22. ୨୨. ଡୁବନ୍ ସିନି ଯୋହନ୍
ପୁର୍ବାମ୍ଦୁ, ମାପ୍ରୁ ନିଜେଦି ବାବବାଦିରିୱାଲେ ୱାର୍ଗିତାନ୍ ୱାରୁ ୱାନି ଲୋକାୱାଲେ ୱାର୍ଗିଦେଙ୍ଗ୍ ଆଟ୍ନାର୍। ମାରି ୱେଡ଼ାଦାନ୍ ୪୦୦ ପାଟେଙ୍ଗ୍ ୱିଜ୍ନିସାନ୍ଦି ୱାଣ୍ତ୍ରୁ ୱାରିଙ୍ଗ୍ ୱାର୍ଗିଏତାନ୍। ଏମେବାନୁ ମାପ୍ରୁ ଲୋକାୱାଲେ ୱାର୍ଗିଏତାନ୍। ଦାନିୱେନ୍କା ମାପ୍ରୁ ଉଣ୍ଡ୍ରେ ଦୂତ୍ଦିଙ୍ଗ୍ ଉଣ୍ଡ୍ରେ ଯାଜକ ଡାଗ୍ରୁ ପକ୍ତାନ୍ ଏୟେଦରୁଗି ଯିଖରିୟ। ଯିଖରିୟ ମାରି ୱାନି ଆଡ୍ସି ଏଲିସାବେଥ ମାପ୍ରୁଦିଙ୍ଗ୍ ନେଗେଣ୍ଡ୍ ମାନାଜିମାର୍ହାର୍। ୱାରୁ ନାଣ୍ଡୋ ଡକ୍ରା ଆତାମାର୍ହାର୍ ମାରି ୱାଦୁ ଇନିକାବା କଢୋ କକ୍ରାର୍ ଜନମ୍ କିଏଣ୍ତା ମାର୍ହାତ୍।
ଆୟା ସାର୍ଗିଦୂତ୍ ଯିଖରିୟଦିଙ୍ଗ୍ ୱେର୍ତାନ୍,“ନି ଆଡ଼୍ସି ଅରେନ୍ କଢୋ ଜନମ୍ କିନାତ୍। ମିରୁ ୱାନି ଦରୁ ଯୋହନ ଇଡ୍ଦୁ। ମାପ୍ରୁ ୱାନିଙ୍ଗ୍ ପବିତ୍ର ଆତ୍ମାଦାନ୍ ପୁରା କିନାନ୍, ମାରି ଯୋହନ ଲୋକାଙ୍ଗ୍ ଖ୍ରୀଷ୍ଟଦିଙ୍ଗ୍ ନିଜେଦି କିନିୱାନ୍ଦିଙ୍ଗ୍ ତିଆର୍ କିନାନ୍। ” ଯିଖରିୟ ୱେର୍ତାନ୍,“ନାନୁ ମାରି ନା ଆଡ୍ସି କଢୋ ଜନମ୍ କିନିୱାନ୍ଦିଙ୍ଗ୍ ମାପୁ ନାଣ୍ଡୋ ଡକ୍ରା! ନାନୁ ଏଣ୍ଡେସ୍ ନେସ୍ନା ଜେ ନିନୁ ନାଙ୍ଗିଁ ନିକାମେ ୱେର୍ସିନି?”
ଆୟା ସାର୍ଗିଦୂତ୍ ୱେର୍ତାନ୍, “ନି ଡାଗ୍ରୁ ଇୟା ନେଗି କାବୁର୍ ଇୟାୱାନ୍ଦିଙ୍ଗ୍ ମାପ୍ରୁବାଣାନ୍ ପକ୍ତାମାନାନ୍। ମାତର୍ ନିନୁ ନାଙ୍ଗିଁ ବିସ୍ବାସ୍ କିଏତି, ଇୟାୱାନ୍ଦିଙ୍ଗ୍ କଢୋ ଜନମ୍ଆନି ସାନ୍ଦି ନିନୁ ୱାର୍ଗିଦେଙ୍ଗ୍ ଆଟ୍ଇ।” ଗାଜିବିଜି ଆକା, ଯିଖରିୟ ୱାର୍ଗିଦେଙ୍ଗ୍ ଆଟ୍ଏତାନ୍। ମାରି ଆୟା ସାର୍ଗିଦୁତ୍ ଯିଖରିୟଦି ଡାଗ୍ରୁହାନ ସର୍ହାନ୍। ଇୟା ୱେନ୍କା, ଯିଖରିୟ ଇଣ୍ଡ୍ର ଢେସି ୱାତାନ୍ ମାରି ୱାନି ଆଡ଼୍ସି ପଟାଦୁ ଆତାତ୍।
ଏସ୍ତିୱାଲେ ଏଲିସାବେତ୍ ଆରୁ ଲେସ୍କୁ ପଟାଦୁ ମାହାତ୍, ମାରି ଆୟା ସାର୍ଗିଦୁତ୍ ଏଲିସାବେତ୍ଦି ନିଜେ ଲୋକା ଡାଗ୍ରୁ ତରାତାନ୍, ଏୟେ ଦରୁଗି ମରିୟମ ମାର୍ହାତ୍। ମରିୟମ ଡିଣ୍ଡା ଆଡ଼୍ସି ମାହାତ୍ ମାରି ୱାଦୁ ପେଡ଼ିଆନି ୱାନ୍ଦିଙ୍ଗ୍ ଯୋଶେଫ ଦରୁତି ଅରେନ୍ ମେମାର୍ୱାଲେ ମାଙ୍ଗ୍ନି କିତାମାର୍ହାର୍, ସାର୍ଗିଦୂତ୍ ୱେର୍ତାନ୍, “ନିନୁ ପଟାଦୁ ଆନି ମାରି ଉଣ୍ଡ୍ରେ କଢୋ ଜନମ୍ କିନି। ନିନୁ ୱାନି ଦରୁ ଜିଶୁ ଇଡ୍ନି। ୱାଣ୍ତ୍ରୁ ୱିଜେରି ବାଣାନ୍ ଶାକ୍ତିସାଲି ମାପ୍ରୁଦି କଢୋ ଆନାନ୍ ମାରି ୱିଜୁ ଦିନାମ୍ ୱାନ୍ଦିଙ୍ଗ୍ ଶାସନ୍ କିନାନ୍।
ମରିୟମ୍ ୱେର୍ତାତ୍, “ଇକା ଏଣ୍ଡେସ୍ ଆନାତ୍, ମାତର୍ ନାନୁ ଡିଣ୍ଡା ରିପା?” ଦାନିଙ୍ଗ୍ ସାର୍ଗିଦୂତ୍ ବୁ଼ଝାକିତାନ୍, ମାରି ପବିତ୍ର ଆତ୍ମା ନି ମୁସ୍କୁ ୱାନାତ୍ ମାରି ମାପ୍ରୁଦି ଶକ୍ତି ନି ମୁସ୍କୁ ୱାନାତ୍। ଇୟାୱାନ୍ଦିଙ୍ଗ୍ ଆୟା କଡ଼ୋ ପବିତ୍ର ଆନାନ୍, ମାରି ୱାଣ୍ତ୍ରୁ ମାପ୍ରୁଦି ମାରିନ୍ ଆନାନ୍” ଏମେକା ଆୟା ସାର୍ଗିଦୂତ୍ ୱେହ୍ତାନ୍ ଦାନି ମୁସ୍କୁ ବିସ୍ବାସ୍ କିତାତ୍।
ଇକା ଆନି ଦାପ୍ରେ, ମରିୟମ୍ ସନ୍ସି ଏଲିସାବେତ୍ଦିଙ୍ଗ୍ କୁଡ଼ିତାତ୍। ଏସ୍ତିୱାଲେ ମରିୟମ୍ ଏଲିସାବେତ୍ଦିଙ୍ଗ୍ ମାଡ଼ିସ୍ତାତ୍, ଏଲିସାବେତ୍ରି କଢୋ ଗାର୍ବାମ୍ଦୁ ଡାଟ୍ତାନ୍। ମାପ୍ରୁ ୱାନ୍କା ୱାନ୍ଦିଙ୍ଗ୍ ଏମେ ପାଣି କିତାମାହାନ୍ ଆୟା ବିଷୟ୍ଦୁ ଆୟା ଆଇମେକ୍ ଅର୍ସେ ସାର୍ଦା ଆତେ। ଏଲିସାବେତ୍ ୱାଲେ ମୁଣ୍ଡ୍ରି ଲେସ୍କୁ ମନ୍ଜିନି ୱେନ୍କା ମରିୟମ୍ ଇଣ୍ଡ୍ର ଢେସି ସର୍ହାତ୍।
ଇୟା ୱେନ୍କା, ଏଲିସାବେତ୍ ନିଜେଦି କଡୋ ଜନମ୍ କିତାତ୍। ଯିଖରିୟ ମାରି ଏଲିଶାବେତ୍ ଆୟା କଡୋ ଦୋରୁ ଯୋହନ ସିତାର, ଏମେୱାଜା ସାର୍ଗି ଦୂତ୍ ୱେହ୍ତା ମାର୍ହାନ୍ ଦାନିୱେନ୍କା ମାପ୍ରୁ ଯିଖରିୟଦିଙ୍ଗ୍ ୱାର୍ଗିନି ୱାନ୍ଦିଙ୍ଗ୍ ଶାକ୍ତି ସିତାନ୍। ଯିଖରିୟ ୱେହ୍ତାନ୍ ମାପ୍ରୁଦି ପ୍ରଶଂସା ଆପିତ୍ ମାତର୍ ୱାଣ୍ତ୍ରୁ ନିଜେଦି ଲୋକାଙ୍ଗ୍ ସାହାଯ୍ୟ କିନି ୱାନ୍ଦିଙ୍ଗ୍ ଅଡ଼୍ବିତାମାନାନ୍। ଏ ନା ମାରିନ୍ ନିନୁ ୱିଜୁବାଣାନ୍ ଶାକ୍ତିଦି ମାପ୍ରୁଦି ବବିସ୍ତ୍ ମାଟା ୱେହ୍ନି ଲୋକୁ ଆନାନ୍। ନିନୁ ଲୋକାଙ୍ଗ୍ ୱେହ୍ନି ଜେ ୱାରୁ ଏମେୱାଜା ନିଜେଦି ପାପାମ୍ ୱାନ୍ଦିଙ୍ଗ୍ କ୍ଷିମା ପାଏଆଦେଙ୍ଗ୍ ଆଟ୍ନାର୍।
ଲୂକ ୧ଦି ଉଣ୍ତ୍ରେ ବାଇବଲ ଦି କାତାନି
Free to use, adapt, and share under an open license (CC BY-SA 4.0).