23. ୨୩. ଯିଶୁଦି ଜନମ୍
ଆୟା ସାର୍ଗିଦୂତ୍ ୱେର୍ହ୍ତାନ୍ ଏ ଯଶେଫ୍ ମରିୟମଦିଙ୍ଗ୍ ନିଜେ ଆଡ୍ସିୱାଜା ଅନିୱାନ୍ଦିଙ୍ଗ୍ ତିଏଲାମା। ଦାନି ପଟାଲୋଇ ଏମେ କଢୋ ମାନାନ୍ ଆକା ପବିତ୍ର ଆତ୍ମା ବାଣାନ୍ ଆତା ମାନାନ୍। ଆଦି ଉଣ୍ଡ୍ରେ କଢୋ ଜନମ୍କିନାତ୍ ୱାନି ଦରୁ ଯିଶୁ ସିଦୁ ( ଆୟା ଅର୍ଥ,’ ଯିହୋବା ମାପ୍ରୁ ରକ୍ଷାକିନିକାନ୍’), ମାତର୍ ୱାଣ୍ଡ୍ରୁ ଲୋକାଙ୍ଗ୍ ୱାରି ପାପାମ୍ଦାନ୍ ଉଦାର୍ କିନାନ୍।”
ମରିୟମ୍ ଅରେନ୍ ଦର୍ମୁ ଲୋକୁୱାଲେ ଦାନିଙ୍ଗ୍ ମାଙ୍ଗ୍ନି ଆତାମାର୍ହାର୍ ଏୟେର ଦରୁଗି ଯସେଫ ମାର୍ହାତ୍। ଏସ୍ତିୱାଲେ ଯସେଫ ଇକା ୱେର୍ହାନ୍ ଗାନି ମରିୟମ୍ ପଟାଦୁ ମାନାତ୍, ୱାଣ୍ଡ୍ରୁ ନେସ୍ତାମାର୍ହାନ୍ ଗାନି ଆକା ୱାନି କଢୋ ଆଏନ୍। ମାରି ଆକାନ୍ ମରିୟମ୍ଦିଙ୍ଗ୍ ସେମାର୍ କିନିୱାନ୍ଦିଙ୍ଗ୍ ମାନ୍ସୁ କିଏତାନ୍, ଇୟାୱାନ୍ଦିଙ୍ଗ୍ ୱାଣ୍ଡ୍ରୁ ଦାନିମୁସ୍କୁ ଦୟାକିଜି ମାରି ଆଲେଜି ଦାନିଙ୍ଗ୍ ଢିସ୍ନିୱାନ୍ଦିଙ୍ଗ୍ ଅଡ୍ବିତାନ୍। ମାରି ଇକା କିତିୱେନ୍କା ଉଣ୍ଡ୍ରେ ସାର୍ଗିଦୂତ୍ ୱାନି ଲବେରୁ ୱାଜି ୱାନିଙ୍ଗ୍ ୱେରହ୍ତାନ୍।
ମାରି ଯଶେଫ୍ ମରିୟମ୍ଦିଙ୍ଗ୍ ପେଡି ଆତାନ୍ ମାରି ନିଜେ ଆଡ୍ସିୱାଜା ଇଣ୍ଡ୍ରୋ ତାତାନ୍, ମାରି ଆକାନ୍ କଢୋ ଜନମ୍ କିଇ ନାସେଣାନ୍ ମରିୟମ୍ ୱାଲେ ଗୁର୍ଏତାନ୍।
ଏସ୍ତିୱାଲେ ମରିୟମ୍ ଜନମ୍ ସିନି ୱେଡା ଡାଗ୍ରୁ ୱାତାମାହାତ୍, ଆକାତ୍ ମାରି ଯଶେଫ୍ ବେଥ୍ଲିହିମ୍ ସନିନୁଣ୍ଡିଙ୍ଗ୍ ଉଣ୍ଡ୍ରେ ନିହି ସାରିଦୁ ବୁଲାତାର୍। ୱାରିଙ୍ଗ୍ ଆବେ ସନ୍ଣ୍ଡ୍ରେଙ୍ଗ୍ ମାହାତ୍ ମାତର୍ ରୋମିୟ ସର୍କାର୍ ଇସ୍ରାଏଲ୍ଦୁ ମାନ୍ଜିମାହି ୱିଜୁ ଲୋକାରିଙ୍ଗ୍ ଗଣେକିଦେଙ୍ଗ୍ ଇଛାକିଜି ମାହାର୍। ୱାରୁ ଇଛା କିଜିମାହାର୍ ଗାନି ୱିଜୁଲୋକୁ ଆବେନୁ ସଣ୍ଡ୍ରୁ ଏମେବାନୁ ୱାରି ପୁର୍ବାମ୍ତି ଲୋକୁ ମାନ୍ଜି ମାର୍ହାର୍। ରାଜା ଦାଉଦ୍ଦି ଜନମ୍ ବେଥ୍ଲିହିମ୍ଦୁ ଆତାମାର୍ହାନ, ମାରି ଦାଉଦ୍ ରାଜା ମରିୟମ୍ତି ମାରି ଯସେଫଦି ଇୟା ରିଏରି ପୁର୍ବାମ୍ତି ଲୋକୁ ମାର୍ହାନ୍।
ମରିୟମ୍ ମାରି ଯଶେଫ୍ ବେଥ୍ଲିହିମ୍ଦୁ ସହାର୍, ମାତର୍ ଆବେ ୱାରିଙ୍ଗ୍ ମାନ୍ଜିନି ନୁଣ୍ଡିଙ୍ଗ୍ କଡି ସାଡାଦାନ୍ ଡ଼ିସ୍ସି ମାରି ଆଇ ବାଡି ସିଲେଣ୍ଡା ମାର୍ହାତ୍। ଆକା ଆୟା ବାଡି ଏମେନୁ ମରିୟମ୍ ନିଜେଦି କଢୋ ଜନମ୍ କିତାତ୍। ଆକାତ୍ ୱାନିଙ୍ଗ୍ କୋଡିଟଙ୍ଗାଁଦୁ ତେର୍ପ୍ତାତ୍ ମାତର୍ ଆବେ ୱାନିନୁଣ୍ଡିଙ୍ଗ୍ ଏମେ ପାର୍ନିକା ସିଲେଣ୍ଡା ମାର୍ହାତ୍। ଆକାର୍ ୱାନି ଦରୁ ଯିଶୁ ଇଟ୍ତାର୍।
ଆୟାନାଡା, ଆୟାଡାଗ୍ରୁ ପାଡିଆଦୁ ଏସୋ ଗାଉଡୁଏର୍ ନିଜେ ମେଣ୍ଢେଙ୍ଗ୍ ଗୋରିଏଙ୍ଗ୍ଁ କାପ୍କିଜି ମାର୍ହାର୍। ଗାଦେମ୍, ଉଣ୍ଡ୍ରେ ଜାଇତି ସାର୍ଗିଦୂତ୍ ୱାରିଡାଗ୍ରୁ ତୋରାତାନ୍, ମାରି ଆକାର୍ ତିଏଲାତାର୍। ଆୟା ସାର୍ଗିଦୂତ୍ ୱେହ୍ତାନ୍, “ ତିଏଲାମାଟ୍, ମାତର୍ ନା ଡାଗ୍ରୁ ମିୱାନ୍ଦିଙ୍ଗ୍ ନେଗି କାବୁର୍ ମାନା। ବେଥ୍ଲିହିମ୍ଦୁ ଖ୍ରୀଷ୍ଟପ୍ରବୁ ଜନମ୍ ଆତାମାହାନ୍!”
ସନ୍ସି ଆୟା କଡୋଦିଙ୍ଗ୍ ରେବାଦୁ, ମାରି ମିରୁ ୱାନିଙ୍ଗ୍ ୱାତି ଗୁଡିଆକିତି ମାହିକା ମାରି ଟଙ୍ଗାଁଦୁ ଗୁର୍ତି ମାନିକା ସୁଡ୍ନିଦେର୍। “ଗାଦେମ୍, ବାଦଡ୍ଦୁ ସାର୍ଗିଦୂତ୍ଙ୍ଗୁଁ ବର୍ତି ଆତେ। ୱାରୁ ମାପ୍ରୁଦି ସ୍ତୁତି କିଜିମାହାର୍। ୱାରୁ ୱେହ୍ତାର୍, “ୱିଜୁ ମହିମା ସାର୍ଗିଦୁ ମାନି ମାପ୍ରୁଦିଙ୍ଗ୍ ପୁଟିତ୍। ପୁର୍ତିବିଦୁ ଆୟା ଲୋକାଡାଗ୍ରୁ ଶାନ୍ତି ଆପିତ୍ ଏହେନ୍ଗି ଆକାନ୍ ଚିନ୍ତାକିଜିନାନ୍।
ଦାନିୱେନ୍କା ସାର୍ଗିଦୂତଙ୍ଗୁଁ ସହେ। ଆୟ ଗାଉଢୁଏର୍ବା ନିଜେ ମେଣ୍ଢେଙ୍ଗ୍ ଢିସ୍ସି କଢୋଦିଙ୍ଗ୍ ସୁଡ୍ଦେଙ୍ଗ୍ ସହାର୍। ଦାପ୍ରେ ଆକାର୍ ଆୟା ବାଡିଦୁ ସହାର୍ ଏମେବାନୁ ଯିଶୁ ମାହାନ୍ ମାରି ଆକାର୍ ୱାନିଙ୍ଗ୍ ଟଙ୍ଗାଦୁ ଗୁର୍ତିମାହିକା ସୁଡ୍ତାର୍, ଏଣ୍ଡେସ୍ଗି ଆୟା ସାର୍ଗିଦୂତ୍ ୱେର୍ହ୍ତା ମାହାନ୍। ଆକାର୍ ନାଣ୍ଡୋ ସାର୍ଦା ମାର୍ହାର୍। ଦାନିୱେନ୍କା ଆୟା ଗାଉଡୁଏର୍ ଢେସି ସହାର୍ ଏମ୍ବାନୁଗି ୱାରି ମେଣ୍ଢେଙ୍ଗ୍ ମାହେ। ଆକାର୍ ଇନିକା ୱିଜୁ ୱେହାର୍ ମାରି ସୁଡ୍ତାର୍ ଆୟା ୱିଜେରି ୱାନ୍ଦିଙ୍ଗ୍ ମାପ୍ରୁଦି ସ୍ତୁତି କିଜିମାର୍ହାର୍।
ପୂର୍ବତି ଉଣ୍ଡ୍ରେ ଆକ ଦେଶେମ୍ତି ଏସୋ ଲୋକୁ ମାର୍ହାର୍। ୱାରୁ ସୁକେଙ୍ଗାଁ ସିକ୍ୟା କିଜିମାର୍ହାର୍ ମାରି ୱାରୁ ବୁଦିମାନ୍ ମାର୍ହାର୍। ୱାରୁ ଉଣ୍ଡ୍ରେ ଆଇୱାଜା ସୁକାଦିଙ୍ଗ୍ ବାଦଡ୍ଦୁ ସୁଡ୍ତାର୍। ୱାରୁ ୱେର୍ହ୍ତାର୍ ଗାନି ଦିନି ଅର୍ଥ ଯିହୁଦିରି ଉଣ୍ଡ୍ରେ ପୁନି ରାଜା ଜନମ୍ ଆତାମାନାନ୍। ଆୟାୱାନ୍ଦିଙ୍ଗ୍ ୱାରୁ ଆୟା କଢୋଦିଙ୍ଗ୍ ସୁଡ୍ନିୱାନ୍ଦିଙ୍ଗ୍ ନିଜେ ଦେଶେମ୍ଦାନ୍ ବୁଲାନିୱାନ୍ଦିଙ୍ଗ୍ ମାନ୍ସୁ କିତାର୍। ଉଣ୍ଡ୍ରେ ନିହି ସାରି ବୁଲାତି ୱେନ୍କା, ୱାରୁ ବେଥ୍ଲିହିମ୍ଦୁ ୱାତାର୍ ମାରି ଆୟା ଇଲୁଦିଙ୍ଗ୍ ପାଏଆତାର୍ ଏମେବାନୁ ଯିଶୁ ମାରି ୱାରି ୟାୟା ବୁବା ମାନ୍ଜି ମାର୍ହାର୍।
ଏସ୍ତିୱାଲେ ଆୟା ଲୋକୁ ଯିଶୁଦିଙ୍ଗ୍ ନିଜେ ୟାୟାୱାଲେ ମାହିକା ସୁଡ୍ତାର୍ ମାରି ୱାରୁ ମେଣ୍ଡେଙ୍ଗ୍ ଉର୍ଜି ଯିଶୁଦି ଆରାଧନା କିତାର୍। ଆକାର୍ ଯିଶୁଦିଙ୍ଗ୍ ଦାରାତି ଦାନ୍ ସିତାର୍। ମାରି ୱାରୁ ମାରିଢେସି ଇଣ୍ଡ୍ରୋ ସର୍ହାର୍।
ମାଥିଉ ୧; ଲୁକ ୨ ଦି ଉଣ୍ଡ୍ରେ ବାଇବଲ୍ ଦି କାତାନି
Free to use, adapt, and share under an open license (CC BY-SA 4.0).