21. ୨୧. ମାପ୍ରୁ ଖ୍ରୀଷ୍ଟଦିଙ୍ଗ ପକିସ୍ନି ୱାନ୍ଦିଙ୍ଗ୍ ସପତ୍ କିତାନ୍
ଏସ୍ତିୱାଲେ ମାପ୍ରୁ ଦୁନିଆଦିଙ୍ଗ୍ ତିଆର୍ କିତାମାର୍ହାନ୍, ୱାଣ୍ତ୍ରୁ ନେସ୍ତାମାର୍ହାନ୍ ଜେ ୱାଣ୍ତ୍ରୁ ଉଣ୍ଡ୍ରେଦିନାମ୍ ଖ୍ରୀଷ୍ଟଦିଙ୍ଗ୍ ପକ୍ନାନ୍। ୱାଣ୍ତ୍ରୁ ଆଦମ୍ ମାରି ହବାଦିଙ୍ଗ୍ ପାର୍ମାଣାମ୍ କିତାମାର୍ହାନ୍ ଜେ ୱାଣ୍ତ୍ରୁ ଇୟାୱାଜା କିନାନ୍। ୱାଣ୍ତ୍ରୁ ୱେର୍ତାନ୍ ଜେ ହବାଦି ବାଣାନ୍ ଉଣ୍ତ୍ରେ କୁଟୁମ୍ତି ଅରେନ୍ ଆନାନ୍ ଏୟେନ୍ଗି ସାରାସୁତାଲାଦିଙ୍ଗ୍ ଗୁତ୍ନାନ୍। ନିକାମେ ଆକା ସୟତାନ୍ନେ ମାର୍ହାନ୍ ଏୟେନ୍ ସାରାସୁ ୱାଜା ୱାଜି ହବାଦିଙ୍ଗ୍ ଦକା ସିତାନ୍। ମାପ୍ରୁ ୱେର୍ନି ଅର୍ତ ଇକା ମାର୍ହାତ୍ ଜେ ଖ୍ରୀଷ୍ଟ ସୟତାନ୍ଦିଙ୍ଗ୍ ପୁରାପୁରି ୱାଜା ଆରା କିନାନ୍।
ମାପ୍ରୁ ଆବ୍ରାହାମ୍ଦିଙ୍ଗ୍ ପାର୍ମାଣାମ୍ କିଜି ୱେର୍ତାନ୍। ଏୟେନ୍ଗି ୱାନିବାଣାନ୍ ପୁର୍ତିବିଦି ୱିଜୁ ଜାତି ଆର୍ଶିବାଦ୍ ପାଏଆନାର୍ ଆୟା ଆର୍ଶିବାଦ୍ ସମାନ୍ ଆନାତ୍ ଏସ୍ତିୱାଲେ ଖ୍ରୀଷ୍ଟ ୱାନିଦିନାମ୍କାଙ୍ଗ୍ ଉଣ୍ଡ୍ରେଦିନ୍ ୱାନାନ୍। ପୁର୍ତିବିଦୁ ମାନି ୱିଜୁ ଜାତିଦି ଲୋକାଙ୍ଗ୍ ୱାରି ପାପାମ୍ଦାନ୍ ୱାରିଙ୍ଗ୍ ରକିୟା କିନାନ୍।
ମାପ୍ରୁ ମୋଶାଦିଙ୍ଗ୍ ପାର୍ମାଣାମ୍ କିତାମାର୍ହାନ୍ ଜେ ୱାନିଦିନାମ୍କାଙ୍ଗ୍ ୱାଣ୍ତ୍ରୁ ମୋଶାଦି ୱାଜା ଆଇ ଅରେନ୍ ବାବବାଦିଦିଙ୍ଗ୍ ପକ୍ନାନ୍। ଇୟା ବାବବାଦିଲୋକୁ ଖ୍ରୀଷ୍ଟ ଆନାନ୍। ଇୟାୱାଜା, ମାପ୍ରୁ ମାରିଅର୍ସୁ ପର୍ମାଣାମ୍ କିତାନ୍ ଜେ ୱାଣ୍ତ୍ରୁ ଖ୍ରୀଷ୍ଟଦିଙ୍ଗ୍ ପକ୍ନାନ୍।
ମାପ୍ରୁ ରାଜା ଦାଉଦିଙ୍ଗ୍ ପାର୍ମାଣାମ୍ କିତାମାର୍ହାନ୍ ଜେ ୱାରି କୁଟୁମ୍ଦି ବାଣାନ୍ ଅରେନ୍ ଖ୍ରୀଷ୍ଟ ଆନାନ୍। ୱାଣ୍ତ୍ରୁ ରାଜା ଆନାନ୍ ମାରି ମାପ୍ରୁଦି ଲୋକା ମୁସ୍କୁ ୱିଜୁଦିନାମ୍ ୱାନ୍ଦିଙ୍ଗ୍ ଶାସନ୍ କିନାନ୍।
ମାପ୍ରୁ ଯିରିମିୟ ଭବିସତ୍ ମାଟା ୱେର୍ନି ଲୋକଦିଙ୍ଗ୍ ୱାର୍ଗିଜି ୱେହ୍ତାନ୍ ଜେ ଉଣ୍ଡ୍ରେ ଦିନାମ୍ ୱାଣ୍ତ୍ରୁ ଉଣ୍ଡ୍ରେ ପୁନି ପାର୍ମାଣାମ୍ କିନାନ୍। ଆୟା ପୁନି ପାର୍ମାଣାମ୍ ପାଡାଇ ପାର୍ମାଣାମ୍ ୱାଜା ଆଏତ୍ ଏମେକା ଇସ୍ରାଏଲ୍ରି ୱାଲେ ସିନୟ ଗୋରତୁ କିତାମାର୍ହାନ୍। ଏସେଙ୍ଗ୍ ୱାଣ୍ତ୍ରୁ ଆୟା ପୁନି ପାର୍ମାଣାମ୍ ଲୋକାୱାଲେ କିନାନ୍, ମାପ୍ରୁ ୱାରିଙ୍ଗ୍ ମାପ୍ରୁଦିଙ୍ଗ୍(ବ୍ୟକ୍ତିଗତ) ନିଜେଦିଙ୍ଗ୍ ନେସ୍ନି ୱାଜା କିନାନ୍। ୱିଜୁ ଲୋକୁ ୱାନିଙ୍ଗ୍ ଜିଉନନାର୍ ମାରି ୱାନି ନିୟମ୍ ମାନାଦେଙ୍ଗ୍ ମାନ୍ସୁ କିନାର୍। ମାପ୍ରୁ ୱେର୍ତାନ୍ ଜେ ଇକା ୱାରି ନିୟମ୍ ୱିଜେରି ଜିଉଦୁ ରାସାତି ୱାଜା ଆନାତ୍। ୱାରୁ ୱାନି ଲୋକୁ ଆନାର୍, ମାରି ମାପ୍ରୁ ୱାରି ପାପାମ୍ କ୍ଷମା କିନାନ୍। ୱାଣ୍ତ୍ରୁ ଖ୍ରଷ୍ଟ ଆନାନ୍ ଏୟେନ୍ ୱାରି ୱାଲେ ଆୟା ପାର୍ମାଣାମ୍ କିନାନ୍।
ମାପ୍ରୁଦି ବାବବାଦି ଲୋକାଙ୍ଗ୍ ଇକାବା ୱେର୍ତାମାର୍ହାନ୍ ଜେ ଖ୍ରୀଷ୍ଟ ଆରେନ୍ ଭବିସତ୍ ମାଟା ୱେର୍ନି ଲୋକୁ, ଆରେନ୍ ବାବବାଦି ଆୟା ଲୋକୁ ଏୟେନ୍ଗି ମାପ୍ରୁଦି ମାଟା ୱେନାନ୍, ମାରି ଦାନିୱେନ୍କା ଲୋକାରିଙ୍ଗ୍ ମାପ୍ରୁଦି ବାକ୍ୟ ୱେର୍ନାନ୍। ଏୟେଙ୍ଗ୍ଗି ପକ୍ନିୱାନ୍ଦିଙ୍ଗ୍ ମାପ୍ରୁ ପର୍ମାଣାମ୍ କିତାମାର୍ହାନ୍ ଆୟା ଖ୍ରୀଷ୍ଟ ଅରେନ୍ ପବିତ୍ର ବାବବାଦି ଆନାନ୍। ମାରି ଦାନି ଅର୍ତ, ଆୟା ଖ୍ରୀଷ୍ଟ ମାପ୍ରୁଦି ମାଟା ନେଗେଣ୍ଡଦାନ୍ ୱେର୍ନାନ୍, ମାରି ୱାଣ୍ତ୍ରୁ ଲୋକାଙ୍ଗ୍ ଆୟା ବାକ୍ୟଦିଙ୍ଗ୍ ନେଗେଣ୍ଡ୍ଦାନ୍ ଅଜାକିନାନ୍।
ଇସ୍ରାଏଲ୍ଦି ଯାଜକର୍ ଲୋକାୱାନ୍ଦିଙ୍ଗ୍ ମାପ୍ରୁ ଆଗ୍ଡି ବଲିଦାନ୍ ବନ୍ଦ୍କିଏତାର୍। ଇୟା ବଲିଦାନ୍ ଲୋକା ପାପାମ୍ୱାନ୍ଦିଙ୍ଗ୍ ୱାରିଙ୍ଗ୍ ମାପ୍ରୁଦି ବାଣାନ୍ ଦଣ୍ଡ୍ସିନି ବାଡିଦୁ ଏକିସ୍ସି ମାର୍ହାର୍। ଯାଜକର୍ ଲୋକାୱାନ୍ଦିଙ୍ଗ୍ ପାର୍ତନା ବା କିଜିମାର୍ହାର୍। ମାତର୍ ଆୟା ଖ୍ରୀଷ୍ଟ ପବିତ୍ର ପେରି ଯାଜକ ଆନାନ୍ ଏୟେନ୍ଗି ମାପ୍ରୁଦିଙ୍ଗ୍ ସିନିୱାନ୍ଦିଙ୍ଗ୍ ଉଣ୍ଡ୍ରେ ପବିତ୍ର ନିଜେଦିଙ୍ଗ୍ ଏକିସ୍ନାନ୍। ଦାନି ଅର୍ତ, ୱାଣ୍ତ୍ରୁ ଏସେଙ୍ଗ୍ ପାପାମ୍ କିଏନ୍, ମାରି ଏସ୍ତିୱାଲେ ୱାଣ୍ତ୍ରୁ ବଲିଦାନ୍ୱାନ୍ଦିଙ୍ଗ୍ ନିଜେଦିଙ୍ଗ୍ ସିନାନ୍, ମାର ଦୁନିଆତି ଏମେ ଆଇ ବଲିଦାନ୍ ଦରକାର୍ ସିଲେତ୍।
ରାଜା ମାରି ଅଦିପତିର୍ ଲୋକା ମାନ୍ଦାରିଙ୍ଗ୍ ଶାସନ୍ କିଜିମାର୍ହାର୍, ମାରି ଏସେଙ୍ଗ୍ ଏସେଙ଼୍ଗ୍ ୱାରୁ ଭୁଲ୍ କିନାର୍। ରାଜା ଦାଉଦ ଇସ୍ରାଇଲ୍ଦିଙ୍ଗ୍ ମାରି ଶାସନ୍ କିତାର୍। ମାରି ଖ୍ରୀଷ୍ଟ ଦାଉଦରି ମାରିନ୍ ୱିଜୁ ଦେଶେମ୍ ମୁସ୍ଦୁ ଶାସନ୍ କିନାନ୍, ମାରି ୱାଣ୍ତ୍ରୁ ୱିଜୁ ଦିନାମ୍ ଶାସନ୍ କିନାନ୍। ଇକା ଢିସ୍ସି, ୱାଣ୍ତ୍ରୁ ୱିଜୁୱାଲେ ନ୍ୟାୟୱାଜା ଶାସନ୍ କିନାନ୍, ମାରି ନେଗି ପାଣି (ନିସ୍ପତି) ଅନାନ୍।
ମାପ୍ରୁଦି ବାବବାଦି ଖ୍ରୀଷ୍ଟଦି ବିଷୟଦିଙ୍ଗ୍ ନାଣ୍ଡୋ ମାଟେଙ୍ଗ୍ ୱେର୍ତାମାର୍ହାର୍, ଇୟାୱାଜା ଜେ ଅଡ଼୍ବିଦୁ, ମୋଲାକି ୱେହ୍ତାନ୍ ଜେ ଖ୍ରୀଷ୍ଟ ୱାତି ଆଗ୍ଡ଼ି ଉଣ୍ଡ୍ରେ ଆଇ ବାବବାଦି ୱାନାନ୍। ଆୟା ବାବବାଦି ନାଣ୍ଡୋ ପେରିକାନ୍ ଆନାନ୍, ଇକା ଡ଼ିସ୍ସି ଯିଶାଇୟ ବାବବାଦି ରାସ୍ତାର୍ ଜେ ଖ୍ରଷ୍ଟ ଉଣ୍ଡ୍ରେ ଡିଣ୍ଡା ରିପା ବାଣାନ୍ ଜନମ୍ ଆନାନ୍ ମାରି ମିକା ବାବବାଦି ୱେର୍ତାନ୍ ଜେ ଖ୍ରଷ୍ଟ ବେତ୍ଲିହିମ୍ଦୁ ଜନମ୍ ଆନାନ୍।
ଯିଶାଇୟ ବାବବାଦି ୱେର୍ତାନ୍ ଜେ ଖ୍ରୀଷ୍ଟ ଗାଲିଲି ଗଡ଼୍ଦୁ ମାନ୍ଜିନାନ୍। ଏମେକାର୍ ନାଣ୍ଡୋ ଦୁକାମ୍ଦାନ୍ ମାନାର୍ ଖ୍ରୀଷ୍ଟ ୱାରିଙ୍ଗ୍ ଶାନ୍ତି ସିନାନ୍। ୱାଣ୍ତ୍ରୁ ତହାତିମାନି ଲୋକାଙ୍ଗ୍ବା ଢିସ୍ପିସ୍ନାନ୍। ଖ୍ରୀଷ୍ଟ ବେମାର୍ ଲୋକାଙ୍ଗ୍ ମାରି ଏମେକାର୍ ୱେନ୍ଣ୍ଡ୍ରେଙ୍ଗ୍ ଆଟ୍ଏଜି ମାନ୍ଜିନାର୍, ସୁଡ଼୍ଦେଙ୍ଗ୍ ଆଟ୍ଏର୍, ୱାର୍ଗିଦେଙ୍ଗ୍ ଆଟ୍ଏର୍ ମାରି ବୁଲାଦେଙ୍ଗ୍ ଆଟ୍ଇ ୱାରିଙ୍ଗ୍ବା ନେଗେଣ୍ଡ୍ କିନାନ୍।
ଯିଶାଇୟ ବାବବାଦି ଇକାବା ୱେହ୍ତାନ୍ ଜେ ଲୋକୁ ଖ୍ରୀଷ୍ଟଦିଙ୍ଗ୍ କାରାଇ ଇନାର୍ ମାରି ଆଇ ବାବବାଦି ୱେର୍ତାର୍ ଜେ ଖ୍ରୀଷ୍ଟଦି ଅରେନ୍ ବନ୍ଦୁ ୱାନି ବିରୁଦ୍ଦୁ ନିଙ୍ଗ୍ନାନ୍। ଯିଖରିୟ ବାବବାଦି ୱେର୍ତାନ୍ ଜେ ୱାରି ଇୟା ବନ୍ଦୁ ଇକା କିନିୱାନ୍ଦିଙ୍ଗ୍ ଆଇ ଲୋକାବାଣାନ୍ ୱେଣ୍ଡିତି ତିରିସ୍ଟା ଅଦ୍ଲି ଅନାନ୍। ଇକା ଢିସ୍ସି, ଏସୋ ବାବବାଦି ୱେର୍ତାର୍ ଜେ ଲୋକୁ ଖ୍ରଷ୍ଟଦିଙ୍ଗ୍ ଢେଇନାର୍, ମାରି ୱାନି ସକାୱାନ୍ଦିଙ୍ଗ୍ ସିଟି ବା ପକ୍ନାର୍।
ବାବବାଦି ଇକାବା ୱେର୍ତାମାର୍ହାର୍ ଗାନି ଖ୍ରୀଷ୍ଟ ଏଣ୍ଡେସ୍ ସାନାନ୍। ଯିଶାଇୟ ବାବବାଣିଙ୍ଗ୍ ୱେହ୍ତାନ୍ ଗାନି ଲୋକୁ ଖ୍ରୀଷ୍ଟ ମୁସ୍କୁ ପୁସ୍ନାର୍, ୱାନିଙ୍ଗ୍ ୱେକ୍ରିସ୍ନାର୍, ମାରି ୱାନିଙ୍ଗ୍ ଢେଇନାର୍। ୱାରୁ ୱାନିଙ୍ଗ୍ କିକାଙ୍ଗ୍ କାଲ୍କାଙ୍ଗ୍ କୁଟି ଡ଼େଇନାର୍ ମାରି ୱାଣ୍ତ୍ରୁ ନାଣ୍ଡୋ କାଷ୍ଟାମ୍ ଦୁକାମ୍ଦାନ୍ ସାନାନ୍, ଏସେଙ୍ଗ୍ଗି ୱାଣ୍ତ୍ରୁ ଇନିକାବା ଭୁଲ୍ କିଏଣ୍ଡାମାର୍ହାନ୍।
ବାବବାଦି ଇକାବା ୱେର୍ତାନ୍ ଜେ ଖ୍ରୀଷ୍ଟ ପାପାମ୍ କିଏନ୍। ୱାଣ୍ତ୍ରୁ ପବିତ୍ର ଆନାନ୍। ମାରି ୱାଣ୍ତ୍ରୁ ଇୟାୱାନ୍ଦିଙ୍ଗ୍ ସାନାନ୍ ମାତର୍ ମାପ୍ରୁ ଆଇ ଲୋକା ପାପାମ୍ୱାନ୍ଦିଙ୍ଗ୍ ୱାନିଙ୍ଗ୍ ଡଣ୍ଡ୍ କିନାନ୍। ୱାନି ସାନି ବାଣାନ୍ ଲୋକୁ ମାପ୍ରୁଦିୱାଲେ ଶାନ୍ତିଦାନ୍ ମାନ୍ଜିନାର୍। ଇୟାୱାନ୍ଦିଙ୍ଗ୍, ମାପ୍ରୁଦି ମାନ୍ସୁ କିଜିନାନ୍ ଜେ ଖ୍ରୀଷ୍ଟ ସାପିନ୍।
ବାବବାଦି ଇକାବା ୱେର୍ତାନ୍ ଜେ ମାପ୍ରୁ ଖ୍ରୀଷ୍ଟଦିଙ୍ଗ୍ ସାତିମାହି ବାଣାନ୍ ଜିଉ କିନାନ୍। ଇକା ତର୍ପ୍ନାନ୍ ଜେ, ଇକା ୱିଜୁ ପୁନି ପାର୍ମାଣାମ୍ଦି ତହ୍ନିକା ମାପ୍ରୁଦି ଉପାୟ୍ ମାର୍ହାତ୍। ଏମେଦାଣାନ୍ ୱାଣ୍ତ୍ରୁ ଆୟା ଲୋକାଙ୍ଗ୍ ରକିୟା କିଦେଙ୍ଗ୍ ଆଟ୍ନାନ୍ ଏମେକାର୍ ୱାନି ବିରୁଦ୍ଦୁ ପାପାମ୍ କିତାମାନାର୍।
ମାପ୍ରୁ ବାବବାଦିରିଙ୍ଗ୍ ଖ୍ରୀଷ୍ଟଦି ନାଣ୍ଡୋ ବିଷୟ ତର୍ପ୍ତାନ୍, ମାତର୍ ଖ୍ରୀଷ୍ଟ ଆୟା ବାବବାଦି ଲୋକା ବାଣାନ୍ ୱାରୁ ଜିଜିମାନି ୱେଡ଼ାଦୁ ରେଏଣ୍ତା ମାର୍ହାର୍। ଇୟା ବାବବାଣି ସିତିମାହି ୪୦୦ ଦାନ୍ ନାଣ୍ଡୋ ପାଟେଙ୍ଗ୍ ୱେନ୍କା ସମାନ୍ ୱେଡ଼ାଦୁ ମାପ୍ରୁ ଖ୍ରୀଷ୍ଟଦିଙ୍ଗ୍ ଦୁନିଆଦୁ ପୋକ୍ନାନ୍।
ଆଦି ପୁସ୍ତକ ୩:୧୫;୧୨:୧-୩; ଦ୍ୱିତିୟ ବିବରଣ ୧୮:୧୫; ୨ଶାମୁଏଲ ୭; ଯିରିମିୟ ୩୧; ଯିଶାଇୟ ୫୯:୧୬; ଦାନିୟେଲ ୭; ମଲାକି ୪:୫; ଯିଶାଇୟ ୭:୧୪; ମିକା ୫:୨; ଯିଶାଇୟ ୯:୧-୭;୩୫:୩-୫;୬୧;୫୩ ଗିତସଂହିତା ୨୨:୧୮; ୩୫:୧୯; ୬୯:୪; ୪୧:୯; ଯିଖରିୟ ୧୧:୧୨-୧୩; ଯିଶାଇୟ ୫୦:୬; ଗିତସଂହିତା ୧୬:୧୦-୧୧ ଦି ଉଣ୍ଡ୍ରେ ବାଇବଲଦି କାହାନି
Free to use, adapt, and share under an open license (CC BY-SA 4.0).