20. ୨୦. ଇସ୍ରାଏଲ୍ଦିକାର୍ ବନ୍ଦି ଆନିକା ମାରି ମାରିଢେସି ୱାନିକା
ଇସ୍ରାଏଲ୍ ରାଜି ମାରି ଯିହୁଦା ରାଜି ଆୟା ରୁଣ୍ଡି ରାଜି ମାପ୍ରୁ ବିରୁଦ୍ ପାପାମ୍ କିତାର୍। ଆୟା ପାର୍ମାଣାମ୍ଦିଙ୍ଗ୍ ମାନାଏତାର୍ ଏମେକାଗି ମାପ୍ରୁ ସିନୟ ଗରୋତୁ କିତାମାର୍ହାନ୍। ମାପ୍ରୁ ୱାରି ମାନ୍ସୁଦିଙ୍ଗ୍ ଢେପ୍ତେଙ୍ଗ୍ ମାରି ମାରିଢେସି ୱାନି ଆରାଦନା କିଦେଙ୍ଗ୍ ଇଜି ଜାଗ୍ରତ୍ କିଦେଙ୍ଗ୍ ନିଜେଦି ବାବବାଦିଦିଙ୍ଗ୍ ପକ୍ତାନ୍, ମାରି ୱାରୁ ୱାରି ମାଟା ମାନାଦେଙ୍ଗ୍ ମନାକିତାର୍।
ମାରି: ମାପ୍ରୁ ୱାରି ଶତ୍ରୁଙ୍ଗାଁ ଶାକ୍ତି ସିଜି ଆୟା ରୁଣ୍ଡି ରାଜିଦୁ ଡଣ୍ଡ୍ ସିତାନ୍। ଆସିରୀୟ ଉଣ୍ଡ୍ରେ ଆଇ ଦେଶମ୍ ମାର୍ହାତ୍ ଏୟେନ୍ଗି ନାଣ୍ଡୋ ସାତୁତିକାନ୍ ଆତା ମାର୍ହାନ୍। ୱାରୁ ଆଇ ଦେଶେମ୍ଦି ୱାନ୍ଦିଙ୍ଗ୍ ଦୟା ସିଲେଣ୍ତା ମାର୍ହାତ୍। ୱାରୁ ୱାଜି ଇସ୍ରାଏଲ୍ ରାଜିଦିଙ୍ଗ୍ ନାଷ୍ଟୁ କିତାଢିସ୍ତାର୍। ଆସିରୀୟତିକାର୍ ୱାଜି ଇସ୍ରାଏଲ୍ ରାଜିଦି ନାଣ୍ଡୋ ଲୋକାଙ୍ଗ୍ ସାପିସ୍ତାର, ଏମେକା ୱାରୁ ମାନ୍ସୁ କିତାର୍ ଆକା ରେଲ୍ଜି ଅତାର୍ ମାରି ଦେଶେମ୍ଦି ଏସୋ ସାନ୍ଦି ଆଟ୍କ୍ତାର୍।
ଆସିରୀୟର୍ ୱିଜୁ ନେତାରିଙ୍ଗ୍, ଦନିଲୋକାଙ୍ଗ୍, ମାରି ନିନି ଲୋକାରିଙ୍ଗ୍ ଏୟେଏର୍ଗି ନାଣ୍ତୋଦାରା ଜିନିଷ ତିଆର୍ କିଦେଙ୍ଗ୍ ଆଟ୍ସି ମାର୍ହାର୍ ମାରି ୱାରିଙ୍ଗ୍ ଉଣ୍ଡ୍ରେବାନୁ ଉଣ୍ତାକିତାନ୍ ମାରି ୱାରୁ ୱାରିଙ୍ଗ୍ ଆସିରୀୟ ଦେଶେମ୍ଦୁ ଅତାର୍। ଇସ୍ରାଏଲ୍ଦୁ ଇନି ଗରିବ୍ ଇସ୍ରାଏଲିୟର୍ ବାକି ମାର୍ହାର୍।
ଦାନିୱେନ୍କା ଆସିରୀୟ ଲୋକୁ ୱାୟା ଦେଶେମ୍ଦୁ ମାନିୱାନ୍ଦିଙ୍ଗ୍ ବିଦେସ୍ତିତି ଲୋକାଙ୍ଗ୍ ତାତାର୍। ଆୟା ବିଦେସ୍ତି ଲୋକୁ ଆୟ ଗଡ଼୍ଦିଙ୍ଗ୍ ମାରିଡ଼େସି ତିଆର୍ କିତାର୍। ଏମେ ଇସ୍ରାଏଲଦିକାର୍ ଆବେନୁ ମାର୍ହାର୍ ୱାରିୱାଲେ ବିଦେସ୍ତିକାର୍ ପେଡ଼ି କିତାର୍। ଆୟା ଲୋକାରି କୁଟୁମ୍ଦିଙ୍ଗ୍ ସାମରିୟ ୱେର୍ତାର୍।
ଯିହୁଦା ରାଜିଦି ଲୋକୁ ସୁଡ଼୍ତାର୍ ଜେ ଏଣ୍ଡେସ୍ ମାପ୍ରୁ ୱାନି ମୁସ୍କୁ ବିସ୍ବାସ୍ କିଏତିଙ୍ଗ୍ ମାରି ୱାନିମାଟା ଆସ୍ଏତିଙ୍ଗ୍ ଇସ୍ରାଏଲ୍ ରାଜିଦି ଲୋକାଙ୍ଗ୍ ଡଣ୍ଡ୍ସିତାର୍। ମାରି ଆତିଙ୍ଗାବା ୱାରୁ କିଣାନିୟ ଦେୟାମ୍ଙ୍ଗାଁ ଉପାସନା କିତାର୍। ମାପ୍ରୁ ୱାରିଙ୍ଗ୍ ଜାଗ୍ରତ୍ କିନିୱାନ୍ଦିଙ୍ଗ୍ ବାବବାଦିଦିଙ୍ଗ୍ ପକ୍ତାନ୍। ମାରି ୱାରୁ ୱେନ୍ଣ୍ଡ୍ରେଙ୍ଗ୍ ମାନ୍ସୁ କିଏତାର୍।
ପାକା ପାକି ସଏ ପାଟେଙ୍ଗ୍ ୱେନ୍କା ଆସିରୀୟଣିତିକାର୍ ଇସ୍ରାଏଲ୍ ରାଜିଦିଙ୍ଗ୍ ନାଷ୍ଟୁ କିଦେଙ୍ଗ୍ ମାପ୍ରୁ ବାବିଲୋନ ରାଜା ନବୂଖଦ୍ ନେସର୍ଦି ଯିହୂଦା ରାଜିମୁସ୍କୁ ଡେଇଦେଙ୍ଗ୍ ଇଜି ପକ୍ତାନ୍। ବାବିଲୋନ ଉଣ୍ଡ୍ରେ ସାତୁତି ଦେଶେମ୍ ମାର୍ହାତ୍। ଯିହୂଦାଦି ରାଜା ନବୁଖଦ୍ ନେସର୍ଦି ଦାସ୍ ଆନିୱାନ୍ଦିଙ୍ଗ୍ ମାରି ୱିଜୁ ପାଟେଙ୍ଗ୍ ୱାନିଙ୍ଗ୍ ନାଣ୍ଡୋ ସମ୍ପତି ସିନିୱାନ୍ଦିଙ୍ଗ୍ ରାଜି ଆତାର୍।
ମାରି ଏସୋ ପାଟେଙ୍ଗ୍ ୱେନ୍କା ଯିହୂଦାଦି ରାଜା ବାବିଲୋନୀୟଦିଙ୍ଗ୍ ବିରୁଦ୍କିତାର୍ ମାରି ବାବିଲୋନୀୟର୍ ମାରିଡ଼େସି ଯିହୂଦା ରାଜି ମୁସ୍କୁ ଡେଇତାର୍। ୱାରୁ ଯିରୂଶାଲମ୍ ଗଡ଼ ନିଜେଦି କିତାର୍, ମନ୍ଦିର୍ଦିଙ୍ଗ୍ ନାଷ୍ଟୁକିତାର୍ ମାରି ଗଡ଼ ମାରି ମନ୍ଦିର୍ଦି ୱିଜୁ ସମ୍ପତି ଅତାର୍।
ବିରୁଦ୍କିନି ୱାନ୍ଦିଙ୍ଗ୍ ଯିହୂଦାଦି ରାଜାଦିଙ୍ଗ୍ ଡଣ୍ତ୍ସିନି ୱାନ୍ଦିଙ୍ଗ୍ ନବୁଖଦ୍ନେସର୍ରି ସେନାର୍ ରାଜାରି କଡ଼ଦିଙ୍ଗ୍ ୱାନି ଏଦ୍ରୁ ସାୟାମାର୍ଗା ଡାକ୍ତାର୍ ମାରି ୱାନିଙ୍ଗ୍ କାଣା କିତାର୍, ୱାରୁ ରାଜାଦିଙ୍ଗ୍ ଅତାର୍ ଏଣ୍ତେସ୍ଗି ୱାଣ୍ତ୍ରୁ ଜଇଲ୍ଦୁ ସାନାନ୍।
ନବୁଖଦ୍ନେସର୍ ମାରି ୱାରି ସେନାର୍ ଯିହୂଦା ରାଜିଦି ପାକା ପାକି ୱିଜୁ ଲୋକାଙ୍ଗ୍ ବାବିଲୋନଦୁ ଅତାର୍ ନିଙ୍ଗିଁନେ ୱିଜେରିଙ୍ଗ୍ ଗରିବ ଲୋକାଙ୍ଗ୍ ୱେନ୍କା ଡିସ୍ତାର୍ ମାତର୍ ୱାରୁ ମାଡିଦୁ ଦିନ୍ସୁକିନି ୱେଡ଼ାଦି ଇୟାକାଡ଼ାଦିଙ୍ଗ୍ ସାକର୍ଆନିକା ୱେର୍ତାର୍ ଏମେବାଣାନ୍ ମାପ୍ରୁ ଲୋକାଙ୍ଗ୍ ପାର୍ମାଣାମ୍କିତି ଦେଶେମ୍ଦାନ୍ ସସି ସଣ୍ଡ୍ରେଙ୍ଗ୍ ଇଜି ବିଜାର୍ କିତାର୍।
ମାରିବା ମାପ୍ରୁ ନିଜେଦି ଲୋକାଙ୍ଗ୍ ୱାରି ପାପାମ୍ ୱାନ୍ଦିଙ୍ଗ୍ ୱାରିଙ୍ଗ୍ ଆଇ ଦେଶେମ୍ଦୁ ବନ୍ଦି ଆଜି ପକ୍ସି ଡଣ୍ତ୍ କିତାନ୍, ମାରିବା ୱାଣ୍ତ୍ରୁ ୱାରିଙ୍ଗ୍ ମାରି ନିଜେଦି ପର୍ମାଣାମ୍ଦିଙ୍ଗ୍ ବାଣାଏଣ୍ଡା ମାର୍ହାର୍। ମାପ୍ରୁ ନିଜେଦି ଲୋକାଙ୍ଗ୍ ସୁଡ଼୍ଦେଙ୍ଗ୍ ଆରାମ୍ କିତାନ୍ ମାରି ନିଜେଦି ବାବବାଦିଦିବାଣାନ୍ ୱାରିଙ୍ଗ୍ ୱାର୍ଗିଜି ମାର୍ହାନ୍। ୱାଣ୍ତ୍ରୁ ପାର୍ମାଣାମ୍ କିତାନ୍ଜେ ସତୁରି ପାଟେଙ୍ଗ୍ ୱେନ୍କା, ୱାରୁ ମାରିଢେସି ପର୍ମାଣାମ୍ କିତିମାହି ଦେଶେମ୍ଦୁ ଡ଼େସି ୱାନାର୍।
ପାକାପାକି ସତୁରି ବରଷ୍ ୱେନ୍କା, ପେର୍ସିଆ ଦେଶେମ୍ଦି ରାଜା ସାଇରୁସ୍ ବାବିଲ୍ଦିଙ୍ଗ୍ ଆରାକିତାନ୍, ଇୟାୱାନ୍ଦିଙ୍ଗ୍ ବାବିଲନ୍ଦି ଶାସନ୍ ବାଦ୍ଲୁଦାନ୍ ପେର୍ସିଆଦି ଶାସନ୍ ନାଣ୍ଡୋ ଦେଶେମ୍ ମୁସ୍କୁ ଶାସନ୍ କିଜି ମାର୍ହାର୍। ଇୟେଲ୍ ଇସ୍ରାଏଲ୍ଦି ଲୋକାଙ୍ଗ୍ ଯିହୁଦି ୱେର୍ସିମାର୍ହାର୍। ୱାରିବାଣାନ୍ ନାଣ୍ଡୋ ଲୋକୁ ନିଜେଦି ପୁରାଜିଉ ବାବିଲନ୍ଦୁ ଜିତାମାର୍ହାନ୍। ମାତର୍ ଯିହୁଦି ଡକ୍ରାରିଙ୍ଗ୍ ଯିହୁଦା ଦେଶେମ୍ଦିଙ୍ଗ୍ ଅଡ଼୍ପୁ ମାର୍ହାତ୍।
ପେର୍ସିଆତି ଲୋକୁ ନାଣ୍ଡୋ ସାତୁତିକାର୍ ମାର୍ହାର୍, ମାତର୍ ୱାରୁ ୱାରି ଜିଣାତି ମାହି ଲୋକାମୁସ୍କୁ ଦୟା କିଜି ମାର୍ହାର୍। ପେର୍ସିଆଦି ଲୋକୁଦି ରାଜା ଆଜି ଏସୋୱେଡ଼ା ୱେନ୍କା, ସାଇରସ୍ ରାଜା ଉଣ୍ଡ୍ରେ ଆଦେଶ୍ ସିତାନ୍ ଜେ ଏମେ ଯିହୁଦି ଯିହୁଦା ଦେଶେମ୍ଦୁ ଢେସି ସନ୍ଡ୍ରେଙ୍ଗ୍ ମାନ୍ସୁକିତାର୍, ୱାରୁ ପେର୍ସିଆଦାନ୍ ସୋସି ଯିହୁଦା ଦେଶେମ୍ଦୁ ସନ୍ଣ୍ଡ୍ରେଙ୍ଗ୍ ଆଟ୍ନାର୍। ଇୟାୱାଜା ନେ ଜେ ୱାଣ୍ତ୍ରୁ ୱାରିଙ୍ଗ୍ ମନ୍ଦିର୍ ତିଆର୍ କିଦେଙ୍ଗ୍ ସମ୍ପତି ବା ସିତାନ୍। ମାରି: ୱାଣ୍ତ୍ରୁ ସାକର୍ଆଜି ସତୁରି ପାଟେଙ୍ଗ୍ ୱେନ୍କା, ଯିହୁଦିରି ଉଣ୍ଡ୍ରେ ନିସ୍ରି ମାନ୍ଦା ଯିହୁଦାଦି ଯିରୁଶାଲମ୍ ଗଡ଼୍ଦୁ ଢେସି ୱାତାର୍।
ଏସେଙ୍ଗ୍ ଲୋକୁ ଯିରୁଶାଲମ୍ଦୁ ଇତାର୍, ୱାରୁ ମନ୍ଦିର୍ ମାରି ଗଡ଼୍ଦି ସାରିବେଡ୍ତିତି କାତିଦିଙ୍ଗ୍ ମାରିଢେସି ତିଆର୍ କିତାର୍। ପେର୍ସିଆ ଲୋକୁ ଇଏଲ୍ ବା ୱାରିମୁସ୍କୁ ଶାସନ୍ କିଜିମାର୍ହାର୍, ମାରି ମାରିଢେସି ୱାରୁ ପାର୍ମାଣାମ୍କିତି ଦେଶେମ୍ଦୁ ମାନ୍ଜି ମନ୍ଦିର୍ଦୁ ଆରାଧନା କିଜିମାର୍ହାର୍।
୨ ରାଜାବଳି ୧୭;୨୪-୨୫ ୨ବଂଶାବଳି ୩୬; ଏଜ୍ରା ୧-୧୦; ନିହିମିୟା ୧-୧୩ ଦି ଉଣ୍ଡ୍ରେ ବାଇବଲ୍ଦି କାତାନି
Free to use, adapt, and share under an open license (CC BY-SA 4.0).