26. ୨୬. ଯିଶୁ ୱାନି ସେବା ଆରାମ୍ କିତାନ୍
ଯିଶୁ ଶୟତାନ୍ଦି ପରିକାଦାନ୍ ଜିଣାତି ୱେନ୍କା, ୱାଣ୍ତ୍ରୁ ଗାଲିଲିଦି ନାହ୍କାଙ୍ଗ୍ ଡ଼େସି ୱାତାନ୍। ଇକା ଆୟା ବାଡି ଏମେବାନୁଗି ୱାଣ୍ତ୍ରୁ ମାନ୍ଜିମାର୍ହାନ୍। ପବିତ୍ର ଆତ୍ମା ୱାନିଙ୍ଗ୍ ନାଣ୍ଡୋ ସକ୍ତି ସିଜିମାହାନ୍ ମାରି ଯିଶୁ ଉଣ୍ଡ୍ରେ ବାଡିଦାନ୍ ଆଇ ବାଡିଦୁ ସନ୍ସି ଲୋକାଙ୍ଗ୍ ଶିକିୟା ସିଜିମାର୍ହାନ୍। ୱିଜେରେ ୱାନି ବିଷୟଦାନ୍ ନେଗିମାଟା ୱେହ୍ସିମାର୍ହାର୍।
ଯିଶୁ ନାଜ୍ରିତ୍ ଗଡ଼୍ଦୁ ସହାନ୍। ଇକା ଆଜିନାତ୍ ଆୟା ନାରୁ ଏମ୍ବାନୁଗି ୱାଣ୍ତ୍ରୁ କଡ଼ୋୱାଲେହାନ୍ ମାନ୍ଜି ମାର୍ହାନ୍। ଆଦିୱାର୍ ନାଣ୍ଡିଙ୍ଗ୍ ୱାଣ୍ତ୍ରୁ ପୁଜା ପାଟ୍ କିନି ବାଡିଦୁ ସର୍ହାନ୍। ନେତାର୍ ଯିଶାୟ ଭବିସତ୍ ମାଟା ୱେହ୍ନି ଲୋକୁଦି ରାସାତିମାନି ଉଣ୍ଡ୍ରେ ବଇ ସିତାର୍। ୱାରୁ ମାନ୍ସୁ କିଜିମାହାର୍ ଜେ ୱାଣ୍ତ୍ରୁ ଆବେଣାନ୍ ପଡ଼ାପିନ୍। ମାରି ଯିଶୁ ବଇଦିଙ୍ଗ୍ କୁତ୍ସି ଲୋକାୱାନ୍ଦିଙ୍ଗ୍ ଖାଣ୍ଡେକ୍ ପଦ୍ ପଡ଼ାତାନ୍।
ଯିଶୁ ପଡ଼ାତାନ୍, “ମାପ୍ରୁ ନାଙ୍ଗିଁ ୱାନି ଆତ୍ମା ସିତାମାନାନ୍ ଏବାଣାନ୍ ନାନୁ ଗରିବ ଲୋକାଙ୍ଗ୍ ନେଗିକାବୁର୍ ପ୍ରଚାର୍ କିଦେଙ୍ଗ୍ ଆଟ୍ନା। ୱାଣ୍ତ୍ରୁ ନାଙ୍ଗିଁ ତହାତିୱାରିଙ୍ଗ୍ ଢିସ୍ପିସ୍ନାନ୍, କାଣାରିଙ୍ଗ୍ ମାରିଢେସ୍ସି ସୁଡ଼୍ନି ୱାନ୍ଦିଙ୍ଗ୍ ମାରି ଆଇ ୱାରିଙ୍ଗ୍ କାଷ୍ଟାମ୍ ସିନି ଲୋକାବାଣାନ୍ ଢିସ୍ପିସ୍ତେଙ୍ଗ୍ ପକ୍ତାମାନାନ୍। ଇକା ଆୟା ୱେଡ଼ା ଆନାତ୍ ଏସେଙ୍ଗ୍ ମାପ୍ରୁ ମା ୱାନ୍ଦିଙ୍ଗ୍ ଦୟା କିନାନ୍ ମାରି ମା ୱାନ୍ଦିଙ୍ଗ୍ ସାହାଜ୍ୟ କିନାନ୍।”
ଦାନିୱେନ୍କା ଯିଶୁ ବାସ୍ତାନ୍। ୱିଜେରେ ନାଣ୍ଡୋ ଗୁର୍ତୁଦାନ୍ ସୁଡ଼୍ଜିମାର୍ହାର୍। ୱାରୁ ନେସ୍ତାର୍ ଜେ ପବିତ୍ର ଶାସ୍ତ୍ରଦିକା ଖଣ୍ଡେକ୍ ଆକା ୱାଣ୍ତ୍ରୁ ଇଏଲ୍ ପଡ଼ାତାମାନାନ୍ ଆକା ଖ୍ରୀଷ୍ଟଦି ବିଷୟ୍ ମାର୍ହାତ୍। ଯିଶୁ ୱେର୍ତାନ୍, “ଏମେ ବିଷୟ ନାନୁ ଇଏଲ୍ ମି ୱାନ୍ଦିଙ୍ଗ୍ ପଡ଼ାତାମାନା, ଆକା ଇଏଲ୍ ଘଟାଜିନାତ୍। “ୱିଜୁ ଲୋକୁ କାବା ଆତାର୍। ୱାରୁ ୱେର୍ତାର୍, ୱାଣ୍ତ୍ରୁ ଇନିକା ଯସେଫ୍ଦି କଢୋ ଆଏନ୍?
ଦାନିୱେନ୍କା ଯିଶୁ ୱେର୍ତାନ୍, ଇକା ସତ୍ଜେ ଲୋକୁ ଆୟା ବାବବାଦିଦିଙ୍ଗ୍ ଏସେଙ୍ଗ୍ବା ମାନାଏର୍ ଏୟେନ୍ଗି ନିଜେଦି ଗଡ଼୍ଦୁ ପିରିନା ମାଞ୍ଜିନାନ୍। ଇଲିଶାୟ ଭବିସତ୍ ମାଟା ୱେହ୍ନି ଲୋକୁଦି ୱେଡ଼ାଦୁ ଇସ୍ରାଏଲ୍ଦୁ ନାଣ୍ଡୋ ରାଣ୍ଡି ଆଡ଼୍ସିକ୍ ମାହେ। ମାରି ଏସ୍ତିୱାଲେ ମୁଣ୍ଡ୍ରି ପାଟେଙ୍ଗ୍ ଆରୁ ଲେସ୍କୁ ସାନ୍ଦି ପିରୁ ଆଏତାତ୍ ମାରି ମାପ୍ରୁ ଇସ୍ରାଏଲ୍ଦି ଆଇ ଏମେ ରାଣ୍ଡିଙ୍ଗାଁ ସାହାଜ୍ୟ କିନିୱାନ୍ଦିଙ୍ଗ୍ ପକ୍ଏତାନ୍। ଇୟା ବାଦ୍ଲୁ, ୱାଣ୍ତ୍ରୁ ଇଲିଶାୟଦିଙ୍ଗ୍ ଆଇ ଦେଶେମ୍ଦି ରାଣ୍ଡିଦି ଡାଗ୍ରୁ ପକ୍ତାନ୍।”
ଯିଶୁ ୱେର୍ସିନେ ମାର୍ହାନ୍, “ମାରି ଇଲିଶାୟ ଭବିସତ୍ ମାଟା ୱେହ୍ନି ଲୋକୁଦି ୱେଡ଼ାଦୁ, ଇସ୍ରାଏଲ୍ଦୁ ନଣ୍ଡୋ ଲୋକାଙ୍ଗ୍ ତୋଲୁ ରୋଗ୍ ଆତାମାର୍ହାତ୍। ମାରି ଇଲିଶାୟ ୱାରିଲୋଇହାନ୍ ଏୟେଙ୍ଗ୍ ନେଗେଣ୍ଡ୍ କିଏତାତ୍। ୱାଣ୍ତ୍ରୁ ମାତର୍ ଇସ୍ରାଏଲ୍ ସତ୍ରୁରି ସେନାପତି ନାମାନଦି ତୋଲୁ ରୋଗ୍ଦିଙ୍ଗ୍ ନେଗେଣ୍ଡ୍ କିତାନ୍।” ମାରି ଏୟେର୍ ଯିଶୁଦି ମାଟା ୱେନ୍ଜିମାର୍ହାର୍ ୱାରୁ ଯିହୁଦି ମାର୍ହାର୍। ମାରି ୱାରୁ ୱାନି ମାଟା ୱେନ୍ଜି, ୱାରୁ ୱାନିମୁସ୍କୁ ରାଗାତାର୍।
ନାଜ୍ରିତ୍ ଲୋକୁ ଯିଶୁଦିଙ୍ଗ୍ ଆସ୍ସି ଉପାସନା ବାଡିଦାନ୍ ରେଲ୍ଜି ଅତାର୍। ୱାନିଙ୍ଗ୍ ପକ୍ସି ଢେଇନିୱାନ୍ଦିଙ୍ଗ୍ ୱାରୁ ଉଣ୍ଡ୍ରେ ପେରି କାଲୁ ମୁସ୍କୁ ଅତାର୍। ମାରି ଯିଶୁ ଗୋଲି ଲୋଇହାନ୍ ସୋସିସର୍ହାନ୍ ମାରି ନାଜରିତ୍ ଗଡ଼୍ ଢିସ୍ସିସର୍ହାନ୍।
ଇୟା ୱେନ୍କା ଯିଶୁ ଗାଲିଲିଦି ୱିଜୁ ବାଡିଦୁ ସହାନ୍, ମାରି ନାଣ୍ଡ ପେରି ମାନ୍ଦାଲୋକୁ ୱାନି ଡାଗ୍ରୁ ୱାତାର୍। ୱାରୁ ବେମାର୍ ଲୋକାଙ୍ଗ୍ ମାରି କାଣା, ଛଟା ଲୋକାଙ୍ଗ୍ ତାତାମାର୍ହାର୍। ୱାରିଲୋଇହାନ୍ ଏସୋଲୋକୁ ସୁଡ଼୍ଦେଙ୍ଗ୍,ଏସୋଲୋକୁ ବୁଲାଦେଙ୍ଗ୍, ଏସୋଲୋକୁ ୱେନ୍ଣ୍ଡ୍ରେଙ୍ଗ୍ ଆଟ୍ଏଜି ମାର୍ହାର୍ ମାରି ଯିଶୁ ୱାରିଙ୍ଗ୍ ନେଗେଣ୍ଡ୍ କିତାନ୍।
ମରିବା, ଏୟେଲୋଇ ଦୁବାମାହାତ୍ ଆୟା ୱିଜେରିଙ୍ଗ୍ ଯିଶୁଦି ଡାଗ୍ରୁ ତାତାର୍। ଯିଶୁ ଦୁବେଙ୍ଗାଁ ୱାରିଲୋଇହାନ୍ ସୋସିୱାଦେଙ୍ଗ୍ ଆଦେଶ୍ ସିତାନ୍, ଦୁବେଙ୍ଗ୍ ଜାରିଦି ଜାରିଙ୍ଗ୍ ଆଉଲି ଆଜିମାହେ “ନିନୁ ମପ୍ରୁଦି ମାରିନ୍!” ମାନ୍ଦାଲୋକୁ କାବା ଆତାର୍ ମାରି ୱାରୁ ମାପ୍ରୁଦି ପ୍ରଶଂସା କିତାର୍।
ଦାନିୱେନ୍କା ଯିଶୁ ୱାନି ସିସୁରିଲୋଇହାନ୍ ବାର ଲୋକାଙ୍ଗ୍ ୱାନିୱାଲେ ମାନ୍ଜିନି ୱାନ୍ଦିଙ୍ଗ୍ ଆସ୍କିତାନ୍। ୱାଣ୍ତ୍ରୁ ୱାରିଙ୍ଗ୍ ପ୍ରେରିତ୍ ଇଜି ୱେର୍ତାନ୍। ଇୟା ପ୍ରେରିତର୍ ଯିଶୁଦି ୱାଲେ ସହାର୍ ମାରି ୱିଜେରେ ୱାନିବାଣାନ୍ ସିକିୟା ପାଏଆତାର୍।
ମାଥିଉ ୪:୧୨-୨୫; ମାର୍କ ୧:୧୪-୧୫, ୩୫-୩୯; ୩:୧୩-୨୧; ଲୁକ ୪:୧୪-୩୦, ୩୮-୪୪; ଦି ଉଣ୍ଡ୍ରେ ବାଇବଲ୍ଦି କାତାନି ୨୭. ନେଗି ଶମିରୋଣ ଗଡ଼୍ତି ଲୋକୁଦି କାତାନି
Free to use, adapt, and share under an open license (CC BY-SA 4.0).