24. ୨୪. ଯୋହନ ଯିଶୁଦିଙ୍ଗ୍ ଡୁବନ୍ ସିତାନ୍‌

ଏଲିସାବେଥ୍ ମାରି ଜିଖରିୟରି କଢୋ ଯୋହନ୍, ପେରିକାନ୍ ଆଜି ଉଣ୍ଡ୍ରେ ବାବବାଦି ଆତାନ୍। ଆକାନ୍ ଗୋରତୁ ମାନ୍‌ଜି ମାର୍‌ହାନ୍, ମାରି ବନୁ ପୁକି ମାରି ମେପିଙ୍ଗ୍ ତିନ୍‌ଜି ମାର୍‌ହାନ୍, ମାରି ଉଟୁଦି କୁକୁଟି ତୋଲୁଦାନ୍ ତିଆର୍ ଆତି ସୋକା ଇଟ୍‌କାଜି ମାହାନ୍।

ନାଣ୍ଡୋ ଲୋକୁ ଯୋହନ୍‌ଦି ମାଟା ୱେନିୱାନ୍ଦିଙ୍ଗ୍ ଗୋରତୁ ୱାତାର୍। ୱାଣ୍ଡ୍ରୁ ଇକା ୱେହ୍‌ସି ୱାରିଙ୍ଗ୍ ପ୍ରଚାର୍ କିତାନ୍, “ମନ୍‌ଦିଙ୍ଗ୍‌ ବଦ୍‌ଲେକିଦୁ, ମାତର୍ ମାପ୍‌ରୁଦି ରାଜି ଡାଗ୍‌ରୁ ମାନାତ୍!”

ଏସ୍ତିୱାଲେ ଲୋକୁ ଯୋହନଦି ବାକ୍ୟ ୱେହାର୍, ମାରି ୱାରିଲୋଇର୍‌ହାନ୍ ଏସୋ ଲୋକୁ ନିଜେ ପାପାମ୍ ମାନାତାର୍, ମାରି ଯୋହନ ୱାରିଙ୍ଗ୍ ଡୁବନ୍ ସିତାନ୍। ଯୋହନଦିଙ୍ଗ୍ ସୁଡ୍‌ଦେଙ୍ଗ୍ଇଜି ନାଣ୍ଡୋ ଦରମ୍ ନେତାର୍ ୱାତାର୍, ମାରି ଆୟାକାର୍ ନିଜେଦି ପାପାମ୍ ମାନ୍‌ଆଏତାର୍।

ଯୋହନ ଦରମ୍ ନେତାରିଙ୍ଗ୍ ୱେରହ୍‌ତାନ୍, “ଏ ୱିସାମ୍‌ମାନି ସାରାସୁ! ମନ୍‌ଦିଙ୍ଗ୍ ବଦ୍‌ଲେକିଦୁ ମାରି ନିଜେ ଚାଲି ଚଲନଦିଙ୍ଗ୍ ବଦ୍‌ଲେକିଦୁ। ମାପ୍‌ରୁ ଆୟା ୱିଜୁ ମାରାକାଙ୍ଗ୍ କଇନାନ୍ ଏମେକା ନେଗି କାଏଙ୍ଗ୍‌ ଆସ୍‌ଉ, ମାରି ୱାଣ୍ଡ୍ରୁ ୱାନ୍‌କାଙ୍ଗ୍‌ ସିସୁଦୁ ପକ୍‌ନାନ୍‌।” ଏମେକା ବାବବାଦି ୱେର୍‌ହ୍‌ତା ମାର୍‌ହାର୍ ଯୋହନ ଆକା ପୁରା କିତାନ୍, ସୁଡ୍‌ଆ, ଦାପ୍‌ରେ ନାନୁ ନି ଆଗ୍‌ଡି ନାଦି ଖାବୁର୍‌ଅନି ଲୋକୁଦିଙ୍ଗ୍ ପକ୍‌ନା ଏୟେନ୍ ନିୱାନ୍ଦିଙ୍ଗ୍ ସାରି ତିଆର୍ କିନାନ୍।”

ଏସୋ ଦାରମ୍‌ ନେତାର୍ ଯୋହନଦିଙ୍ଗ୍ ୱେର୍‌ତାର୍ ଗାନି ଇନିକା ୱାଣ୍ଡ୍ରୁ ଖ୍ରୀଷ୍ଟ ନା। ଯୋହନ ୱେହ୍‌ତାନ୍, “ ନାନୁ ଖ୍ରୀଷ୍ଟ ଆଏ, ମାତର୍ ୱାଣ୍ଡ୍ରୁ ନା ୱେନ୍‌କା ୱାଜିନନ୍। ୱାଣ୍ଡ୍ରୁ ଏସୋ ମହାନ୍ ଗାନି ନାନୁ ୱାନି ଜଡ଼ୁତି ଫିତା କୁତ୍‌ତେଙ୍ଗ୍ ଜଗ୍ ସିଲେ।”

ଆଗ୍‌ଡିହି ଦିନାମ୍, ଯିଶୁ ଡୁବନ୍ ଆତେଙ୍ଗ୍ ଯୋହନଦି ଡାଗ୍‌ରୁ ୱାତାନ୍। ଏସେଙ୍ଗ୍ ଯୋହନ ୱାନିଙ୍ଗ୍ ସୁଡ୍‌ତାନ୍,ମାରି ୱେର୍‌ହ୍‌ତାନ୍, “ସୁଡ୍‌ଦୁ! ମାପ୍‌ରୁଦି ମେଣ୍ଢା ଏହେନ୍ ଦେଶେମ୍‌ଦି ପାପାମ୍‌ଦିଙ୍ଗ୍ ପିଣ୍ଡ୍‌ଜି ଅନାନ୍।”

ଯୋହନ ଯିଶୁଦିଙ୍ଗ୍ ୱେହ୍‌ତାନ୍, ନାନୁ ନିଙ୍ଗିଁ ଡୁବନ୍ ସିଦେଙ୍ଗ୍ ଜଗ୍ ସିଲେ। ଇୟା ବାଦ୍‌ଲୁ ନିନୁ ନାଙ୍ଗିଁ ଡୁବନ୍ ସିଦେଙ୍ଗ୍ ଦର୍‌କାର୍। ମାରି ଯିଶୁ ୱେର୍‌ହ୍‌ତାନ୍, ନିନୁ ନାଙ୍ଗିଁ ଡୁବନ୍ ସିଦେଙ୍ଗ୍ ଦର୍‌କାର୍, ମାତର୍‌ ଇକା କିନିୱାନ୍ଦିଙ୍ଗ୍ ନେଗିପାଣି। ମାରି ଯିଶୁ ପାପାମ୍ କିଏଣ୍ଡା ମାର୍‌ହିଙ୍ଗାଁବା ଯୋହନ ୱାନିଙ୍ଗ୍ ଡୁବନ୍ ସିତାନ।

ଏସ୍ତିୱାଲେ ଯିଶୁ ଡୁବନ୍‌ଅସି ଏରୁଦାନ୍ ସୋସିୱାତାନ୍, ମାପ୍‌ରୁଦି ଆତ୍‌ମା ପାଉରାୱାଜା ତରାଆତାତ ମାରି ସାଲୁ ୱାଜି ୱାନି ମୁସ୍‌କୁ ମାର୍‌ହାତ୍। ଆୟା ୱେଡାଦୁ, ମାପ୍‌ରୁ ସାର୍‌ଗିଦାନ୍ ୱେର୍‌ହ୍‌ତାନ୍, “ ନିନୁ ନା କଢୋ। ନାନୁ ନିଙ୍ଗିଁ ଜିଉ ନଜିନା, ନାନୁ ନିୱାଲେ ସାର୍‌ଦା ମାନାର।”

ମାପ୍‌ରୁ ଯୋହନଦିଙ୍ଗ୍ ୱେର୍‌ହ୍‌ତାମାରହାନ୍, “ପବିତ୍ର ଆତ୍ମା ସାଲୁ ୱାଜି ଏୟେମୁସ୍‌କୁ ମାନ୍‌ଜିନାତ୍ ୱାନିଙ୍ଗ୍ ନିନୁ ଡୁବନ୍ ସିନି, ଆକାନ୍ ମାପ୍‌ରୁଦି କଢୋ।” ମାପ୍‌ରୁ ଅରେନ୍‌ନେ। ମାରି ଏସେଙ୍ଗ୍ ଯୋହନ ଯିଶୁଦିଙ୍ଗ୍ ଡୁବନ୍ ସିତାନ୍, ମାରି ୱାଣ୍ଡ୍ରୁ ମାପ୍‌ରୁବୁବା ୱେର୍‌ହ୍‌ନିକା ୱେର୍‌ହାନ୍, କଢୋ ମାପ୍‌ରୁଦିଙ୍ଗ୍ ସୁଡ୍‌ତାନ୍, ଏୟେନ୍‌ଗି ଯିଶୁ, ମାରି ୱାଣ୍ଡ୍ରୁ ପବିତ୍ର ଆତ୍ମାଦିଙ୍ଗ୍ ସୁଡ୍‌ତାନ୍।