି ମୁସ୍କୁ ଏସୋ ଥର୍ ଜିଣାତା ମାହାନ୍। ଦାଉଦ ଉଣ୍ଡ୍ରେ ପେରି ସେନା ଆତାନ୍, ମାରି ୱାଣ୍ଡ୍ରୁ ନାଣ୍ଡୋ ଜୁଦ୍ଦୁ ଇସ୍ରାଏଲ୍ଦି ଲୋକାଙ୍ଗ୍ ସାରି ତର୍ପ୍ତାନ୍। ଲୋକୁଙ୍ଗ୍ ୱାନି ନେଗେଣ୍ଡ୍ ୱେତାର୍।
ଲୋକୁଙ୍ଗ୍ ଦାଉଦଦିଙ୍ଗ୍ ଏସୋ ଲାଡ୍ କିତାର୍ ଗାନି ସାଉଲ ରାଜା ୱାନିଙ୍ଗ୍ କାକା ଆତାନ୍। ୱିଜ୍ନିୱାଲେ ସାଉଲ ରାଜା ୱାନିଙ୍ଗ୍ ଢେଇଦେଙ୍ଗ୍ ମାନ୍ସୁ କିତାନ୍, ଇୟାୱାନ୍ଦିଙ୍ଗ୍ ଦାଉଦ, ରାଜାଦିବାଣାନ୍ ମାରି ୱାନି ସେନାର୍ରିବାଣାନ୍ ମାରାଗ୍ନିୱାନ୍ଦିଙ୍ଗ୍ ଗରୋତୁ ଉରୁକ୍ସି ସର୍ହାର୍। ଉଣ୍ଡ୍ରେ ଦିନାମ୍, ନାସ୍ତିୱାଲେ ସାଉଲ ରାଜା ମାରି ୱାନି ସେନାର୍ ଦାଉଦଦିଙ୍ଗ୍ ରେବାଜି ମାର୍ହାର୍ ମାରି ସାଉଲ ଉଣ୍ଡ୍ରେ ସାରାଦୁ ସର୍ହାନ୍। ଆକା ଆୟା ସାରା ମାହାତ୍ ଏମେବାନୁଗି ଦାଉଦ ମାରାଗିତା ମାର୍ହାନ୍, ମାତର୍ ସାଉଲ ରାଜା ୱାନିଙ୍ଗ୍ ସୁଡ୍ଏତାର୍। ଦାଉଦ ସାଉଲଦି ୱେନ୍କା ନାଣ୍ଡୋ ଡାଗ୍ରୁ ସର୍ହାନ୍ ମାରି ୱାନି ସୋକାଦିଙ୍ଗ୍ କାଣ୍ଡେକ୍ କୋଇତାନ୍। ୱେନ୍କା, ନାସ୍ତିୱାଲେ ସାଉଲ ଆୟା ସାରାଦାନ୍ ସତାନ୍ ମାରି ଦାଉଦ ୱାନିଙ୍ଗ୍ କୁକ୍ସି ଆୟା ଆସ୍ତିମାନି କଇତି ସକାଦିଙ୍ଗ୍ ତର୍ପ୍ତାନ୍। ଇୟୱାଜା, ସାଉଲ ନେସ୍ତାନ୍ ଗାନି ଦାଉଦ ରାଜା ଆନିୱାନ୍ଦିଙ୍ଗ୍ ୱାନିଙ୍ଗ୍ ଢେଏତାର୍।
ଇନି ୱେଡା ୱେନ୍କା, ସାଉଲ ରାଜା ଜୁଜ୍ଦୁ ସାତାନ୍, ମାରି ଦାଉଦ ଇସ୍ରାଏଲଦି ରାଜା ଆତାନ୍। ୱାଣ୍ଡ୍ରୁ ଉଣ୍ଡ୍ରେ ନେଗେଣ୍ଡ୍ ରାଜା ମାର୍ହାନ୍, ମାରି ଲୋକୁ ୱାନିଙ୍ଗ୍ ଲାଡ୍ କିଜି ମାର୍ହାର୍। ମାପ୍ରୁ ଦାଉଦଦିଙ୍ଗ୍ ଆର୍ଶିବାଦ୍ କିତାନ୍ ମାରି ୱାନି ପିରିପ୍ତାନ୍। ଦାଉଦ ଏସୋ ଜୁଦ୍ କିତାନ୍, ମାରି ମାପ୍ରୁ ଇସ୍ରାଏଲ୍ଦି ଶତ୍ରୁରିଙ୍ଗ୍ ହାରାକିଦେଙ୍ଗ୍ ଦାଉଦଦିଙ୍ଗ୍ ସାହାଜ୍ୟ କିତାନ୍। ଦାଉଦ ଯିରୁଶାଲମଦିଙ୍ଗ୍ ଜିଣାଜି ୱାନିଙ୍ଗ୍ ନିଜେ ରାଜ୍ଦାନି କିତାନ୍, ଏୟେନ୍ଗି ଆକାନ୍ ମାର୍ହାନ୍ ମାରି ଶାସନ୍ କିତାନ୍। ଦାଉଦ ନାଲ୍ପାୟ୍ ପାଟେଙ୍ଗ୍ ନାସେଣାନ୍ ରାଜା ମାର୍ହାନ୍। ଇୟାୱେଡାଦୁ, ଇସ୍ରାଏଲ୍ ଦେଶେମ୍ ସାତୁତିକାର୍ ମାରି ଧନି ଆତାତ୍।
ଦାଉଦ ରାଜା ଉଣ୍ଡ୍ରେ ମନ୍ଦିର୍ ତିଆର୍ କିଦେଙ୍ଗ୍ ଇଷ୍ଟାମ୍କିଜି ମାର୍ହାନ୍ ଏମେବାଣାନ୍ ୱିଜୁ ଇସ୍ରାଏଲ୍ଦିକାର୍ ମାପ୍ରୁଦି ଆରାଧନା କିଦେଙ୍ଗ୍ ଆଟ୍ନାର୍ ମାରି ୱାରିୱାନ୍ଦିଙ୍ଗ୍ ବଲିଦାନ୍କିଦେଙ୍ଗ୍ ଆଟ୍ନାର୍, ପାକା ପାକି ୪୦୦ ପାଟେଙ୍ଗ୍, ଆୟଲୋକୁ ମୋଶାଦି ବାଣାନ୍ ତିଆର୍କିତିମାର୍ହି କୁଡ୍ନି ସାମ୍ଣ୍ଡାଦୁ ମାପ୍ରୁଦି ଆରାଧନା କିଜିମାର୍ହାର୍ ମାରି ୱାରିୱାନ୍ଦିଙ୍ଗ୍ ବଲିଦାନ୍ କିଜିମାର୍ହାର୍।
ମାତର୍ ଆବେ ନାଥନ୍ ଦୋରୁତିକାନ୍ ଅରେନ୍ ବାବବାଦି ମାର୍ହାନ୍। ମାପ୍ରୁ ୱାନିଙ୍ଗ୍ ଦାଉଦ ଡାଗ୍ରୁ ଇକା ୱେତେଙ୍ଗ୍ଇଜି ପକ୍ତାନ୍: “ନିନୁ ନାଣ୍ଡୋଜୁଦ୍ କିତିମାର୍ହି, ଇୟାୱାନ୍ଦିଙ୍ଗ୍ ନିନୁ ନାୱାନ୍ଦିଙ୍ଗ୍ ମନ୍ଦିର୍ ତିଆର୍କିମାଟ୍। ମି କଡ଼ୋ ଇକା କିନାନ୍। ମାରିବା, ନାନୁ ନିଙ୍ଗିଁ ନାଣ୍ଡୋ ଆର୍ଶିବାଦ୍ କିନା। ମିଦି ଉଣ୍ଡ୍ରେ କୁଟୁମ୍ ୱିଜୁଦିନାମ୍ ନା ଲୋକାଦି ମିଗ ରାଜା ୱାଜା ସାଶନ୍ କିନାର୍।” ୱିଜୁ ଦିନାମାୱାନ୍ଦିଙ୍ଗ୍ ସାଶନ୍ କିନି ଲୋକୁ ୱାଣ୍ଡ୍ରୁ ଦାଉଦଦି ଉଣ୍ଡ୍ରେନେ କୁଟୁମ୍ତି ଲୋକୁ ଖ୍ରୀଷ୍ଟ ମାର୍ହାନ୍। ଖ୍ରୀଷ୍ଟ ମାପ୍ରୁଦି ଆରେନ୍ ଆସ୍କିତିମାର୍ହି ଲୋକୁ ମାର୍ହାନ୍ ଏୟେନ୍ଗି ଦେଶେମ୍ତି ୱିଜୁ ଲୋକୁଙ୍ଗ୍ଦି ୱାରି ପାପାମ୍ଦାନ୍ ରକ୍ଷା କିନାନ୍।
ନାସ୍ତିୱାଲେ ଦାଉଦ ନାଥନଦି ମାଟା ୱେହାନ୍ ମାରି ଆକାନ୍ ମାପ୍ଦି ଧନ୍ୟବାଦ୍ ମାରି ସ୍ତୁତି କିତାନ୍। ମାପ୍ରୁ ୱାନିଙ୍ଗ୍ ମାନାଜି ମାର୍ହାନ୍, ଦାନିଙ୍ଗ୍ ପିରିପ୍ସି ମାର୍ହାନ୍ ମାରି ୱାନିଙ୍ଗ୍ ନାଣ୍ଡୋ ଆର୍ଶିବାଦ୍ କିଜିମାର୍ହାନ୍। ସତ୍ନେ,ଦାଉଦ ନେସ୍ଏଣ୍ଡା ମାର୍ହାନ୍ ଗାନି ମାପ୍ରୁ ଇୟା ୱିଜୁ ବିଷୟ୍ ଏସେଙ୍ଗ୍ କିନାନ୍। ଇଏଲ୍ ମାଡୁ ନେସ୍ନାଟ୍ ଗାନି ଇସ୍ରାଏଲ୍ଦି ୱାରିଙ୍ଗ୍ ଉଣ୍ଡ୍ରେ ନିହି ୱେଡାଦୁ ପାକାପାକି ୧,୦୦୦ ପାଟେଙ୍ଗ୍ ନାସେଣାନ୍ ଖ୍ରୀଷ୍ଟ ୱାନିକା କାପ୍କିଦେଙ୍ଗ୍ ମାନାତ।
ଦାଉଦ ଏସୋ ବରଷ୍ ନାସେଣାନ୍ ନିଆଁୟ୍ ୱାଜା ନିଜେ ଲୋକୁଦି ଶାସନ୍ କିତାର୍। ୱାଣ୍ଡ୍ରୁ ପେରି ବିଶାଷ୍ଦି ୱାଜା ମାପ୍ରୁ ମାଟା ୱେର୍ହାନ୍ ମାରି ମାପ୍ରୁ ୱନିଙ୍ଗ୍ ଆର୍ଶିବାଦ୍ କିତାନ୍। ଏମେକାବା, ନିଜେଦି ଜିଉ ୱିଜ୍ନି ୱେଡାଦୁ ୱାଣ୍ଡ୍ରୁ ମାପ୍ରୁଦି ବିରୁଦ୍ ଉଣ୍ଡ୍ରେ ପେରି ପାପାମ୍ କିତାନ୍।
ଉଣ୍ଡ୍ରେ ଦିନାମ୍ ଦାଉଦ ନିଜେ ଛାତ୍ ମିଗଣାନ୍ ସୋସି ସୁଡ୍ତାନ୍ ମାରି ଉଣ୍ଡ୍ରେ ସୁନ୍ଦ୍ରି ରିପାଦିଙ୍ଗ୍ ଇବାନିକା ସୁଡ୍ତାନ୍। ୱାଣ୍ଡ୍ରୁ ଦାନିଙ୍ଗ୍ ନେସେଏଣ୍ଡା ମାହାନ୍, ମାତର୍ ୱାଣ୍ଡ୍ରୁ ନେସ୍ତାନ୍ ଜେ ୱାନି ଦୋରୁ ବେତ୍ଶିବା ମାର୍ହାତ୍।
ୱାଣ୍ଡ୍ରୁ ନିଜେ ଆଇତରିଣ୍ଡ୍ ସୁଡ୍ନି ବାଦ୍ଲୁ, ଦାଉଦ ଦାନିଙ୍ଗ୍ ନିଜେଦି ଡାଗ୍ରୁ ତାତେଙ୍ଗ୍ ଅରେନ୍ୱାନିଙ୍ଗ୍ ପକ୍ତାନ୍। ୱାଣ୍ଡ୍ରୁ ଦାନିୱାଲେ ଗୁରିତାନ୍ ମାରି ମାରିଢେସି ଇଣ୍ଡ୍ରୋ ପକ୍ତାନ୍। ଏସୋ ଦିନାମ୍ ୱେନ୍କା ବେତ୍ଶିବା ଖାବୁର୍ ପକ୍ତାତ୍ ଗାନି ଆକାତ୍ ପଟାଦୁ ମାନାତ୍।
ଊରିୟ ଦୋରୁଦିକାନ୍ ଆରେନ୍ ଲୋକୁ ମାର୍ହାନ୍ ୱାଣ୍ଡ୍ରୁ ବେତ୍ଶିବାତି ମାସି। ଆକାନ୍ ଉଣ୍ଡ୍ରେ ଦାଉଦରି ନେଗି ସେନା ମାର୍ହାନ୍। ଇୟା ୱେଡ଼ାଦୁ ୱାଣ୍ଡ୍ରୁ ଜୁଦ୍ଦି ୱାନ୍ଦିଙ୍ଗ୍ ବାଇଲୁଦୁ ସହା ମାର୍ହାନ୍। ଦାଉଦ ଊରିୟଦିଙ୍ଗ୍ ଜୁଦ୍ଦି ବାଣାନ୍ କୁକ୍ସି ନିଜେ ଆଡ୍ସି ଡାଗ୍ରୁ ମାଣ୍ଡ୍ରେଙ୍ଗ୍ ୱେର୍ତାନ୍। ମାରି ଆଇ ସେନାର୍ ଜୁଦ୍ଦୁ ମାର୍ହାର୍ ଇୟାୱାନ୍ଦିଙ୍ଗ୍ ଊରିୟ ଇଣ୍ଡ୍ରୋ ସଣ୍ଡ୍ରେଙ୍ଗ୍ ମନାକିତାନ୍। ମାରି ଊରିୟଦିଙ୍ଗ୍ ମାରି ଢେସ୍ସି ଜୁଦ୍ଦୁ ପକ୍ତାନ୍ ମାରି ସେନାପତିଦିଙ୍ଗ୍ ୱେର୍ତାନ୍ ଗାନି ୱାଣ୍ଡ୍ରୁ ୱାନିଙ୍ଗ୍ ଉଣ୍ଡ୍ରି ଇୟାୱାଜାତି ବାଡିଦୁ ଇଡ୍ଦୁ ଏମେବାନୁଗି ଶତ୍ରୁ ୱେଜେରିଙ୍ଗ୍ ସାତୁତିକାନ ମାନ୍ଜିନାନ୍ ମାରି ଆକାନ୍ ସାନାନ୍। ଇୟାୱାଜା ଆତାତ୍ ଜେ ଊରିୟ ଜୁଦ୍ଦୁ ସାତାନ୍।
ଊରିୟ ଜୁଦ୍ଦୁ ସାତି ୱେନ୍କା ଦାଉଦ ବେତ୍ଶିବାଦିଙ୍ଗ୍ ପେଡି ଆତାନ୍। ଦାନି ୱେନ୍କା, ଆଦି ଦାଉଦଦି କଢୋଦିଙ୍ଗ୍ ଜନମ କିତାତ୍। ଦାଉଦ ଏମେକା କିତାମାହାନ୍ ଆୟାୱାନ୍ଦିଙ୍ଗ୍ ମାପ୍ରୁ ନାଣ୍ଡୋ କାକା ଆତାନ୍, ଇୟାୱାନ୍ଦିଙ୍ଗ୍ ଆକାନ୍ ନାଥନ ଦୋରୁଦି ବାବବାଦିଦିଙ୍ଗ୍ ଦାଉଦ ଡାଗ୍ରୁ ଇକା ୱେତେଙ୍ଗ୍ ପକ୍ତାନ୍ ଗାନି ୱାନିଙ୍ଗ୍ ପାପାମ୍ ଏସୋ ସେଏଣ୍ଡ ମାର୍ହାତ୍। ଦାଉଦ ନିଜେଦି ପାପାମ୍ଦାନ୍ ମାନ୍ସୁ ଢେପ୍ତାନ୍ ମାରି ମାପ୍ରୁ ୱାନିଙ୍ଗ୍ କ୍ଷମା କିତାନ୍। ନିଜେ ୱିଜ୍ନି ଜିଉଦିଙ୍ଗ୍, ନିଜେ କାଷ୍ଟାମ୍ ୱେଡାଦୁବା ଦାଉଦ ମାପ୍ରୁଦି ୱେନ୍କା ୱେନ୍କା ସର୍ହାନ୍ ମାରି ୱାନି ମାଟା ମାନାତାନ୍।
ମାତର୍ ଦାଉଦରି କଡୋ ସାତାନ୍। ଇୟାୱାଜା ମାପ୍ରୁ ଦାଉଦଦିଙ୍ଗ୍ ଡଣ୍ଡ୍ ସିତାନ୍। ମାରିବା, ଦାଉଦଦି ସାନି ନାସେଣାନ୍, ୱାନି ନିଜେ ପରିବାର୍ଦିଙ୍ଗ୍ ଏସୋ ଲୋକୁ ୱାରି ବିରୁଦ୍ଦୁ ଜୁଜାତାର୍, ମାରି ଦାଉଦଦି ନିଜେ ସାତୁ କୋକ ଆତାମାହାତ୍। ମାରି ମାପ୍ରୁ ଦାଉଦନୁଣ୍ଡିଙ୍ଗ୍ ବିଶାସ୍ ମାହାନ୍ ମାରି ଇଏଲ୍ବା ଆକାନ୍ ଇକା କିତାନ୍ ଇନିକାବା ଆକାନ୍ ଦାଉଦନୁଣ୍ଡିଙ୍ଗ କିଦେଙ୍ଗ୍ ଇଜି ପାର୍ମାଣାମ୍ କିତାମାହାନ୍ ଜେ ଆକାନ୍ କିନାନ୍, ମାରିବା ଦାଉଦ ମାପ୍ରୁଦି ବାଣାନ୍ ଅବିଶାସ୍ କିତାମାହାନ୍, ୱେନ୍କା ଦାଉଦ ମାରି ବେତ୍ଶିବାଦି ଅରେନ୍ କଢୋ ଜନମ୍ ଆତାନ୍ ମାରି ଆୟାକା ୱାନି ଦୋରୁ ଶଲୋମୋନ ଇଟ୍ତାର୍।
୧ ଶାମୁଏଲ ୧୦; ୧୫-୧୯; ୨୪; ୩୧; ୨ ଶାମୁଏଲ୫;୭; ୧୧-୧୨ ଦି ଉଣ୍ଡ୍ରେ ବାଇବଲଦି କାତା
Free to use, adapt, and share under an open license (CC BY-SA 4.0).