18. ୧୮. ବାଟା ଆତି ଦେଶେମ୍
ଦାଉଦ ରାଜା ଚାଲିସ୍ ପାଟେଙ୍ଗ୍ ସାନ୍ଦି ଶାସନ୍ କିତାନ୍। ମାରି ୱାଣ୍ତ୍ରୁ ସାତାନ୍, ମାରି ୱାନି ମାରିନ୍ ଶଲୋମୋନ ଇସ୍ରାଏଲ୍ ମୁସ୍କୁ ଶାସନ୍ କିଦେଙ୍ଗ୍ ଆରାମ୍ କିତାନ୍। ମାପ୍ରୁ ଶଲୋମୋନ୍ଦିୱାଲେ ୱାର୍ଗିଜି ମାରି ୱାନିଙ୍ଗ୍ ୱେନ୍ବାତାନ୍ ଜେ ୱଣ୍ତ୍ରୁ ୱିଜୁବାଣାନ୍ ନାଣ୍ତୋ ଇନିକା ମାନ୍ସୁକିଜିନାନ୍ ଏମେଦାଣାନ୍ଗି ମାପ୍ରୁ ୱାନିୱାନ୍ଦିଙ୍ଗ୍ କିନାନ୍। ଶଲୋମୋନ ମାପ୍ରୁଦିଙ୍ଗ୍ ଲସ୍ତାନ୍ ଜେ ୱାଣ୍ତ୍ରୁ ୱାନିଙ୍ଗ୍ ନାଣ୍ତୋ ବୁଦିତିକାନ୍ କିପିନ୍। ଇୟା ମାଟା ମାପ୍ରୁଦିଙ୍ଗ୍ ନାଣ୍ତୋ ସାର୍ଦା କିତାନ୍, ଇୟାୱାନ୍ଦିଙ୍ଗ୍ ମାପ୍ରୁ ଶଲୋମୋନ୍ଦିଙ୍ଗ୍ ଦେଶେମ୍ଦି ୱିଜୁଦିବାଣାନ୍ ବୁଦିଦି ଲୋକୁ କିତାନ୍। ଶଲୋମୋନ୍ ନାଣ୍ଡୋ ମାଟେଙ୍ଗ୍ ଅଜାତାନ୍ ମାରି ୱାଣ୍ତ୍ରୁ ଆରେନ୍ ବୁଦିମାନ୍ ଶାସନ୍କିନିକାନ୍ ମାର୍ହାନ୍। ମାପ୍ରୁ ୱାନିଙ୍ଗ୍ ଧନି ବା କିତାନ୍।
ଯିରୁଶାଲୋମଦୁ ଶଲୋମୋନ୍ ଆୟା ମନ୍ଦିର୍ ତିଆର୍ କିତାନ୍ ଏମେକା ୱାରି ବୁବା ଉପାୟ୍ କିତା ମାହାନ୍ ମାରି ଜିନିଷ୍ଙ୍ଗାଁ ଉଣ୍ଡ୍ରେ ଡାଗରୁ କିତାମାର୍ହାନ୍। ଇଏଲ୍ ଲୋକୁ କୁଡ଼୍ନି ଗୁଡା ବାଦ୍ଲୁ ମନ୍ଦିର୍ଦୁ ମାପ୍ରୁଦି ଉପାସନା କିଜିମାର୍ହାର୍ ମାରି ୱାନି ୱାନ୍ଦିଙ୍ଗ୍ ବଲିଦାନ୍ କିଜି ମାର୍ହାର୍। ମାପ୍ରୁ ୱାଜି ମନ୍ଦିରଦୁ ମାନ୍ଜି ମାହାନ୍, ମାରି ଆବେନୁ ନିଜେ ଲୋକାୱାଲେ ମାନ୍ଜି ମାର୍ହାନ୍।
ମାରି ଶଲୋମୋନ ଆଇ ଦେଶେମତି ଆଡ଼୍ସିକାଙ୍ଗ୍ ଲାଡ୍ କିତାନ୍। ୱାଣ୍ତ୍ରୁ ନାଣ୍ଡୋ ଲୋକାଙ୍ଗ୍, ପାକା ପାକି ୧,୦୦୦ ଆଡ଼୍ସିକାଙ୍ଗ୍ ପେଡିକିଜି ମାପ୍ରୁଦିଙ୍ଗ୍ ମାନାଏତାନ୍! ଇୟା ଆଡ଼୍ସିକା ବାଣାନ୍ ନାଣ୍ଡୋ ଆଡ଼୍ସିକ୍ ଆଇ୍ ଦେଶେମ୍ଦାନ୍ ୱାତେମାହେ ମାରି ନିଜେଦି ୱାଲେ ନିଜେ ଦେୟାମ୍ ତାତେମାହେ ମାରି ୱାନ୍କା ଉପାସନା କିଜି ମାହେ। ଏସେଙ୍ଗ୍ ଶଲୋମୋନ ଡକ୍ରା ଆତାନ୍ ମାରି ୱାଣ୍ତ୍ରୁ ବା ୱାନ୍କା ଦେୟମ୍କାଙ୍ଗ୍ଁ ପୁଜା କିତାନ୍।
ଇୟାୱାନ୍ଦିଙ୍ଗ୍ ମାପ୍ରୁ ଶଲୋମୋନଦିଙ୍ଗ୍ ରିସା ଆତାନ୍। ମାପ୍ରୁ ୱେର୍ତାନ୍ ଜେ ୱାଣ୍ତ୍ରୁ ଇସ୍ରାଏଲ୍ ଦେଶେମ୍ଦିଙ୍ଗ୍ ରୁଣ୍ଡି ରାଜିଦୁ ବାଟାକିନି ବାଣାନ୍ ଶଲୋମୋନ୍ଦିଙ୍ଗ୍ ଡଣ୍ଡ୍ ସିନାନ୍। ୱାଣ୍ତ୍ରୁ ଶଲୋମୋନଦି ସାତି ୱେନ୍କା ଇୟାକା କିନାନ୍।
ଶଲୋମୋନ ସାତି ୱେନ୍କା, ୱାନି ମାରିନ୍ ରିହବିୟାମ ରାଜା ଆତାନ୍। ଇସ୍ରାଏଲ୍ ଦେଶେମ୍ତିକାର୍ ୱିଜୁ ଲୋକୁ ୱାନିଙ୍ଗ୍ ନିଜେଦି ରାଜା ୱାଜା ମାନାଦେଙ୍ଗ୍ ଉଣ୍ଡ୍ରେ ବାଡିଦୁ କୁମା ଆତାର୍। ୱାରୁ ରିହବିୟାମ୍ଦିଙ୍ଗ୍ ବିରୁଦ୍ଦି ମାଟା ୱେହ୍ତାର୍ ଜେ ଶଲୋମୋନ୍ ରାଜା ନାଣ୍ଡୋ କାଷ୍ଟାମ୍ଦି ପାଣି କିବିସି ମାର୍ହାନ୍ ମାରି ନାଣ୍ଡୋ ସିସ୍ତୁ ଲସ୍ତାମାର୍ହାନ୍। ୱାରୁ ରିହବିୟମଦିଙ୍ଗ୍ ବାତିମାଲିତାର୍ ଜେ ୱାରିଙ୍ଗ୍ କୋକୋ ପାଣି କିବିସ୍ଆ।
ମାରି ରିହବିୟମ ୱାରିଙ୍ଗ୍ ପେରି ଗାଡ଼୍ସୁୱାଜା ୱେର୍ତାନ୍, “ମିରୁ ୱେହ୍ସିନିଦେର୍ ଜେ ନା ବୁବା ଶଲୋମୋନ ମିଙ୍ଗିଁ କାଷ୍ଟାମ୍ ପାଣି କିବିସ୍ତାନ୍। ମାରି ନାନୁ ମିଙ୍ଗିଁ ୱାନି ବାଣାନ୍ ନାଣ୍ଡୋ ପାଣି କିବିସ୍ନା, ମାରି ନାନୁ ମିଙ୍ଗିଁ ୱାନି ବାଣାନ୍ ନାଣ୍ଡୋ କାଷ୍ଟାମ୍ ସିନା।”
ନାସ୍ତିୱାଲେ ଲୋକୁ ୱାନିଙ୍ଗ୍ ଇହୁ ୱେର୍ନିକା ୱେହାର୍ ମାରି ୱାରିଲୋଇହାନ୍ ଏସୋ ଲୋକୁ ୱାନି ବିରୁଦ୍ଦାନ୍ ନିଙ୍ଗିଁତାର୍। ପାଦି କୁଟୁମ୍ ୱାନିଙ୍ଗ୍ ଢିସ୍ତାସିତାର୍; ୱାନି ୱାଲେ ରୁଣ୍ଡି କୁଟୁମ୍ନେ ମାର୍ହାର୍। ଇୟା ରୁଣ୍ଡି କୁଟୁମ୍ ନିଜେଦିଙ୍ଗ୍ ଯିହୁଦା ରାଜି ୱେର୍ତାର୍।
ଆଇ ପାଦି କୁଟୁମ୍ ଯାରବିୟାମ ଦୋରୁଦି ଆରେନ୍ ମେମାର୍ଦିଙ୍ଗ୍ ନିଜେ ରାଜା କିତାର୍। ଇଆ କୁଟୁମ୍ ଦେଶେମ୍ଦି ଉଣେରି ତରିନ୍-ୱେଡ଼ା ସନି ସାନ୍ଦିଦୁ ମାହାର୍। ୱାରୁ ନିଜେଦିଙ୍ଗ୍ ଇସ୍ରାଏକ୍ଦି ରାଜି ଇଜି ୱେର୍ତାର୍।
ମାରି ଯାରବିୟାମ୍ ମାପ୍ରୁଦି ବିରୁଦ୍ଦୁ ସର୍ହାନ୍ ମାରି ଲୋକାଙ୍ଗ୍ ପାପାମ୍ କିବିସ୍ତାନ୍। ୱାଣ୍ତ୍ରୁ ନିଜେଦି ଲୋକାଙ୍ଗ୍ୱାନ୍ଦିଙ୍ଗ୍ ଉପାସନା କିଦେଙ୍ଗ୍ ରୁଣ୍ଡି୍ ଦେୟାମ୍ ତିଆର୍ କିତାନ୍। ଇଏଲ୍ ୱାରୁ ୟିହୁଦା ଦେଶେମ୍ଦୁ ଯିରୁଶାଲୋମ୍ଦି ମନ୍ଦିର୍ଦୁ ଉପାସନା କିଦେଙ୍ଗ ସନ୍ଏଜି ମାର୍ହାର୍।
ଯିହୁଦା ମାରି ଇସ୍ରାଏଲ୍ ଦେଶେମ୍ତିକାର୍ ଶତ୍ରୁ ଆତାର୍ ମାରି ୱିଜୁୱାଲେ ୱାରୁ ଜୁଜାଜି ମାର୍ହାର୍।
ପୁନି ଦେଶେମ୍ ଇସ୍ରାଏଲ୍ଦୁ, ୱିଜୁ ରାଜାର୍ ଦୁଷ୍ଟାମ୍ ମାର୍ହାର୍। ଇୟା ରାଜାରି ଲୋଇହାନ୍ ଏସୋଲୋକାଙ୍ଗ୍ ଇସ୍ରାଏଲ୍ଦିକାର୍ ସାୟାମାର୍ଗା ଡାକ୍ତାମାର୍ହାର୍ ଏମେକାର୍ ୱାରିବାଡିଦୁ ରାଜାଆଦେଙ୍ଗ୍ ମାନ୍ସୁ କିଜିମାର୍ହାର୍।
ଇସ୍ରାଏଲ୍ ରାଜିଦୁ ୱିଜୁରାଜାର୍ ମାରି ନାଣ୍ଡୋଦାନ୍ ନାଣ୍ଡୋ ଲୋକୁ ଦେୟାମ୍ଦିଙ୍ଗ୍ ଉପାସନା କିଜି ମାର୍ହାର୍। ନାସ୍ତିୱାଲେ ୱାରୁ ଇୟାୱାଜା କିତାର୍ ଜେ, ମାରି ୱାରୁ ଦାରିଣିକାୱାଲେ ଗୁରିତାର୍ ମାରି ଇୟାୱାଜା ଏସୋ ଜାରିଙ୍ଗ୍ ୱାରୁ କଢୋରିଙ୍ଗ୍ ଦେୟାମ୍ ଆଗ୍ଡି ବଲିଦାନ୍ ସିତାର୍।
ଯିହୁଦା ଦେଶେମ୍ତି ରାଜା, ଦାଉଦଦି କୁଟୁମ୍ତିକାନ୍ ମାର୍ହାର୍। ଇୟା ରାଜାରି ଲୋଇହାନ୍ ଏସୋ ଲୋକୁ ନ୍ୟାୟ୍ୱାଜା ଶାସନ୍ କିତାର୍ ମାରି ମାପ୍ରୁଦି ଉପାସନା କିତାର୍। ମାରି ଯିହୁଦାଦି ନାଣ୍ଡୋ ରାଜାର୍ ଦୁଷ୍ଟାମ୍ ମାର୍ହାର୍। ୱାରୁ ଦୁଷ୍ଟାମ୍ୱାଜା ଶାସନ୍ କିତାର୍ ମାରି ଦେୟାମ୍ଦି ଉପାସନା କିତାର୍। ଇୟାୱାଜା ନେ ଇୟାଲୋକା ଲୋଇଆନ୍ ଏସୋ ରାଜାର୍ ବାଣ୍ଡିସ୍ନି ଦେୟାମ୍କା ଆଗ୍ଡି ନିଜେ କଢୋରିଙ୍ଗ୍ ବା ବଲିଦାନ୍ କିତାର୍। ଯିହୁଦାଦି ନାଣ୍ଡୋ ଲୋକୁ ବା ମାପ୍ରୁଦି ବିରୁଦ୍ଦୁ ସର୍ହାର୍ ମାରି ଆଇ ଦେୟାମ୍ଦି ଉପାସନା କିତାର୍।
୧ରାଜା ୧-୬;୧୧-୧୨ ଦି ଉଣ୍ଡ୍ରେ ବାଇବଲଦି କାତାନି
Free to use, adapt, and share under an open license (CC BY-SA 4.0).